Be Hiẹ Nọ Mọ Homẹhunhun to ‘Osẹ́n Jehovah Tọn’ mẹ Ya?
‘Ayajẹnọ wẹ mẹhe homẹhunhun etọn tin to osẹ́n Jehovah tọn mẹ.’—PSALM 1:1, 2.
1. Taidi devizọnwatọ Jehovah tọn lẹ, naegbọn mí nọ jaya?
JEHOVAH nọ gọalọna mí bo nọ dona mí taidi devizọnwatọ nugbonọ etọn lẹ. Nugbo wẹ dọ, mí nọ pehẹ whlepọn susu lẹ. Ṣigba, mí sọ nọ duvivi ayajẹ nujọnu tọn ga. Ehe ma yin nupaṣamẹ de gba, na “Jiwheyẹwhe donanọ [kavi ayajẹnọ]” lọ sẹ̀n wẹ mí te, podọ gbigbọ wiwe etọn nọ wleawuna ayajẹ do ahun mítọn mẹ. (1 Timoti 1:11; Galatianu lẹ 5:22) Ayajẹ yin ninọmẹ homẹhunhun nugbo tọn de he nọ wá sọn nukundido kavi onú dagbe de tintindo mẹ. Podọ matin ayihaawe Otọ́ olọn mẹ tọn mítọn nọ na mí nunina dagbedagbe lẹ. (Jakobu 1:17) Abajọ mí do yin ayajẹnọ!
2. Psalm tẹlẹ wẹ mí na gbadopọnna?
2 Homẹhunhun yin nùzindeji taun to owe Psalm lẹ tọn mẹ. Di dohia, ehe sọawuhia to Psalm 1 po 2 po mẹ. Hodotọ dowhenu Jesu Klisti tọn lẹ dohia dọ Ahọlu Davidi Islaeli tọn wẹ kàn psalm awetọ. (Owalọ lẹ 4:25, 26) Mẹhe pà hànjiji psalm tintan tọn he mí ma yọ́n oyín etọn, bẹ ohàn gbọdo etọn jẹeji dọmọ: “Donanọ [kavi ayajẹnọ] wẹ mẹhe ma zinzọnlin to hónamẹ mẹylankan lẹ tọn mẹ.” (Psalm 1:1) To hosọ ehe po dehe bọdego po mẹ, mì gbọ mí ni pọ́n lehe Psalm 1 po 2 po na mí whẹwhinwhẹ́n nado jaya do.
Aṣli Ayajẹ Tọn
3. Sọgbe hẹ Psalm 1:1, etẹwẹ yin delẹ to whẹwhinwhẹ́n he wutu omẹ jijọ-di-Jiwheyẹwhe tọn nọ jaya lẹ mẹ?
3 Psalm 1 do nuhewutu omẹ jijọ-di-Jiwheyẹwhe tọn do nọ jaya hia. To hànjiji etọn mẹ, psalm-kantọ lọ na whẹwhinwhẹ́n ayajẹ enẹ tọn delẹ dọmọ: “Donanọ [kavi ayajẹnọ] wẹ mẹhe ma zinzọnlin to hónamẹ mẹylankan lẹ tọn mẹ, bo ma ṣite to ali ylanwatọ lẹ tọn ji, bo masọ sinai to otẹn mẹvlẹtọ lẹ tọn mẹ.”—Psalm 1:1.
4. Aliho apajlẹ dagbe tọn tẹwẹ Zakali po Elizabẹti po hodo?
4 Nado yin ayajẹnọ nugbonugbo, mí dona yinuwa sọgbe hẹ nubiọtomẹsi dodo Jehovah tọn lẹ. Zakali po Elizabẹti po, he tindo lẹblanulọkẹyi ayajẹnọ lọ nado lẹzun mẹjitọ Johanu Baptizitọ lọ tọn lẹ, “yin dodonọ to Jiwheyẹwhe nukọn, [na] yé to zọnlinzin to osẹ́n po ali [Jehovah] tọn lẹpo po mẹ mablu.” (Luku 1:5, 6) Mí sọgan yin ayajẹnọ eyin mí hodo apajlẹ mọnkọtọn bo gbẹ́ gbidigbidi nado “zinzọnlin to hónamẹ mẹylankan lẹ tọn mẹ” kavi nado hodo ayinamẹ ylankan yetọn.
