Be Hiẹ Yọ́n Ayajẹ He Nunamẹ Nọ Hẹnwa Ya?
MẸMẸYỌNNU nugbonọ de ko yí zohunhun do wà sinsẹ̀nzọn Klistiani tọn na nudi owhe 50. Mahopọnna dọ nugandomẹgo yọnhowhe tọn lẹ ko de huhlọn etọn pò tlala, e magbe nado dla Plitẹnhọ Ahọluduta tọn he ṣẹṣẹ yin gbigbá lọ pọ́n. E ganjẹ awà mẹmẹsunnu Klistiani de tọn go, bo biọ plitẹnhọ lọ mẹ bosọ zinzọnlin dẹẹdẹ hlan yanwle etọn kọ̀n tlọlọ—enẹwẹ apotin nunina tọn. E ze akuẹ vude he e ko to jijọ na lẹndai ehe wutu do apotin lọ mẹ. Dile etlẹ yindọ e ma sọgan wà huhlọnzọ́n nado doalọ to plitẹnhọ lọ gbigbá mẹ, e jlo nado gọalọ.
Yọnnu Klistiani ehe sọgan hẹn we flin yọnnu nugbonọ devo—“asuṣiọsi wamọnọ” he Jesu pọnhlan to whenue e to abọgan-kuẹ pẹvipẹvi awe dlan do adọkunnu potin tẹmpli tọn mẹ. Zẹẹmẹ ma yin bibasi na mí gando ninọmẹ etọn lẹ go, ṣigba to ojlẹ enẹ mẹ godonọnamẹ asu de tọn matindo sọgan ze yọnnu de do nuhahun sinsinyẹn mẹ to akuẹzinzan-liho. Na jide tọn lẹblanu nawe ehe tọn wà Jesu, na e mọnukunnujẹ ninọmẹ blawu etọn mẹ to gigọ́mẹ. To whenuena e to asuṣiọsi ehe dohia devi etọn lẹ taidi apajlẹ de, Jesu zinnudeji dọ nunina pẹvi etọn nọtena “onú he e tindo lẹpo . . . , yèdọ gbẹ̀mẹnu etọn lẹpo.”—Malku 12:41-44.
Naegbọn yọnnu he to nuhudo mẹ taidi asuṣiọsi wamọnọ ehe na basi avọ́sinsan mọnkọtọn? Na jide tọn, whẹwhinwhẹ́n lọ wẹ yindọ e ko ze ede jo na Jehovah Jiwheyẹwhe mlẹnmlẹn, omẹ lọ he ahọnkan sinsẹ̀n-bibasi etọn tọn yin zize sinai do tẹmpli lọ mẹ to Jelusalẹm. Mahopọnna dọ e ma sọgan wà nususu sọmọ, e jlo nado nọgodona sinsẹ̀nzọn wiwe. Podọ vivẹnudido nado na nudepope he go e pé na ko hẹn ayajẹ nujọnu tọn wá na ẹn.
Nunina Nado Nọgodona Azọ́n Jehovah Tọn
Nutindo agbasa tọn lẹ po akuẹ po nina ko yin adà tangan sinsẹ̀n-bibasi wiwe ṣeke tọn sọn dowhenu, podọ e ko hẹn ayajẹ daho wá to whepoponu. (1 Otannugbo lẹ 29:9) To Islaeli hohowhenu tọn mẹ nunina lẹ nọ yin yiyizan, e ma yin nado doaṣọ́na tẹmpli lọ kẹdẹ wẹ gba, ṣigba nado sọ dike adà sinsẹ̀n-bibasi Jehovah tọn lẹpo ni to nukọnzindo to finẹ egbesọegbesọ. Osẹ́n lọ zinnudeji dọ ovi Islaeli tọn lẹ dona nọ na madao sinsẹ́n yetọn lẹ tọn nado nọgodona Levinu he nọ wà sinsẹ̀nzọn to tẹmpli mẹ lẹ. Ṣigba Levinu lẹ lọsu dona nọ na madao nuhe yé mọyi lẹ tọn hlan Jehovah.—Osọha lẹ 18:21-29.
