Sẹ̀n Jiwheyẹwhe ‘po Ayiha Dopo Po’
JU LẸ po mẹdiọzun Ju lẹ po pli lẹdo devi Jesu Klisti tọn lẹ. Hùnwhẹ Pẹntikọsti tọn whenu wẹ, podọ jonọ ehelẹ wá sọn fie dẹn do Jelusalẹm lẹ, taidi Lomu to whèyihọ, podọ Paltia to whèzẹtẹn. Ogbè voovo lẹ wẹ to yinyin sisè to gbẹtọgun lọ ṣẹnṣẹn. Ṣogan, Galilinu wẹ devi Jesu tọn he to hodọna yé lẹ. Awuji jonọ ehelẹ bọ delẹ to yé mẹ kanse dọ: “Etẹwutu ka wẹ mí mẹdopodopo do to sisè to ogbè mítọn mẹ, to fie yè ji mí te?”—Owalọ 2:8.
Apọsteli Pita fọ́nṣite bo basi zẹẹmẹ nuhewutu azọ́njiawu he yé to mimọ lọ do wá aimẹ tọn. Gbẹtọgun lọ yinuwa to afọdopolọji. Nudi omẹ yọyọ 3 000 wẹ yin bibaptizi! (Owalọ 2:41) Dile agun lọ tlẹ jideji po awuyiya po, yé gbọṣi pọninọ mẹ. “Agun mẹhe yise lẹ tọn sọ tin to ayiha dopo mẹ podọ to gbigbọ dopo mẹ” wẹ Biblu-kàntọ Luku dọ.—Owalọ 4:32.
Nudi gbẹtọ 3 000 he yin bibaptizi to azán Pẹntikọsti 33 W.M. gbè lẹ jlo na gbọṣi Jelusalẹm na ojlẹ de nado sọgan plọnnu dogọ gando yise yọyọ yetọn go. Ṣigba yé ma wá po linlẹn lọ po nado nọ̀ finẹ dẹn gba. Enẹwutu, tito akuẹjọ ojlẹ gli tọn de yin bibasi. Yisenọ delẹ desọn ojlo mẹ bo sà nutindo yetọn lẹ bosọ bẹ akuẹ nuhe yé sà lẹ tọn wá na apọsteli lẹ na yé nido má na mẹhe tin to nuhudo mẹ lẹ. (Owalọ 2:42-47) Gbigbọ owanyi po alọtútlú po tọn nankọtọn die!
Klistiani nugbo lẹ nọ do gbigbọ owanyi po alọtútlú po tọn mọnkọ hia to whepoponu. To egbehe, agun Klistiani tọn gbẹ́ to Jehovah sẹ̀n to kọndopọ mẹ zọnmii “to ayiha dopo mẹ podọ to gbigbọ dopo mẹ.” Klistiani dopodopo nọ gbọn alọtútlú dali yí whenu, huhlọn, po akuẹ yetọn lẹ po zan nado lá wẹndagbe lọ bo nọgodona onú Ahọluduta Jiwheyẹwhe tọn lẹ.—Pọ́n apotin lọ “Aliho He mẹ Mẹdelẹ De Nado Nanú te Lẹ.”
[Apotin to weda 6, 7]
ALIHO HE MẸ MẸDELẸ DE NADO NANÚ TE LẸ
NUNINA LẸ NA AZỌ́N LẸDO AIHỌN PÉ TỌN
Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Azọ́n Lẹdo Aihọn Pé Tọn” do lẹ mẹ.
To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483 tlọlọ, kavi hlan wekantẹn alahọ Kunnudetọ Jehovah tọn lẹ tọn he nọ penukundo otò mìtọn go. Akuẹyiwema he yin didohlan gbọn adlẹsi he tin to aga lọ gblamẹ lẹ dona yin awuwlena do “Watchtower” tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.
TITO NUNINA HE SINAI DO NINỌMẸ JI TỌN
Akuẹ sọgan yin nina Watch Tower Bible and Tract Society of Pennsylvania to tito vonọtaun de glọ nado yin yiyizan lẹdo aihọn pé. Ṣigba, eyin nunamẹtọ lọ gọ̀ nunina lọ biọ, e na yin gigọjo hlan ẹn. Na nudọnamẹ dogọ, jaale kanwe hlan Wekantẹn Akuẹbẹhẹntọ tọn gbọn adlẹsi he tin to aga lọ yiyizan dali kavi tẹkàn hlan (718) 560-7500.
