Kanbiọ lẹ sọn Wehiatọ lẹ Dè
Be Klistiani de dona na akuẹ kavi nunina de ahọluzọnwatọ de na azọ́n etọn lẹ ya, kavi enẹ dona yin pinpọnhlan taidi alọgodo-kuẹ nina?
Fidepope he Klistiani lẹ tin te, yé nọ tẹnpọn nado yí nuyọnẹn zan gando ninọmẹ lẹdo yetọn tọn lẹ go, bo nọ flin dọ nuhe yin alọkẹyi bosọ sọgbe hẹ osẹ́n to otò de mẹ sọgan nọma sọgbe kavi yin alọkẹyi paali to otò devo mẹ. (Howhinwhẹn lẹ 2:6-9) Na nugbo tọn, Klistiani de dona nọ flin to whepoponu dọ mẹdepope he jlo na “wáwáṣi to gohọ̀ [Jehovah tọn] mẹ” dona gbẹ́ núbibla kavi alọgodo-kuẹ dai.—Psalm 15:1, 5; Howhinwhẹn lẹ 17:23.
Etẹwẹ yin alọgodo-kuẹ? Sọgbe hẹ otanwe lọ The World Book Encyclopedia, “alọgodo-kuẹ zẹẹmẹdo nado na kavi ze nuhọakuẹ de donukọnna . . . ahọluzọnwatọ de, na ewọ nido gbẹkọ azọngban etọn go kavi tùnafọ osẹ́n ji na ale nunamẹtọ lọ tọn.” Enẹwutu, mahopọnna fie mí nọ nọ̀, alọgodo-kuẹ nina wẹ e yin dọ mẹde ni na akuẹ kavi nunina de whẹdatọ kavi ponọ de na ewọ nido sọtadona whẹdida dodo kavi hlan ponọ dodinnanutọ de na ewọ nido miyọnnukundo nuṣiwa de. Eyin mẹde yí nunina de zan nado mọ nukundagbe vonọtaun yí, vlavo na yinkọ etọn nido yin sislẹ jẹnukọn kavi nado jẹnukọn na mẹdevo lẹ to whenuena mẹsusu tò ṣlẹlẹ, alọgodo-kuẹ na wẹ e sọ te. Nuyiwa mọnkọtọn nasọ do owanyi matindo hia.—Matiu 7:12; 22:39.
Ṣigba mí ni dọ dọ mẹde na akuẹ kavi nunina de ahọluzọnwatọ de na azọ́n he sọgbe hẹ osẹ́n de nido yin wiwà na ẹn kavi nado dapana nuyiwahẹmẹ agọ̀. Be alọgodo-kuẹ nina wẹ enẹ yin ya? Di apajlẹ, to otò delẹ mẹ, ahọluzọnwatọ lẹ sọgan nọma jlo nado yí ovi lẹ do wehọmẹ, kẹalọyi mẹde do dotowhé, kavi de aṣẹ-wema tògodo yìyì tọn lẹ tọ́n kakajẹ whenue yé mọ nunina de yí. Kavi yé sọgan nọ dọngbàn nado namẹ gbedewema he sọgbe hẹ osẹ́n lẹ.
Aṣa nunamẹ tọn lẹ po nukun he gbẹtọ lẹ nọ saba yí do pọ́n yé po gbọnvo sọn fide jẹ fidevo. To fie akuẹ mọnkọtọn lẹ súsú ko lẹzun aṣa kavi nọ yin nukundo te lẹ, Klistiani delẹ sọgan mọdọ, dile yé ma ko zẹ̀ dogbó osẹ́n tọn lẹ go, yé ma gbà nunọwhinnusẹ́n Biblu tọn lẹ to whenuena yé nanú ahọluzọnwatọ de na e nido wà azọ́n etọn. To otò delẹ mẹ, gbẹtọ lẹ tlẹ sọgan nọ pọ́n nunina mọnkọtọn lẹ hlan taidi yidogọ kleun de na akuẹ pẹvi he nọ yin súsú ahọluzọnwatọ lẹ. Flin dọ vogbingbọn tin to nunamẹ nado mọ azọ́n he mí tindo jlọjẹ na de yí po alọgodo-kuẹ nina nado mọ nukundagbe he ma sọgbe hẹ osẹ́n yí po ṣẹnṣẹn.
To alọ devo mẹ, Kunnudetọ Jehovah tọn delẹ ko gbẹ́ ma nado nanú ponọ dodinnanutọ lẹ, ponọ dènu tọn lẹ, kavi mẹdevo lẹ nado sọgan mọ nuhe sọgbe hẹ osẹ́n lẹ yí, etlẹ yin to fie nunina mọnkọtọn ko lẹzun aṣa te lẹ. Na Kunnudetọ lẹ yin yinyọnẹn to lẹdo yetọn mẹ taidi ahundoponọ podọ nugbodọtọ wutu, yé nọ mọ nukunpedomẹgo delẹ yí to whedelẹnu, ehe suhugan gbẹtọ lẹ tọn dona na nude whẹpo do mọyi.—Howhinwhẹn lẹ 10:9; Matiu 5:16.
Do glido, devizọnwatọ Jehovah tọn dopodopo dona basi dide na ede vlavo eyin e na basi nunina de nado mọ nuhe sọgbe hẹ osẹ́n lẹ yí kavi nado dapana nuyiwahẹmẹ agọ̀. Hú popolẹpo, e dona yinuwa to aliho de mẹ nado hẹn ayihadawhẹnamẹnu dagbe go, podọ ma nado hẹn vlẹko wá yinkọ Jehovah tọn ji, kavi hẹn mẹdevo lẹ dahli.—Matiu 6:9; 1 Kọlintinu lẹ 10:31-33; 2 Kọlintinu lẹ 6:3; 1 Timoti 1:5.