Dile etlẹ yindọ Klistiani lẹ ko yin hinhẹn jẹ mẹdekannu sọn nubiọtomẹsi alẹnu Osẹ́n tọn lẹ si, nunọwhinnusẹ́n lọ dọ devizọnwatọ Jiwheyẹwhe tọn lẹ dona nọ basi nunina agbasa tọn lẹ nado nọgodona sinsẹ̀n-bibasi wiwe ṣeke ma diọ gba. (Galatianu lẹ 5:1) To yidogọmẹ, Klistiani owhe kanweko tintan tọn lẹ mọ ẹn taidi ayajẹnu nado gọalọ to kọgbọ hinhẹnwa na mẹmẹsunnu yetọn he to nuhudo mẹ lẹ mẹ. (Owalọ lẹ 2:45, 46) Apọsteli Paulu flinnu Klistiani lẹ dọ kẹdẹdile Jiwheyẹwhe gbọn dagbewà kavi alọtútlú dali wleawu onú dagbe lẹ tọn na yé do, mọwẹ yelọsu dona do alọtútlú hia mẹdevo lẹ do. E wlan dọmọ: “Naṣẹ mẹhe yin adọkunnọ to aihọn he mẹ lẹ, dọ yé yigo blo, dọ yé sọ dotudo adọkun he ma [nọ] nọte go blo, adavo do Jiwheyẹwhe ogbẹ̀nọ go, mẹhe na onú popo mí susugege nado dugbẹ yetọn; dọ yé ni nọ wà dagbe, yé ni nọ sù to azọ́n dagbe lẹ mẹ, yé ni nọ wleawu nado mánamẹ, bosọ jlo nado nọ kọndopọ; na yé ni bẹpli do agbànhọ mẹ na yede dòdó dagbe de pọ́n ojlẹ he ja, na yé nido hẹn ogbẹ̀ lọ go ehe yin ogbẹ̀ nugbonugbo.” (1 Timoti 6:17-19; 2 Kọlintinu lẹ 9:11) Na nugbo tọn, sọn numimọ edetiti tọn mẹ, Paulu sọgan nọgodona hogbe Jesu tọn lẹ dọ: “Nado namẹ do dona [kavi ayajẹ] hú nado mọyi.”—Owalọ lẹ 20:35.
Nunina Klistiani Tọn to Egbehe
To egbehe, devizọnwatọ Jehovah tọn lẹ gbẹ́ nọ yí nutindo agbasa tọn yetọn lẹ zan nado gọalọna ode awetọ podọ nado nọgodona azọ́n Jiwheyẹwhe tọn. Mẹhe ma tlẹ tindo alọnu sọmọ lẹ nọ na nuhe go yé pé. “Afanumẹ nugbonọ, nuyọnẹntọ” lọ yọnẹn dọ azọngban emitọn to Jehovah nukọn wẹ e yin nado yí akuẹ he yin nina ehe lẹpo zan to aliho dagbe hugan mẹ. (Matiu 24:45) Nunina lọ lẹ nọ yin yiyizan nado hẹn azọ́n alahọ lẹ tọn zindonukọn, basi lẹdogbedevomẹ Biblu po owe sinai do Biblu ji lẹ tọn po bo zin yé jẹgbonu, basi tito na plidopọ Klistiani tọn lẹ, plọnazọ́n nugopọntọ tomẹyitọ lẹ po mẹdehlan lẹ po bo do yé hlan, wleawuna alọgọ kọgbọ tọn to nugbajẹmẹji whenu, podọ na lẹndai titengbe susu devo lẹ. Mì gbọ mí ni ze ayidonugo do dopo to lẹndai enẹlẹ mẹ ji—yèdọ alọgigọ nado gbá nọtẹn sinsẹ̀n-bibasi tọn lẹ.
