666—Ma Yin Nudabla de Poun

“Mẹdepope ma nado tin sọgan nado họ̀, kavi bo sà, adavo ewọ he tindo ohia lọ kavi oyín [Gbekanlin] lọ tọn, kavi sọha oyín yetọn tọn. Ofi wẹ nuyọnẹn te. Gbọ ewọ he tindo nuyọnẹn ni hia sọha kanlin lọ tọn: na sọha gbẹtọ de tọn wẹ: sọha etọn sọ basi Nuọ̀ntọ̀n kandeko-atọ́n e lán dopo.”—Osọhia 13:17-18.

HOSỌ Biblu tọn vude poun wẹ fọ́n ojlo po ahunmẹdunamẹnu susu po dote sọ dọdai he gando ohia, kavi oyín dabla “kanlin” kavi gbekanlin lọ tọn, heyin 666 go. To televiziọn po Internet po ji, podọ to video, owe, po linlinwe lẹ po mẹ, ohia gbekanlin lọ tọn ko fọ́n hopàdọ madosọha lẹ dote.

Mẹdelẹ yise dọ 666 yin ohia he Biblu na agọjẹdoklisti tọ́ lẹ. Mẹdevo lẹ dọ dọ ohia mẹyinyọnẹn dandan tọn de wẹ e yin, taidi yẹnviwhẹ gbigbò kavi hogbe he nọ do mẹde hia di devizọnwatọ gbekanlin lọ tọn. Ṣogan, mẹdelẹ sọ yise dọ 666 yin ohia de na papa Katoliki tọn. Wekun sọha Lomunu lẹ tọn lọ heyin 666 yin didiọ do hogbe he sọgbe hẹ tẹnmẹ-yinkọ papa tọn nkọtọn de, heyin Vicarius Filii Dei (Yẹwhenọ Ovi Jiwheyẹwhe tọn tọn) mẹ nado hẹn ẹn sọgbe hẹ sọha lọ. Podọ mẹdevo lẹ sọ dohia dọ sọha dopolọ sọgan yin hinhẹn sọgbe hẹ oyín Ahọluigbagán Lomu tọn Dioclétien tọn to Latin-gbe mẹ podọ to Heblugbe mẹ, e sọgan sọgbe hẹ oyín Néron César tọn ga.a

Ṣigba, dile mí na mọ to hosọ he bọdego mẹ do, tadena hopàdọ tọn ehelẹ gbọnvo mlẹnmlẹn na nuhe Biblu dọ gando ohia gbekanlin lọ tọn go. Biblu dohia hezeheze dọ mẹhe tindo ohia lọ lẹ na jiya homẹgble Jiwheyẹwhe tọn to whenuena e na và aihọn ehe sudo. (Osọhia 14:9-11; 19:20) Enẹwutu, nukunnumimọjẹ zẹẹmẹ 666 tọn mẹ yin nujọnu taun hugan zẹẹmẹ dindin poun na nudabla he fọnjlodotenamẹ de. Homẹ mítọn hùn dọ Jehovah Jiwheyẹwhe, heyin owanyinọ daho lọ po Asisa hinhọ́n gbigbọmẹ tọn po, ma jo devizọnwatọ etọn lẹ do zinvlu mẹ to whẹho titengbe ehe mẹ gba.—2 Timoti 3:16; 1 Johanu 1:5; 4:8.

[Nudọnamẹ Odò Tọn]