‘Afanumẹ Nugbonọ lọ’ Duto Mẹtẹnpọn lọ Ji!
“Ojlẹ lọ wá, bọ whẹdida na ṣẹ sọn owhé Jiwheyẹwhe tọn gbè janwẹ.”—1 Pita 4:17.
1. Etẹwẹ Jesu mọ to whenuena e dla “afanumẹ” lọ pọ́n?
TO Pẹntikọsti 33 W.M., Jesu de “afanumẹ” de nado wleawuna núdùdù to osaa sisọ mẹ na “whédo” etọn. To 1914, Jesu hẹ́ gánzinpo ji taidi Ahọlu, bọ to madẹnmẹ ojlẹ lọ sọ̀ nado dla “afanumẹ” enẹ pọ́n. E mọdọ suhugan hagbẹ “afanumẹ” lọ tọn ko do ede hia nado yin “nugbonọ [podọ] nuyọnẹntọ.” Enẹwutu, e yí ì “do basi ogán nuhe e tindo lẹpo tọn.” (Matiu 24:45-47) Ṣigba, afanumẹ ylankan de sọ tin, he ma yin nugbonọ bo masọ yin nuyọnẹntọ.
“Afanumẹ Ylankan Nẹ”
2, 3. Fie wẹ “afanumẹ ylankan nẹ” wá sọn, podọ nawẹ e bẹjẹeji gbọn?
2 Jesu dọho gando afanumẹ ylankan lọ go tlolo he e dọhodo “afanumẹ nugbonọ, nuyọnẹntọ” lọ ji godo. E dọmọ: “Eyin afanumẹ ylankan nẹ dọ to ayiha etọn mẹ, dọ, [klunọ] ṣie dọ̀n gigọ̀ etọn do godo; bo ṣẹ nuli devi hatọ etọn lẹ, bosọ to dùdù, bo to ahànnumu; [klunọ] afanumẹ nẹ tọn na wá to azán de mẹ whenuena e ma donukun in, podọ to ojlẹ he e ma yọnẹn de mẹ, bo nasọ hò e susu, e na de tẹnmẹ etọn to yẹnuwatọ lẹ dè; finẹ wẹ avi po adúkúnkún [etọn] po na te.” (Matiu 24:48-51) Hogbe lọ ‘afanumẹ ylankan nẹ’ dọ̀n ayidonugo mítọn wá nuhe Jesu dọ jẹnukọn gando afanumẹ nugbonọ, nuyọnẹntọ lọ go ji. Mọwẹ, “afanumẹ ylankan” lọ wá sọn hagbẹ afanumẹ nugbonọ lọ tọn lẹ mẹ.a Gbọnna?
3 Jẹnukọnna 1914, hagbẹ pipli afanumẹ lọ tọn susu tindo todido lọ nado pé Asisunọ-yọyọ lọ to olọn mẹ to owhe enẹ mẹ, ṣigba todido yetọn ma mọ hẹndi yí gba. Taidi kọdetọn ehe tọn po diọdo devo lẹ po tọn, mẹsusu jẹflumẹ bọ omẹ vude tlẹ gblehomẹ. Delẹ to omẹ ehelẹ mẹ jẹ “nuli” mẹmẹsunnu yetọn dai tọn lẹ ji po hogbe mẹzunzun tọn lẹ po bosọ jẹ gbẹdo hẹ ‘ahànnumunọ lẹ,’ yèdọ pipli sinsẹ̀nnọ Mẹylọhodotọklisti tọn lẹ ji.—Isaia 28:1-3; 32:6.
