Lehe Mí Nọ Dohia Dọ Mí Yiwanna Jiwheyẹwhe Do — WESẸDOTẸN INTẸNẸT JI TỌN Watchtower Tọn

Lehe Mí Nọ Dohia Dọ Mí Yiwanna Jiwheyẹwhe Do

WANYINA Jiwheyẹwhe bẹ nususu hẹn hugan oyọnẹn tintindo poun. Dile devizọnwatọ Jiwheyẹwhe tọn lẹ lẹdo aihọn pé sọgan yigbe etọn do, owanyi nugbo na Jiwheyẹwhe nọ whẹ́n dile mẹde dovivẹnu nado jẹakọhẹ jẹhẹnu etọn lẹ, podọ e sọ nọ lodo dogọ dile mẹde dindona nuhe e yiwanna lẹ, nuhe e gbẹwanna lẹ, podọ nuhe yin nubiọtomẹsi etọn lẹ.

Homẹ mítọn hùn dọ Jehovah ko do ede hia to Ohó etọn, Biblu, he e na mí mẹ. Mí plọn lehe Jehovah penukundo ninọmẹ voovo lẹ go do to e mẹ. Kẹdẹdile wekanhlanmẹ heyin mimọyi sọn mẹyiwanna de dè nọ hẹn awuvivi susu wá do, mọwẹ Biblu nọ hẹn ayajẹ susu wá na mí dile mí mọnukunnujẹ adà yọyọ jẹhẹnu Jehovah tọn lẹ tọn mẹ do.

Ṣigba, dile mí nọ doayi e go do to lizọnyizọn gbangba tọn mítọn mẹ to whedelẹnu, oyọnẹn tintindo gando Jiwheyẹwhe go ma nọ hẹn mẹde nado yiwanna ẹn to afọdopolọji gba. Jesu dọna Juvi mayọ́n-dagbenọ azán etọn gbè tọn delẹ dọmọ: “Mì Owe-wiwe lẹ dinmọ, na mì lẹndọ yé mẹ mì tindo ogbẹ̀ madopodo te wutu; . . . ṣigba yẹn yọ́n mì dọ, mì ma tindo owanyi Jiwheyẹwhe tọn to mì homẹ gba.” (Johanu 5:39, 42) Mẹdelẹ nọ yí owhe susu do plọnnu gando nuyiwa owanyinọ Jehovah tọn lẹ go ṣogan bo ma nọ yiwanna ẹn sọmọ. Etẹwutu? Na yé ma nọ lẹnayihamẹpọn do nugandomẹgo nuhe plọn yé te lẹ tọn ji wutu. To vogbingbọn mẹ, omẹ ahundoponọ livi susu he mí to Biblu plọn hẹ lẹ nọ doayi e go dọ owanyi yetọn na Jiwheyẹwhe to whinwhẹ́n deji zọnmii. Etẹwutu? Na, dile mílọsu nọ wà do, yé nọ hodo apajlẹ Asafu tọn. To aliho tẹ mẹ?

Lẹnayihamẹpọn po Sọwhiwhe Po

Asafu magbe nado yiwanna Jehovah to ayiha etọn mẹ. E wlan dọmọ: “Yẹn to hodọ hẹ ayiha ṣie titi: . . . yẹn na dọho azọ́n OKLUNỌ tọn: na yẹn na nọ flin azọ́n jiawu etọn hoho tọn lẹ. Yẹn na [lẹnayihamẹpọn do] azọ́n towe lẹpo [ji] ga, bo nasọ nọ lẹn azọ́n towe lẹ pọ́n.” (Psalm 77:6, 11, 12) Owanyi na Jiwheyẹwhe na whẹ́n to ayiha mẹhe nọ lẹnayihamẹpọn do aliho Jehovah tọn lẹ ji tọn mẹ dile psalm-kàntọ lọ nọ wà do.

