‘Pali Akuẹ Gege Tọn’ Dindin to Egbehe
“Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de.”—MATIU 24:14.
1, 2. (a) Etẹwẹ Ju azán Jesu gbè tọn lẹ lẹn gando Ahọluduta Jiwheyẹwhe tọn go? (b) Etẹwẹ Jesu wà nado hẹn gbẹtọ lẹ mọnukunnujẹ nuhe Ahọluduta lọ yin nugbonugbo mẹ, podọ etẹwẹ yin kọdetọn lọ lẹ?
DIBLAYIN Ju lẹpo wẹ to nukundo Ahọluduta Jiwheyẹwhe tọn po jejejininọ po to whenuena Jesu wá aigba ji. (Matiu 3:1, 2; 4:23-25; Johanu 1:49) Ṣigba, to tintan whenu, suhugan yetọn ma mọnukunnujẹ obá he mẹ e na gbloada bo yí aṣẹpipa zan jẹ mẹ gba; mọjanwẹ yé ma mọnukunnujẹemẹ dọ gandudu olọn mẹ tọn de wẹ e na yin do niyẹn. (Johanu 3:1-5) Mẹhe tlẹ lẹzun hodotọ Jesu tọn delẹ ma mọnukunnujẹ nuhe Ahọluduta Jiwheyẹwhe tọn yin kavi nuhe yé dona wà nado lẹzun gandutọgbẹ́ hẹ Klisti mẹ to gigọ́mẹ gba.—Matiu 20:20-22; Luku 19:11; Owalọ lẹ 1:6.
2 To nukọn mẹ, Jesu yí sọwhiwhe do plọn nususu devi etọn lẹ, gọna oló pali akuẹ gege tọn he yin hodọdeji to hosọ he jẹnukọn mẹ, bo dohia yé dọ nujọnu wẹ e yin nado sinyẹnlin to Ahọluduta olọn tọn dindin mẹ. (Matiu 6:33; 13:45, 46; Luku 13:23, 24) Ehe dona ko yinuwado yé ji sisosiso na to madẹnmẹ yé yí adọgbigbo do jẹ wẹndagbe Ahọluduta tọn lá ji matin nuṣikọ jẹ opodo aigba tọn, yèdọ nuhe owe Owalọ lẹ tọn dekunnuna to gigọ́mẹ.—Owalọ lẹ 1:8; Kọlọsinu lẹ 1:23.
3. Etẹwẹ Jesu dọ gando Ahọluduta lọ go to whenuena e to alọdlẹndo azán mítọn gbè?
3 Nalete, etẹwẹ dogbọn azán mítọn dali? Dona he paladisi aigba ji tọn na hẹnwa to Ahọluduta lọ glọ lẹ to yinyin lilá na gbẹtọ livi susu lẹ. To dọdai tangan Jesu tọn mẹ gando “opodo aihọn tọn” go, e zinnudeji tlọlọ dọmọ: “Yè nasọ dọyẹwheho wẹndagbe ahọludu tọn he lẹ to aigba fininọ lẹpo mẹ na okunnu de hlan akọta lẹpo; whenẹnu wẹ opodo na wá.” (Matiu 24:3, 14; Malku 13:10) E sọ basi zẹẹmẹ dọ azọ́n pligidi ehe na yin wiwà mahopọnna aliglọnnamẹnu, avùnnukundiọsọmẹnu, po homẹkẹn he vẹadi lẹ po. Etomọṣo, e na jidide ehe dọ: “Mẹhe doakọnna kakajẹ opodo, mẹdopolọ wẹ yè na whlẹn gán.” (Matiu 24:9-13) Ehe lẹpo nọ biọ gbigbọ mẹde-yido-sanvọ́ po mẹdezejo tọn po he ajọwatọ tomẹyitọ lọ dohia to oló Jesu tọn mẹ. Be mẹhe nọ do yise po zohunhun mọnkọtọn po hia to Ahọluduta lọ dindin mẹ lẹ tin to egbehe ya?