4. Nawẹ Jesu yinuwa hẹ “afanumẹ ylankan” lọ po mẹhe ko do gbigbọ dopolọ hia lẹpo po gbọn?
4 Mẹhe ko yin Klistiani dai ehelẹ wá yin yinyọnẹn taidi “afanumẹ ylankan,” podọ Jesu hò kavi sayana yé “susu.” To aliho tẹ mẹ? E gbẹ́ yé dai, bọ yé hẹn todido olọn mẹ tọn yetọn bu. Ṣigba, yé ma yin vivasudo to afọdopolọji gba. Yé dona doakọnna ojlẹ avi po adúkúnkún po tọn to “zinvlu he to gbonu” agun Klistiani tọn mẹ whẹ́. (Matiu 8:12) Sọn azán fliflimẹ tọn enẹlẹ mẹ, mẹyiamisisadode delẹ ko sọ do gbigbọ ylankan mọnkọtọn hia, bo gbọnmọ dali do yede hia nado yin apadewhe “afanumẹ ylankan” lọ tọn. Delẹ to “lẹngbọ devo” lẹ mẹ ko hodo apajlẹ nugbomadọ yetọn tọn. (Johanu 10:16) Kẹntọ Klisti tọn enẹ lẹpo wẹ mọ yede to “zinvlu [gbigbọmẹ tọn] he to gbonu” dopolọ mẹ.
5. Nawẹ nuyiwa afanumẹ nugbonọ, nuyọnẹntọ lọ tọn gbọnvona “afanumẹ ylankan” lọ tọn gbọn?
5 Nalete, afanumẹ nugbonọ, nuyọnẹntọ lọ jugbọn mẹtẹnpọn dopolọ he mẹ “afanumẹ ylankan nẹ” jugbọn mẹ. Ṣigba, kakati nado gblehomẹ, yé kẹalọyi “vọjlado.” (2 Kọlintinu lẹ 13:11, NW) Owanyi he yé tindo na Jehovah po mẹmẹsunnu yetọn lẹ po yin hinhẹn lodo. Taidi kọdetọn de, yé lẹzun “dòtin afọdotẹn nugbo tọn” to ‘azán godo’ tọn he gọ́ na tukla ehelẹ mẹ.—1 Timoti 3:15; 2 Timoti 3:1.
Awhli Nuyọnẹntọ po Nulunọ lẹ Po
6. (a) Nawẹ Jesu dohia dọ pipli afanumẹ nugbonọ etọn tọn yin nuyọnẹntọ gbọn? (b) Jẹnukọnna 1914, wẹndomẹ tẹwẹ Klistiani yiamisisadode lẹ lá?
6 To hodidọ gando “afanumẹ ylankan nẹ” go godo, Jesu dó oló awe he do nuhewutu Klistiani yiamisisadode delẹ na yin nugbonọ bosọ yin nuyọnẹntọ to vogbingbọn mẹ na devo lẹ hia.b Nado basi zẹẹmẹ nuyọnẹntọ lẹ tọn, e dọmọ: “Whenẹnu wẹ ahọludu olọn tọn na yin jijlẹ do awhli ao go, he yí ozòwhán yetọn lẹ, bo tọ́n jei asisunọ pé gbé. Atọ́n to yé mẹ yin nulunọ, atọ́n sọ yin nuyọnẹntọ. Na nulunọ lẹ, whenuena yé yí ozòwhán yetọn lẹ ma yí amì po yé po gba: ṣigba nuyọnẹntọ lẹ hẹn amì to ogò yetọn mẹ po ozòwhán yetọn lẹ po.” (Matiu 25:1-4) Awhli ao lẹ hẹn mí flin Klistiani yiamisisadode lẹ jẹnukọnna 1914. Yé ko lẹn azán lẹ dọ asisunọ-yọyọ lọ, Jesu Klisti, na sọawuhia to madẹnmẹ. Enẹwutu, yé “tọ́n jei” pipé e gbé, bo yí adọgbigbo do to lilá dọ “ojlẹ [dide] Kosi lẹ tọn” na wá vivọnu to 1914.—Luku 21:24.
7. Whetẹnu podọ naegbọn Klistiani yiamisisadode lẹ ‘yì damlọn’ to yẹhiadonu-liho?
7 Nugbo wẹ yé dọ. Ojlẹ dide Kosi lẹ tọn wá vivọnu to 1914, bọ Ahọluduta Jiwheyẹwhe tọn to Klisti Jesu glọ jẹ nuyiwa ji. Ṣigba enẹ jọ to olọn mayinukundomọ lẹ mẹ. To aigba ji, gbẹtọvi lẹ jẹ numimọ “dindọ̀n” kavi awufiẹsa heyin didọdai tọn tindo ji. (Osọhia 12:10, 12) Ojlẹ mẹtẹnpọn tọn de bọdego. Na Klistiani yiamisisadode lẹ ma mọnukunnujẹ onú lẹ mẹ ganji wutu, yé lẹndọ ‘asisunọ lọ to dindẹn.’ Yé jẹflumẹ bosọ jiya kanyinylan tọn sọn aihọn lọ dè. Taidi kọdetọn de, yé gbọjọ bọ azọ́n yẹwhehodidọ gbangba tọn dibla doalọte. Taidi awhli oló lọ tọn lẹ, yé “samlọngọ, bo damlọn” to gbigbọ-liho, kẹdẹdile nugbomadọtọ he ylọ yede dọ Klistiani lẹ wà do to okú apọsteli Jesu tọn lẹ tọn godo.—Matiu 25:5; Osọhia 11:7, 8; 12:17.