Humọ, numimọ he mí ko duvivi etọn dile mí to Jehovah sẹ̀n lẹ finflin nọ hẹn haṣinṣan mítọn hẹ ẹ lodo. Apọsteli Paulu dọ dọ mí yin “azọ́nyiwahẹmẹtọ dopọ” hẹ Jiwheyẹwhe, podọ họntọnjiji vonọtaun de wẹ nọ yin awuwlena to azọ́nyiwahẹmẹtọ dopọ lẹ ṣẹnṣẹn. (1 Kọlintinu lẹ 3:9) To whenuena mí dohia dọ mí yiwanna Jehovah, ewọ nọ yọ́n pinpẹn etọn, podọ e nọ hẹn homẹ etọn hùn. (Howhinwhẹn lẹ 27:11) Enẹgodo, eyin mí biọ alọgọ Jehovah tọn bọ e deanana mí nado mọ pọngbọ na nuhahun delẹ, mí nọ yọnẹn dọ ewọ tin hẹ mí, bọ owanyi he mí tindo na ẹn nọ siso dogọ.

Họntọnjiji to omẹ awe ṣẹnṣẹn nọ lodo dile yé to numọtolanmẹ yetọn lẹ dohia ode awetọ. Mọdopolọ, to whenuena mí dọ na Jehovah nuhewutu mí ze míde jo na ẹn, owanyi he mí tindo na ẹn nọ yin hinhẹn lodo. Mí na mọdọ mí to nulẹnpọndo ohó Jesu tọn lẹ ji dọmọ: “Hiẹ dona yiwanna Jehovah Jiwheyẹwhe towe sọn ahun towe lẹpo mẹ podọ sọn alindọn towe lẹpo mẹ podọ sọn ayiha towe lẹpo mẹ podọ po huhlọn towe lẹpo po.” (Malku 12:30, NW) Etẹwẹ mí sọgan wà nado hẹn ẹn diun dọ mí na to wanyina Jehovah zọnmii sọn ahun mítọn lẹpo mẹ, sọn alindọn mítọn lẹpo mẹ, sọn ayiha mítọn lẹpo mẹ, podọ po huhlọn mítọn lẹpo po?

Wanyina Jehovah sọn Ahun Mítọn Lẹpo Mẹ

Owe-wiwe dlẹnalọdo ahun yẹhiadonu tọn, yèdọ nuhe mí yin to homẹ—ojlo mítọn, walọ mítọn podọ numọtolanmẹ mítọn lẹ. Enẹwutu, wanyina Jehovah sọn ahun mítọn lẹpo mẹ zẹẹmẹdo dọ ojlo mítọn tintan wẹ nado hẹn homẹ Jiwheyẹwhe tọn hùn. (Psalm 86:11) Mí nọ dohia dọ mí tindo owanyi mọnkọtọn gbọn hinhẹn gbẹtọ-yinyin mítọn sọgbe hẹ ojlo etọn dali. Mí nọ dovivẹnu nado hodo apajlẹ Jiwheyẹwhe tọn gbọn ‘wangbigbẹna nuhe ylan bo joawuna ehe yin dagbe’ dali.—Lomunu lẹ 12:9.

Owanyi he mí tindo na Jiwheyẹwhe nọ yinuwado numọtolanmẹ mítọn lẹ ji to onú lẹpo mẹ. Di apajlẹ, agbasazọ́n mítọn sọgan nọma bọawu kavi e sọgan nọ yí whenu susu sọn mí si, ṣigba be ehe ji wẹ ahun mítọn tin te ya? Lala. To whenuena e yindọ mí yiwanna Jehovah sọn ahun mítọn lẹpo mẹ, lizọnyizọn mítọn hlan Jiwheyẹwhe wẹ yin azọngban mítọn tintan. Mọdopolọ, dile etlẹ yindọ mí na jlo nado hẹn homẹ mẹjitọ, alọwlemẹ, kavi ogán mítọn tọn hùn, mí dona nọ do owanyi ahun lẹpo tọn mítọn na Jehovah hia gbọn dindin nado hẹn homẹ etọn hùn whẹ́ dali. To popolẹpo mẹ, ewọ wẹ jẹ nado tin to otẹn nukọn tọn mẹ to ahun mítọn mẹ.—Matiu 6:24; 10:37.

