Ahọluduta Jiwheyẹwhe Tọn Gandudu Nujọnu Tọn de to Egbehe

“Nawẹ otò susu, he bẹ aṣa voovo lẹ hẹn bo hunnukun to adà voovo lẹ mẹ, sọgan kọngbedopọ gbọn? E ko yin didọ dọ kiki awhàn-tọ́nmẹ sọn planẹti devo ji wẹ na kọ̀n akọ̀ gbẹtọvi tọn dopọ.”—The Age, linlinwe Australie tọn.

BE AWHÀN-TỌ́NMẸ sọn planẹti devo ji wẹ ya? Mí ma yọnẹn eyin ehe na kọ̀n akọta aigba ji tọn lẹpo dopọ kavi lala, ṣigba dọdai Biblu tọn dọhodo hunyanhunyan he to unklẹn de ji he na hẹn akọta aihọn tọn lẹ bẹ yedelẹ pli. Podọ na nugbo tọn, hunyanhunyan ehe na yin hinhẹnwa gbọn huhlọn he hugan aigba ji tọn lẹ dali.

Ahọlu Davidi Islaeli hohowhenu tọn dọ dọdai gando ninọmẹ aihọn tọn ehe go. To whenuena e yin gbigbọdo gbọn Jiwheyẹwhe dali, e wlan dọmọ: “Ahọlu aigba tọn lẹ ṣite, ogán lẹ sọ to núbla do OKLUNỌ go, podọ do mẹyiamisisadode etọn go dọ, Mì gbọ mí ni wẹ́n ogàn yetọn gbidigbidi, bo ze okàn yetọn dlangbé sọn mí dali.” (Psalm 2:2, 3; Owalọ lẹ 4:25, 26) Doayi e go dọ gandutọ aihọn tọn lẹ na bẹ yedelẹ pli bo blanú kavi diọnukunsọ Jehovah, Didatọ wẹkẹ lọ tọn, po mẹyiamisisadode etọn, kavi Ahọlu dide etọn, Jesu Klisti po go. Nawẹ ehe na jọ gbọn?

Sọgbe hẹ todohukanji ojlẹ hihia Biblu tọn po dọdai he ko mọ hẹndi lẹ po, Ahọluduta Jiwheyẹwhe tọn yin didoai to olọn mẹ to 1914, po Jesu Klisti po taidi Ahọlu.a To ojlẹ enẹ mẹ akọta aihọn tọn lẹ tindo linlẹn dopolọ. Kakati nado litaina nupojipetọ-yinyin Ahọluduta Jiwheyẹwhe tọn he ṣẹṣẹ yin jiji lọ, yé tlọ́ biọ agbàwhinwhlẹn huhlọn tọn de mẹ—enẹwẹ Awhàn Daho lọ, kavi Wẹkẹ-Whàn I.

Nukun tẹwẹ Jehovah Jiwheyẹwhe nọ yí do pọ́n nuyiwa gbẹtọvi gandutọ lẹ tọn ehe? “Mẹhe sinai to olọn lẹ mẹ na kò yé: OKLUNỌ na yí yé do davlẹ. Whenẹnu wẹ e na dọho hlan yé to homẹgble etọn mẹ, bo nasọ dobuna yé to adánjijẹ zogbe etọn mẹ.” Enẹgodo, Jehovah na dọna Visunnu etọn, Ahọlu yiamisisadode Ahọluduta lọ tọn dọmọ: “Biọ mi, yẹn nasọ yí kosi [kavi akọta] lẹ na we na ogú towe, aigba podo lẹ na nutindo towe. Opò ogàn tọn wẹ hiẹ na do gbà yé; hiẹ nasọ lì yé pọ́dọ́pọ́dọ́ di okò zẹ́nmẹtọ tọn.”—Psalm 2:4, 5, 8, 9.