8. Etẹwẹ zọ́n bọ awhá do di dọ: “Pọ́n, asisunọ ja”! podọ ojlẹ etẹ tọn wẹ sọ̀ na Klistiani yiamisisadode lẹ?
8 Enẹgodo to 1919, onú de jọ to ajiji mẹ. Mí hia dọmọ: “To zángbodawe mẹ, awhá di, dọmọ, Pọ́n, asisunọ ja; mì tọ́n yì pé e. Whenẹnu wẹ awhli nẹlẹ po fọ́n, bo jla ozòwhán yetọn lẹ do.” (Matiu 25:6, 7) To ojlẹ lọ pẹpẹ he e taidi dọ todido depope matin ba wẹ oylọ yin bibasi nado yinuwa! To 1918, Jesu, “angẹli alẹnu tọn lọ,” ko wá tẹmpli gbigbọmẹ Jehovah tọn mẹ nado dla agun Jiwheyẹwhe tọn pọ́n bo klọ́ ẹ wé. (Malaki 3:1) Todin, Klistiani yiamisisadode lẹ dona tọ́n jẹgbonu nado pé e to awánu tẹmpli enẹ tọn lẹ mẹ to aigba ji. Ojlẹ lọ ko sọ̀ na yé nado “họnwun.”—Isaia 60:1; Filippinu lẹ 2:14, 15.
9, 10. To 1919, naegbọn Klistiani delẹ yin “nuyọnẹntọ” bọ delẹ yin “nulunọ”?
9 Ṣigba yì agbọji whẹ́! To oló lọ mẹ, delẹ to awhli lọ lẹ mẹ tindo nuhahun de. Jesu zindonukọn dọmọ: “Nulunọ lẹ sọ dọ hlan nuyọnẹntọ lẹ, dọmọ, Mì na mí sọn amì mìtọn mẹ; na ozòwhán mítọn lẹ to ṣiṣi.” (Matiu 25:8) Ozòwhán lẹ ma sọgan tá eyin amì ma tin to yé mẹ gba. Gbọnmọ dali, amì lọ flin mí nugbo Ohó Jiwheyẹwhe tọn po gbigbọ wiwe etọn po, he nọ na huhlọn sinsẹ̀n-basitọ nugbo lẹ nado yin hinhọ́n hẹntọ lẹ. (Psalm 119:130; Daniẹli 5:14) Jẹnukọnna 1919, Klistiani yiamisisadode nuyọnẹntọ lẹ ko gbọn vivẹnu dali dín nado tunwun nuhe Jiwheyẹwhe jlo dọ yé ni wà go, mahopọnna ninọmẹ gbigbọjọ ojlẹ gli tọn yetọn. Enẹwutu, to whenuena oylọ lọ yin bibasi nado tá hinhọ́n jẹgbonu, yé ko tin to awuwle mẹ.—2 Timoti 4:2; Heblu lẹ 10:24, 25.
10 Ṣigba, mẹyiamisisadode delẹ ma jlo nado sanvọ́ depope kavi vánkan gba—dile etlẹ yindọ yé tindo ojlo vẹkuvẹku nado tin hẹ Asisunọ-yọyọ lọ. Enẹwutu to whenuena ojlẹ lọ sọ̀ nado hẹn alọnu ján to yẹwheho wẹndagbe lọ tọn didọ mẹ, yé ma wleawu gba. (Matiu 24:14) Yé tlẹ tẹnpọn nado hẹn gbẹdohẹmẹtọ zohunhunnọ yetọn lẹ gbọjọ, bo to obiọ basi, to yẹhiadonu-liho, na amì yetọn. To oló Jesu tọn mẹ, nawẹ awhli nuyọnẹntọ lẹ yinuwa gbọn? Yé dọmọ: “Eya, na e ma nado whè do mí po mìwlẹ po; ṣigba mì gbọ bo yì mẹhe nọ sà lẹ dè, bo họ̀ na mìde.” (Matiu 25:9) Mọdopolọ, to 1919, Klistiani nugbonọ yiamisisadode lẹ gbẹ́ nado wà nudepope he na de nugopipe yetọn nado tá hinhọ́n pò. Yé gbọnmọ dali duto mẹtẹnpọn lọ ji.
