Kanbiọ lẹ sọn Wehiatọ lẹ Dè

Nawẹ Samsọni sọgan gbọṣi Nazilinu-yinyin mẹ to alọdido oṣiọ mẹhe ewọ lọsu ko hù lẹ tọn go godo gbọn?

To Islaeli hohowhenu tọn mẹ, mẹde sọgan dopà sọn ojlo mẹ wá nado lẹzun Nazilinu na ojlẹ tangan de.a Dopo to osẹ́n he blá mẹhe dopà mọnkọtọn lẹ mẹ wẹ yindọ: “To azán he ewọ de ede dovo hlan OKLUNỌ lọ lẹpo mẹ ewọ ma na wá sẹpọ oṣiọ de gba. Ewọ ma na hẹn ede zun mawé na otọ́ etọn gba, kavi na onọ̀ etọn, na nọvisunnu etọn, kavi na nọviyọnnu etọn, whenuena yé kú gba.” Etẹwẹ na jọ eyin mẹde “kú ajiji to e dali”? Alọdido oṣiọ de go to nujijọ ajiji mọnkọtọn de whenu na hẹn Nazilinu-yinyin etọn flu. Enẹwutu, anademẹ lọ yin nina dọmọ: “Azán nukọn tọn lẹ na yin ovọ́.” Ewọ dona jugbọn nuyiwa lẹ̀wé tọn de mẹ bo gọ̀ ojlẹ Nazilinu-yinyin tọn lọ bẹ.—Osọha lẹ 6:6-12.

Nalete, Nazilinu-yinyin Samsọni tọn gbọnvo. Whẹpo Samsọni do yin jiji, angẹli Jehovah tọn dọna onọ̀ etọn dọmọ: “Pọ́n, hiẹ na mọhò, bo ji visunnu de; odalunhi de ma na wá ota etọn ji: na ovi lọ na yin Nazilinu hlan Jiwheyẹwhe sọn adọ̀ mẹ: ewọ nasọ ṣẹ nado to Islaeli whlẹn sọn alọ Filistinu lẹ tọn mẹ.” (Whẹdatọ 13:5) Samsọni ma dopà Nazilinu-yinyin tọn gba. Jiwheyẹwhe wẹ de e taidi Nazilinu, podọ e na yin Nazilinu to gbẹzan etọn lẹpo mẹ. Osẹ́n lọ ma nado doalọ oṣiọ go ma sọgan yin yiyizan to whẹho etọn mẹ. Eyin osẹ́n lọ gando e go bọ e doalọ oṣiọ de go to nujijọ ajiji de mẹ, nawẹ e sọgan gọ̀ gbẹzan Nazilinu-yinyin tọn he e ko zan sọn whenuena e yin jiji gbọ́n bẹjẹeji gbọn? Enẹwutu, e họnwun dọ nuhe yin bibiọ to mẹhe yin Nazilinu to gbẹwhenu yetọn lẹpo mẹ si gbọnvo to aliho delẹ mẹ na dehe yin bibiọ to mẹhe yin Nazilinu sọn ojlo mẹ wá lẹ si.

Lẹnnupọndo gbedide he Jehovah na omẹ atọ̀n heyin Nazilinu to gbẹwhenu yetọn lẹpo mẹ lẹ ji—Samsọni, Samuẹli, po Johanu Baptizitọ po—he yin nùdego to Biblu mẹ. Dile mí ko mọ do wayi, odalunhi ma dona jẹ ota Samsọni tọn. Hanna dopà gando Samuẹli, ovi he e na wá ji go, dọmọ: “Yẹn na na ẹn hlan OKLUNỌ to azán ogbẹ̀ etọn tọn lẹpo mẹ, odalunhi de ma na wá ota etọn go.” (1 Samuẹli 1:11) Angẹli Jehovah tọn sọ dọ gando Johanu Baptizitọ go dọmọ: “E ma [dona] nù ovẹn kavi ahàn sinsinyẹn de.” (Luku 1:15) Humọ, “Johanu . . . tindo na avọ̀ etọn ofún kanklosọpoawenọ tọn, bosọ tindo gbaja ayú tọn to adà etọn mẹ; núdùdù etọn sọ wẹ owẹ̀n po owín akú po.” (Matiu 3:4) Depope to omẹ atọ̀n ehelẹ mẹ ma yin gbedena ma nado sẹpọ oṣiọ gba.