Vasudo godo tọn akọta agọjẹdomẹtọ lẹ tọn ehe gbọn opò ogàn tọn dali na wá aimẹ to Amagẹdọni. Owe Biblu tọn he gbọngodo lọ, yèdọ Osọhia, do nujijọ tadona tọn ehe hia taidi “awhàn azán daho Jiwheyẹwhe Ganhunupo tọn lọ,” he “ahọlu aigba po aihọn lẹpo po tọn lẹ” to yinyin bibẹpli na. (Osọhia 16:14, 16) To nuyiwadomẹji aovi lẹ tọn glọ, akọta aigba ji tọn lẹ na wá jẹpọ to godo mẹ po yanwle dopo po—yèdọ nado fùnawhàn sọta Jiwheyẹwhe Ganhunupotọ lọ.

Ojlẹ he mẹ gbẹtọvi lẹ na bẹ yedelẹ pli nado hoavùn sọta nupojipetọ-yinyin Jiwheyẹwhe tọn to sisẹpọ po awuyiya po. Ṣigba nupaṣamẹ wẹ dọ “pọninọ” yetọn ma na hẹn ale wá na yé gba. Kakatimọ, nuyiwa yetọn na dekọtọn do bẹjẹeji jijọho he gbẹtọvi lẹpo to nukundo sọn ojlẹ dindẹn de die mẹ. Gbọnna? To awhàn tadona tọn ehe mẹ, Ahọluduta Jiwheyẹwhe tọn na “gbà ahọludu [aihọn tọn lẹ] do flinflin bo sú ahọludu he lẹpo do, ewọ bo nasọ nọte kakadoi.” (Daniẹli 2:44) Ahọluduta Jiwheyẹwhe tọn wẹ na yin gandudu he na hẹn ojlo gbẹtọvi lẹ tọn na jijọho lẹdo aihọn pé tọn di, e mayin titobasinanu gbẹtọvi tọn de gba.

Anadenanutọ Gandudu Ahọluduta lọ Tọn

Ahọluduta Jiwheyẹwhe tọn wẹ omẹ ahundoponọ susu ko hodẹ̀na gbọn didọ dali dọmọ: “Ahọludu towe ni wá. Ojlo towe ni yin wiwà to aigba go, dile e te to olọn mẹ.” (Matiu 6:10) Kakati nido yin ninọmẹ ahun mẹ tọn dáblu de, Ahọluduta Jiwheyẹwhe tọn yin gandudu nujọnu tọn de he ko wà nujiawu susu dotana sọn whenue gbọ́n e ko yin didoai to olọn mẹ to 1914. Mì gbọ mí ni gbadopọnna whẹwhinwhẹ́n tangan delẹ he dohia dọ Ahọluduta Jiwheyẹwhe tọn yin nujọnu de he to nuyiwa to gigọ́mẹ to egbehe.

Tintan whẹ́, e tindo adà anadenanu tọn huhlọnnọ podọ kọdetọn dagbenọ de he Jesu Klisti, Ahọlu zedo ofìn ji lọ yin nukọntọ na. To owhe 33 W.M., Jehovah Jiwheyẹwhe yí Jesu Klisti do basi Ota agun Klistiani tọn. (Efesunu lẹ 1:22) Sọn whenẹnu gbọ́n, Jesu ko to tatọ́-yinyin etọn yizan, bo gbọnmọ dali to nugopipe anadenanu etọn tọn dohia. Di apajlẹ, to whenuena huvẹ daho de tọ́n to Jude to owhe kanweko tintan whenu, agun Klistiani tọn yinuwa to afọdopolọji nado gọalọna hagbẹ etọn lẹ. Azọ́n alọgọnamẹ tọn de yin titobasina, bọ Balnaba po Saulu po yin didohlan sọn Antioku po nunina lẹ po.—Owalọ lẹ 11:27-30.