11. Etẹwẹ jọ do awhli nulunọ lẹ go?
11 Jesu dotana dọmọ: “Le [awhli nulunọ lẹ] jei hihọ̀ gbé, asisunọ wá: yé mẹhe wleawu lẹ biọ họmẹ hẹ ẹ yì alọwle hunwhẹ kọ̀n; yè sọ sú ohọ̀n. To godo wẹ awhli devo he pò lẹ wá, yé dọmọ, Oklunọ, Oklunọ, hùnhọ̀n na mí. Ṣigba e gblọn bo dọmọ, Nugbo wẹ yẹn dọ hlan mì, yẹn ma yọ́n mì gba.” (Matiu 25:10-12) Mọwẹ, mẹdelẹ ma wleawudai na wiwá Asisunọ-yọyọ lọ tọn. Enẹwutu, yé jai to mẹtẹnpọn lọ nukọn bosọ hẹn dotẹnmẹ hundote lọ nado yì hunwhẹ alọwle olọn tọn tẹnmẹ bu. Lehe e blawu do sọ!
Oló Talẹnti Tọn
12. (a) Apajlẹ tẹwẹ Jesu yizan nado basi zẹẹmẹ do nugbonọ-yinyin ji? (b) Mẹnu wẹ yin alọdlẹndo di omẹ de he “yì gbejizọnlin” ji?
12 To zẹẹmẹ bibasi do nuyiwa nuyọnẹn tọn ji godo, Jesu zindonukọn nado basi zẹẹmẹ do nugbonọ-yinyin ji. E dọmọ: “E tin di whenuena omẹ de jei otò dindẹn mẹ, bo ylọ afanumẹ etọn lẹ, bo bẹ agbàn [kavi nutindo] etọn lẹ jo na yé. E yí talẹnti atọ́n na mẹde, bo yí awe na omẹ awetọ, bosọ yí dopo na omẹ atọ̀ntọ; e na dopodopo yetọn le huhlọn etọn te: e sọ tọ́n yì gbejizọnlin etọn ji.” (Matiu 25:14, 15) Mẹhe yin alọdlẹndo di omẹ de to oló lọ mẹ wẹ Jesu, mẹhe “yì gbejizọnlin” ji to whenuena e hẹji yì olọn mẹ to owhe 33 W.M. Ṣigba whẹpo e do hẹji yì olọn mẹ, Jesu bẹ ‘nutindo etọn lẹ’ jo na devi nugbonọ etọn lẹ. Gbọnna?
13. Nawẹ Jesu wleawu ogle daho nuwiwa tọn de bo naṣẹ “afanumẹ” etọn lẹ nado wàjọ gbọn?
13 To lizọnyizọn etọn whenu to aigba ji, Jesu jẹ awuwlena ogle daho nuwiwa tọn de ji gbọn yẹwheho wẹndagbe Ahọluduta tọn didọ to aigba Islaeli tọn lẹpo ji dali. (Matiu 9:35-38) Whẹpo e do “yì gbejizọnlin” ji, e ze ogle enẹ do alọmẹ na devi nugbonọ etọn lẹ, bo dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì nisọ nọ plọn yé nado nọ doayi onú lẹpo go, nudepope he yẹn degbena mì.” (Matiu 28:18-20) Po hogbe ehelẹ po, Jesu naṣẹ “afanumẹ” etọn lẹ nado wàjọ kakajẹ wiwá etọn whenu, “dopodopo yetọn le huhlọn etọn te.”