Ayajẹ He Nọ Dekọtọn sọn Nugbo lọ Mimọ Mẹ
4. Nuyiwadomẹji tẹwẹ nugbo Ahọluduta lọ tọn tindo do gbẹtọ lẹ ji to egbehe?
4 Ajọwatọ he yin nùdego to oló Jesu tọn mẹ gọ́ na ayajẹ susu to whenuena e mọ nuhe yin ‘pali akuẹ gege tọn’ to nukun etọn mẹ. Ayajẹ enẹ whàn ẹn nado wà nuhe go e pé lẹpo nado họ̀ pali lọ. (Heblu lẹ 12:1) Mọdopolọ to egbehe, nugbo lọ gando Jiwheyẹwhe po Ahọluduta etọn po go nọ dọ̀n gbẹtọ lẹ dogo bosọ nọ whàn yé. Ehe hẹn mí flin nuhe Mẹmẹsunnu A. H. Macmillan dọ, mẹhe wlanwe gando aliho he mẹ e dín Jiwheyẹwhe bo dindona lẹndai Etọn na gbẹtọvi lẹ te go to owe lọ Faith on the March mẹ dọmọ: “Gbẹtọ fọtọ́n susu lẹ pò to nuhe yẹn ko mọ lọ dinmọ to whemẹwhemẹ. Podọ yé ma yí nude do gbọnvo na yẹn po hiẹ po, na yé wá sọn akọta, akọ̀, po ninọmẹ gbẹninọ tọn lẹpo po mẹ bosọ tindo owhe voovo lẹ. Nugbo ma nọ klan mẹde dovo gba. Gbẹtọ wunmẹ lẹpo wẹ e nọ dọ̀n dogo.”
5. Kọdetọn dagbe tẹlẹ wẹ yin mimọ to linlin owhe sinsẹ̀nzọn 2004 tọn mẹ?
5 Nugbo-yinyin ohó enẹlẹ tọn nọ yin mimọ to whemẹwhemẹ dile wẹndagbe Ahọluduta Jiwheyẹwhe tọn tọn to ahunjijlọnọ fọtọ́n kanweko susu lẹ whàn nado klan gbẹzan yetọn do wiwe na Jehovah bo wà ojlo etọn. Linlin sinsẹ̀nzọn owhe 2004 tọn, he bẹsọn septembre 2003 jẹ août 2004, do enẹ hia hezeheze. To osun 12 enẹlẹ mẹ, gbẹtọ 262 416 wẹ basi dohia klandowiwe yetọn tọn hlan Jehovah to gbangba gbọn baptẹm osin tọn dali. Ehe jọ to aigba 235 ji, fie Kunnudetọ Jehovah tọn lẹ to anadena plọnmẹ Biblu 6 085 387 te to sẹmẹsẹmẹ nado sọgan gọalọna gbẹtọ wunmẹ lẹpo sọn akọta, hẹnnu, po ogbè susu po mẹ nado kẹalọyi nugbo ogbẹ̀-namẹ tọn sọn Ohó Jiwheyẹwhe tọn mẹ.—Osọhia 7:9.
6. Etẹwẹ hẹn jideji dagbe he ko tin to owhe lẹ gblamẹ yọnbasi?
6 Etẹwẹ hẹn ehe lẹpo yọnbasi? Matin ayihaawe, Jehovah lọsu wẹ dọ̀n ahunjijlọnọ ehelẹ wá ede dè. (Johanu 6:65; Owalọ lẹ 13:48) Etomọṣo, mí ma sọgan yí nukunpẹvi do pọ́n gbigbọ mẹde-yido-sanvọ́ tọn heyin didohia gọna vivẹnu vẹkuvẹku heyin dido gbọn mẹhe yí yede zan to Ahọluduta lọ dindin mẹ lẹ dali gba. To whenuena Mẹmẹsunnu Macmillan to owhe 79 tindo, e wlan dọmọ: “Sọn whenue yẹn yọ́n opagbe heyin didó na gbẹtọvi awutunọ he to kukujei lẹ todido ṣie to nuhe owẹ̀n Biblu tọn enẹ dehia mẹ ma ko depò gba. To ojlẹ enẹ mẹ yẹn magbe nado dindona nuplọnmẹ Biblu tọn lẹ dogọ nado sọgan gọalọna mẹdevo lẹ he to oyọnẹn Jiwheyẹwhe Ganhunupotọ lọ, Jehovah, po lẹndai dagbe he e tindo na gbẹtọvi lẹ po tọn dín taidi yẹn.”