5. Etẹwẹ sọgan gọalọna mí nado dapana “ali ylanwatọ lẹ tọn”?
5 Eyin mí gbẹ́ linlẹn mẹylankan lẹ tọn dai, mí ma na “ṣite to ali ylanwatọ lẹ tọn ji.” To paa mẹ, mí ma na nọ yin mimọ to fie yé nọ saba tin te lẹ—to aihundida fẹnnuwiwa tọn lẹ kọ̀n kavi to fie diyin na walọ ylankan lẹ. Eyin mí ka yin whiwhlepọn nado kọnawudopọ hẹ ylandonọ lẹ to walọ yetọn he ma sọgbe hẹ Owe-wiwe lẹ mẹ lo? To whenẹnu, mì gbọ mí ni hodẹ̀ bo biọ alọgọ Jiwheyẹwhe tọn nado yinuwa sọgbe hẹ hogbe apọsteli Paulu tọn lẹ dọmọ: “Mì yin omẹ yè yí gbemasọ do dopokle dopọ po mayisenọ lẹ po blo: na pọninọ tẹwẹ dodo tindo po mawadodo po? Kọndopọ tẹwẹ hinhọ́n tindo po zinvlu po?” (2 Kọlintinu lẹ 6:14) Eyin mí dejido Jiwheyẹwhe go bo yin “wiwenọ to ayiha mẹ,” mí na gbẹ́ gbigbọ po gbẹzan ylandonọ lẹ tọn po dai bọ linlẹn po ojlo mítọn lẹ po na yin wiwe, bọ mí nasọ tindo “yise he madoklọ.”—Matiu 5:8; 1 Timoti 1:5.
6. Naegbọn mí dona tin to aṣeji gando mẹvlẹtọ lẹ go?
6 Nado hẹn homẹhun Jehovah, mí ‘ma dona sinai to otẹn mẹvlẹtọ lẹ tọn mẹ.’ Mẹdelẹ nọ vlẹ jijọ-di-Jiwheyẹwhe kò, ṣigba to “azán godo tọn” ehelẹ mẹ, Klistiani dai tọn he ko lẹzun atẹṣitọ lẹ nọ saba do wangbẹna sinsinyẹn hia to mẹṣanko yetọn mẹ. Apọsteli Pita na avase yisenọ hatọ lẹ dọmọ: “Mẹyiwanna emi, . . . mì nisọ yọ́n ehe whẹ́, dọ, mẹvlẹtọ lẹ na wá po ovlẹ po to azán godo tọn mẹ, bo na to zọnlinzin to ojlo yede tọn mẹ, bo na to didọmọ, Fie wẹ opagbe gigọwa etọn tọn te? Na sọn whenuena otọ́ mítọn lẹ ko damlọn, doponẹ wẹ onú popo te sọn whẹwhẹwhenu nudida tọn gbọ́n.” (2 Pita 3:1-4) Eyin mí ma nọ “sinai to otẹn mẹvlẹtọ lẹ tọn mẹ,” mí na penugo nado dapana nugbajẹmẹji he na wá yé ji dandan lọ.—Howhinwhẹn lẹ 1:22-27.
7. Naegbọn mí dona setonuna hogbe Psalm 1:1 tọn lẹ?
7 Eyin mí ma setonuna hogbe he bẹ Psalm 1 jẹeji lẹ, mí sọgan hẹn gbigbọnọ-yinyin he Biblu pinplọn ko gọalọna mí nado wleawuna lọ bu. Na taun tọn, gbẹzan mítọn sọgan gblezọn pete. Eyin mí dotoaina ayinamẹ mẹylankan lẹ tọn, enẹ sọgan yin bẹjẹeji aijijẹ mítọn tọn. Enẹgodo mí sọgan jẹ gbẹdohẹ yé ji to gbesisọmẹ. To nukọn mẹ, mí tlẹ sọgan lẹzun atẹṣitọ mẹvlẹtọ lẹ ga. E họnwun dọ, họntọnjiji hẹ mẹylankan lẹ sọgan fọ́n gbigbọ atẹṣiṣi tọn dote to ahun mítọn mẹ bo sọgan hẹn haṣinṣan mítọn hẹ Jehovah Jiwheyẹwhe gble. (1 Kọlintinu lẹ 15:33; Jakobu 4:4) Mì gbọ mí ni ma dike enẹ ni jọ do mí go pọ́n gbede blo!