14. Naegbọn mẹlẹpo mayin nukundo nado wàjọ to obá dopolọ mẹ?
14 Hogbe enẹ dohia dọ e mayin Klistiani owhe kanweko tintan whenu tọn lẹpo wẹ tindo ninọmẹ kavi nugopipe dopolọ lẹ gba. Mẹdelẹ, taidi Paulu po Timoti po, vò nado tindo mahẹ gigọ́ to azọ́n yẹwhehodidọ po mẹpinplọn tọn po mẹ. Ninọmẹ mẹdevo lẹ tọn sọgan ko hẹnalọdotena yé nado yinuwa po mẹdekannujẹ gigọ́ po. Di apajlẹ, Klistiani delẹ yin afanumẹ lẹ, podọ mẹdevo lẹ yin awutunọ, yọnhonọ, kavi tindo azọngban whẹndo tọn lẹ. Nugbo wẹ dọ, lẹblanulọkẹyi delẹ to agun mẹ ma sọgan yin nina devi lẹpo. Yọnnu yiamisisadode lẹ podọ delẹ to sunnu yiamisisadode lẹ mẹ ma nọ plọnmẹ to agun mẹ gba. (1 Kọlintinu lẹ 14:34; 1 Timoti 3:1; Jakobu 3:1) Etomọṣo, mahopọnna ninọmẹ yetọn, devi yiamisisadode Klisti tọn lẹpo—vlavo yé yin sunnu kavi yọnnu—yin azọ́ndena nado wàjọ, bo yí dotẹnmẹ hundote po ninọmẹ yetọn lẹ po zan ganji to lizọnyizọn Klistiani tọn mẹ. Pipòtọ yetọn lẹ to onú dopolọ wà to egbehe.
Ojlẹ Mẹtẹnpọn Tọn Bẹjẹeji!
15, 16. (a) Whetẹnu wẹ ojlẹ lọ sọ̀ nado basi nulinlẹn? (b) Dotẹnmẹ devo tẹlẹ wẹ yin nina nugbonọ lẹ nado “wàjọ”?
15 Oló lọ zindonukọn dọmọ: “To ojlẹ dindẹn de godo, klunọ afanumẹ nẹlẹ tọn gọ̀, bo basi [nulinlẹn] po yé po.” (Matiu 25:19) To 1914—matin ayihaawe ojlẹ dindẹn to owhe 33 W.M. godo—Klisti Jesu bẹ tintin tofi gigonọ etọn jẹeji. Owhe atọ̀n daa godo, to 1918, e wá tẹmpli gbigbọmẹ tọn Jiwheyẹwhe tọn mẹ bo hẹn ohó Pita tọn lẹ di dọmọ: “Ojlẹ lọ wá, bọ whẹdida na ṣẹ sọn owhé Jiwheyẹwhe tọn gbè janwẹ.” (1 Pita 4:17; Malaki 3:1) Ojlẹ lọ ko sọ̀ nado basi nulinlẹn po yé po.
16 Etẹwẹ afanumẹ lọ lẹ, yèdọ mẹmẹsunnu yiamisisadode Jesu tọn lẹ, ko wà po “talẹnti” Ahọlu tọn lẹ po? Sọn owhe 33 W.M. sọyi, gọna owhe he plan mí jẹ 1914 lẹ, mẹsusu ko to azọ́n sinsinyẹn wà to ‘ajọ́’ Jesu tọn mẹ. (Matiu 25:16) Etlẹ yin to wẹkẹ whàn tintan whenu, yé ko do ojlo vẹkuvẹku hia nado sẹ̀n Klunọ lọ. Todin, nuhe sọgbe wẹ e yin nado hùn dotẹnmẹ devo lẹ dote na nugbonọ lẹ nado “wàjọ.” Ojlẹ opodo titonu ehe tọn ko wá. Wẹndagbe lọ dona yin lilá lẹdo aihọn pé. “Ojì aigba tọn” dona yin gbingbẹ̀n. (Osọhia 14:6, 7, 14-16) Hagbẹ godo tọn pipli likun lọ tọn lẹ dona yin dindinmọ podọ “gbẹtọ susugege” lẹngbọ devo lẹ tọn dona yin bibẹpli.—Osọhia 7:9; Matiu 13:24-30.