7. Numimọ tẹwẹ do ayajẹ po zohunhun mẹhe to nugbo Biblu tọn dín lẹ tọn po hia?
7 Zohunhun enẹ sọ yin mimọ to devizọnwatọ Jehovah tọn lẹ ṣẹnṣẹn to egbehe. Di apajlẹ, lẹnnupọndo Daniela he wá sọn Vienne, to Autriche ji. E dọmọ: “Jiwheyẹwhe ko yin họntọn vivẹ ṣie sọn ovú-whenu ṣie gbọ́n. Ojlo ṣie wẹ e ko yin to whepoponu nado yọ́n yinkọ etọn na hogbe lọ ‘Jiwheyẹwhe’ nọ do e hia taidi mẹhe tin to fie dẹ̀n taun to nukun ṣie mẹ. Ojlo ṣie wá yin hinhẹndi to whenuena Kunnudetọ Jehovah tọn lẹ dla mi pọ́n. Owhe 17 wẹ yẹn tindo to whenẹnu. Yé basi zẹẹmẹ nuhe yẹn jlo na yọnẹn gando Jiwheyẹwhe go lẹpo tọn na mi. Yẹn mọ nugbo lọ to godo mẹ podọ lehe enẹ jiawu do sọ! Homẹ ṣie hùn sọmọ bọ yẹn jẹ yẹwhehodọ na mẹlẹpo ji.” Zohunhun etọn hẹn vlẹko klasigbẹ́ etọn lẹ tọn wá to madẹnmẹ. Daniela zindonukọn dọmọ: “E taidi dọ dọdai Biblu tọn lẹ to hẹndi mọyi to nukun ṣie lẹ mẹ wẹ nkọ, na yẹn ko plọn nuhe Jesu dọna hodotọ etọn lẹ dọ yé na yin wangbẹna bo yin homẹkẹndo na oyín etọn wutu. Ayajẹ ṣie gọfla to aliho jiawu de mẹ.” To ojlẹ vude godo, Daniela klan gbẹzan etọn do wiwe na Jehovah, bo yin bibaptizi, bosọ jẹ afọdona yanwle lọ nado lẹzun mẹdehlan ji. To alọwle etọn godo, Daniela, po asu etọn Helmut po, jẹ yẹwhehodọ ji to omẹ Aflika, Inde, Philippines, po Chine po tọn he nọ nọ̀ Vienne lẹ ṣẹnṣẹn. Todin, Daniela po Helmut po to sinsẹ̀nzọnwa taidi mẹdehlan lẹ to hùwaji-whèyihọ Aflika tọn.
Yé Ma Dekanpona Zohunhun Yetọn Gba
8. Aliho dagbe dopo tẹ mẹ wẹ mẹsusu ko do owanyi yetọn na Jiwheyẹwhe podọ nugbonọ-yinyin na Ahọluduta etọn hia te?
8 Na nugbo tọn, sinsẹ̀nzọn mẹdehlan tọn yin dopo to aliho he mẹ omẹ Jehovah tọn lẹ nọ do owanyi yetọn na Jiwheyẹwhe podọ nugbonọ-yinyin yetọn na Ahọluduta etọn hia te lẹ mẹ to egbehe. Taidi ajọwatọ lọ to oló Jesu tọn mẹ, mẹhe biọ sinsẹ̀nzọn ehe mẹ lẹ nọ tindo ojlo nado zingbejizọnlin yì fidindẹn lẹ na Ahọluduta lọ tọn wutu. Nalete, mẹdehlan ehelẹ ma to gbejizọnlinzin nado dín wẹndagbe Ahọluduta tọn gba; yé nọ hẹn ẹn yì mẹhe nọ nọ̀ nuslòmẹ aigba tọn lẹ dè, bo nọ plọn yé bosọ nọ gọalọna yé nado lẹzun devi Jesu Klisti tọn. (Matiu 28:19, 20) To aigba susu ji, yé dona doakọnna awusinyẹnnamẹnu he ma yọnjlẹ lẹ. Ṣigba akọndonanu yetọn nọ yin ahọsuna susugege.
9, 10. Numimọ ayajẹ tọn tẹlẹ wẹ mẹdehlan he tin to otò dindẹn taidi République Centrafricaine mẹ lẹ nọ duvivi etọn?
