‘Alọgọ Ṣie Wá sọn Jehovah Dè’

Jọja He Nọ Pagigona Jehovah lẹ Nọ Hẹn Gbẹzan Yetọn Pọnte

“YẸN jlo onú dagbe hugan he tin to gbẹ̀mẹ lẹ!” Lehe visunnu aflanmẹ de basi zẹẹmẹ todido etọn lẹ tọn do niyẹn. Ṣigba, nawẹ jọja de sọgan mọ onú dagbe hugan lọ to gbẹ̀mẹ gbọn? Biblu na gblọndo he họnwun de dọmọ: “Flin mẹdatọ towe to azán ovu whenu towe tọn.”—Yẹwhehodọtọ 12:1.

E ma yin mẹhomẹ lẹ kẹdẹ wẹ nọ pà Jehovah bo nọ sẹ̀n ẹn gba. Samuẹli, visunnu Ẹlkana po Hanna po tọn, gbẹ́ yin yọpọvu to whenuena e wadevizọn na Jehovah to gòhọtúntún mẹ. (1 Samuẹli 1:19, 20, 24; 2:11) Viyọnnu pẹvi Heblu de do yise mlẹnmlẹn hia to Jehovah mẹ to whenuena e na ayinamẹ dọ awhàngán Silianu Naamani ni yì yẹwhegán Eliṣa dè nado yin hinhẹn jẹgangan sọn pòzọ̀n mẹ. (2 Ahọlu lẹ 5:2, 3) To Psalm 148:7, 12 mẹ, dẹpẹ lẹ po awhli lẹ po yin gbedena nado pà Jehovah.a Jesu do ojlo nujọnu tọn de hia to sinsẹ̀nzọn Otọ́ etọn tọn mẹ to whenuena e yin owhe 12 mẹvi poun. (Luku 2:41-49) Na yé yin pinplọn gbọn Owe-wiwe dali wutu, visunnu delẹ he mọ Jesu to tẹmpli mẹ dawhá dọmọ: “Hosana hlan [kavi jaale, whlẹn mí] visunnu Davidi tọn.”—Matiu 21:15, 16.

Gigopipana Jehovah to Egbehe

To egbehe, jọja he tin to Kunnudetọ Jehovah tọn lẹ ṣẹnṣẹn susu wẹ nọ doawagun to nuyise yetọn lẹ mẹ bo nọ yí adọgbigbo do dọhona mẹdevo lẹ gando yé go to wehọmẹ podọ to fidevo lẹ. Mì gbọ mí ni gbadopọnna apajlẹ awe.

To Grande-Bretagne, klasigbẹ́ Stephanie he tindo owhe 18 tọn lẹ to hodọdo hòdide po whẹho walọ dagbe tọn devo lẹ po ji. Mẹplọntọ lọ dọ po nujikudo po dọ hòdide ko yin alọkẹyi gbayipe todin podọ dọ awhli depope ma na tindo whẹwhinwhẹ́n de nado mọhodọdo nuyiwa ehe go. To whenuena wehọmẹvi lọ lẹpo kọngbedopọ hẹ pọndohlan ehe, Stephanie mọdọ emi dona yiavunlọna teninọ sinai do Biblu ji emitọn. Dotẹnmẹ lọ nado wàmọ hundote to whenuena mẹplọntọ lọ kàn linlẹn Stephanie tọn biọ ẹ. Dile etlẹ yindọ e dibu to bẹjẹeji, Stephanie yí dotẹnmẹ hundote lọ zan nado do pọndohlan Owe-wiwe tọn hia. E dọhodo Eksọdusi 21:22-24 ji bo basi zẹẹmẹ dọ eyin e ylan nado gbleawuna ovi he ma ko yin jiji de, be hòdide dona jẹagọdo ojlo Jiwheyẹwhe tọn.

Mẹplọntọ lọ, he yin sinsẹ̀ngán de, ma ko hia wefọ enẹlẹ pọ́n gbede. Kunnudide adọgbigbo tọn Stephanie tọn dekọtọn do hodọdopọ dagbe susu mẹ hẹ klasigbẹ́ etọn lẹ do hosọ voovo lẹ ji. Dopo to yé mẹ nọ yí vọkan yọyọ Atọ̀họ̀-Nuhihọ́ Lọ Tọn po Réveillez-vous! po tọn lẹ todin, podọ omẹ awe devo lẹ yì plidopọ agbegbe Kunnudetọ Jehovah tọn lẹ tọn de nado pọ́n baptẹm Stephanie tọn taidi dohia klandowiwe etọn tọn hlan Jiwheyẹwhe.