17. Nawẹ Klistiani nugbonọ yiamisisadode lẹ ‘biọ ayajẹ klunọ yetọn tọn mẹ’ gbọn?
17 Ojijẹ whenu yin ojlẹ ayajijẹ tọn. (Psalm 126:6) Enẹwutu, nuhe sọgbe wẹ e yin dọ to 1919, Jesu ze azọngban daho lẹ do alọmẹ na mẹmẹsunnu nugbonọ yiamisisadode etọn lẹ, bo dọmọ: ‘Hiẹ yin nugbonọ to onú vude mẹ, yẹn na yí we do dogán onú susu tọn: hiẹ biọ ayajẹ klunọ towe tọn mẹ.’ (Matiu 25:21, 23) Humọ, ayajẹ Klunọ lọ tọn taidi Ahọlu yọyọ Ahọluduta Jiwheyẹwhe tọn tọn zẹ̀ nuhe mí sọgan lẹnnupọn deji go. (Psalm 45:1, 2, 6, 7) Pipli afanumẹ nugbonọ lọ tọn tindo ayajẹ dopolọ gbọn afọ Ahọlu lọ tọn zizedai po nutindo etọn lẹ hinhẹn jideji to aigba ji po dali. (2 Kọlintinu lẹ 5:20) Ayajẹ yetọn yin mimọ to ohó dọdai Isaia 61:10 tọn lẹ mẹ dọmọ: “Yẹn na jaya susu to OKLUNỌ mẹ, gbigbọ ṣie nasọ yin ayajẹtọ to Jiwheyẹwhe ṣie mẹ; na e ko yí awù whlẹngán tọn dó na mi.”
18. Naegbọn mẹdelẹ jai to mẹtẹnpọn lọ nukọn, podọ etẹwẹ yin kọdetọn lọ?
18 E blawu dọ mẹdelẹ jai to mẹtẹnpọn lọ nukọn. Mí hia dọmọ: “Ewọ . . . he mọ talẹnti dopo yí sọ wá, bo dọmọ, Oklunọ, yẹn yọ́n hiẹ dọ gbẹtọ fifiẹtọ wẹ hiẹ, hiẹ nọ gbẹ̀n to fie hiẹ ma dó do, bosọ nọ bẹpli to fie hiẹ ma vúnvún do; yẹn sọ yin avosatọ bo yì, bo yí talẹnti towe whlá do okọ́ mẹ: pọ́n, hiẹ tindo towe titi lọ.” (Matiu 25:24, 25) Mọdopolọ, Klistiani yiamisisadode delẹ ma doalọ to ‘ajọwiwa’ mẹ gba. Jẹnukọnna 1914 yé ma ko yí zohunhun do má todido yetọn hẹ mẹdevo lẹ, podọ yé ma jlo na bẹjẹeji to 1919 gba. Nawẹ Jesu yinuwa hlan goyiyi yetọn gbọn? E yí lẹblanulọkẹyi yetọn lẹpo sọn yé si. Yé yin ‘dindlan do zinvlu mẹ to gbonu, fie avi po adúkúnkún yetọn po na te.’—Matiu 25:28, 30.
Mẹtẹnpọn lọ Zindonukọn
19. Aliho tẹ mẹ wẹ nuyiwa mẹtẹnpọn lọ tọn zindonukọn te, podọ etẹwẹ Klistiani yiamisisadode lẹpo magbe nado wà?
19 Nugbo wẹ dọ, suhugan mẹhe dona lẹzun afanumẹ yiamisisadode Klisti tọn to ojlẹ opodo lọ tọn whenu lẹ ma ko to Jehovah sẹ̀n to whenuena Jesu bẹ mẹtẹnpọn etọn jẹeji to 1918 gba. Be yewlẹ ma yin tintẹnpọn wẹ ya? Gbau. Nuyiwa mẹtẹnpọn lọ tọn bẹjẹeji to 1918/19 poun wẹ, whenuena afanumẹ nugbonọ, nuyọnẹntọ lọ duto mẹtẹnpọn lọ ji taidi pipli de. Klistiani yiamisisadode dopodopo gbẹ́ tin to mẹtẹnpọn glọ kakajẹ whenuena hiadomẹgo yetọn na lẹzun tẹgbẹ tọn. (Osọhia 7:1-3) Enẹwutu, mẹmẹsunnu yiamisisadode Klisti tọn lẹ magbe nado ‘to ajọwa’ po nugbonọ-yinyin po. Yé magbe nado yin nuyọnẹntọ, bo hẹn amì susugege to ogo yetọn mẹ na hinhọ́n yetọn nido sọgan họnwun jẹgbonu. Yé yọnẹn dọ to whenuena dopodopo yetọn na yin nugbonọ kakajẹ opodo, Jesu na kẹalọyi i do nọtẹn olọn tọn mẹ.—Matiu 24:13; Johanu 14:2-4; 1 Kọlintinu lẹ 15:50, 51.
