“Le Wẹ Mì Ni Nọ Hodẹ̀ Do”

BE HIẸ yọ́n Odẹ̀ Oklunọ tọn ya? Jesu Klisti wẹ ze odẹ̀ apajlẹ tọn ehe dai. To whenuena Jesu to Yẹwhehodidọ Osó ji tọn etọn he diyin lọ dọ, e dọmọ: “Le wẹ mì ni nọ hodẹ̀ do.” (Matiu 6:9) Na Jesu wẹ plọn mí odẹ̀ enẹ wutu, e nọ saba yin yiylọdọ Odẹ̀ Oklunọ tọn.—Paternoster to Latin-gbè mẹ.

Livi susu gbẹtọ lẹ tọn ko plọn Odẹ̀ Oklunọ tọn lọ do tamẹ bo nọ to vivọ́ ẹ dọ gbọzangbọzan, vlavo to azán lẹpo gbè. To owhe agọe tọn lẹ mẹ, mẹsusu ko vọ́ odẹ̀ ehe dọ to wehọmẹ kavi to nujijọ gbangba tọn lẹ whenu. Naegbọn Odẹ̀ Oklunọ tọn do nọ yin sisi na sọmọ?

Cyprien heyin sinsẹ̀n-nuplọnmẹtọ owhe kanweko atọ̀ntọ tọn, wlan dọmọ: “Odẹ̀ tẹwẹ sọgan sọ yin gbigbọmẹ tọn hugan dehe yin nina mí gbọn Klisti dali . . . ? Odẹ̀ nugbo tẹwẹ sọgan yin hihò hlan Otọ́ lọ hugan dehe yin didọna mí gbọn Ovi lọ heyin Nugbo dali?”—Johanu 14:6.

To sinsẹ̀n-nuplọnmẹ Ṣọṣi Katoliki tọn mẹ, Odẹ̀ Oklunọ tọn nọ yin pinpọnhlan taidi “odẹ̀ titengbe hugan Klistiani lẹ tọn.” The World Book Encyclopedia ylọ odẹ̀ ehe dọ “hogbe dodonu yise Klistiani tọn lẹ,” nado do lehe e yin nujọnu to sinsẹ̀n mẹylọhodotọklisti tọn lẹpo mẹ do hia.

Ṣigba, mí dona yọnẹn dọ suhugan mẹhe nọ vọ́ Odẹ̀ Oklunọ tọn dọ lẹ tọn ma nọ mọnukunnujẹemẹ to gigọ́mẹ gba. Linlinnamẹwe Ottawa Citizen, Canada tọn dọmọ: “E sọgan bọawu na we eyin hiẹ nọ̀ sinsẹ̀n Klistiani tọn mẹ pọ́n nado dọ hogbe Odẹ̀ Oklunọ tọn lẹ tọn sọn tamẹ po awuyiya po matin agbọ́ yíyí, ṣigba e sọgan vẹawuna we hugan nado dọ ẹ dẹẹdẹ po nukunnumọjẹnumẹ po.”

Be nujọnu wẹ e yin nugbonugbo dọ mí ni mọnukunnujẹ odẹ̀ he mí nọ hò hlan Jiwheyẹwhe lẹ mẹ ya? Naegbọn Jesu do ze Odẹ̀ Oklunọ tọn dai na mí? Zẹẹmẹ tẹwẹ e tindo na we? Mì gbọ mí ni na ayidonugo hlan kanbiọ ehelẹ todin.