Mí sọgan donukun nususu humọ sọn Jesu Klisti si todin he gandudu Ahọluduta lọ tọn ko jẹ azọ́n ji. Whedepopenu he nugbajẹmẹji lẹ—yèdọ aigba sisọsisọ lẹ, huvẹ, singigọ, jẹhọn-ahizi, yujẹhọn, kavi wuwujẹgbonu osó miyọnnọ lẹ tọn—jọ, agun Klistiani Kunnudetọ Jehovah tọn lẹ tọn nọ yinuwa to niyaniya mẹ nado gọalọna yisenọ hatọ lẹ po mẹdevo lẹ po to lẹdo he mẹ onú jọ te lọ lẹ mẹ. Di dohia, to whenuena aigba sisọsisọ ylankan de jọ to Salvador to février 2001, azọ́n alọgọnamẹ tọn lẹ yin titobasina to adà otò lọ tọn lẹpo mẹ, bọ pipli Kunnudetọ Jehovah tọn lẹ tọn gọalọ sọn Canada, Guatemala, po États-Unis po. Atọ̀n to sinsẹ̀n-basitẹn yetọn lẹ mẹ po owhé he hugan 500 lẹ po wẹ yin vivọ́ gbá to ojlẹ kleun de mẹ.

Mẹjidugando Gandudu Ahọluduta Jiwheyẹwhe Tọn Lẹ

Sọn whenue gbọ́n e ko yin didoai to 1914, Ahọluduta olọn mẹ tọn Jiwheyẹwhe tọn ko to mẹjidugando etọn lẹ bẹpli sọn gbẹtọ lẹ mẹ lẹdo aihọn pé bosọ to titobasina yé. Ehe hẹn dọdai ayidego tọn de di he Isaia kandai dọmọ: “To azán podo gbè, yè na yí yonu owhé OKLUNỌ tọn [sinsẹ̀n-bibasi nugbo etọn heyin zizedaga] hẹnai to aga osó daho lẹ tọn ji, . . . akọta lẹ nasọ lìn biọ e mẹ.” Dọdai lọ dohia dọ “gbẹtọ susu” na yì osó ehe ji bo kẹalọyi anademẹ po osẹ́n Jehovah tọn lẹ po.—Isaia 2:2, 3.

Nuwiwa ehe ko dekọtọn do pipli ayidego tọn hugan egbezangbe tọn mẹ—yèdọ mẹmẹsunnu-yinyin akọjọpli tọn de he bẹ hugan Klistiani 6 000 000 hẹn to aigba he hugan 230 ji. To plidopọ akọjọpli Kunnudetọ Jehovah tọn lẹ tọn ji, e nọ saba paṣa ayidonugotọ lẹ nado mọ owanyi, jijọho, po pọninọ he tin to gbẹtọgun daho lọ lẹ ṣẹnṣẹn po, ehe duto dogbó akọta, aṣa, po ogbè tọn lẹ po ji. (Owalọ lẹ 10:34, 35) Be hiẹ ma yigbe dọ whẹpo gandudu de na penugo bo bẹ hẹnnu kanweko susu lẹ plidopọ to jijọho po kọndopọ po mẹ, e dona to nuyiwa bo hẹnai—bosọ yin gandudu nujọnu tọn de ya?

Mẹpinplọn He Ahọluduta Jiwheyẹwhe Tọn Nọ Wleawuna

Gandudu dopodopo wẹ tindo nujinọtedo lẹ he tòvi etọn lẹpo dona setonuna, bọ mẹdepope he jlo nado nọgbẹ̀ to gandudu enẹ glọ dona setonuna nujinọtedo ehelẹ. Mọdopolọ, Ahọluduta Jiwheyẹwhe tọn tindo nujinọtedo lẹ he mẹhe na pegan nado yin mẹjidugando etọn lẹpo dona setonuna. Ṣigba, matin ayihaawe, azọ́n pligidi de wẹ e yin nado hẹn ẹn yọnbasi na gbẹtọ susu sọmọ he wá sọn ninọmẹ voovo lẹ mẹ nado kẹalọyi bo hodo nujinọtedo dopolọ lẹ. Enẹwutu, whẹwhinwhẹ́n devo niyẹn he do nujọnu-yinyin Ahọluduta Jiwheyẹwhe tọn tọn hia—enẹwẹ tito mẹpinplọn kọdetọn dagbenọ etọn he nọ diọ e mayin ayiha kẹdẹ gba ṣigba ahun lọsu ga.