20. (a) Etẹwẹ lẹngbọ devo lẹ magbe nado wà to egbehe? (b) Etẹwẹ Klistiani yiamisisadode lẹ yọnẹn?
20 Gbẹtọ susugege lẹngbọ devo lẹ tọn ko hodo apajlẹ mẹmẹsunnu yiamisisadode yetọn lẹ tọn. Yé yọnẹn dọ oyọnẹn he yé tindo gando lẹndai Jiwheyẹwhe tọn lẹ go bẹ azọngban daho lẹ hẹn. (Ezekiẹli 3:17-21) Enẹwutu, Ohó Jehovah tọn po gbigbọ wiwe etọn po gọalọna yé bọ yelọsu hẹn amì susu gbọn oplọn po gbẹdido Klistiani tọn lẹ po gblamẹ. Podọ yé nọ dike hinhọ́n yetọn ni họnwun gbọn mahẹ tintindo to azọ́n yẹwhehodidọ po mẹpinplọn tọn po mẹ dali bosọ nọ gbọnmọ dali “wàjọ” to pọmẹ hẹ mẹmẹsunnu yiamisisadode yetọn lẹ. Ṣigba, Klistiani yiamisisadode lẹ yọnẹn ganji dọ alọ yetọn lẹ mẹ wẹ talẹnti lọ lẹ yin zizedo. Yé dona dogbè na aliho he mẹ yé penukundo nutindo Oklunọ lọ tọn he to aigba ji lẹ go te. Dile etlẹ yindọ yé whè to sọha mẹ, yé ma sọgan bli azọngban yetọn do gbẹtọ susugege lọ ji gba. Po ehe po to ayiha mẹ, afanumẹ nugbonọ, nuyọnẹntọ lọ zindonukọn nado yin nukọntọ to nukunpipedo ajọ́ Ahọlu lọ tọn go mẹ, bosọ yọ́n pinpẹn alọgọ hagbẹ mẹdezejotọ gbẹtọ susugege lọ tọn lẹ tọn. Omẹ ehelẹ yọ́n azọngban he mẹmẹsunnu yiamisisadode yetọn lẹ tindo bosọ nọ pọ́n ẹn hlan taidi lẹblanulọkẹyi de nado wazọ́n to nukunpedonugo yetọn glọ.
21. Tudohomẹnamẹ tẹwẹ yọn-na-yizan na Klistiani lẹpo jẹnukọnna 1919 podọ kakajẹ egbehe?
21 Nalete, dile etlẹ yindọ oló awe ehelẹ tá hinhọ́n do nujijọ he wá aimẹ to 1919 kavi gblagbla owhe enẹ tọn lẹ mẹ ji, nunọwhinnusẹ́n yetọn lẹ yọn-na-yizan na Klistiani nugbo lẹpo to azán godo tọn ehelẹ mẹ. Gbọnmọ dali, dile etlẹ yindọ tudohomẹnamẹ Jesu tọn to vivọnu oló awhli ao lẹ tọn yọn-na-yizan na Klistiani yiamisisadode lẹ jẹnukọnna 1919, nunọwhinnusẹ́n etọn gbẹsọ yọn-na-yizan na Klistiani lẹpo todin. Enẹwutu, mì gbọ mímẹpo ni hẹn ohó Jesu tọn lẹ do ayiha mẹ dọmọ: “Enẹwutu mì nọ họ́ mìde, na mì ma yọ́n azán lọ kavi ojlẹ lọ gba.”—Matiu 25:13.
[Nudọnamẹ Odò Tọn]
a To aliho dopolọ mẹ, to okú apọsteli lẹ tọn godo, “ohla he dobu” lẹ wá sọn pipli mẹho Klistiani yiamisisadode lẹ tọn mẹ.—Owalọ lẹ 20:29, 30.
b Nado mọ zẹẹmẹ devo lẹ gando oló Jesu tọn go, pọ́n Sécurité universelle sous le Règne du “Prince de paix,” heyin zinzinjẹgbonu gbọn Kunnudetọ Jehovah tọn lẹ dali, weta 5 po 6 po.