Wanyina Jehovah sọn Alindọn Mítọn Lẹpo Mẹ

To Owe-wiwe mẹ hogbe lọ “alindọn” nọ dlẹnalọdo mílọsu gọna ogbẹ̀ he tin to ohò mítọn mẹ. Enẹwutu, wanyina Jehovah sọn alindọn mítọn lẹpo mẹ zẹẹmẹdo dọ mí yí mídelẹ pete zan nado pagigona ẹn podọ nado dohia ẹ dọ mí yiwanna ẹn.

Nugbo wẹ dọ mí sọgan tindo ahunmẹdunamẹnu devo lẹ to gbẹ̀mẹ, taidi azọ́n de pinplọn, ajọ́ de wiwà, kavi pinpọ́n whẹndo de go. Ṣigba to ojlẹ dopolọ mẹ, mí na do owanyi alindọn lẹpo tọn mítọn na Jehovah hia gbọn onú lẹ wiwà sọgbe hẹ aliho etọn dali podọ gbọn onú he pò lẹ hinhẹn do otẹn he yé jẹna mẹ to gbẹzan mítọn mẹ dali. Gbọn mọwiwà dali, mí na to “ahọludu Jiwheyẹwhe tọn, po dodo etọn po [dín] whẹ́.” (Matiu 6:33) Sinsẹ̀n-bibasi alindọn lẹpo tọn sọ zẹẹmẹdo dọ mí dona yin zohunhunnọ ga. Mí nọ dohia Jehovah dọ mí yiwanna ẹn gbọn zohunhun yíyí do lá owẹ̀n Ahọluduta lọ tọn, gblọndo mẹjlọdote tọn lẹ nina to opli lẹ ji, kavi alọgigọna mẹmẹsunnu po mẹmẹyọnnu Klistiani tọn mítọn lẹ po dali. To onú lẹpo mẹ, mí nọ to ‘ojlo Jiwheyẹwhe tọn wà po alindọn lẹpo po.’—Efesunu lẹ 6:6.

Jesu dohia dọ emi yiwanna Jiwheyẹwhe po alindọn lẹpo po gbọn mimọ́n ede dali. E ze ojlo Jiwheyẹwhe tọn do otẹn tintan mẹ bọ nuhudo ewọ lọsu tọn lẹ tin to otẹn awetọ mẹ. Jesu na tuli mí nado hodo apajlẹ etọn. E dọmọ: “Eyin mẹdepope jlo na hodo mi, gbọ e ni mọ́n ede, bosọ ze [yatin, NW] etọn, bo hodo mi.” (Matiu 16:24, 25) Mídelẹ mimọ́n nọ biọ dọ mí ni basi klandowiwe. E zẹẹmẹdo dọ mí yiwanna Jiwheyẹwhe jẹ obá lọ mẹ bọ mí ze mídelẹ jo na ẹn petepete, kẹdẹdile Islaelivi de nọ yiwanna ogán etọn do to hohowhenu sọmọ bọ e nọ biọ to aliho egblemaku tọn mẹ nado yin afanumẹ etọn kakadoi. (Deutelonomi 15:16, 17) Gbẹzan mítọn kinklandowiwe na Jehovah nọ dohia dọ mí yiwanna ẹn nugbo.