Kunnudetọ Jehovah tọn lẹ nọ pli whlasusu to osẹ dopo mẹ to Plitẹnhọ Ahọluduta tọn yetọn lẹ mẹ nado mọaleyi sọn nuplọnmẹ gbigbọmẹ tọn po gbẹdido dagbe po mẹ. Ṣigba, to otò susu mẹ, ninọmẹ akuẹzinzan tọn lẹ nọ zọ́n bọ Kunnudetọ lẹdo lọ tọn lẹ ma sọgan mọ akuẹ he pé nado gbá Plitẹnhọ Ahọluduta tọn lẹ matin alọgọ mimọyi jẹnukọn gba. Enẹwutu, to 1999, Kunnudetọ Jehovah tọn lẹ bẹ tito de jẹeji nado sọgan yí akuẹ he yin bibẹpli to aigba adọkunnọ lẹ ji zan nado gbá Plitẹnhọ Ahọluduta tọn lẹ to otò he yin wamọnọ lẹ mẹ. Humọ, mẹdezejotọ fọtọ́n susu lẹ ko ze whenu po azọ́nyinyọnẹn yetọn lẹ po jo, bo ko wazọ́n whlasusu to lẹdo otò ehelẹ tọn he tin to olá lẹ mẹ. To họgbigbá whenu, Kunnudetọ lẹdo lọ tọn lẹ nọ plọn aliho họgbigbá po nukunpedonugo po tọn lẹ, podọ Akuẹ-bẹpli Plitẹnhọ Ahọluduta tọn nọ hẹn ẹn yọnbasi nado họ̀ azọ́nwanu he jẹ lẹ. Kunnudetọ he to plitẹnhọ yọyọ ehelẹ yizan todin lẹ dopẹ́ taun dọ yisenọ hatọ yetọn lẹ basi nunina whenu po akuẹ po tọn. Yelọsu nọ basi nunina to sunmẹsunmẹ nado penukundo Plitẹnhọ Ahọluduta tọn yọyọ lọ go podọ nado suahọ akuẹzinzan họgbigbá lọ tọn, bo gbọnmọ dali gọalọ nado gbá Plitẹnhọ Ahọluduta tọn susu dogọ.
Aliho họgbigbá tọn po azọ́nwanu lẹdo lọ tọn lẹ po wẹ nọ yin yiyizan nado gbá Plitẹnhọ Ahọluduta tọn lẹ. Dile etlẹ yindọ plitẹnhọ ehelẹ ma nọ gẹdẹ sọmọ, yé yọnwhanpẹ, yọn-na-yizan, bo jẹaṣọ́. To whenuena tito họgbigbá tọn lọ bẹjẹeji to 1999, nudi otò wamọnọ 40 wẹ e bẹhẹn. Sọn whenẹnu gbọ́n, tito họgbigbá tọn lọ ko gbloada bo bẹ aigba mọnkọtọn lẹ 116 hẹn, ehe gando hugan odaa agun Kunnudetọ Jehovah tọn lẹ tọn go lẹdo aihọn pé. To owhe atọ́n he wayi lẹ mẹ, Plitẹnhọ Ahọluduta tọn hugan 9 000 ko yin gbigbá to tito ehe glọ, ehe zẹẹmẹdo dọ plitẹnhọ yọyọ hugan 5 nọ yin gbigbá to azán dopodopo ji! Ṣogan, to aigba 116 ehelẹ ji, nuhudo gbẹ́ tin na Plitẹnhọ Ahọluduta tọn yọyọ 14 500. Po dona Jehovah tọn po podọ gbọn ojlo po alọtútlú Kunnudetọ lẹ tọn po dali lẹdo aihọn pé, todido mítọn wẹ yindọ akuẹ na tin nado hẹn pekọwa na nuhudo ehe.—Psalm 127:1.
Plitẹnhọ Ahọluduta Tọn lẹ Nọ Yidogọna Jideji
Nuyiwadomẹji tẹwẹ vivẹnudido vẹkuvẹku ehe ko tindo do Kunnudetọ otò enẹlẹ tọn ji podọ do azọ́n yẹwhehodidọ Ahọluduta tọn ji? To lẹdo susu mẹ, sọha pliwatọ lẹ tọn nọ jideji to aliho ayidego tọn mẹ to whenuena Plitẹnhọ Ahọluduta tọn yọyọ de yin gbigbá godo. Linlin he wá sọn Burundi ehe do apajlẹ ehe tọn dopo hia dọmọ: “Eyin Plitẹnhọ Ahọluduta tọn de yin gbigbá fó, e nọ gọ́ to afọdopolọji. Di apajlẹ, Plitẹnhọ Ahọluduta tọn de yin gbigbá na agun de he madozẹnzẹn sọha pliwatọ etọn lẹ tọn diblayi 100. Plitẹnhọ Ahọluduta tọn yetọn yọyọ lọ yin awuwlena na omẹ 150 nido sinai to e mẹ bo vò. To whenuena e yin gbigbá fó, gbẹtọ 250 wẹ nọ wá opli lẹ.”
Naegbọn jideji mọnkọtọn do nọ tin? Whẹwhinwhẹ́n dopo wẹ yindọ, to whedelẹnu gbẹtọ lẹ nọ vẹnudo pipli wẹnlatọ Ahọluduta tọn lẹ tọn he ma tindo plitẹnhọ dagbe de ṣigba he dona nọ pli to atin-sa kavi to glemẹ. To otò de mẹ, pipli sinsẹ̀n tọn pẹvipẹvi lẹ ko yin kinkọndopọ hẹ whẹho danuwiwa akọ ṣinṣinyan tọn, podọ osẹ́n nọ biọ dọ opli sinsẹ̀n tọn lẹpo ni yin bibasi to ohọ̀ sinsẹ̀n-bibasi tọn de mẹ.
