Whetẹnu Wẹ E Jẹ Nado Gblehomẹ?

TO YẸWHEHODỌTỌ 7:9 mẹ, Biblu dọmọ: ‘Homẹgble gbọjẹ to otù nulunọ tọn ji.’ Wefọ ehe dohia dọ mí ma dona nọ yawu gblehomẹ to whenuena mẹde ṣinuwa do mí; kakatimọ mí dona nọ jonamẹ.

Ṣigba, be Yẹwhehodọtọ 7:9 to didọ dọ mí ma dona nọ gblehomẹ paali to whenuena nude kavi mẹde hẹn homẹgble na mí, dọ mí na nọ jonamẹ to whepoponu mahopọnna lehe whẹho lọ sinyẹn kavi yin whẹwhẹ sọ bọ mí ma dona yí nudepope wà wẹ ya? Be yinyọnẹn dọ mẹhe mí hẹn homẹgble na lẹ na jona mí na zọ́n bọ mí ma na nọ kiya nado hẹn homẹgble na mẹdevo lẹ gbọn hogbe po nuyiwa mítọn lẹ po dali wẹ ya? E ma sọgan yin mọ.

Jehovah Jiwheyẹwhe wẹ asisa owanyi, lẹblanu, jona po linsinsinyẹn po tọn. Ṣogan, whlasusu wẹ Biblu dọho gando homẹ hinhẹngble na Jehovah go. E yin nuṣiwa lọ sinyẹn, e nọ yinuwa sọta nuṣiwatọ lọ. Gbadopọnna apajlẹ delẹ.

Homẹ Hinhẹngble Na Jehovah

Otàn he tin to 1 Ahọlu lẹ 15:30 mẹ dọ gando ylando Jeloboami tọn go dọmọ “ehe e yí do hẹn Islaeli nado waylando; na homẹ hẹngblena mẹ etọn wutu ehe e yí do hẹn homẹgblena OKLUNỌ.” To 2 Otannugbo lẹ 28:25 mẹ, Biblu dọ gando Ahazi Ahọlu Juda tọn go dọmọ: “E basi otẹn yiji lẹ . . . nado nọ mẹ̀ nuyọnwan hlan yẹwhe devo lẹ, bosọ hẹn homẹgble OKLUNỌ, Jiwheyẹwhe otọ́ yetọn lẹ tọn hlan adi.” Apajlẹ devo sọ yin mimọ to Whẹdatọ 2:11-14 mẹ: “Ovi Islaeli tọn lẹ sọ wà enẹ he yin oylan to nukun OKLUNỌ tọn mẹ bo sẹ̀n [Baali] . . . , yé sọ hẹn OKLUNỌ gblehomẹ hlan adi . . . Yé sọ hẹn adi OKLUNỌ tọn jimiyọ́n do Islaeli ji, e sọ jó yé do alọ mẹhẹngbletọ lẹ tọn mẹ.”

Onú devo lẹ tin he nọ gblehomẹna Jehovah bo nọ biọ dọ e ni sayana mẹ. Di apajlẹ, to Eksọdusi 22:18-20 mẹ, mí hia dọmọ: “Hiẹ ma na dike owọ́ntọ yọnnu de ni nọgbẹ̀. Mẹdepope he mlọ́n kanlin de dè na yín hùhù dandan. Ewọ he sanvọ́ hlan yẹwhe depope adavo hlan OKLUNỌ lọ kẹdẹ, na yín súsúdo gbidigbidi.”

Jehovah ma zindonukọn nado to ylando sinsinyẹn Islaeli hohowhenu tọn lẹ tọn jona yé to whenuena yé gbẹ́ pò to homẹ hẹngblena ẹn bo ma do lẹnvọjọ nujọnu tọn hia gba. To whenuena yé ma tindo lẹnvọjọ nujọnu tọn bo masọ de afọdide depope nado dohia dọ yé to diọdo basi nado setonuna Jehovah, to godo mẹ Jiwheyẹwhe và ylanwatọ lọ lẹ sudo. Ehe jọ do akọta lọ pete go to 607 J.W.M. gbọn Babilọni dali, podọ e sọ jọ whladopo dogọ to owhe 70 W.M. gbọn Lomu dali.

