Jiwheyẹwhe Kavi Gbẹtọ?

“YẸN wẹ hinhọ́n aihọn tọn; mẹhe hodo mi ma na zinzọnlin zinvlu mẹ, ṣigba e na tindo hinhọ́n ogbẹ̀ tọn.” (Johanu 8:12) Jesu Klisti wẹ dọ ohó ehelẹ. Wesetọ owhe kanweko tintan whenu tọn de wlan gando e go dọmọ: “Mẹhe mẹ yè yí adọkunnu nuyọnẹn tọn po zinzin lẹpo po tọn whlá do.” (Kọlọsinu lẹ 2:3) Biblu sọ dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Dandannu wẹ e yin dọ mí ni tindo oyọnẹn he pegan gando Jesu go nado sọgan hẹn pekọ wá na nuhudo gbigbọmẹ tọn mítọn.

Mẹsusu ko sèhó gando Jesu Klisti go lẹdo aihọn pé. E ko yinuwado whenuho gbẹtọvi tọn ji to obá he yiaga tlala de mẹ. Na nugbo tọn, sunzanhiawe he nọ yin yiyizan to fisusu to aihọn lọ mẹ yin zize sinai do owhe he mẹ mẹsusu lẹndọ ewọ yin jiji te ji. Otanwe lọ The World Book Encyclopedia dọmọ: “Mẹsusu nọ dlẹnalọdo ojlẹ he jẹnukọnna owhe enẹ lẹ taidi J.W.M., kavi jẹnukọnna whenu mítọn,” he sọ zẹẹmẹdo jẹnukọnna ojlẹ Klisti tọn. “Yé nọ yí A.D., kavi anno Domini (to owhe Oklunọ mítọn tọn mẹ) zan na ojlẹ he jẹgodona owhe enẹ lẹ.”

Ṣogan, linlẹn voovo wẹ tin gando mẹhe Jesu yin go. Mẹdelẹ lẹndọ gbẹtọ ayidego tọn he yinuwado whenuho gbẹtọvi tọn ji de poun wẹ e yin, to whenuena mẹdevo lẹ nọ pọ́n ẹn hlan taidi Jiwheyẹwhe Ganhunupotọ bo nọ sẹ̀n ẹn. Sinsẹ̀nnọ Hindu delẹ ko yí Jesu Klisti jlẹdo yẹwhe Hindu he nọ yin Krishna go, ehe mẹsusu yise dọ e yin yẹwhe he nọ ze agbasa gbẹtọ tọn dó de. Be gbẹtọ de poun wẹ Jesu yin ya, kavi mẹhe dona yin sinsẹ̀n-basina de? Mẹnu wẹ ewọ yin taun? Fie wẹ e wá sọn? Gbẹtọ-yinyin nankọtọn wẹ e tindo? Podọ fie wẹ e tin te todin? Dile mí na mọ do to hosọ he bọdego mẹ, owe lọ he tindo nususu taun nado dọ gando Jesu go na gblọndo he sọgan yin jidedego lẹ hlan kanbiọ ehelẹ.