8. Etẹwẹ na gọalọna mí nado hẹn ayiha mítọn gbọṣi gbigbọnu lẹ ji?
8 Odẹ̀ na gọalọna mí nado hẹn ayiha mítọn gbọṣi gbigbọnu lẹ ji podọ nado dapana gbẹdido hẹ mẹylankan lẹ. “Mì jẹtukla nudepope tọn blo,” wẹ Paulu wlan, “ṣigba to odẹ̀ mẹ to ovẹ̀ mẹ po pẹdido po mẹ, mì nọ yí kanbiọ mìtọn hia Jiwheyẹwhe to onú popo mẹ. Jijọho Jiwheyẹwhe tọn he hú nuyọnẹn lẹpo na whlá ayiha mìtọn po linlẹn mìtọn lẹ po [to] Klisti Jesu mẹ.” Apọsteli lọ dotuhomẹnamẹ nado nọ lẹnnupọndo nuhe yin nugbo, yẹyi, jijlọ, wiwe, owanyi, wẹndagbe, jijọdagbe, po nuhe jẹna pipà lẹ po ji. (Filippinu lẹ 4:6-8) Mì gbọ mí ni nọ yinuwa sọgbe hẹ ayinamẹ Paulu tọn bo ma lẹkọyi aliho mẹylankan lẹ tọn ji gbede blo.
9. Dile etlẹ yindọ mí nọ dapana walọ ylankan lẹ, nawẹ mí nọ tẹnpọn nado gọalọna gbẹtọ wunmẹ lẹpo gbọn?
9 Dile etlẹ yindọ mí nọ gbẹ́ walọ ylankan lẹ dai, mí nọ yí zinzin do dekunnuna mẹdevo lẹ, dile apọsteli Paulu dọhona Togán Lomu tọn Feliksi “gbọn dodo, owùnza, po whẹdida he ja po tọn dali” do. (Owalọ lẹ 24:24, 25; Kọlọsinu lẹ 4:6) Mí nọ dọyẹwheho wẹndagbe Ahọluduta lọ tọn na gbẹtọ wunmẹ lẹpo, podọ mí nọ yinuwahẹ yé po homẹdagbe po. Mí deji dọ mẹhe “yè de do ogbẹ̀ madopodo mẹ lẹ” na lẹzun yisenọ bo na hùnhomẹ to osẹ́n Jiwheyẹwhe tọn mẹ.—Owalọ lẹ 13:48.
E Nọ Hùnhomẹ to Osẹ́n Jehovah Tọn Mẹ
10. Etẹwẹ na gọalọna mí nado hẹn nuhe mí plọn to oplọn mẹdetiti tọn whenu lẹ gbọṣi ayiha po ahun mítọn po mẹ?
10 Psalm-kantọ lọ zindonukọn nado dọ gando dawe ayajẹnọ lọ go dọmọ: “Homẹhunhun etọn tin to osẹ́n [Jehovah] tọn mẹ; podọ osẹ́n etọn mẹ wẹ e nọ ayihamẹlẹnpọn te to okle po ozán po.” (Psalm 1:2) Taidi devizọnwatọ Jiwheyẹwhe tọn lẹ, ‘homẹ nọ hùn mí to osẹ́n Jehovah tọn mẹ.’ To oplọn mẹdetiti tọn whenu, mí sọgan nọ ‘lẹnayihamẹpọ́n do e ji’ kavi nado nọ hia ẹ daga to whenuena e yọnbasi. Hihia adà Owe-wiwe tọn de daga na gọalọ nado hẹn ẹn gbọṣi ayiha po ahun mítọn po mẹ.