Nugbo wẹ dọ Jehovah nọ gblehomẹ do nuylankan he gbẹtọvi lẹ nọ wà kavi dọ go, podọ to whedelẹnu e nọ hù mẹhe waylando sinsinyẹn bo ma lẹnvọjọ lẹ. Ṣigba, be ehe dohia dọ sọgbe hẹ Yẹwhehodọtọ 7:9 Jehovah yin dopo to mẹhe nọ yawu gblehomẹ lẹ mẹ wẹ ya? Paali. Owhẹ̀ etọn whẹ́n nado nọ gblehomẹ gando ylando sinsinyẹn lẹ go podọ whẹdida etọn nọ yin dodo tọn to whepoponu. Biblu dọ gando Jehovah go dọmọ: “Osé lọ, pipé wẹ azọ́n etọn na whẹdida [dodo] wẹ ali etọn lẹpo: Jiwheyẹwhe nugbowa tọn de, podọ, matin kunnuhu, dodonọ podọ jlọjẹnọ wẹ ewọ.”—Deutelonomi 32:4.

Ylanwiwa Sinsinyẹn Sọta Mẹdevo Lẹ

To Osẹ́n he Jiwheyẹwhe na Islaeli hohowhenu tọn mẹ, eyin ylando sinsinyẹn de yin wiwà sọta mẹde ylanwatọ lọ nọ jiya etọn taun. Di apajlẹ, eyin ajotọ de wá owhé de gbè to zánmẹ bọ whétọ lọ hù i, whétọ lọ ma dù ohùnhọ́. Ewọ mahuwhẹ ylanwiwa sinsinyẹn tọn depope gba. Enẹwutu, mí hia dọ: “Eyin yè mọ ajotọ lọ to dòkùn biọ whégbè, bọ yè linú i bọ e kú, ohùn ma na tin na ẹn [kavi whétọ lọ ma dù ohùnhọ́] gba.”—Eksọdusi 22:2.

Yọnnusi he yin zinzanhẹ gánnugánnu tindo jlọjẹ nado duadi sọta danuwatọ lọ, sẹ́nhẹngba sinsinyẹn de wẹ huhlọn-yido-zanhẹmẹ yin to nukun Jiwheyẹwhe tọn mẹ. To Osẹ́n Mose tọn glọ, sunnu he wà ylando mọnkọtọn dona kú “di whenuena omẹ de fọ́n do kọmẹnu etọn ji, bo hù i.” (Deutelonomi 22:25, 26) Dile etlẹ yindọ mí masọ tin to Osẹ́n Mose tọn glọ ba, Osẹ́n lọ hẹn mí nado yọ́n nukun he Jehovah nọ yido pọ́n huhlọn-yido-zanhẹmẹ—he yin ylando sinsinyẹn de.

To egbehe, huhlọn-yido-zanhẹmẹ gbẹsọ yin ylando sinsinyẹn he nọ biọ yasanamẹ nujọnu tọn. Mẹhe go onú jọ do lọ tindo jlọjẹ lẹpo nado jẹwhẹ na ponọ lẹ. Gbọnmọ dali, aṣẹpipa he nọ penukundo whẹho mọnkọtọn go lẹ sọgan sayana whẹhutọ lọ. Podọ eyin yọnnu he go onú jọ do lọ ma ko whẹ́n, mẹjitọ etọn lẹ sọgan yinuwa.

Ylando Flinflin Lẹ

Etomọṣo, e ma yin ylando lẹpo mẹ wẹ aṣẹpipa lẹ na nọ dádo. Enẹwutu, ylando flinflin mẹdevo lẹ tọn ma dona nọ hẹn homẹgble mí zẹjlẹgo, ṣigba mí dona nọ jonamẹ. Nawẹ mí dona nọ jonamẹ gbọzangbọzan sọ? Apọsteli Pita kanse Jesu dọmọ: “Oklunọ, whla nẹmu wẹ mẹmẹsunnu ṣie na waylan do ogo e, bọ yẹn na jona ẹn? Kaka jẹ whla ṣinawe?” Jesu gblọn na ẹn dọmọ: “Yẹn ma dọ hlan we, dọ, kakajẹ whla ṣinawe gba: adavo kakajẹ whla [kandegbàn-atọ́n-nukunawe].”—Matiu 18:21, 22.

