Ayinamẹ Dagbe Hugan lẹ Mimọ
MẸLẸPO wẹ nọ do ojlo to gbẹzan kọdetọn dagbenọ de tintindo mẹ. Nuhe sọgan gọalọ nado duvivi gbẹzan mọnkọtọn tọn to aihọn bẹwlunọ ehe mẹ wẹ ayinamẹ dagbe lẹ mimọyi po ojlo lọ nado nọ yí yé do yizan mẹ po. Ṣigba, gbẹtọ lẹ ma nọ do ojlo hia to ayinamẹ he sọgan hẹn ale wá lẹ mẹ to whepoponu gba. Mẹdelẹ ko sọalọakọ́n dọ gbẹtọ dona nọ zan gbẹzan etọn dile e jlo e do. Na nugbo tọn, kandai Biblu tọn dohia dọ, Satani, mẹhe jẹagọdo nupojipetọ-yinyin Jiwheyẹwhe tọn sọn dowhenu, ze gbẹzan jlòkoko tọn donukọnna gbẹtọvi tintan lẹ. Gẹnẹsisi 3:5 basi kandai nuhe e dọna Evi tọn dọmọ: “Jiwheyẹwhe yọnẹn dọ azán he gbè mìwlẹ dù to [atin yinyọ́n dagbe po oylan po tọn lọ] mẹ te, whenẹnu wẹ yè na hùn nukun mìtọn, bọ mìwlẹ na tin di Jiwheyẹwhe, bo nọ yọ́n onú dagbe po oylan po.”
Be Adam po Evi po penugo to enẹgodo nado nọgbẹ̀ to fẹẹ mẹ, matin kọdetọn ylankan depope, dile linlẹn yede titi tọn lẹ kẹdẹ to anadena yé ya? Paali. Kọdetọn he wá sọn tintẹnpọn nado yọ́n dagbe gbọnvona oylan mẹ lẹ hẹn yé jẹflumẹ to afọdopolọji. Yé yin whẹgbledo gbọn Jiwheyẹwhe dali to aliho he sọgbe mẹ bo bẹ gbẹzan awusinyẹn tọn de jẹeji to mapenọ-yinyin mẹ, ehe dekọtọn do okú mẹ to godo mẹ. (Gẹnẹsisi 3:16-19, 23) Mímẹpo wẹ tin to nuyiwadomẹji okú tọn glọ. Biblu dọmọ: “ylando gbọn omẹ dopo [Adam] dè biọ aihọn mẹ, podọ okú gbọn ylando dali; mọwẹ gbẹtọ lẹpo kú do, na omẹ popo wẹ waylan wutu.”—Lomunu lẹ 5:12.
Dile e tlẹ yindọ nudide Adam po Evi po tọn hẹn kọdetọn ylankan lẹ wá, mẹsusu gbẹ́ nọ tindo ayihaawe dọ nuyọnẹnnu wẹ e yin nado hodo ayinamẹ Didatọ gbẹtọvi tọn. Ṣogan, Biblu do ede hia nado yin ‘gbingbọ́n sọn Jiwheyẹwhe dè bosọ yin alenọ,’ podọ e sọgan gọalọ nado hẹn mí zun mẹhe “pegan, he yè hẹn sọgbe mlẹnmlẹn hlan azọ́n dagbe lẹpo.” (2 Timoti 3:16, 17) Matin ayihaawe, mí na yin ayajẹnọ dogọ eyin mí hodo ayinamẹ he tin to Biblu mẹ. Ehe yọ́n-na-yizan titengbe to gbẹzan whẹndo tọn mẹ.
