Kanbiọ lẹ sọn Wehiatọ lẹ Dè

Be hogbe Stefani tọn lẹ to Owalọ lẹ 7:59 mẹ dohia dọ odẹ̀ lẹ dona nọ yin hihò hlan Jesu wẹ ya?

Owalọ lẹ 7:59 dọmọ: “Yé dlan zannu do Stefani, [bọ e to oylọ basi, NW ], bo to didọmọ, Jesu Oklunọ, yí gbigbọ ṣie.” Hogbe ehelẹ ko fọ́n kanbiọ lẹ do ayiha mẹ na mẹdelẹ, na Biblu dọ dọ Jehovah wẹ yin ‘Mẹhe nọ sè odẹ̀’ wutu. (Psalm 65:2) Be Stefani hodẹ̀ hlan Jesu nugbonugbo wẹ ya? Be ehe dohia dọ Jesu po Jehovah po yin mẹdopolọ wẹ ya?

Biblu Wiwe Lọ dọ dọ Stefani “to Jiwheyẹwhe ylọ.” Abajọ bọ mẹsusu do wá tadona dopolọ kọ̀n hẹ zẹẹmẹ basi do Biblu ji tọ́ Matthew Henry he dọmọ: “Tofi Stefani hodẹ̀ hlan Klisti, podọ mílọsu dona nọ wà nudopolọ.” Nalete, pọndohlan enẹ ma sọgbe gba. Etẹwutu?

Barnes’ Notes on the New Testament yigbe madoadudẹ́ji dọ: “Hogbe lọ Jiwheyẹwhe ma sọawuhia to [vọkan] dowhenu tọn mẹ, bo masọ dona sọawuhia to lẹdogbedevomẹ lọ mẹ gba. E ma sọawuhia to [alọnuwe-hihia] kavi lẹdogbedevomẹ hohowhenu tọn lẹ depope mẹ.” Nawẹ hogbe lọ “Jiwheyẹwhe” wá yin zizedo wefọ ehe mẹ gbọn? Weyọnẹntọ Abiel Abbot Livermore ylọ ehe dọ “apajlẹ nuṣiwa nuplọnmẹ agọ̀ lẹdogbedevomẹtọ lẹ tọn.” Enẹwutu, suhugan lẹdogbedevomẹ egbezangbe tọn lẹ de alọdlẹndonu lalo tọn ehe hlan Jiwheyẹwhe sẹ̀.

Etomọṣo, lẹdogbedevomẹ susu dọ dọ Stefani “hodẹ̀” hlan Jesu. Podọ nudọnamẹ odò tọn to Traduction du monde nouveau mẹ dohia dọ hogbe lọ “to oylọ basi” sọgan zẹẹmẹdo “ovẹvivẹ; dẹ̀hiho.” Be ehe ma dohia dọ Jesu yin Jiwheyẹwhe Ganhunupotọ ya? Lala. Vine’s Expository Dictionary of Old and New Testament Words basi zẹẹmẹ dọ to ninọmẹ ehe mẹ, hogbe Glẹki dowhenu tọn lọ, e·pi·ka·leʹo, zẹẹmẹdo: “Nado basi oylọ, nado vẹvẹ; . . . nado basi obiọ to aṣẹpipa de dè.” Paulu yí hogbe dopolọ zan to whenuena e dọmọ: “Yẹn yí owhẹ̀ ṣie hlan Sesali.” (Owalọ lẹ 25:11) Enẹwutu, The New English Bible dọ po gbesisọ po dọ Stefani “dawhá ylọ” Jesu.

Etẹwẹ whàn Stefani nado basi obiọ ehe nkọtọn? Sọgbe hẹ Owalọ lẹ 7:55, 56, Stefani, “gọ́ na [gbigbọ wiwe], e zín nukun do aga do olọn mẹ, bosọ mọ gigo Jiwheyẹwhe tọn, po Jesu po to ote to adusilọ Jiwheyẹwhe tọn mẹ.” Na nugbo tọn, Stefani dona ko basi obiọ etọn lẹ hlan Jehovah to oyín Jesu tọn mẹ. Ṣigba, dile e to Jesu he ko fọnsọnku lọ mọ to numimọ mẹ, Stefani sọgan basi oylọna ẹn tlọlọ, dọmọ: “Jesu Oklunọ, yí gbigbọ ṣie.” Stefani yọnẹn dọ huhlọn ko yin nina Jesu nado fọ́n oṣiọ lẹ. (Johanu 5:27-29) Enẹwutu e biọ to Jesu si nado whlá gbigbọ, kavi huhlọn ogbẹ̀ tọn etọn, kakajẹ gbeegbe Jesu na fọ́n ẹn hlan ogbẹ̀ jọmaku to olọn mẹ.

Be hodidọ Stefani tọn kleun ehe ze apajlẹ dẹ̀hiho hlan Jesu tọn dai wẹ ya? Paali. Whẹwhinwhẹ́n dopo wẹ yindọ, Stefani basi vogbingbọn he họnwun to Jesu po Jehovah po ṣẹnṣẹn, na kandai lọ dọ dọ e mọ Jesu “to ote to adusilọ Jiwheyẹwhe tọn mẹ.” Humọ, ninọmẹ ehelẹ yin ninọmẹ vonọtaun. Whladopo gee he hogbe mọnkọtọn sọ yin didọhlan Jesu te wẹ whenue apọsteli Johanu dọho tlọlọ na Jesu to whenuena e mọ Ẹn to numimọ mẹ.—Osọhia 22:16, 20.

Dile etlẹ yindọ Klistiani lẹ to egbehe nọ hodẹ̀ yetọn lẹpo hlan Jehovah Jiwheyẹwhe tlọlọ, yelọsu yise mlẹnmlẹn dọ Jesu wẹ “fọnsọnku po ogbẹ̀ po.” (Johanu 11:25) Kẹdẹdile e ko wà do na Stefani, yise mọnkọtọn to nugopipe Jesu tọn nado fọ́n hodotọ etọn lẹ sọn okú mẹ sọgan gọalọna mí bo hẹn mí dote to ojlẹ whlepọn tọn lẹ mẹ.