11. Naegbọn mí dona nọ hia Biblu “to okle po ozán po”?
11 “Afanumẹ nugbonọ, nuyọnẹntọ” lọ ko na mí tuli nado nọ hia Biblu egbesọegbesọ. (Matiu 24:45) Na ojlo vẹkuvẹku nado jẹakọ ganji hẹ owẹ̀n Jehovah tọn na gbẹtọvi lẹ wutu, e na yọ́n hugan dọ mí ni nọ hia Biblu “to okle po ozán po”—mọwẹ, etlẹ yin to whenuena mí ma mọ amlọndọ to whedelẹnu na whẹwhinwhẹ́n de wutu. Pita dotuhomẹna mí dọmọ: “Di ovi yọyọ to anọ́nù, mì jlo oyìnnọ ohó lọ tọn he tin matin oklọ, na mì nido whẹ́n gbọn e dali jẹ whlẹngán” kọ̀n. (1 Pita 2:1, 2) Be hiẹ nọ mọ homẹhunhun to Biblu hihia egbesọegbesọ mẹ podọ to ayihamẹlinlẹnpọn do Ohó Jiwheyẹwhe tọn po lẹndai etọn lẹ po ji to zánmẹ ya? Psalm-kantọ lọ wàmọ.—Psalm 63:6.
12. Etẹwẹ mí na nọ wà eyin mí hùnhomẹ to osẹ́n Jehovah tọn mẹ?
12 Ayajẹ kakadoi mítọn sinai do homẹhunhun tintindo to osẹ́n Jiwheyẹwhe tọn mẹ ji. Pipé po dodo po wẹ osẹ́n etọn lẹ, podọ ale susu wẹ tin to yìnyìn yé mẹ. (Psalm 19:7-11) Devi Jakobu wlan dọmọ: “Mẹdepope he doun osẹ́n mẹdekannujẹ tọn he sọgbe lọ mẹ pọ́n, bosọ nọte to e mẹ, bọ ewọ ma yin sisetọ nuwọntọ, ṣigba azọ́n lọ basitọ, omẹ lọ wẹ yè na dona to bibasi etọn mẹ.” (Jakobu 1:25) Eyin mí hùnhomẹ to osẹ́n Jehovah tọn mẹ nugbonugbo, azán dopo tata ma na nọ juwayi bọ mí ma na nọ lẹnnupọndo gbigbọnu lẹ ji. Na taun tọn, mí na yin whinwhàn nado nọ ‘dindona onú sisosiso Jiwheyẹwhe tọn lẹ’ podọ nado ze dagbenu Ahọluduta lọ tọn lẹ do otẹn tintan mẹ to gbẹzan mítọn mẹ.—1 Kọlintinu lẹ 2:10-13; Matiu 6:33.
E Nọ Taidi Atin De
13-15. Linlẹn tẹ mẹ wẹ mí sọgan tin taidi atin he yin didó do asisa osin tọn tó de te?
13 To zẹẹmẹ-bibasi do dawe dodonọ lọ ji mẹ, psalm-kantọ lọ zindonukọn dọmọ: “E na di atin he yè họ̀ndo do asisa osin tọn tó, he to sinsẹ́n etọn sẹ́n to ojlẹ etọn mẹ; amà etọn ga ma na yọ́; nudepope e to wiwà na doale.” (Psalm 1:3) Mí mẹhe to Jehovah sẹ̀n lẹ lọsu nọ tindo nuhahun to gbẹ̀mẹ dile gbẹtọ mapenọ lẹpo nọ tindo do. (Job 14:1) Mí sọgan jiya homẹkẹn po whlepọn voovo devo lẹ po tọn he gando yise mítọn go. (Matiu 5:10-12) Ṣigba, po alọgọ Jiwheyẹwhe tọn po, mí nọ penugo nado doakọnna whlepọn ehelẹ, kẹdẹdile atin he lodo ganji de nọ nọte to yujẹhọn sinsinyẹn nukọn do.