To alọdevo mẹ, mí dona to azọ́nwa do gbẹtọ-yinyin Klistiani tọn mítọn ji bo ma na nọ yí nukunpẹvi do pọ́n homẹ hinhẹngble na mẹdevo lẹ. Di apajlẹ, to whenuena hiẹ to nuyiwa hẹ mẹdevo lẹ, be hogbe towe lẹ nọ sọwhán mẹ, nọ do zinzin matindo hia, bo nọ yin mẹzunzun tọn to whedelẹnu wẹ ya? Mọwiwà sọgan hẹn homẹgblenamẹ. Kakati nado gblewhẹdo mẹhe gblehomẹ lọ bo lẹndọ ewọ wẹ tindo azọngban nado jonamẹ, nuṣiwatọ lọ dona yọnẹn dọ ewọ wẹ hẹn homẹgble lọ wá. Nuṣiwatọ lọ dona wazọ́n nado nọ dava ede to nuyiwa po hogbe etọn lẹ po mẹ ma nado nọ hẹn homẹgble wá. Vivẹnudido mọnkọtọn na gọalọna mí nado de nuṣiwa mítọn he nọ gbleawu numọtolanmẹ mẹdevo lẹ tọn pò. Biblu flin mí dọmọ: “Omẹ delẹ tin bo nọ yawu dọho di sisọ ohí de tọn: ṣigba odẹ́ nuyọnẹntọ lẹ tọn wẹ núgángán.” (Howhinwhẹn lẹ 12:18) To whenuena mí ṣinuwa do mẹde, etlẹ yin to mayọnẹn mẹ, ovẹvivẹ nujọnu tọn mítọn na gọalọ nado jla whẹho lọ do.

Ohó Jiwheyẹwhe tọn dohia dọ mí dona “nọ hodo nuhe nọ wazọ́n na jijọho lẹ, podọ nuhe dali mẹde sọgan gbọn hẹn mẹdevo dote.” (Lomunu lẹ 14:19) To whenuena mí yin zinzintọ po homẹdagbenọ po, mí nọ dohia dọ mí yí hogbe howhinwhẹn tọn lọ do yizan mẹ ehe dọmọ: “Di agọ̀n sika tọn to ohà fataka tọn mẹ, mọwẹ ohó he yè dọ to ojlẹ etọn mẹ te.” (Howhinwhẹn lẹ 25:11) Nuyiwadomẹji homẹhunhun po ayajẹ po tọn nankọ die! Hogbe homẹmimiọn tọn he gọna zinzin sọgan diọ walọ hẹngogonọ tọn: “Odẹ́ he mlẹn wẹ nọ gbà ohú.”—Howhinwhẹn lẹ 25:15.

Enẹwutu, Ohó Jiwheyẹwhe tọn na mí ayinamẹ dọmọ: “Mì gbọ hogbe mìtọn ni tin po ojọmiọn po to whepoponu, ehe ojẹ̀ pé, na mìwlẹ nido yọ́n le mì na nọ gblọnhona gbẹtọ lẹ dopodopo do.” (Kọlọsinu lẹ 4:6) “Ehe ojẹ̀ pé” zẹẹmẹdo nado hẹn hogbe mítọn lẹ vivi bo yọ́n sisè na mẹdevo lẹ, bo gbọnmọ dali dekanpona homẹ hinhẹngble na mẹdevo lẹ. To hogbe po nuyiwa po mẹ, Klistiani lẹ nọ vánkan nado yí avase Biblu tọn do yizan mẹ ehe dọmọ: “Gbọ e ni nọ dín jijọho, bosọ nọ doafọna ẹn.”—1 Pita 3:11.

Eyin mọwẹ, e họnwun dọ nuhe dọ Yẹwhehodọtọ 7:9 te wẹ yindọ mí ma dona nọ gblehomẹ na nuṣiwa flinflin mẹdevo lẹ tọn wutu. Nuṣiwa flinflin ehelẹ sọgan yin kọdetọn mapenọ-yinyin mítọn tọn kavi to whedelẹnu sọn ojlo mẹ, ṣogan e ma yin ylando sinsinyẹn lẹ gba. Ṣigba, eyin nuṣiwa lọ yin ylando sinsinyẹn, e họnwun dọ mẹhe go yè ṣinuwa do lọ sọgan gblehomẹ bo sọgan basi nudide nado ze afọdide he jẹ.—Matiu 18:15-17.

[Yẹdide to weda 14]

Jehovah jo Islaelivi tasinyẹntọ lẹ do bọ Lomunu lẹ và yé sudo to owhe 70 W.M.

[Yẹdide to weda 15]

“Di agọ̀n sika tọn . . . mọwẹ ohó he yè dọ to ojlẹ etọn mẹ te”