Nawẹ gandudu Ahọluduta lọ tọn nọ hẹn azọ́n pligidi ehe di gbọn? Gbọn aliho yẹwhehodidọ ‘sọn whédegbè jẹ whédegbè’ apọsteli lẹ tọn po Ohó Jiwheyẹwhe tọn pinplọn mẹdopodopo po dali. (Owalọ lẹ 5:42; 20:20) Nawẹ mẹpinplọn wunmẹ ehe yin kọdetọn dagbenọ sọ? Jacques Johnson, yẹwhegán Katoliki de, wlanwe to linlinwe sẹmẹsẹmẹ Canada tọn de mẹ gando vivẹnudido etọn nado diọlinlẹnna nawe de sọn Biblu pinplọn hẹ Kunnudetọ Jehovah tọn lẹ mẹ go. E dọmọ: “Yẹn jẹflumẹ bo wá doayi e go dọ avùn tata hò wẹ n’te. Yẹn jẹ ayidego ji dọ yọnnu [Kunnudetọ Jehovah tọn] ehelẹ ko yí osun susu do wleawuna haṣinṣan dagbe de hẹ vinọ yọyọ heyin ginglọndo whégbè ehe. Yé wleawuna kanṣiṣa pẹkipẹki de hẹ ẹ gbọn alọgigọna ẹn, họntọnjiji hẹ ẹ, po kọndopọ ahun mẹ tọn nujọnu tọn de zizedai po dali. To madẹnmẹ, ewọ lẹzun hagbẹ zohunhunnọ de to sinsẹ̀n yetọn mẹ podọ yẹn ma sọgan wà nudepope nado glọnalina ehe.” Dile ahun Katoliki dai tọn ehe tọn yin whinwhàn gbọn owẹ̀n Biblu tọn he Kunnudetọ Jehovah tọn lẹ plọn ẹn po walọ Klistiani tọn yetọn po dali do, mọwẹ ahun livi susu gbẹtọ lẹ tọn to yinyin whinwhàn do niyẹn lẹdo aihọn pé.

Wunmẹ mẹpinplọn ehe tọn—yèdọ mẹpinplọn Ahọluduta tọn—sinai do Biblu ji, bo nọ ze nunọwhinnusẹ́n po nujinọtedo walọ dagbe tọn etọn lẹ po daga. E nọ plọn gbẹtọ lẹ nado yiwanna bo gbògbéna yenọzo mahopọnna ninọmẹ he mẹ yé wá sọn. (Johanu 13:34, 35) E sọ nọ gọalọna gbẹtọ lẹ nado kẹalọyi tudohomẹnamẹ ehe dọmọ: “Mì yin kinkọndopọ hlan aihọn he blo; ṣigba mì ni yin mẹdiọadana gbọn hinhẹn jẹ yọyọ ayiha mìtọn tọn dali, na mì nido mọdona nuhe ojlo Jiwheyẹwhe tọn he yọ́n, alọkẹyi, bosọ sọgbe nẹ yin.” (Lomunu lẹ 12:2) To whenuena yé jo aliho gbẹzan yetọn dai tọn do bo yí homẹhun do hodo osẹ́n po nunọwhinnusẹ́n gandudu Ahọluduta lọ tọn lẹ po, livi susu gbẹtọ lẹ tọn ko mọ jijọho po ayajẹ po todin gọna nukundido họnwun lẹ na sọgodo.—Kọlọsinu lẹ 3:9-11.