9 Di apajlẹ, lẹnnupọndo nuhe jọ to République Centrafricaine to owhe he wayi mẹ ji. Gbẹtọ 16 184 wẹ wá Oflin okú Klisti tọn tẹnmẹ, yèdọ nudi sọha wẹnlatọ Ahọluduta otò enẹ tọn lẹ donù ṣinawe. To whenuena e yindọ miyọ́n lẹtliki tọn ma tin to fisusu to otò lọ mẹ, gbẹtọ lẹ nọ saba wà whégbè-zọ́n yetọn lẹ to gbonu to atin-sá. Enẹwutu nuhe sọgbe wẹ e yin dọ mẹdehlan lẹ ni wà azọ́n yetọn to aliho dopolọ mẹ, bo deanana plọnmẹ Biblu lẹ to gbonu to atin-sá. Gbọnvona dọ gbonu nọ họ́n bo nọ fá ganji, ale devo sọ tin to e mẹ. Gbẹtọ lẹ yiwanna Biblu to jọwamọ-liho, podọ nuhe gbayipe taun wẹ e yin nado mọ gbẹtọ lẹ to hodọdo sinsẹ̀n ji. To paa mẹ, aligbọntọ lẹ nọ doayi nuhe to jijọ go bo nọ kọnawudopọ to oplọn lọ mẹ.
10 To gbèdopo, dile mẹdehlan de to anadena plọnmẹ Biblu to gbonu, dẹpẹ he nọ nọ̀ yakẹ de dọnsẹpọ ẹ bo dọna ẹn dọ na yé ma ko dla emi pọ́n wutu, mẹdehlan lọ dona wá owhé emitọn gbè nado plọn Biblu hẹ emi lọsu. Na nugbo tọn, homẹ mẹdehlan lọ tọn hùn nado yì, podọ dẹpẹ lọ to nukọnyi po awuyiya po. To otò enẹ mẹ, ponọ lẹ nọ saba do Kunnudetọ lẹ te to ali ji, e ma yin nado gbẹnuna yé kavi gbò akuẹ na yé wẹ gba, ṣigba nado biọ vọkan yọyọ Atọ̀họ̀-Nuhihọ́ Lọ Tọn po Réveillez-vous! tọn lẹ po kavi nado dọnudo yé na hosọ tangan de he yé duvivi etọn.
11. Mahopọnna whlepọn lẹ, numọtolanmẹ tẹlẹ wẹ mẹdehlan whenu-dindẹn tọn lẹ tindo gando sinsẹ̀nzọn yetọn go?
11 Susu to mẹhe biọ sinsẹ̀nzọn mẹdehlan tọn mẹ to nudi owhe 40 kavi 50 die wayi lẹ mẹ gbẹ́ pò to sinsẹ̀nzọnwa po nugbonọ-yinyin po to ogle lọ mẹ. Apajlẹ dagbe yise po linsinsinyẹn tọn po nankọ die yé zedai na mímẹpo! To owhe 42 he wayi lẹ gblamẹ, asu po asi po de ko wadevizọn dopọ taidi mẹdehlan to otò dopodopo atọ̀n mẹ. Asu lọ dọmọ: “Mí ma gọ̀n ma mọ nuhahun lẹ gba. Di apajlẹ, owhe 35 wẹ mí do diahi hẹ ovà-zọ̀n. Ṣogan, nudide mítọn nado yin mẹdehlan ma ko vẹ́ na mí pọ́n gbede.” Asi lọ yidogọ dọ: “Nususu wẹ tin he jẹna pẹdido to whepoponu. Lizọnyizọn kunnudegbe tọn yin asisa ayajẹ daho tọn, podọ e bọawu nado bẹ plọnmẹ Biblu lẹ jẹeji. Eyin nuplọntọ lẹ jẹ opli lẹ wá ji bo jẹ yedelẹ yọnẹn ji, e nọ taidi ayidedai pọmẹ tọn to whẹndo mẹ to ojlẹ dopodopo mẹ.”
