Otàn Gbẹzan Tọn

Yẹn Mọ ‘Obiọ Ahun Ṣie mẹ Tọn’ Yí

DILE E YIN DIDỌ GBỌN DOMINIQUE MORGOU DALI

Yẹn ko wá tin to Aflika lo! Ojlo vẹkuvẹku he yẹn ko tindo sọn ovu whenu gbọ́n wá mọ hẹndi to décembre 1998. Nọtẹn flala po gbekanlin wunmẹwunmẹ Aflika tọn lẹ po ko nọ fọnjlodotena mi to whepoponu. Yẹn wá tin to finẹ todin na nugbo tọn! To ojlẹ dopolọ mẹ, ojlo vẹkuvẹku devo sọ mọ hẹndi. Yẹn yin wẹndagbe-jlatọ whenu-gigọ́ tọn de he to devizọnwa to otò devo mẹ. Yẹn ma nọ mọnù ganji, podọ yẹn nọ zinzọnlin to aliho yẹnkẹn tọn gbétatò Aflika tọn lẹ ji po alọgọ avún alidohiamẹ tọn he nọ deanana nukuntọ́nnọ lẹ de po he ko yin pinplọn titengbe nado zinzọnlin to tòhomẹ-liho tòdaho Europe tọn lẹ ji. To nukun mẹsusu tọn mẹ, ehe sọgan ko taidi nuhe ma yọnbasi. Mì gbọ ma dọ lehe e wá yọnbasi na mi nado wadevizọn to Aflika podọ lehe Jehovah na mi ‘obiọ ahun ṣie mẹ tọn’ gbọn na mì.—Psalm 37:4.

YẸN yin jiji to 9 juin 1966, to hùwaji France tọn. Yẹn wẹ yin pòdevi to mí ovi ṣinawe whẹndo lọ tọn lẹ mẹ, yèdọ sunnu awe, yọnnu atọ́n, podọ mẹjitọ owanyinọ mítọn lẹ penukundo mí go ganji. Ṣigba, nujijọ awubla tọn de jọ to jọja whenu ṣie. Taidi onọ̀-daho ṣie, onọ̀ ṣie, podọ dopo to mẹdaho yọnnu ṣie lẹ mẹ, yẹn jẹ azọ̀n he n’dugu etọn sọn mẹjitọ ṣie lẹ si de he nọ hẹnmẹ tọ́nnukun pete to nukọnmẹ.

Taidi jọja aflanmẹ de, n’pehẹ akọ̀ ṣinṣinyan, nuvẹun, po yẹnuwiwa po, bọ ehe hẹn mi nado nọ fọ́ngu sọta gbẹtọvi lẹ to paa mẹ. To ojlẹ sinsinyẹn ehe mẹ wẹ mí sẹtẹn yì agbegbe Hérault tọn ji. To finẹ, onú jiawu de jọ.

To dimanche afọnnu gbèdopo, Kunnudetọ Jehovah tọn awe wá ohọ̀n mítọn ji. Onọ̀ ṣie yọ́n yé bo dọna yé dọ yé ni biọ họmẹ. Dopo to yọnnu awe lọ lẹ mẹ kanse Mama eyin e flindọ ewọ ko dopagbe dọ emi na kẹalọyi plọnmẹ Biblu to gbèdopo. Mama flin, enẹwutu e kanse dọ: “Whetẹnu wẹ mí na bẹjẹeji?” Yé kọngbedopọ dọ yé na nọ pé to dimanche afọnnu lẹpo, bọ gbọnmọ dali onọ̀ ṣie jẹ “nugbo wẹndagbe tọn” plọn ji.—Galatianu lẹ 2:14.

Nukunnumọjẹnumẹ Tintindo

Mama dovivẹnu vẹkuvẹku nado mọnukunnujẹ nuhe plọn e te lẹ mẹ bo flin yé. Na ewọ yin nukuntọ́nnọ wutu, e dona plọn onú lẹpo do tamẹ. Kunnudetọ lọ lẹ yinuwa hẹ ẹ po homẹfa po taun. Whedepopenu he Kunnudetọ lọ lẹ wá, yẹn nọ họ̀n whlá do abò mẹ bo nọ tọ́n kiki to whenue yé ko yì godo. Ṣigba, to whèmẹ dopo, Eugénie, he yin dopo to Kunnudetọ lọ lẹ mẹ dukosọ hẹ mi bo dọhona mi. E dọna mi dọ Ahọluduta Jiwheyẹwhe tọn na de yẹnuwiwa, wangbẹna, po nuvẹun lẹpo po sẹ̀ sọn aihọn mẹ. “Jiwheyẹwhe kẹdẹ wẹ tindo pọngbọ lọ,” wẹ e dọ. E kanse eyin yẹn na jlo nado yọ́n nususu dogọ. To wunkẹngbe, plọnmẹ Biblu ṣie bẹjẹeji.