Nugbonọ-Yinyin to Alọwle Mẹ
Sọgbe hẹ Biblu, lẹndai Jiwheyẹwhe tọn wẹ yindọ alọwle ni yin kanṣiṣa tẹgbẹ tọn. (Gẹnẹsisi 2:22-24; Matiu 19:6) Humọ, Owe-wiwe dọ dọ ‘adọ́zan alọwle tọn ma dona yin hinhẹnflu,’ ehe zẹẹmẹdo dọ kanṣiṣa ehe ma dona yin hinhẹnflu gbọn kọndopọ zanhẹmẹ tọn tintindo to gbonu alọwle tọn dali. (Heblu lẹ 13:4) Ṣigba, vlavo hiẹ na ko yọnẹn dọ alọwle susu wẹ nọ gboawupo nado jẹ nujinọtedo ehe kọ̀n to egbehe. Walọ mẹdelẹ tọn wẹ nado nọ daihun gblewa tọn hẹ mẹhe ma yin alọwlemẹ yetọn lẹ to azọ́nmẹ. Mẹdevo lẹ nọ dolalo na whẹndo yetọn nado yì zan whenu hẹ mẹdevo he mẹ yé tindo ojlo owanyi tọn te gbọnvona alọwlemẹ yetọn. Mẹdelẹ tlẹ nọ jo alọwlemẹ yetọn do nado yì nọ̀ hẹ mẹdevo he yin jọja hugan, bo nọ dín whẹjijọ dọ ehe nọ hẹn yé tindo numọtolanmẹ jọja mẹ gigọwa po ayajẹnọ-yinyin po tọn, dile e yin do to whẹho Veronica tọn heyin nùdego to hosọ he jẹnukọn mẹ.
Ṣigba, gbemima nado hẹn ojlo mẹdetiti tọn lẹpo di mahopọnna kọdetọn lẹ ma na hẹn ayajẹ dẹn-to-aimẹ wá gba. Ronald sọgan dekunnu ehe tọn. Na e kudeji dọ gbẹzan emitọn sọgan pọnte dogọ wutu, e jo asi etọn do nado yì wleawuna whẹndo yọyọ de po yọnnu devo he e ko to yìyì hẹ to nuglọ na owhe ṣidopo bọ e ko ji ovi awe na ẹn po. Ṣigba, ojlẹ vude to whenuena e ko doalọtena alọwle etọn godo, yọnnu he e yiwanna lọ jo e do! Ronald gbọ bo yì nọ̀ hẹ mẹjitọ etọn lẹ to godo mẹ. E basi zẹẹmẹ ninọmẹ etọn tọn nado yin “mẹdèpo tọn.” Apajlẹ dopo poun wẹ enẹ yin. Walọyizan mọnkọtọn he nọ yin whinwhàn gbọn ojlo ṣejannabi tọn lẹ dali ko hẹn gbẹdai po gbakija whẹndo tọn po sudeji hugan gbede pọ́n tọn, podọ ehe nọ hẹn yajiji wá na mẹsusu—yèdọ mẹho po yọpọvu po.
To alọ devo mẹ, ayinamẹ Biblu tọn lẹ hihodo nọ dekọtọn do ayajẹ nujọnu tọn mẹ. Roberto he tindo numimọ enẹ tọn dọmọ: “Ayinamẹ Biblu tọn lẹ ko gọalọna mi ma nado hẹn asi ṣie bu. Mí ma nọ tindo ayajẹ nujọnu tọn eyin mí jẹ omọ̀ lọ mẹ nado yì hẹ mẹdevo he ma yin alọwlemẹ mítọn, yèdọ eyin etlẹ taidi dọ mẹlọ yọnwhanpẹ taun. Oplọn Biblu tọn ko gọalọna mi nado yọ́n pinpẹn alọwlemẹ ṣie he ko nọpọ́ hẹ mi na owhe susu tọn.” Ayinamẹ Biblu tọn lọ dọ “mẹde yí danú do zan do asi vuwhenu etọn tọn go blo” yí adà tangan de wà to gbẹzan Roberto tọn mẹ. (Malaki 2:15) Ninọmẹ devo tẹlẹ mẹ wẹ mí sọgan mọaleyi sọn ayinamẹ Jiwheyẹwhe tọn lẹ mẹ te?