Yé “Lẹn Onú Lẹpo Do Nugúgú”
12. Nawẹ pinpẹn-nutọn-yinyọnẹn nujọnu tọn na Ahọluduta lọ nọ yin didohia gbọn?
12 To whenuena ajọwatọ tomẹyitọ lọ mọ pali akuẹ gege tọn, “e yì, bo sà nuhe e tindo lẹpo, bosọ họ̀ ẹ.” (Matiu 13:46) Ojlo ehe nado yí nuhe sọgan taidi nuhọakuẹ lẹ do sanvọ́ wẹ nọ do mẹhe yọ́n pinpẹn nuhọakuẹ-yinyin Ahọluduta lọ tọn nugbonugbo lẹ hia. Taidi dopo to mẹhe na dugán hẹ Klisti to gigo Ahọluduta tọn mẹ lẹ mẹ, apọsteli Paulu dọmọ: “Yẹn ko lẹn onú lẹpo do nugúgú na whanpẹ oyọnẹn Klisti Jesu Oklunọ ṣie tọn; na mẹhe yẹn to oyà gúgú onú lẹpo tọn ji, yẹn sọ hia yé di omí, na yẹn nido duale Klisti tọn.”—Filippinu lẹ 3:8.
13. Nawẹ dawe de do owanyi etọn na Ahọluduta lọ hia to République tchèque gbọn?
13 Mọdopolọ to egbehe, mẹsusu wẹ jlo nado basi diọdo sinsinyẹn lẹ to gbẹzan yetọn mẹ nado sọgan mọ dona Ahọluduta tọn lẹ yí. Di apajlẹ, to octobre 2003, wehọmẹ-gán owhe 60 mẹvi de to République tchèque mọ nuplọnmẹwe Biblu tọn lọ Oyọnẹn He Nọ Planmẹ Sọyi Ogbẹ̀ Madopodo Mẹ. To hihia ẹ pó godo, e dín Kunnudetọ Jehovah tọn he tin to lẹdo etọn mẹ lẹ mọ to afọdopolọji nado sọgan plọn Biblu. E yinukọn ganji to gbigbọ-liho bo jẹ opli lẹpo yì ji to madẹnmẹ. Ṣigba, etẹwẹ dogbọn tito etọn lẹ nado hoavùn na ogántẹn daho de nado sọgan wá yin dide taidi dopo to aṣẹpatọ otò lọ tọn lẹ mẹ dali? E basi dide nado hoavùn na nudevo—enẹ wẹ nado lẹzun lilatọ Ahọluduta tọn de. E dọmọ: “Yẹn penugo nado do owe sinai do Biblu ji susu gbonu na wehọmẹvi ṣie lẹ.” E basi dohia klandowiwe etọn tọn hlan Jehovah gbọn baptẹm osin tọn dali to plidopọ de ji to juillet 2004.
14. (a) Etẹwẹ wẹndagbe Ahọluduta tọn ko whàn omẹ livi susu lẹ nado wà? (b) Kanbiọ mẹhẹnlẹnnupọn tọn tẹlẹ wẹ dopodopo mítọn sọgan kanse ede?
14 Omẹ livi susu devo lẹ ko kẹalọyi wẹndagbe Ahọluduta lọ tọn to aliho mọnkọtọn mẹ lẹdo aihọn pé. Yé ko tọ́nsọn aihọn ylankan lọ mẹ, klọ́n gbẹtọ hoho lọ dai, jo họntọn yetọn hoho lẹ do, bo ko deta sọn yanwle aihọn tọn lẹ mẹ. (Johanu 15:19; Efesunu lẹ 4:22-24; Jakobu 4:4; 1 Johanu 2:15-17) Naegbọn yé wà ehe lẹpo? Na dona Ahọluduta Jiwheyẹwhe tọn yin nujọnu taun to nukun yetọn mẹ hugan nudepope he aihọn ehe sọgan zedonukọnnamẹ wutu. Be numọtolanmẹ dopolọ wẹ a tindo gando wẹndagbe Ahọluduta lọ tọn go ya? Be e whàn we nado basi diọdo he jẹ lẹ nado sọgan hẹn gbẹzan, nujinọtedo, po yanwle towe lẹ po sọgbe hẹ nubiọtomẹsi Jehovah tọn lẹ ya? Mọwiwà na hẹn dona susugege lẹ wá na we todin podọ to sọgodo.
