Be Hiẹ to Ahidi hẹ Numọtolanmẹ Agọ̀ lẹ Wẹ Ya?
NA OWHE susu to gbẹzan etọn mẹ, Lena diahi hẹ numọtolanmẹ agọ̀ he e tindo gando edetiti go lẹ. “Zanhẹmẹ gánnugánnu he yẹn jiya etọn na owhe susu to ovu-whenu ko de sisi mẹdetiti tọn ṣie pò tlala,” wẹ e dọ. “Yẹn nọ mọdọ n’masọ yọ́n na nude ba.” Simone lọsu lẹnnupọndo jọja-whenu etọn ji bo dọmọ, “Yẹn tindo numọtolanmẹ sisosiso awugbopo tọn to ohò ṣie mẹ bo nọ mọ dee taidi nuvọ́nọ.” E taidi dọ awubla sinsinyẹn he nọ dekọtọn sọn numọtolanmẹ mọnkọtọn lẹ mẹ to gbigbayipe taun to egbehe. Azọ́nwatẹn he nọ na ayinamẹ jọja lẹ gbọn alokan ji de dọ dọ diblayi madoawe mẹhe nọ ylọ yé lẹ tọn wẹ nọ do “numọtolanmẹ sinsinyẹn nuvọ́nọ-yinyin tọn” hia.
Sọgbe hẹ nuhe doto delẹ dọ, numọtolanmẹ nuvọ́nọ-yinyin tọn lẹ nọ fọndote to whenuena mẹde yin hinhẹn gbọn mẹdevo lẹ dali nado mọ ede taidi mẹhe ma họakuẹ. Linlẹn mọnkọtọn sọgan doadọ̀do eyin yè nọ wadán do mẹlọ ji gbọzangbọzan, bo nọ mọhodọdego zẹjlẹgo po fifiẹ po, kavi nọ yinuwahẹ ẹ to aliho agọ̀ mẹ. Depope he whẹwhinwhẹ́n lọ yin, kọdetọn lọ lẹ sọgan hẹnmẹ gbọjọ bo tlẹ sọgan hẹnnugble taun. Dodinnanu amasinzọnwiwa tọn de dohia to agọe dọ mẹhe tindo numọtolanmẹ agọ̀ gando yedetiti go lẹ nọ saba hẹn jidide bu to yedelẹ po mẹdevo lẹ po mẹ, bo nọ gbọnmọ dali hẹn haṣinṣan pẹkipẹki he yé tindo hẹ mẹdevo lẹ gble to mayọnẹn mẹ. Linlin he yin nina do dodinnanu lọ ji dọmọ: “To linlẹn de mẹ, yelọsu lẹ wẹ nọ ‘wleawuna’ ninọmẹ he yé to budina hugan lọ lẹ.”
Mẹhe nọ lẹnnupọn to aliho enẹ mẹ lẹ nọ saba jiya nuhe Biblu ylọdọ “tùmajai” mẹlọsu titi tọn lẹ. (Psalm 94:19) Yé nọ mọdọ emi dẹn do nuhe yin nukundo lọ. Eyin nude ma yì dile e jẹ do, yé nọ gblewhẹdo yedelẹ to jọwamọ-liho. Mahopọnna dọ mẹdevo lẹ sọgan nọ pà yé na nuwadotana yetọn lẹ, to ohò yetọn mẹ dọ́n yé nọ mọ yede taidi yẹnuwatọ he na wá yin didegbà to gbèdopo. Na mẹsusu yise dọ emi ma jẹ nado tindo ayajẹ wutu, yé nọ tlọ́ biọ walọ mẹdetiti huhusudo tọn mẹ bo nọ lẹndọ e ma tin to huhlọn emitọn mẹ nado jla ninọmẹ lọ do. Lena, he yin nùdego jẹnukọn, jiya nuhahun núdùdù dùdù tọn sinsinyẹn de na sisi mẹdetiti tọn he e hẹnbu wutu, podọ e yigbe dọmọ, “Yẹn lẹndọ n’ma sọgan basi diọdo depope.”
Be mẹhe to ahidi hẹ “tùmajai” mọnkọtọn lẹ dona jiya nulẹnpọn ehe tọn na pipotọ gbẹzan yetọn tọn wẹ ya? Be nudepope sọgan yin wiwà nado duto numọtolanmẹ agọ̀ mọnkọtọn lẹ ji ya? Biblu wleawuna nunọwhinnusẹ́n lẹ po ayinamẹ yọn-na-yizan lẹ po he ko gọalọna mẹsusu nado tindo kọdetọn dagbe to ahididi lọ mẹ. Etẹwẹ yin delẹ to nunọwhinnusẹ́n ehelẹ mẹ, podọ nawẹ yé ko gọalọna mẹhe to yaji lẹ nado tindo ayajẹ to gbẹzan yetọn mẹ gbọn? Hosọ he bọdego na basi zẹẹmẹ ehe tọn.