Plitẹnhọ yetọn titi tintindo sọ nọ gọalọna Kunnudetọ Jehovah tọn lẹ nado dohia mẹhe to lẹdo yetọn mẹ lẹ dọ yé ma yin devi sinsẹ̀ngán de tọn. Wekantẹn alahọ Kunnudetọ Jehovah tọn lẹ tọn he to Zimbabwe wlan dọmọ: “To ojlẹ he wayi lẹ mẹ, mẹmẹsunnu lẹdo ehe tọn lẹ nọ saba pli to owhé mẹdetiti tọn lẹ gbè, bọ omẹ lẹdo lọ tọn lẹ nọ yí yinkọ whétọ owhé he gbè yé nọ pli do tọn do yọ́n agun lọ. Yé nọ dlẹnalọdo mẹmẹsunnu lẹ taidi hagbẹ ṣọṣi Mẹdaho le tọn. Ehe lẹpo wẹ to didiọ todin dile gbẹtọ lẹ nọ mọ ohia lẹ he nọ do plitẹnhọ dopodopo hia hezeheze taidi ‘Plitẹnhọ Ahọluduta Kunnudetọ Jehovah tọn lẹ tọn.’ ”
Nunamẹtọ Ayajẹnọ Lẹ
“Jiwheyẹwhe yiwanna nunamẹtọ homẹhunhunnọ,” wẹ apọsteli Paulu wlan. (2 Kọlintinu lẹ 9:7) Na nugbo tọn, nunina dahodaho lẹ nọ gọalọ taun. Ṣigba adà daho hugan akuẹ he nọ yin nina do azọ́n Kunnudetọ Jehovah tọn lẹ tọn tamẹ nọ wá sọn apotin nunina tọn he tin to Plitẹnhọ Ahọluduta tọn lẹ mẹ. Nunina lẹpo wẹ yin nujọnu bo ma nọ yin nukun pẹvi yí-do-pọ́n, vlavo yé sù kavi whè. Flindọ Jesu sinai do fie e sọgan mọ asuṣiọsi wamọnọ lọ hlan te to whenuena e to abọgan-kuẹ pẹvipẹvi awe etọn lẹ na. Angẹli lẹ po Jehovah po sọ mọ ẹn ga. Mí ma tlẹ yọ́n yinkọ asuṣiọsi lọ tọn, ṣigba Jehovah hẹn ẹn diun dọ nuyiwa mẹde-yido-sanvọ́ tọn etọn yin kinkàndai to Biblu mẹ nado gbọṣi aimẹ.
To yidogọmẹ na Plitẹnhọ Ahọluduta tọn gbigbá, nunina mítọn lẹ nọ nọgodona adà azọ́n titengbe Ahọluduta tọn he pò lẹpo. Gbekinkọndopọ to aliho ehe mẹ nọ na mí whẹwhinwhẹ́n nado jaya podọ nado “yin gege . . . gbọn opẹ́ susu dali hlan Jiwheyẹwhe.” (2 Kọlintinu lẹ 9:12) Mẹmẹsunnu mítọn Bénin tọn lẹ na linlin dọ: “Egbesọegbesọ odẹ̀ pẹdido tọn susu nọ hẹji yì Jehovah dè na alọgọ he nọ yin mimọyi sọn mẹmẹsunnu-yinyin lẹdo aihọn pé tọn lọ si to akuẹzinzan-liho.” To ojlẹ dopolọ mẹ, mí mẹhe nọ nọgodona azọ́n Ahọluduta tọn lọ to akuẹzinzan-liho lẹpo nọ tindo ayajẹ he nunamẹ Klistiani tọn nọ hẹnwa!
[Apotin/Yẹdide to weda 22, 23]
Aliho He mẹ Mẹdelẹ De Nado Nanú te Lẹ
NUNINA LẸ NA AZỌ́N LẸDO AIHỌN PÉ TỌN
Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Nunina lẹ Na Azọ́n Lẹdo Aihọn Pé Tọn—Matiu 24:14” do lẹ mẹ.
To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ heyin nina sọn ojlo mẹ wá lẹ sọgan sọ yin didohlan Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ tọn he nọ penukundo otò mìtọn go. Akuẹyiwema lẹ dona yin awuwlena do “Watch Tower” tamẹ. Aṣọdonu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.