Ojijẹ lọ Ko Jei Vivọnu
15. Etẹwẹ yin didọdai dọ omẹ Jiwheyẹwhe tọn lẹ na wà to azán godo tọn lẹ mẹ?
15 Psalm-kantọ lọ wlan dọmọ: “Gbẹtọ towe lẹ na yin ojlonọ to azán huhlọn towe tọn gbè.” Mẹhe ko ze yede jo lẹ bẹ dẹpẹ he taidi “ahún” lẹ, gọna “agun daho” “yọnnusi he to owẹ̀n lọ lá lẹ” tọn hẹn. (Psalm 68:11; 110:3) Etẹwẹ ko yin kọdetọn vivẹnudido po mẹde-yido-sanvọ́ omẹ Jehovah tọn lẹ tọn po—yèdọ sunnu, yọnnu, jọja po mẹho po lẹ—to azán godo tọn ehelẹ mẹ?
16. Na apajlẹ de he do lehe devizọnwatọ Jiwheyẹwhe tọn lẹ to vivẹnudo nado gọalọna mẹdevo lẹ nado plọnnu gando Ahọluduta lọ go do hia.
16 Gbehosọnalitọ de yin ahunmẹduna to Inde gando lehe tókunọ hugan livi awe he tin to otò enẹ mẹ lẹ sọgan yin alọgọna nado plọnnu dogbọn Ahọluduta lọ dali do go. (Isaia 35:5) E basi dide nado ze yinkọ dai to wehọ de mẹ to Bangalore nado plọn ogbè alọ-yido-dọho tọn. To finẹ, e penugo nado má todido Ahọluduta lọ tọn hẹ tókunọ susu, bọ pipli Biblu pinplọn tọn lẹ yin didoai. To osẹ vude gblamẹ, hugan omẹ wiawe jẹ opli lẹ yì ji to Plitẹnhọ Ahọluduta tọn mẹ. To nukọn mẹ, to jonọyiyi alọwle tọn de whenu, gbehosọnalitọ lọ dukosọ hẹ dẹpẹ tókunọ he wá sọn Calcutta de he tindo kanbiọ susu bosọ tindo ojlo zogbe nado yọ́n nususu dogọ gando Jehovah go. Ṣigba, aliglọnnamẹ de tin. Dẹpẹ lọ dona lẹkọyi Calcutta, he dẹn na nudi kilomẹtlu 1 600, nado bẹ wehọmẹ daho, podọ Kunnudetọ he yọ́n ogbè alọ-yido-dọho tọn depope ma tin to dọ́n. Dẹpẹ lọ wà nuhe go e pé lẹpo nado diọlinlẹn na otọ́ etọn nado dike e ni yì wehọmẹ to Bangalore nado sọgan zindonukọn to Biblu pinplọn etọn mẹ. E yinukọn po awuyiya po to gbigbọ-liho, bọ to nudi owhe dopo godo, e klan gbẹzan etọn do wiwe na Jehovah. Todin, ewọ lọsu to Biblu plọn hẹ tókunọ susu, gọna họntọn ovú-whenu tọn de. Wekantẹn alahọ Inde tọn to tito basina gbehosọnalitọ lẹ todin nado plọn ogbè alọ-yido-dọho tọn nado sọgan gọalọ to otò enẹ mẹ.
17. Dọ nuhe a mọ dọ e yin tulinamẹnu titengbe to linlin sinsẹ̀nzọn owhe 2004 tọn he tin to weda 19 jẹ 22 mẹ.
17 To weda 19 jẹ 22, hiẹ na mọ linlin nuwiwa Kunnudetọ Jehovah tọn lẹ tọn lẹdo aihọn pé na owhe sinsẹ̀nzọn 2004 tọn. Yì agbọji bo gbadopọnna ẹn, bo yí nukun towe titi lẹ do mọ kunnudenu lọ dọ lẹdo aihọn pé, omẹ Jehovah tọn lẹ ze ayidonugo yetọn lẹpo do ‘pali akuẹ gege tọn’ lọ dindin ji to egbehe.
