Be Hiẹ Yọnẹn Ya?

Naegbọn ahun devi Stefani tọn ma gbàdo to whenue e pehẹ homẹkẹn?

STEFANI pannukọn pipli sunnu lẹ tọn de he jẹagọdo e. Taidi hagbẹ whẹdatẹn daho hugan Islaeli tọn, yèdọ Sanhedlin, whẹdatọ 71 enẹlẹ tin to sunnu huhlọnnọ hugan akọta lọ tọn lẹ mẹ. Yé yin bibẹpli gbọn Yẹwhenọ Daho Kaifa dali, mẹhe yin nukọntọ to whẹdatẹn lọ to osun delẹ die wayi whenue Jesu yin kú-whẹ̀ dá na. (Mat. 26:57, 59; Owalọ 6:8-12) Dile yé to whẹsadokọnamẹtọ lalo lẹ hẹnwa debọdo-dego, yé doayi nupaṣamẹ de go—nukunmẹ Stefani tọn “taidi nukunmẹ angẹli de tọn.”—Owalọ 6:13-15.

Etẹwẹ gọalọna Stefani bọ ahun etọn ma gbàdo to ninọmẹ he dobu enẹ nkọ mẹ? Whẹpo Stefani do yin hinhẹn po huhlọn po yì Sanhedlin nukọn, e ko nọ hẹn alọnu ede tọn ján to lizọnyizọn etọn mẹ to gigọ́ mẹ to nuyiwadomẹji huhlọnnọ gbigbọ Jiwheyẹwhe tọn glọ. (Owalọ 6:3-7) To whenue e to owhẹ̀ nukọn, gbigbọ enẹ dopolọ yinuwado e ji taidi homẹmiọnnamẹtọ podọ nuflinmẹtọ de. (Joh. 14:16, Odò.) To whenue Stefani to avùnlọyina ede po adọgbigbo po, dile e yin kinkandai to Owalọ lẹ weta 7 mẹ do, gbigbọ wiwe hẹn nudi wefọ Owe-wiwe Heblu tọn 20 kavi humọ wá oflin mẹ na ẹn. (Joh. 14:26) Ṣigba, yise Stefani tọn yin hinhẹn lodo dogọ to whenue e mọ numimọ de he mẹ Jesu ṣite to adusilọ Jiwheyẹwhe tọn mẹ te.—Owalọ 7:54-56, 59, 60.

Mílọsu sọgan wá pannukọn nukunvandomẹ po homẹkẹn po to gbèdopo. (Joh. 15:20) Gbọn Ohó Jiwheyẹwhe tọn yíyí do na núdùdù míde to gbesisọ mẹ, gọna zohunhunnọ-yinyin to lizọnyizọn lọ mẹ dali, mí nọ hùn dotẹnmẹ dote na gbigbọ Jehovah tọn nado yinuwado mí ji. Mí nasọ mọ huhlọn nado nọtegli pannukọn nukundiọsọmẹ bosọ hẹn jijọho ahun mẹ tọn mítọn go.—1 Pita 4:12-14.