Be Hiẹ Sọgan Basi Zẹẹmẹ Ya?
• Whetẹnu wẹ Jesu dla hodotọ etọn lẹ pọ́n, podọ etẹwẹ e mọ?
• Naegbọn Klistiani yiamisisadode delẹ wleawuna gbigbọ “afanumẹ ylankan nẹ” tọn?
• Nawẹ mí sọgan dohia dọ mí yin nuyọnẹntọ to gbigbọ-liho gbọn?
• Gbọn apajlẹ mẹmẹsunnu nugbonọ yiamisisadode Jesu tọn lẹ tọn hihodo dali, aliho tẹ mẹ wẹ mí sọgan zindonukọn to ‘ajọwiwa’ mẹ te?
[Apotin to weda 16]
WHETẸNU WẸ JESU WÁ?
To Matiu weta 24 po 25 po mẹ, Jesu yin alọdlẹndo taidi mẹhe “wá” to linlẹn voovo lẹ mẹ. E mayin dandan dọ e ni sẹtẹn whẹpo bo nado “wá” gba. Kakatimọ, e “wá” to linlẹn lọ mẹ dọ e lilẹ́ ayidonugo etọn hlan gbẹtọvi lẹ kavi hlan hodotọ etọn lẹ, podọ ehe nọ saba yin nado dawhẹ. Enẹwutu, to 1914 e “wá” nado bẹ tintin tofi etọn jẹeji taidi Ahọlu he ko yin zizedo ofìn ji. (Matiu 16:28; 17:1; Owalọ lẹ 1:11) To 1918 e “wá” taidi angẹli alẹnu tọn lọ bo jẹ whẹdana mẹhe sọalọakọ́n nado to Jehovah sẹ̀n lẹ ji. (Malaki 3:1-3; 1 Pita 4:17) To Amagẹdọni, e na “wá” nado hẹn whẹdida ṣẹ do kẹntọ Jehovah tọn lẹ ji.—Osọhia 19:11-16.
Hogbe lọ dọ e ja (kavi dọ e na wá) heyin yiyizan whlasusu to Matiu 24:29-44 po 25:31-46 po mẹ na mọ hẹndi to “nukunbibia daho” lọ whenu. (Osọhia 7:14) To alọ devo mẹ, wiwá heyin alọdlẹndo whlasusu to Matiu 24:45 jẹ 25:30 mẹ gando nuyiwa whẹdida etọn tọn sọta mẹhe ylọ yede dọ devi lẹ sọn 1918 sọyi go. Di apajlẹ, e ma na yin lẹnpọn dagbenu nado dọ dọ ahọsusu afanumẹ nugbonọ lọ, whẹdidana awhli nulunọ lọ lẹ, podọ whẹdidana afanumẹ adidọnọ, he whlá talẹnti Oklunọ lọ tọn, na wá aimẹ to whenuena Jesu na “wá” to nukunbibia daho lọ whenu gba. Eyin mọwẹ, e na zẹẹmẹdo dọ susu to mẹyiamisisadode lẹ mẹ na yin mimọ to ojlẹ enẹ mẹ nado yin nugbomadọtọ bo dona yin didiọ. Ṣigba, Osọhia 7:3 dohia dọ afanumẹ yiamisisadode Klisti tọn lẹpo na ko yin yíyí “hiadonu do dohia ogo na” mlẹnmlẹn to ojlẹ enẹ mẹ.
[Yẹdide to weda 14]
“Afanumẹ ylankan” lọ ma mọ dona depope yí to 1919
[Yẹdide to weda 15]
Awhli nuyọnẹntọ lọ lẹ ko wleawu to whenuena asisunọ-yọyọ lọ wá
[Yẹdide to weda 17]
Afanumẹ nugbonọ lọ hẹn alọnu ján to ‘ajọ́’ lọ mẹ
Afanumẹ adidọnọ lọ ma wàmọ gba
[Yẹdide to weda 18]
Mẹyiamisisadode lẹ po “gbẹtọ susugege” lọ po zindonukọn nado dike hinhọ́n yetọn ni to wunhọ́n