TITO NUNINA HE SINAI DO NINỌMẸ JI TỌN
Akuẹ sọgan yin nina do Watch Tower tamẹ to tito vonọtaun de glọ, ehe mẹ eyin nunamẹtọ lọ biọ ẹ, nunina lọ sọgan yin gigọjo hlan ẹn. Na nudọnamẹ dogọ, jaale kanwehlan Wekantẹn Akuẹbẹhẹntọ tọn gbọn adlẹsi he tin to aga lọ yiyizan dali.
TITO NUNAMẸ HOMẸDAGBE TỌN
Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi sinsẹ̀nzọn lẹdo aihọn pé Ahọluduta lọ tọn. Ehelẹ wẹ:
Alọgọ Owù-Nujijọ Tọn: Watch Tower sọgan yin nina alemọyi nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de.
Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zizedo kandai ogú mimá tọn mẹ kavi sọgan yin súsú lẹkọ to okú godo hlan Watch Tower, to kọndopọmẹ hẹ nubiọtomẹsi akuẹsẹdotẹn lẹdo lọ tọn lẹ.
Kandai Akuẹ Ajọ́ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina Watch Tower taidi nunina tlọlọ de.
Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba fininọ lẹ, gbọn hinhẹn ohọ̀ po aigba de po dote na nunamẹtọ lọ na gbẹwhenu etọn dali. Dọna alahọ otò towe tọn whẹpo do basi nunina ohọ̀ po aigba po tọn depope.
Nunina Whemẹwhemẹ Tọn: Nunina whemẹwhemẹ tọn yin tito de to ehe mẹ mẹde nọ na akuẹ azọ́nwatẹn Watch Tower tọn de. To ehe mẹ, nunamẹtọ lọ kavi mẹhe yin dide gbọn nunamẹtọ lọ dali, nọ yí akuẹ tangan de to owhe dopodopo mẹ na pipòtọ gbẹzan etọn tọn. Nunamẹtọ lọ nọ mọ ale takuẹ didepo tọn de yí to owhe he mẹ nunina whemẹwhemẹ tọn lọ yin didoai.
Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Watch Tower gbọn kandai sọgbe hẹ osẹ́n de bibasi dali, kavi yinkọ Watch Tower tọn sọgan yin kinkàndai taidi mẹhe na dugu nunina lẹ tọn. Nunina heyin bibasi do titobasinanu sinsẹ̀n tọn de tamẹ sọgan de takuẹ he nọ yin bibiọ delẹ pò.
Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito bibasi delẹ to adà nunamẹtọ lọ tọn mẹ. Nado gọalọna mẹhe to jijlo nado hẹn azọ́n lẹdo aihọn pé Kunnudetọ Jehovah tọn lẹ tọn mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Espagne-gbè po Glẹnsigbe po mẹ he hosọ etọn yin Charitable Planning to Benefit Kingdom Service Worldwide [Tito Nunamẹ Homẹdagbe Tọn na Alemọyi Sinsẹ̀nzọn Ahọluduta Tọn Lẹdo Aihọn Pé]. Alọnuwe lọ yin kinkàn nado na nudọnamẹ lẹ dogbọn aliho voovo he mẹ nunina lẹ sọgan yin bibasi te vlavo todin kavi gbọn ogú jijodai to okú godo dali. To alọnuwe lọ hihia po hodọdopọ hẹ ayinamẹtọ osẹ́n po takuẹ po tọn yetọn titi godo, mẹsusu ko penugo nado nọgodona azọ́n Kunnudetọ Jehovah tọn lẹ tọn lẹdo aihọn pé bo de takuẹ he nọ yin bibiọ lẹ pò taun to mọwiwà mẹ. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.
Na nudọnamẹ dogọ, hiẹ sọgan dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi heyin sislẹ to odò kavi to wekantẹn Kunnudetọ Jehovah tọn lẹ tọn he nọ penukundo otò mìtọn go mẹ.
Wekantẹn Tito Nunamẹ Homẹdagbe Tọn
Watch Tower Bible and Tract Society of Pennsylvania
100 Watchtower Drive,
Patterson, New York 12563-9204
Alokan: (845) 306-0707
[Yẹdide to weda 20, 21]
Zambie
Plitẹnhọ Kunnudetọ Jehovah tọn lẹ tọn hoho lẹ po yọyọ lẹ po
République centrafricaine