‘Mì Nọ Dín Ahọluduta lọ Whẹ́’
18. Nudọnamẹ tẹwẹ Jesu ma yidogọ to oló ajọwatọ tomẹyitọ tọn lọ mẹ, podọ etẹwutu e ma do wàmọ?
18 Eyin mí lẹkọwa oló Jesu tọn gando ajọwatọ tomẹyitọ lọ go ji whladopo dogọ, mí na mọ dọ Jesu ma dọ nudepope dogbọn lehe ajọwatọ lọ na penukundo ede go do dali to whenuena e ko sà nuhe e tindo lẹpo godo. Po gbesisọ po, mẹdelẹ sọgan kanse dọ: ‘Todin he ajọwatọ lọ ma tindo nuhe go e na ganjẹ depope ba, nawẹ e na mọ núdùdù, avọ̀, po fibẹtado po gbọn? Dagbe tẹwẹ pali họakuẹ enẹ na wà na ẹn?’ Kanbiọ enẹlẹ na yin lẹnpọn dagbe tọn sọn pọndohlan gbẹtọvi tọn mẹ. Ṣigba be Jesu ma dotuhomẹna devi etọn lẹ dọ: “Mì dín ahọludu Jiwheyẹwhe tọn, po dodo etọn po whẹ́; onú [he pò] helẹ pó wẹ yè na dogọ hlan mì” ya? (Matiu 6:31-33) Nuagokun tangan oló lọ tọn wẹ yindọ mí dona ze mídelẹ jo na Jiwheyẹwhe petepete sọn ahun mẹ wá bo yin zohunhunnọ na Ahọluduta lọ. Be mí sọgan plọn nude sọn ehe mẹ ya?
19. Nuagokun tangan tẹwẹ mí sọgan plọn sọn oló Jesu tọn gando pali akuẹ gege tọn lọ go mẹ?
19 Vlavo mí ṣẹṣẹ sè wẹndagbe jiawu lọ wẹ kavi mí ko to Ahọluduta lọ dín bo to dona etọn lẹ dọna mẹdevo lẹ sọn owhe susu die gbọ́n, mí dona zindonukọn nado ze Ahọluduta lọ do otẹn tintan mẹ to gbẹzan mítọn mẹ. Dile etlẹ yindọ ojlẹ awusinyẹn tọn lẹ mẹ wẹ mí tin te, mí tindo whẹwhinwhẹ́n dolido nado yise dọ nuhe mí to dindin yin nujọnu he ma sọgan yin jijlẹdo nudepope go—taidi pali he ajọwatọ enẹ wá mọ. Nujijọ aihọn tọn lẹ po dọdai Biblu tọn he ko mọ hẹndi lẹ po dohia hezeheze dọ mí to gbẹnọ to “opodo aihọn tọn.” (Matiu 24:3) Taidi ajọwatọ tomẹyitọ enẹ, mì gbọ mí ni do zohunhun ahundopo tọn hia na Ahọluduta Jiwheyẹwhe tọn bo jaya na lẹblanulọkẹyi he mí tindo nado lá wẹndagbe lọ.—Psalm 9:1, 2.
Be Hiẹ Flin Ya?
• To owhe lẹ gblamẹ, etẹwẹ ko yidogọna jideji sinsẹ̀n-basitọ nugbo lẹ tọn?
• Gbigbọ tẹwẹ yin mimọ to mẹhe to sinsẹ̀nzọnwa taidi mẹdehlan lẹ ṣẹnṣẹn?
• Diọdo tẹlẹ wẹ mẹdelẹ ko basi na wẹndagbe Ahọluduta tọn wutu?
• Nuplọnmẹ họakuẹ tẹwẹ mí sọgan plọn sọn oló Jesu tọn gando pali akuẹ gege tọn lọ go mẹ?
[Apotin to weda 19-22]
LINLIN OWHE SINSẸ̀NZỌN 2004 TỌN HEYIN KUNNUDETỌ JEHOVAH TỌN LẸ TỌN LẸDO AIHỌN PÉ
[Yẹdide to weda 14]
‘Gbẹtọ wunmẹ lẹpo wẹ nugbo nọ dọ̀n dogo.’—A. H. Macmillan
[Yẹdide to weta 15]
Daniela po Helmut po dọyẹwheho to jonọ he tin to Vienne lẹ ṣẹnṣẹn
[Yẹdide to weda 16, 17]
Taidi ajọwatọ tomẹyitọ lọ, mẹdehlan lẹ yin didona susugege to egbehe
[Yẹdide to weda 17]
“Gbẹtọ towe lẹ na yin ojlonọ”