Ovi Mítọn lẹ Go Pinpọn Whẹ́n
To nudi owhe kande die wayi, linlẹn lọ gbayipe dọ mẹjitọ lẹ ma dona nọ ze dogbó susu dai to whenuena yé to ovi yetọn lẹ go pọ́n whẹ́n. E taidi nuhe sọgbe hẹ lẹnpọn dagbe dọ ovi lẹ ni yin dotẹnmẹna nado nọ basi nudide yetọn titi gando linlẹn po walọ yetọn lẹ po go. Yanwle lọ wẹ nado dapana alọhinhẹndotena nukọnyiyi yetọn. To fidelẹ, aliho wepinplọn tọn he ma tlẹ yin tito-basina ganji lẹ nọ yin didoai, bọ wehọmẹvi lẹ nọ vò nado yì wehọmẹ to whenue e jlo yé bo nọ basi nudide lehe ojlẹ ayidedai tọn yetọn na dẹ̀n sọ po obá he mẹ yé na plọnnu jẹ po tọn gọna nudide susu devo lẹ. Aliho nuyiwa wehọmẹ ehelẹ dopo tọn wẹ “nado na dotẹnmẹ ovi lẹ nado nọ dọ numọtolanmẹ yetọn lẹpo tọ́n matin homọdọdomẹgo kavi alọgọ mẹho lẹ tọn.” To egbehe, ayinamẹtọ nuyiwa gbẹtọvi tọn delẹ gbẹsọ nọ jẹagọdo nujọnu-yinyin mẹplọnlọ-domẹgo delẹ tọn, etlẹ yin to whenuena mẹjitọ lẹ mọdọ nuhudo tin nado domẹplọnlọ ovi lẹ go po owanyi po.
Etẹwẹ yin kọdetọn lọ? Mẹsusu yise dọ alọjodokọjinamẹ to ovi pinplọn whenu ko na mẹdekannujẹ ovi lẹ zẹjlẹgo. Yé lẹndọ ehe wẹ zọ́n bọ sẹ́nhẹngba po amasin adínọ ṣiṣizan po to susudeji. Dodinnanu de heyin bibasi to États-Unis dohia dọ 70 to kanweko ji mẹhe yin hokanse lẹ tọn wẹ lẹndọ ovi lẹ po jọja lẹ po ma nọ mọ anademẹ yí sọn mẹjitọ lẹ si dile e jẹ do. Na mẹsusu, “anademẹ numakiyana mẹjitọ lẹ tọn” wẹ hẹn sòdedomẹ to wehọmẹ po sẹ́nhẹngba sẹhundaga jọja lẹ tọn devo lẹ po wá. Podọ etlẹ yin to whenuena kọdetọn lọ lẹ ma sinyẹn sọmọ, mẹjitọ lẹ po ovi lẹ po nọ jiya nugandomẹgo ylankan ovi pinplọn matin anademẹ dagbe tọn.
Etẹwẹ Biblu tindo nado dọ gando whẹho ehe go? Sọgbe hẹ ayinamẹ Owe-wiwe tọn, mẹjitọ lẹ dona nọ yí aṣẹpipa yetọn zan to owanyi po nujikudo po mẹ. Biblu dọmọ: “Ayiha yọpọvu tọn mẹ wẹ nululu mlin do; ṣigba obá anademẹ tọn na yàn ẹn dẹn sọn e dè.” (Howhinwhẹn lẹ 22:15) Na nugbo tọn, mẹplọnlọ-domẹgo mẹjitọ lẹ tọn dona nọ sọgbe hẹ ninọmẹ lẹ. Walọmimiọn, mawazẹjlẹgo, po mẹtọnhopọn po dona nọ deanana mẹplọnlọ-domẹgo depope. Gbọnmọ dali e nọ do owanyi hia. Eyin mẹjitọ lẹ nọ do aṣẹpipa yetọn hia po owanyi po bo ma nọ fiẹ zẹjlẹgo, e na gọalọna yé tlala nado tindo kọdetọn dagbe.
Mẹsusu ko tindo kọdetọn dagbe gbọn ayinamẹ ehelẹ yíyí do yizan mẹ dali. Arturo, sunnu owhe 30-mẹvi Mexique tọn de, he wlealọ to agọe, dọmọ: “Otọ́ ṣie hẹn ẹn họnwun na yẹn po nọvisunnu ṣie lẹ po dọ ewọ po mama po wẹ tindo aṣẹpipa to whẹndo lọ mẹ. Yé ma nọ whleawu gbede nado domẹplọnlọ mí go gba. Etomọṣo, yé nọ tindo whenu to whepoponu nado dọho na mí. Todin he yẹn ko whẹ́n mẹho, yẹn tindo pekọ to gbẹzan dagbe he yẹn to zinzan mẹ, podọ yẹn yọnẹn dọ anademẹ dagbe he yẹn mọyi wẹ gọalọ to ehe mẹ na taun tọn.”