TITO NUNAMẸ HOMẸDAGBE TỌN
Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi sinsẹ̀nzọn lẹdo aihọn pé Ahọluduta lọ tọn. Ehelẹ wẹ:
Alọgọ Owù-Nujijọ Tọn: Watch Tower Bible and Tract Society of Pennsylvania sọgan yin nina alemọyi nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de.
Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, kandai akuẹsẹdo tọn lẹ, kavi akuẹ gbọjẹ gaa mẹdopodopo tọn lẹ sọgan yin zizedo kandai ogú mimá tọn mẹ kavi sọgan yin súsú lẹkọ to okú godo hlan Watch Tower Bible and Tract Society of Pennsylvania, to kọndopọ mẹ hẹ nubiọtomẹsi akuẹsẹdotẹn lẹdo lọ tọn lẹ.
Kandai Akuẹ Ajọ́ Tọn lẹ po Ale Ajọ́ Tọn lẹ Po: Kandai akuẹ ajọ́ tọn lẹ po ale ajọ́ tọn lẹ po sọgan yin nina Watch Tower Bible and Tract Society of Pennsylvania taidi nunina tlọlọ de.
Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba fininọ lẹ, gbọn hinhẹn ohọ̀ po aigba de po dote na nunamẹtọ lọ na gbẹwhenu etọn dali. Dọna alahọ otò towe tọn whẹpo do basi nunina ohọ̀ po aigba po tọn depope.
Nunina Whemẹwhemẹ Tọn: Nunina whemẹwhemẹ tọn yin tito de to ehe mẹ mẹde nọ na akuẹ azọ́nwatẹn tangan he Kunnudetọ Jehovah tọn lẹ nọ yizan de. To ehe mẹ, nunamẹtọ lọ kavi mẹhe yin dide gbọn nunamẹtọ lọ dali, nọ yí akuẹ tangan de to owhe dopodopo mẹ na pipotọ gbẹzan etọn tọn. Nunamẹtọ lọ nọ mọ ale takuẹ didepo tọn de yí to owhe he mẹ nunina whemẹwhemẹ tọn lọ yin didoai te.
Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan Watch Tower Bible and Tract Society of Pennsylvania gbọn kandai sọgbe hẹ osẹ́n de bibasi dali, kavi yinkọ Watch Tower Bible and Tract Society of Pennsylvania tọn sọgan yin kinkàndai taidi mẹhe na dugu nunina lẹ tọn. Nunina he yin bibasi do titobasinanu sinsẹ̀n tọn de tamẹ sọgan de takuẹ he nọ yin bibiọ delẹ pò.
Dile hogbe lọ tito nunamẹ homẹdagbe tọn” dohia do, nunina wunmẹ ehelẹ nọ biọ tito bibasi delẹ to adà nunamẹtọ lọ tọn mẹ. Nado gọalọna mẹhe to jijlo nado hẹn azọ́n lẹdo aihọn pé Kunnudetọ Jehovah tọn lẹ tọn mọaleyi sọn wunmẹ tito nunamẹ homẹdagbe tọn delẹ mẹ, alọnuwe de ko yin awuwlena to Espagne-gbè po Glẹnsigbe po mẹ he hosọ etọn yin Charitable Planning to Benefit Kingdom Service Worldwide [Tito Nunamẹ Homẹdagbe Tọn Na Alemọyi Sinsẹ̀nzọn Ahọluduta Tọn Lẹdo Aihọn Pé]. Alọnuwe lọ yin kinkàn nado na nudọnamẹ lẹ dogbọn aliho voovo he mẹ nunina lẹ sọgan yin bibasi te vlavo todin kavi gbọn ogú jijodai to okú godo dali. To alọnuwe lọ hihia po hodọdopọ hẹ ayinamẹtọ osẹ́n po takuẹ po tọn yetọn titi po godo, mẹsusu ko penugo nado nọgodona nuwiwa sinsẹ̀n tọn po kọgbọ hẹnwanamẹ tọn Kunnudetọ Jehovah tọn lẹ tọn po lẹdo aihọn pé bo de takuẹ he nọ yin bibiọ lẹ pò taun to mọwiwà mẹ. Alọnuwe ehe sọgan yin mimọyi gbọn vọkan dopo bibiọ sọn Wekantẹn Tito Nunamẹ Homẹdagbe tọn dè tlọlọ dali.
Na nudọnamẹ dogọ, hiẹ sọgan dọnsẹpọ Wekantẹn Tito Nunamẹ Homẹdagbe tọn, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò mìtọn go.
Wekantẹn Tito Nunamẹ Homẹdagbe Tọn
Watch Tower Bible and Tract Society of Pennsylvania
100 Watchtower Drive
Patterson, New York 12563-9204
Alokan: (845) 306-0707