Kanbiọ lẹ sọn Wehiatọ lẹ Dè
Etẹwẹ Jesu tindo to ayiha mẹ to whenuena e dọna devi etọn lẹ dọmọ: “Yẹn mọ Satani di abì, flẹ sọn olọn jai”?
Jesu ṣẹṣẹ de devi 70, bọ e “do yé hlan, awe awe jẹnukọn na ẹn yì tòdaho po fihe ewlọsu na jẹ lẹ po mẹ.” To whenuena omẹ 70 lọ lẹ lẹkọ, yé to ayajẹ na kọdetọn dagbe azọ́ndenamẹ yetọn tọn wutu. Yé dọmọ: “Oklunọ, yèdọ aovi lẹ yin mẹglọnọ hlan mí to oyín towe mẹ.” Whenẹnu wẹ Jesu dọna yé dọmọ: “Yẹn mọ Satani di abì, flẹ sọn olọn jai.”—Luku 10:1, 17, 18.
To tintan whenu, e sọgan taidi dọ Jesu to alọdlẹndo nujijọ he ko jọ wayi de. Ṣogan, owhe 60 to whenuena Jesu ko dọ hogbe he tin to aga ehelẹ godo, apọsteli yọnhonọ lọ Johanu yí hogbe enẹ nkọ lẹ zan to whenuena e wlan dọmọ: “Yé sọ yàn dlagọni daho lọ jẹgbonu, odàn hoho lọ, he yè nọ ylọ Lẹgba, podọ Satani, he nọ to aihọn lẹpo klọ: yè yàn ẹn dlan aigba ji, bosọ yàn angẹli etọn lẹ jẹgbonu po e po.”—Osọhia 12:9.
To whenuena Johanu wlan hogbe ehelẹ, Satani gbẹ́ pò to olọn mẹ. Nawẹ mí wagbọn do yọnẹn? Na Osọhia yin owe dọdai tọn de wutu, e mayin whenuho de gba. (Osọhia 1:1) Enẹwutu, to ojlẹ Johanu tọn mẹ, Satani ma ko yin yinyan dlan aigba ji. Na nugbo tọn, kunnudenu dohia dọ ehe ma jọ kakajẹ ojlẹ gli de to whenuena Jesu ko yin zizedo ofìn ji to 1914 taidi Ahọlu Ahọluduta Jiwheyẹwhe tọn godo.a—Osọhia 12:1-10.
To whelọnu lo, naegbọn Jesu do dọho dogbọn yinyanjẹgbonu Satani tọn sọn olọn mẹ dali taidi dọ e ko jọ wẹ nkọtọn? Weyọnẹntọ delẹ de linlẹn lọ tọ́n dọ Jesu to nugbẹna devi etọn lẹ na goyiyi he ma sọgbe didohia wutu wẹ. Yé yise dọ nuhe dọ e te, na taun tọn, wẹ yindọ: ‘Mì gbawhàn aovi lẹ tọn, ṣigba mì lẹzun awagundotọ blo. Satani lẹzun goyitọ, podọ ehe hẹn aijijẹ etọn wá to ajijimẹ.’
Mí ma sọgan tẹdo pọndohlan de go taun to whẹho ehe mẹ. Etomọṣo, yọnbasi tin taun dọ Jesu to ayajẹ po devi etọn lẹ po bo to alọdlẹndo aijijẹ sọgodo tọn Satani tọn. Jesu yọ́n wangbẹna sinsinyẹn he Lẹgba tindo hugan depope to devi etọn lẹ mẹ. Yí nukun homẹ tọn do pọ́n ayajẹ he Jesu na ko tindo to whenuena e sè dọ aovi huhlọnnọ lẹ ko yin didiọzun mẹmẹglọ hlan devi etọn heyin gbẹtọvi mapenọ lẹ! Awhàngbigba do aovi lẹ ji ehe yin numọdohlan-nukọn de poun na azán sọgodo tọn lọ whenuena Jesu, taidi Mikaẹli angẹligán lọ, na fùnawhàn hẹ Satani bo na yàn ẹn jẹgbonu sọn olọn mẹ dlan aigba ji.
E họnwun dọ to whenuena Jesu dọ dọ emi mọ Satani ‘flẹ jai,’ e to nùzindo aijijẹ Satani tọn ji taidi nude he na jọ dandan. Ehe sọgbe hẹ dọdai Biblu tọn devo lẹ he nọ dọhodo nujijọ sọgodo tọn lẹ ji taidi dọ yé ko jọ wẹ nkọtọn. Di apajlẹ, doayi lehe adà delẹ to dọdai he gando Mẹssia lọ go to Isaia 52:13–53:12 mẹ yin didọ do taidi dọ yé ko jọ wayi wẹ nkọtọn. E yọnbasi dọ Jesu to didohia po jidide po dọ yinyanjẹgbonu Satani tọn sọn olọn mẹ na wá aimẹ sọgbe hẹ lẹndai Otọ́ Etọn tọn. Jesu sọ tindo nujikudo lọ dọ to ojlẹ dide Jiwheyẹwhe tọn mẹ, Satani po aovi etọn lẹ po na yin dindọ̀n dlan odò mapote mẹ bo nasọ yin vivasudo mlẹnmlẹn to godo mẹ.—Lomunu lẹ 16:20; Heblu lẹ 2:14; Osọhia 20:1-3, 7-10.
[Nudọnamẹ Odò Tọn]
a Pọ́n Oyọnẹn He Nọ Planmẹ Sọyi Ogbẹ̀ Madopodo Mẹ, weta 10, podọ Osọhia—Hẹndi Pete Etọn Sẹpọ! weta 27, heyin zinzinjẹgbonu gbọn Kunnudetọ Jehovah tọn lẹ dali.