Gigopipana Jehovah to Wehọmẹ
LẸDO aihọn pé, jọja Kunnudetọ Jehovah tọn lẹ nọ dín aliho lẹ nado pà Jiwheyẹwhe to wehọmẹ—gbọn hodidọ po walọ yetọn po dali. Numimọ delẹ die he do zohunhun jọja-whenu tọn yetọn hia.
To Grèce, jọja Kunnudetọ de yin azọ́ndena nado wlan linlin de gando hẹnflu aigba tọn go. To dodinnanu bibasi to Index des publications de la Société Watch Tower mẹ godo, e mọ hosọ yọn-na-yizan lẹ to Réveillez-vous! mẹ, bo slẹ linlinnamẹwe lọ to tadonahó etọn mẹ taidi asisa nudọnamẹ etọn tọn. Mẹplọntọ etọn dọna ẹn dọ linlin etọn yin dopo to dagbe hugan he emi ko hia pọ́n lẹ mẹ. To nukọnmẹ mẹplọntọ lọ yí nudọnamẹ lọ lẹ zan to opli nupinplọn tọn de ji bo tindo kọdetọn dagbe. Enẹwutu mẹmẹyọnnu jọja lọ basi dide nado ze zinjẹgbonu Réveillez-vous! tọn devo lẹ donukọnna mẹplọntọ lọ, gọna dehe dọhodo hosọ lọ ji “Les enseignants: que ferions-nous sans eux?” To godo mẹ, mẹplọntọ lọ pà linlinnamẹwe lọ Réveillez-vous! to klasi, bọ wehọmẹvi devo lẹ jẹ vọkan lẹ biọ ji. Mẹmẹyọnnu lọ tin to dandannu glọ nado hẹn vọkan linlinnamẹwe lọ tọn lẹ wá wehọmẹ na yé nido sọgan hia zinjẹgbonu devo lẹ.
To Bénin, to Aflika, jọja Klistiani de pehẹ kọgbidinamẹ wunmẹ vonọtaun de. Dile aṣa lọ gbayipe do, mẹjitọ wehọmẹvi susu lẹ tọn kọngbedopọ to wehọmẹ etọn bo yí weplọnmẹtọ lẹ nado nọ wazọ́n hẹ jọja lọ lẹ do hosọ he vẹawu lẹ ji bo hẹn yé pegan na mẹtẹnpọn lẹ. Ṣigba, weplọnmẹtọ lọ lẹ basi dide nado nọ plọnnu hẹ yé to samedi afọnnu lẹ. Jọja Kunnudetọ lọ jẹagọdo enẹ dọmọ: “Samedi afọnnu wẹ agun lọ blebu nọ yì dọyẹwheho to pọmẹ. Ojlẹ he nọ hẹn ayajẹ wá na mi hugan to osẹ lọ mẹ niyẹn, podọ n’ma na yí nudepope do diọtẹnna ẹn.” Otọ́ etọn, mẹjitọ godoponọ de he yin Kunnudetọ ga, kọngbedopọ hẹ ẹ bo tẹnpọn nado dọho hẹ mẹjitọ delẹ po weplọnmẹtọ delẹ po nado sọgan diọ tito lọ. Ṣigba, yemẹpo gbẹ́. Viyọnnu jọja lọ basi dide nado jo tito weplọnmẹ tọn lọ do. Kakatimọ, e nọ dọyẹwheho to pọmẹ hẹ agun etọn. Klasigbẹ́ etọn lẹ nọ ṣàn ẹn kò, bo nọ na ẹn tuli nado wọnji yẹwhehodidọ etọn po Jiwheyẹwhe etọn po go. Yé yọnẹn dọ e na jai to mẹtẹnpọn lẹ whenu janwẹ. Ṣigba, dile nulẹ wá yì do, wehọmẹvi he mọaleyi sọn tito weplọnmẹ tọn lọ mẹ lẹ jai, bọ mẹmẹyọnnu mítọn dín. Do glido, mẹṣanko lọ doalọte. Todin wehọmẹvi lọ lẹ nọ dọna ẹn dọ, “A dona zindonukọn to Jiwheyẹwhe towe sinsẹ̀n mẹ.”
To République Tchèque, viyọnnu owhe 12-mẹvi de dona na linlin do owe de ji. Onọ̀ etọn dotuhomẹna ẹn nado yí owe lọ Dawe Klohugan lọ He Nkọtọn Ma Nọgbẹ̀ Pọ́n zan. E bẹ linlin etọn jẹeji po kanbiọ helẹ po dọmọ: “Etẹwẹ hiẹ lẹn? Mẹnu wẹ sọgan yin dawe klohugan lọ he nkọtọn ma nọgbẹ̀ pọ́n?” E basi zẹẹmẹ gando Jesu, gbẹzan etọn to aigba ji, po nuplọnmẹ etọn lẹ po go. To enẹgodo e dọhodo weta lọ “Nuplọnmẹ de Dogbọn Jonamẹ Dali” ji. Mẹplọntọ etọn vó dọ, “Ehe wẹ linlin dagbe hugan he n’ko sè sọn dè we!” podọ e yí homẹhunhun do kẹalọyi vọkan owe lọ tọn dopo. Wehọmẹvigbẹ́ delẹ sọ jlo nado mọ vọkan owe lọ tọn yí ga. To wunkẹngbe, homẹ viyọnnu lọ tọn hùn tlala nado má vọkan 18.
Gigopipana Jehovah to wehọmẹ nọ hẹn ayajẹ daho wá na jọja ehelẹ. E jẹ dọ mímẹpo ni hodo apajlẹ zohunhun jọja-whenu yetọn tọn.