Dile etlẹ yindọ Samsọni yin Nazilinu de, e yin dopo to whẹdatọ he Jehovah ze tite nado whlẹn Islaelivi lẹ sọn alọ mẹhe to yé hẹngble lẹ tọn mẹ lẹ mẹ. (Whẹdatọ 2:16) Podọ to azọ́n ehe hinhẹndi mẹ, e doalọ oṣiọ lẹ go. To nujijọ de mẹ, Samsọni hù Filistininu 30 bo yí avọ̀ yetọn lẹ. To nukọn mẹ, e zindonukọn bo to kẹntọ lẹ hò liai, bosọ “yí hùhù daho de do hù yé sudo.” E sọ yí aglànkahú yọyọ kẹtẹkẹtẹ de tọn do hù omẹ fọtọ́n. (Whẹdatọ 14:19; 15:8, 15) Samsọni wà ehe lẹpo po godonọnamẹ Jehovah tọn po bosọ mọ nukundagbe etọn. Owe-wiwe dlẹnalọdo e taidi sunnu yisenọ he ze apajlẹ dagbe dai na mí.—Heblu lẹ 11:32; 12:1.

Be hogbe lọ dọ Samsọni tlẹ́n kinnikinni de “dile ewọ do ko tlẹ́n gbọgbọẹvu de [do awe] do” dohia dọ gbọgbọẹvu lẹ tintlẹ́n yin aṣa he gbayipe de to azán etọn gbè wẹ ya?

Kunnudenu de ma tin dọ to ojlẹ Whẹdatọ Islaeli tọn lẹ tọn mẹ, nuhe gbayipe wẹ e yin dọ gbẹtọ lẹ ni tlẹ́n gbọgbọẹvu lẹ gba. Whẹdatọ 14:6 dọmọ: “Gbigbọ OKLUNỌ tọn sọ wá [Samsọni] ji po huhlọn po, ewọ sọ tlẹ́n [kinnikinni de do awe] dile ewọ do ko tlẹ́n gbọgbọẹvu de [do awe] do, ewọ masọ tindo nude to alọ etọn mẹ.” Hodidọ ehe sọgan ko yin nuyijlẹdonugo de.

Hodidọ lọ ‘ewọ tlẹ́n ẹn do awe’ sọgan tindo zẹẹmẹ voovo awe. Samsọni sọgan ko tlẹ́n aglàn kinnikinni lọ tọn kavi tlẹ́n kinnikinni lọ lọsu do awe to aliho de mẹ. Eyin zẹẹmẹ tintan lọ wẹ hodidọ ehe zẹẹmẹdo, to whenẹnu mí sọgan dọ dọ gbẹtọ sọgan wà nudopolọ na gbọgbọẹvu de nugbonugbo. Gbọnmọ dali, nuyijlẹdonugo lọ to didohia dọ e bọawu na Samsọni nado yí alọ tata do tlẹ́n kinnikinni de kẹdẹdile yè sọgan wà na gbọgbọẹvu de do. Ṣigba, eyin kinnikinni lọ lọsu wẹ Samsọni tlẹ́n do awe lo? To whenẹnu, zẹẹmẹ lọ ma sọgan yin nudevo de hugan nuyijlẹdonugo. Nuagokun nuyijlẹdonugo lọ tọn na yin dọ gbigbọ Jehovah tọn na huhlọn Samsọni nado wà azọ́n de he biọ huhlọn he hugan jọwamọ tọn. Depope he whẹho lọ na yin, nuyijlẹdonugo he mí mọ to Whẹdatọ 14:6 mẹ dohia dọ po alọgọ Jehovah tọn po, kinnikinni huhlọnnọ de ma dobuna Samsọni kẹdẹdile gbọgbọẹvu de ma sọgan hẹn gbẹtọ paa de jọsi do.

[Nudọnamẹ Odò Tọn]