14 Atin he yin didó do osin he to sisà whepoponu tó ma nọ yọ́ to alunlun kavi akú whenu gba. Eyin mí nọ dibusi Jehovah Jiwheyẹwhe, ewọ na yin Asisa huhlọn mítọn tọn he ma na doalọte. Paulu ganjẹ Jiwheyẹwhe go na alọgọ bo sọgan dọmọ: “Yẹn sọgan wà onú popo gbọn [Jehovah] he to huhlọnna mi mẹ.” (Filippinu lẹ 4:13) Eyin mí dike gbigbọ wiwe Jehovah tọn ni nọ deanana mí bo nọ gọalọna mí to gbigbọ-liho, mí ma na yọ́, bo gbọjọ kavi kú to gbigbọ-liho gba. Mí na yin sinsẹ́nnọ to sinsẹ̀nzọn Jiwheyẹwhe tọn mẹ bo nasọ nọ do sinsẹ́n gbigbọ etọn tọn hia.—Jẹlemia 17:7, 8; Galatianu lẹ 5:22, 23.
15 Gbọn hogbe Heblu tọn lọ heyin lilẹdo “di” yiyizan dali, psalm-kantọ lọ to nuyijlẹdonugo yizan. E to onú voovo awe yijlẹdo yedelẹ go, dile yé tlẹ tindo jẹhẹnu tangan de to pọmẹ. Gbẹtọ gbọnvona atin taun, ṣigba matin ayihaawe amakikọ atin he yin didó do otọ̀ tó de tọn flinnu psalm-kantọ lọ gando kọdetọn dagbe gbigbọmẹ tọn he mẹhe ‘homẹhunhun yetọn tin to osẹ́n Jehovah tọn mẹ’ lẹ nọ tindo go. Eyin mí nọ hùnhomẹ to osẹ́n Jiwheyẹwhe tọn mẹ, azán mítọn sọgan dite di atin de tọn. Na taun tọn, mí sọgan nọgbẹ̀ kakadoi.—Johanu 17:3.
16. Etẹwutu podọ to aliho tẹ mẹ wẹ ‘nudepope he mí to wiwà nọ doale’ te?
16 Dile mí to afọdona gbẹzan dodo tọn de, Jehovah nọ gọalọna mí nado doakọnna kọgbidinamẹ whlepọn po awusinyẹnnamẹnu lẹ po tọn. Mí nọ yin ayajẹnọ podọ sinsẹ́nnọ to sinsẹ̀nzọn Jiwheyẹwhe tọn mẹ. (Matiu 13:23; Luku 8:15) ‘Nudepope he mí to wiwà nọ doale’ na ojlo Jehovah tọn wiwà wẹ yin yanwle mítọn tintan wutu. To whenuena e yindọ lẹndai etọn lẹ nọ mọ hẹndi to whepoponu podọ homẹ nọ hùn mí to gbedide etọn lẹ mẹ, mí nọ tindo kọdetọn dagbe to gbigbọ-liho. (Gẹnẹsisi 39:23; Jọṣua 1:7, 8; Isaia 55:11) Mí nọ tindo kọdetọn dagbe eyin mí tlẹ pehẹ nuhahun lẹ.—Psalm 112:1-3; 3 Johanu 2.
Mẹylankan Nọ Taidi Mẹhe Tindo Kọdetọn Dagbe
17, 18. (a) Etẹ go wẹ psalm-kantọ lọ yí mẹylankan lẹ jlẹdo? (b) Eyin mẹylankan lẹ tlẹ tindo kọdetọn dagbe to agbasa-liho, naegbọn yé ma tindo hihọ́ he dẹn-to-aimẹ?
17 Lehe ninọmẹ mẹylankan tọn gbọnvona dodonọ tọn do sọ! Eyin mẹylankan lẹ tlẹ taidi mẹhe to kọdetọn dagbe tindo to agbasa-liho na ojlẹ de, yé ma to mọwà to gbigbọ-liho gba. Hogbe psalm-kantọ lọ tọn lẹ dekunnuna ehe dọmọ: “Mẹylankan lẹ ma to mọ gba: ṣigba yé taidi núyọ he jẹhọn to fúfú. Enẹwutu mẹylankan lẹ ma na nọte to whẹdida whenu, kavi ylanwatọ to agun dodonọ lẹ tọn mẹ.” (Psalm 1:4, 5) Doayi e go dọ psalm-kantọ lọ dọ dọ “mẹylankan lẹ ma to mọ gba.” Nuhe dọ e te wẹ yindọ, yé ma taidi omẹ jijọ-di-Jiwheyẹwhe tọn lẹ, he ṣẹṣẹ yin yiyijlẹdo atin he to sinsẹ́n detọ́n bosọ nọ nọgbẹ̀ dẹn lẹ go.