Vareta he yin owhe ṣidopo mẹvi he nọ nọ̀ Suriname, to Hùwaji Amelika tọn, yí dotẹnmẹ hundote lọ zan nado pà Jiwheyẹwhe to whenuena mẹplọntọ etọn tindo nuhudo homẹmiọnnamẹ tọn sọn Owe-wiwe mẹ. To whenuena mẹplọntọ lọ gọ̀n wehọmẹ bo wá lẹkọwa to azán atọ̀n godo, e kanse wehọmẹvi etọn lẹ eyin yé yọ́n nuhewutu e gọ̀n wehọmẹ. Yé gblọn dọ, “E manọna mì, kavi?” “Lala,” wẹ mẹplọntọ lọ gblọn. “Nọviyọnnu ṣie wẹ kú, bọ e blawu na mi taun. Enẹwutu mì dona nọ̀ whii.”

To whèmẹ enẹ, to whenuena onọ̀ etọn to amlọndọ, Vareta to linlinnamẹwe hoho lẹ keje pọ́n bo to hosọ lẹ hia. E mọ Atọ̀họ̀-Nuhihọ́ Lọ Tọn 15 juillet 2001 tọn, he hosọ etọn yin “Be ogbẹ̀ Tin to Okú Godo Wẹ Ya?” Po jeje po, e fọ́n onọ̀ etọn bo dọmọ, “Mama, Mama, mì pọ́n! N’mọ linlinnamẹwe he dọhodo okú ji na mẹplọntọ ṣie!” Linlinnamẹwe lọ yin didohlan mẹplọntọ lọ po wekanhlanmẹ Vareta tọn de po. E wlan dọmọ: “Ehe sọgbe hẹ mì pẹpẹ. To Paladisi mẹ mì na mọ nọviyọnnu mìtọn whladopo dogọ na Jehovah ma nọ dolalo gbede. E ko dopagbe dọ emi na hẹn paladisi de wá aigba ji, e mayin to olọn mẹ gba.” Mẹplọntọ lọ do pinpẹn-nutọn-yinyọnẹn sisosiso etọn hia na homẹmiọnnamẹ sinai do Biblu ji he hosọ ehelẹ wleawuna.

Awuwiwledai Na Sọgodo

Jehovah yin “Jiwheyẹwhe donanọ [kavi ayajẹnọ],” podọ e jlo dọ jọja lẹ ni yin ayajẹnọ. (1 Timoti 1:11) Ohó etọn dọmọ: “To ayajẹ to ovu whenu towe, hiẹ omẹ winyanwinyan E, bosọ gbọ ayiha towe ni doawuyana we to ovu whenu towe.” (Yẹwhehodọtọ 11:9) Jehovah nọ mọnú zẹ̀ nuhe to jijọ alọnu din lẹ go bosọ nọ mọ kọdetọn dẹn-to-aimẹ walọyizan dagbe kavi ylankan tọn lẹ hlan nukọn. Enẹ wẹ zọ́n bọ Ohó etọn na avase jọja lẹ dọmọ: “Flin mẹdatọ towe to azán ovu whenu towe tọn, whenuena azán oylan tọn ma ko wá, bọ owhe ma ko sẹyamẹ, whenuena hiẹ na dọmọ, yẹn ma tindo homẹhun to yé mẹ gba.”—Yẹwhehodọtọ 12:1.

Mọwẹ, Jehovah jlo dọ jọja lẹ ni duvivi nunina họakuẹ ogbẹ̀ tọn to gigọ́mẹ. Eyin jọja lẹ nọ flin Jiwheyẹwhe bo nọ pà ẹ, yé sọgan zan gbẹzan he nọ hẹn pekọ po ale po wá. Etlẹ yin to whenue yé pehẹ avùnnukundiọsọmẹnu lẹ, yé sọgan dọ po jidide po dọ: ‘Alọgọ ṣie wá sọn Jehovah dè.’—Psalm 121:2.

[Nudọnamẹ odò tọn]

[Blurb on page 9]

“Mì pà OKLUNỌ sọn aigba-homẹ, . . . dẹpẹ lẹ, po awhli lẹ po.”—PSALM 148:7, 12

[Apotin to weda 8]

JEHOVAH NỌ GỌALỌNA JỌJA LẸ

“Hiẹ wẹ todido ṣie, [Jehovah] Jiwheyẹwhe E; hiẹ wẹ tudonu ṣie sọn ovu ṣie wá.”—Psalm 71:5.

“[Jiwheyẹwhe] yí onú dagbe lẹ do pekọna onù [kavi gbẹzan] towe; sọmọ bọ ovu towe jẹ yọyọ taidi akùn lọ.”—Psalm 103:5.