Alọgọ jiawu de nado jẹ pọninọ lẹdo aihọn pé tọn ehe kọ̀n wẹ linlinnamẹwe lọ, Atọ̀họ̀-Nuhihọ́ Lọ Tọn. Gbọn aliho lẹdogbedevomẹ tọn heyin titobasina ganji lẹ po azọ́nwanu zinjẹgbonu to ogbè susu mẹ tọn lẹ po yiyizan dali, hosọ titengbe Atọ̀họ̀-Nuhihọ́ Lọ Tọn lẹ nọ yin zinzinjẹgbonu to ogbè 135 mẹ to ojlẹ dopolọ mẹ, podọ hugan 95 to kanweko ji hihiatọ etọn lẹ tọn lẹdo aihọn pé sọgan plọn nudọnamẹ lọ lẹ to ogbè yetọn titi mẹ to ojlẹ dopolọ mẹ.

Wekantọ Ṣọṣi Mormon tọn de basi todohukanji azọ́n mẹdehlan he tindo kọdetọn dagbe hugan lẹ tọn gbọnvona ṣọṣi ewọ lọsu tọn. E slẹ Atọ̀họ̀-Nuhihọ́ Lọ Tọn po Réveillez-vous! po, he nọ yin zinzinjẹgbonu gbọn Kunnudetọ Jehovah tọn lẹ dali, taidi linlinnamẹwe dagbe hugan wẹndagbe-jijlá tọn lẹ bo dọmọ: “Mẹdepope ma sọgan sawhẹdokọna Atọ̀họ̀-Nuhihọ́ Lọ Tọn po Réveillez-vous! po dọ yé nọ na tuli vọdonanu gba—kakatimọ, yé nọ fọ́n gbigbọ aṣejininọ tọn de dote he yẹn ma nọ saba mọ to owe sinsẹ̀n devo lẹ tọn mẹ. Atọ̀họ̀-Nuhihọ́ Lọ Tọn po Réveillez-vous! po nọ miọnhomẹnamẹ gbọn nudọnamẹ sinai do nugbo ji heyin dodinna ganji, bosọ sọgbe hẹ lẹnpọn dagbe he yé nọ bẹhẹn lẹ dali.”

Kunnudenu lẹ sù he dohia dọ Ahọluduta Jiwheyẹwhe tọn yin nujọnu de to egbehe bo to nuyiwa to gigọ́mẹ. Kunnudetọ Jehovah tọn lẹ nọ yí ayajẹ po zohunhun po do má “wẹndagbe ahọludu tọn” ehe hẹ kọmẹnu yetọn lẹ, bo nọ basi oylọna yé nado lẹzun mẹjidugando etọn lẹ. (Matiu 24:14) Be nukundido mọnkọtọn fọnjlodotena we ya? Hiẹ sọgan mọaleyi sọn dona he nọ wá sọn gbẹdido hẹ mẹhe to yinyin pinplọn bo to vivẹnudo nado nọgbẹ̀ sọgbe hẹ nujinọtedo Ahọluduta lọ tọn lẹ mẹ. Humọ, hiẹ sọgan duvivi nukundido lọ tọn nado nọgbẹ̀ to gandudu Ahọluduta tọn glọ to aihọn yọyọ dopagbe lọ mẹ, fie “dodo nọnọ̀.”—2 Pita 3:13.

[Nudọnamẹ Odò Tọn]

[Yẹdide to weda 4, 5]

To 1914 akọta lẹ tlọ́ biọ wẹkẹ-whàn mẹ

[Yẹdide to weda 6]

Azọ́n alọgọnamẹ sọn ojlo mẹ wá tọn nọ do nuyiwa owanyi Klistiani tọn hia

[Yẹdide to weda 7]

Lẹdo aihọn pé Kunnudetọ Jehovah tọn lẹ nọ mọaleyi sọn tito mẹpinplọn tọn dopolọ mẹ