18 Eyin mẹylankan lẹ tlẹ tindo kọdetọn dagbe to agbasa-liho, yé ma tindo hihọ́ dẹn-to-aimẹ gba. (Psalm 37:16; 73:3, 12) Yé taidi dawe adọkunnọ nulunọ he go Jesu donù to oló de mẹ to whenuena e yin bibiọ to e si nado dádo whẹho gúmima tọn de mẹ. Jesu dọna mẹhe to finẹ lẹ dọmọ: “Mì họ́ mìde, bosọ payi do nukunkẹn: to gege gbẹtọ tọn de mẹ ma wẹ ogbẹ̀ etọn nọte te sọn onú he ewọ tindo lẹ mẹ gba.” Nado zinnudo nuagokun ehe ji, Jesu na apajlẹ de dọ aigba dawe adọkunnọ de tọn hẹn sinsẹ́n susu jẹgbonu sọmọ bọ e basi tito nado họ́ zínhọ etọn lẹ liai bo dó dehe klo humọ lẹ nado sọgan hẹn adọkunnu etọn lẹpo. Enẹgodo dawe lọ basi tito nado dù, bo nù, bosọ dugbẹ. Ṣigba Jiwheyẹwhe dọmọ: “Hiẹ nulunọ, ozán he mẹ yè na kàn ogbẹ̀ towe biọ sọn dè we: be mẹnu tọn wẹ nuhe hiẹ wleawu etọn dai helẹ na yin?” Nado zinnudo nuagokun etọn ji, Jesu yidogọ dọmọ: “Mọkẹdẹ wẹ ewọ he bẹ adọkunnu pli na ede, bo ma yin adọkunnọ gbọn Jiwheyẹwhe dali.”—Luku 12:13-21.
19, 20. (a) Basi zẹẹmẹ lehe likun nọ yin jinjàn bo nọ yin fúfú to hohowhenu do tọn. (b) Naegbọn mẹylankan lẹ yin yiyijlẹdo núyọ go?
19 Mẹylankan lẹ ma yin “adọkunnọ gbọn Jiwheyẹwhe dali.” Enẹwutu, yé ma tindo hihọ́ kavi zínpinpẹn depope dile núyọ, yèdọ ofló he nọ nọ̀ likun go ma tindo do. To jibẹwawhé likun tọn godo to hohowhenu, e nọ yin bibẹ yì jinjàn-tẹn, yèdọ aigba de he to flala to fie yiaga de. To finẹ, kanlin lẹ nọ yin yiyizan nado dọ̀n núzinzan pinpẹn he zannu didá kavi adú ogànnọ to oglọ na lẹ gbọn likun lẹ ji nado lì zinkán lẹ do flinflin bo flé ofló sẹ̀ sọn likun lọ lẹ go. Enẹgodo, ogàn ofẹ̀nnọ likun-fúfú tọn nọ yin yiyizan nado bà zinkán, likun po núyọ lẹ po he ko flusọ́ dlan jẹhọn mẹ. (Isaia 30:24) Likun lẹ nọ flẹ́ jẹ kọmẹ to jinjàn-tẹn lọ, bọ jẹhọn nọ bẹ zinkán lẹ dlan apadopo bosọ nọ fú núyọ lẹ sọyi. (Luti 3:2) To whenuena likun ko yin jinjàn bọ okẹ́n po nuhe ma yọn-na-yizan lẹ po ko yin didesẹ godo, e nọ yin bibẹdo zínhọ mẹ kavi yin lili. (Luku 22:31) Ṣigba núyọ lẹ ko nọ yin fúfú dlangbé.