Mọaleyi Sọn Ayinamẹ Dagbe Hugan lẹ Mẹ
Ohó Jiwheyẹwhe tọn, Biblu, bẹ ayinamẹ dagbe hugan he tin na gbẹtọvi lẹ hẹn. E ma yin whẹndo lẹ kẹdẹ wẹ anademẹ etọn tin na gba. E nọ gọalọ nado hẹn mí pegan to adà susu mẹ, na e nọ plọn mí lehe mí na yinuwa gbọn to aihọn ehe mẹ, fie suhugan gbẹtọ lẹ tọn ma nọ jlo nado kẹalọyi dọ Asisa nuyọnẹn tọn he yiaga de ni deanana gbẹzan yetọn na ale yede titi tọn te.
Jehovah Jiwheyẹwhe, Didatọ gbẹtọvi lẹ tọn, na jide gbọn psalm-kantọ Davidi dali dọmọ: “Yẹn na plọn we, yẹn nasọ yí afọ towe do ali he ji hiẹ na gbọ̀n: yẹn na yí nukun ṣie do dewe hẹ we.” (Psalm 32:8) Yí nukun homẹ tọn do pọ́n nuhe e zẹẹmẹdo dọ Mẹdatọ lọ ni to nukun zedo mí ji nado basi hihọ́ na mí sọn owùnu lẹ mẹ! Todin, kanbiọ he dopodopo mítọn dona kanse ede wẹ yindọ: ‘Be yẹn na yí whiwhẹ do kẹalọyi anademẹ Jehovah tọn he nọ basi hihọ́ namẹ ya?’ Ohó etọn gbọn owanyi dali dọ na mí dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.”—Howhinwhẹn lẹ 3:5, 6.
Pinplọn nado yọ́n Jehovah nọ biọ vivẹnudido po mẹdezejo po, ṣigba gbẹtọvi lẹ sọgan jẹ yanwle ehe kọ̀n gbọn Biblu gblamẹ. Aliho he mẹ Jehovah jlo dọ mí ni nọgbẹ̀ te “tindo opagbe aihọn he tin to dinvie tọn, po aihọn he ja tọn po.” Asisa ale daho tọn wẹ e yin na nugbo tọn, to pọndohlanmẹ na kọdetọn dagbe he e bẹhẹn lẹ.—1 Timoti 4:8; 6:6.
Eyin nuyọnẹn he tin to Biblu mẹ po ale he nọ wá sọn yíyí i do yizan mẹ po nọ fọnjlodotena we, yí Ohó Jiwheyẹwhe tọn hihia po ayihamẹlinlẹnpọn deji po do basi yanwle titengbe de to gbẹzan towe mẹ. Mọwiwà na gọalọna we nado duto avùnnukundiọsọmẹ egbehe tọn lẹ podọ dehe tin to nukọn ja lẹpo ji. To yidogọmẹ, hiẹ nasọ plọnnu gando todido gbẹninọ to aihọn yọyọ Jiwheyẹwhe tọn mẹ go, fie mẹlẹpo na yin pinplọn gbọn Jehovah dali te, bọ jijọho yetọn na sù.—Isaia 54:13.
[Yẹdide to weda 5]
Ayinamẹ Biblu tọn sọgan hẹn kanṣiṣa alọwle tọn lodo
[Yẹdide lẹ to weda 6]
Ayinamẹ Biblu tọn wẹ yin dodonu anademẹ dagbe tọn, ṣogan e nọ na dotẹnmẹ nado deayidai
[Yẹdide to weda 7]
Mẹhe nọ yí ayinamẹ Biblu tọn do yizan mẹ lẹ sọgan duvivi gbẹzan he tin to jlẹkaji de tọn