Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Eyọn, pọ́n eyin a sọgan na gblọndo na kanbiọ he bọdego helẹ:

• Naegbọn 25 décembre do yin dide taidi jijizan Jesu tọn?

Ohó Jiwheyẹwhe tọn ma de azán depope taidi jijizan Jesu tọn gba. Enciclopedia Hispánica dọmọ: “Azán 25 décembre tọn na hùnwhẹ Noẹli tọn ma sinai do dodinnanu he sọgbe jijizan Jesu tọn ji gba, kakatimọ, e sinai do hùnwhẹ avivọ-whenu tọn lẹ ji.” Lomunu hohowhenu tọn lẹ nọ basi hùnwhẹ zizẹ owhè tọn to avivọ-whenu gbọn aglinjijẹ, paṣadudu, po nunina lẹ mimá po dali.—15/12, weda 4-5.

• Be Owalọ lẹ 7:59 to didohia dọ Stefani hodẹ̀ hlan Jesu wẹ ya?

Lala. Biblu dohia dọ Jehovah Jiwheyẹwhe kẹdẹ wẹ odẹ̀ dona yin hihò hlan. Dile Stefani to Jesu mọ to numimọ mẹ, e sọgan basi oylọna ẹn tlọlọ, dọmọ: “Jesu Oklunọ, yí gbigbọ ṣie.” Stefani yọnẹn dọ huhlọn ko yin nina Jesu nado fọ́n oṣiọ lẹ. (Johanu 5:27-29) Enẹwutu Stefani vẹ̀ Jesu nado whlá huhlọn ogbẹ̀ tọn etọn kakajẹ azán fọnsọnku tọn gbè.—1/1, weda 31.

• Nawẹ mí wagbọn do yọnẹn dọ sọgodo gbẹtọvi tọn ma nọ yin kinkàndai gba?

Jiwheyẹwhe ko na mẹdekannujẹ nudide bibasi tọn gbẹtọvi lẹ, podọ ehe jẹagọdo sinsẹ̀n-nuplọnmẹ sẹ́gbè tọn. Nuyiwa kanyinylan po mawadodo po tọn wẹ e na ko yin sọn Jehovah dè nado kàn nuhe mí na wà to gbẹzan mẹ lẹpo dai jẹnukọnna jiji mítọn bo nọ wá gblewhẹdo mí to enẹgodo na nuhe mí wà lẹ. (Deutelonomi 32:4; 1 Johanu 4:8)—15/1, weda 4-5.

• Naegbọn e na yin nuyiwa jlẹkaji matindo tọn nado dọ dọ azọ́njiawu lẹ ma sọgan jọ gba?

To yinyọnẹn mẹ dọ oyọnẹn vude poun wẹ yé tindo gando awujinu lẹnunnuyọnẹn tọn he tin to nudida Jiwheyẹwhe tọn mẹ lẹ go, lẹnunnuyọnẹntọ delẹ yigbe dọ yé ma sọgan dọ po nujikudo po dọ nude ma yọnbasi ba. Kakatimọ, e nọ jlo yé hugan nado dọ dọ onú mọnkọtọn ma ko jọ pọ́n.—15/2, weda 5-6.

• Naegbọn Whẹdatọ Samsọni do dọna mẹjitọ etọn lẹ dọ emi jlo viyọnnu Filistininu lẹ tọn de taidi asi? (Whẹdatọ 14:2)

Nuhe jẹagọdo osẹ́n Jiwheyẹwhe tọn wẹ e yin nado mọ yọnnu to sinsẹ̀n-basitọ lalo lẹ ṣẹnṣẹn. (Eksọdusi 34:11-16) Ṣigba, viyọnnu Filistininu lọ ‘sọgbe’ to nukun Samsọni tọn mẹ. Samsọni “to aklọn de dín to Filistininu lẹ nù wẹ,” bọ viyọnnu lọ sọgbe na lẹndai enẹ. Jiwheyẹwhe nọgodona Samsọni gbọn gbigbọ wiwe Etọn gblamẹ. (Whẹdatọ 13:25; 14:3, 4, 6)—15/3, weda 26.

• Be Klistiani de dona na akuẹ kavi nunina wunmẹ de ahọluzọnwatọ de na azọ́n etọn lẹ ya?

E ma sọgbe nado na alọgodo-kuẹ kavi nuyizan họakuẹ de ahọluzọnwatọ de na ewọ nido wà nuhe ma sọgbe hẹ osẹ́n, sọtadona whẹdida dodo, kavi nado mọ nukundagbe vonọtaun yí. Ṣigba e ma yin alọgodo-kuẹ nina wẹ e yin gba nado na akuẹ kavi nunina ahọluzọnwatọ he wà azọ́n etọn kavi na azọ́n he sọgbe hẹ osẹ́n de nido yin wiwà na mí kavi nado dapana nuyiwahẹmẹ agọ̀.—1/4, weda 29.