Wanyina Jehovah sọn Ayiha Mítọn Lẹpo Mẹ

Wanyina Jehovah sọn ayiha mítọn lẹpo mẹ zẹẹmẹdo dọ mí ni wà nuhe go mí pé lẹpo nado mọnukunnujẹ jẹhẹnu, lẹndai, po nubiọtomẹsi Jehovah tọn lẹ po mẹ. (Johanu 17:3; Owalọ lẹ 17:11) Mí nọ dohia dọ mí yiwanna Jehovah gbọn nugopipe apọ̀nmẹ tọn mítọn lẹpo yiyizan nado gọalọna mẹdevo lẹ nado yiwanna Jehovah dali podọ gbọn azọ́nyinyọnẹn mẹpinplọn tọn mítọn hinhẹn pọnte dali. “Mì blá gbaja otùnu [kavi ayiha] mìtọn tọn gligli,” wẹ ayinamẹ apọsteli Pita tọn. (1 Pita 1:13) Humọ, mí nọ dovivẹnu nado do ojlo hia to mẹdevo lẹ mẹ, titengbe devizọnwatọ Jiwheyẹwhe tọn hatọ mítọn lẹ. Mí yọ́n ninọmẹ yetọn lẹ bosọ dona nọ doayi ojlẹ he mẹ yé tindo nuhudo pipà kavi homẹmiọnnamẹ tọn go.

Mí nọ dohia Jehovah dọ mí yiwanna ẹn sọn ayiha mítọn lẹpo mẹ to whenuena mí ze míde jo na ẹn to apọ̀nmẹ. Mí nọ tẹnpọn nado yọ́n pọndohlan etọn do whẹho lẹ ji, yọ́n ẹn to nudide lẹ bibasi whenu, bo deji dọ aliho etọn wẹ yọ́n hugan. (Howhinwhẹn lẹ 3:5, 6; Isaia 55:9; Filippinu lẹ 2:3-7) Ṣigba dile mí to owanyi dohia Jiwheyẹwhe, nawẹ mí sọgan yí huhlọn mítọn zan gbọn?

Wanyina Jehovah po Huhlọn Mítọn Lẹpo Po

To agun Klistiani tọn mẹ, jọja susu nọ yí huhlọn yetọn zan nado pagigona Jehovah. (Howhinwhẹn lẹ 20:29; Yẹwhehodọtọ 12:1) Aliho dopo he mẹ jọja Klistiani susu nọ dohia dọ yé yiwanna Jehovah po huhlọn yetọn lẹpo po te wẹ nado tindo mahẹ to sinsẹ̀nzọn gbehosọnalitọ tọn mẹ, yèdọ lizọnyizọn whenu-gigọ́ tọn. Onọ̀ susu nọ tindo mahẹ to azọ́n ehe mẹ to whenuena ovi yetọn lẹ tin to wehọmẹ. Mẹho nugbonọ he nọ basi dlapọn lẹngbọhọtọ tọn bosọ nọ penukundo whẹndo yetọn titi go lẹ nọ dohia dọ yé yiwanna Jehovah po huhlọn yetọn lẹpo po. (2 Kọlintinu lẹ 12:15) Jehovah nọ na huhlọn mẹhe tindo todido to ewọ mẹ lẹ, na yé nido sọgan do owanyi yetọn hia gbọn gigopipana ẹn po huhlọn he yé tindo lẹpo po dali.—Isaia 40:29; Heblu lẹ 6:11, 12.

Owanyi na whẹ́n eyin e yin awuwlena ganji. Enẹwutu, mí dona zindonukọn nado nọ yí whenu zan nado lẹnayihamẹpọn. Mí flin nuhe Jehovah ko wà na mí lẹ podọ nuhewutu ewọ jẹna mẹdezejo mítọn. Taidi ovivi mapenọ Adam tọn lẹ, mí ma jẹna “nuhe Jiwheyẹwhe wleawu etọn lẹ na yé he yiwanna ẹn lẹ” to aliho depope mẹ gba, ṣigba mí sọgan dohia dọ mí yiwanna Jehovah sọn alindọn mítọn lẹpo mẹ. Mì gbọ mí ni to mọwà zọnmii!—1 Kọlintinu lẹ 2:9.

[Yẹdide to weda 20]

Nuyiwa mítọn lẹ nọ dohia dọ mí yiwanna Jiwheyẹwhe