20 Kẹdẹdile likun lẹ nọ flẹ́ jẹ aigba bo nọ yin bibẹsẹdo bọ núyọ lẹ nọ yin fúfú dlan do, mọwẹ dodonọ lẹ na gbọṣi aimẹ bọ mẹylankan lẹ na yin didesẹ do niyẹn. Enẹwutu, homẹ mítọn hùn dọ mẹylankan ehelẹ na yin vivasudo kakadoi to madẹnmẹ. To whenuena yewlẹ na ko yin didesẹ, mẹhe hùnhomẹ to osẹ́n Jehovah tọn mẹ lẹ na yin didona susugege. To godo mẹ, gbẹtọvi he setonu lẹ na mọ nunina Jiwheyẹwhe tọn heyin ogbẹ̀ madopodo yí.—Matiu 25:34-46; Lomunu lẹ 6:23.
“Ali Dodonọ lẹ Tọn” Yin Didona
21. Nawẹ Jehovah ‘nọ yọ́n dodonọ lẹ’ gbọn?
21 Psalm tintan yin tadona po hogbe helẹ po: “[Jehovah] yọ́n ali dodonọ lẹ tọn: ṣigba ali mẹylankan lẹ tọn na sudo.” (Psalm 1:6) Nawẹ Jiwheyẹwhe ‘nọ yọ́n dodonọ’ lẹ gbọn? Do glido, eyin mí to afọdona gbẹzan dodowiwa tọn, mí sọgan deji dọ Otọ́ olọn mẹ tọn mítọn na doayi gbẹzan jijọ-di-Jiwheyẹwhe tọn mítọn go bo na kẹalọyi mí taidi devizọnwatọ etọn lẹ. To whenẹnu, mí sọgan bẹ magbọjẹ mítọn lẹpo do alọ etọn mẹ podọ mí dona wàmọ po nujikudo lọ po dọ e to tukla mítọn jẹ.—Ezekiẹli 34:11; 1 Pita 5:6, 7.
22, 23. Etẹwẹ na jọ do mẹylankan lẹ go podọ do dodonọ lẹ go?
22 “Ali dodonọ lẹ tọn” na gbọṣi aimẹ kakadoi, ṣigba mẹylankan tasinyẹntọ lẹ na yin vivasudo to whẹdida Jehovah tọn mẹ. Podọ “ali” kavi aliho gbẹzan yetọn tọn na sudo po yé po. Mí sọgan tindo jide to hẹndi ohó Davidi tọn lẹ mẹ dọmọ: “Na whenu pẹẹde, mẹylankan lẹ ma na tin ba: nugbo, hiẹ na yí sọwhiwhe do lẹn otẹn etọn pọ́n, e ma nasọ tin. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ. Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:10, 11, 29.
23 Lehe ayajẹ mítọn na sù sọ eyin lẹblanulọkẹyi lọ yin nina mí nado nọgbẹ̀ to paladisi aigba ji tọn de mẹ fie mẹylankan lẹ ma na tin te ba! To whenẹnu, homẹmiọnnọ lẹ po dodonọ lẹ po na duvivi jijọho nugbo tọn, na yé na nọ hùnhomẹ whepoponu to ‘osẹ́n Jehovah tọn mẹ.’ Ṣigba, jẹnukọnna ojlẹ enẹ, ‘osẹ́ndoai Jehovah tọn’ dona yin tonusena whẹ́. (Psalm 2:7a) Hosọ he bọdego na gọalọna mí nado yọ́n nuhe osẹ́ndoai enẹ yin podọ nuhe e na zẹẹmẹdo na mí podọ na whẹndo gbẹtọvi tọn lẹpo pete.
Nawẹ Hiẹ Na Na Gblọndo Gbọn?
• Naegbọn gbẹtọ jijọ-di-Jiwheyẹwhe tọn nọ yin ayajẹnọ?
• Etẹwẹ nọ dohia dọ mí nọ mọ homẹhunhun to osẹ́n Jehovah tọn mẹ?
• Nawẹ mẹde sọgan tin taidi atin he to otọ̀ tó de gbọn?
• Nawẹ ali dodonọ tọn gbọnvona mẹylankan tọn gbọn?
[Yẹdide to weda 11]
Odẹ̀ na gọalọna mí nado dapana gbẹdido hẹ ylanwatọ lẹ
[Yẹdide to weda 12]
Naegbọn dodonọ do tin taidi atin de?