Nuhe yẹn nọ plọn lẹpo wẹ nọ di nuyọyọ na mi. Yẹn wá mọnukunnujẹemẹ todin dọ Jiwheyẹwhe tindo whẹwhinwhẹ́n dolido lẹ nado jotẹnna kanyinylan to aigba ji na ojlẹ gli de. (Gẹnẹsisi 3:15; Johanu 3:16; Lomunu lẹ 9:17) Yẹn sọ mọnukunnujẹemẹ hezeheze dọ Jehovah ma jo mí do matin todido gba. E ko na mí todido jiawu ogbẹ̀ madopodo tọn to paladisi aigba ji tọn mẹ. (Psalm 37:29; 96:11, 12; Isaia 35:1, 2; 45:18) To Paladisi enẹ mẹ, nukun ṣie lẹ he ko to tintọ́n vudevude, na vọ́ mọnù ganji.—Isaia 35:5.

Sinsẹ̀nzọn Whenu-Gigọ́ Tọn Bibẹjẹeji

To 12 décembre 1985, yẹn basi dohia klandowiwe ṣie hlan Jehovah tọn gbọn baptẹm osin tọn dali, bo gbọnmọ dali kọnawudopọ hẹ mẹdaho ṣie yọnnu Marie-Claire, he ko ze afọdide ehe. Madẹnmẹ to enẹgodo, mẹdaho ṣie sunnu Jean-Pierre po onọ̀ yiwanna ṣie po ze afọdide dopolọ.

Gbehosọnalitọ whepoponu tọn kavi wẹndagbe-jlatọ whenu-gigọ́ tọn susu wẹ tin to agun he yẹn nọ kọnawudopọ hẹ mẹ. Ayajẹ po zohunhun yetọn po to lizọnyizọn lọ mẹ na tuli mi tlala. Marie-Claire lọsu, he nọ jẹ nukunzọ̀n bo nọ do afọpa sẹkunọ lẹ tọn do afọ dopo tlẹ biọ sinsẹ̀nzọn whenu-gigọ́ tọn mẹ ga. Kakajẹ egbé, apajlẹ etọn gbẹ́ nọ na mi tuli to gbigbọ-liho. Na gbehosọnalitọ lẹ wẹ lẹdo mi pé to agun mẹ podọ to whégbè wutu, yẹnlọsu wleawuna ojlo vẹkuvẹku nado tindo mahẹ to sinsẹ̀nzọn whenu-gigọ́ tọn mẹ. Enẹwutu, to novembre 1990, n’jẹ devizọnwa ji taidi gbehosọnalitọ to Béziers.—Psalm 94:17-19.

Duduto Flumẹjijẹ Ji

Mẹtọnhopọn owanyinọ gbehosọnalitọ devo lẹ tọn gọalọna mi taun to lizọnyizọn lọ mẹ. Mahopọnna enẹ, sọn ojlẹ de mẹ jẹ devo mẹ, yẹn nọ tindo numọtolanmẹ flumẹjijẹ tọn na madogán ṣie lẹ wutu bọ e nọ jlo mi nado wà nususu dogọ. Ṣigba, Jehovah gọalọna mi to ojlẹ flumẹjijẹ tọn enẹlẹ mẹ. Yẹn basi dodinnanu to Index des publications de la Société Watch Tower mẹ bo dín otàn gbẹzan gbehosọnalitọ he jẹ nukunzọ̀n taidi yẹn lẹ tọn. Lehe yé sù sọ paṣa mi tlala! Kandai yọn-na-yizan podọ tulinamẹ tọn ehelẹ plọn mi nado yọ́n pinpẹn nuhe n’penugo nado wà tọn bo kẹalọyi madogán ṣie lẹ.

Nado penukundo nuhudo ṣie lẹ go, yẹn po Kunnudetọ devo lẹ po nọ hẹn nusatẹn lẹ do wiweji. To gbèdopo n’doayi e go dọ azọ́nwatọgbẹ́ ṣie lẹ vọ́ to súnsúnsún fie yẹn ṣẹṣẹ súnsún wayi lẹ. E họnwun dọ yẹn to dihó susu jodo. Yẹn yì mọ Valérie, he yin gbehosọnalitọ he nọ penukundo azọ́nwiwa-gbẹ́ mítọn go, bo biọ to e si nado dọna mi tlọlọ eyin yẹn to onú lẹ hẹn sinyẹn na mẹhe pò lẹpo. E gbọn homẹdagbe dali na mi dotẹnmẹ nado zindonukọn kakajẹ whenue yẹnlọsu mọdọ n’ma sọgan wà azọ́n lọ ba. To mars 1994, yẹn jo azọ́n lọ do.

Whladopo dogọ, yẹn gọ́ na numọtolanmẹ nuvọ́nọ-yinyin tọn. N’hodẹ̀ vẹkuvẹku hlan Jehovah, podọ yẹn yọnẹn dọ e sè ovẹvivẹ ṣie lẹ. Whladopo dogọ, Biblu po owe Klistiani tọn lẹ po pinplọn gọalọna mi tlala. Nalete, dile etlẹ yindọ nukunzọ̀n lọ to sinsinyẹn deji, ojlo ṣie nado sẹ̀n Jehovah fọ́n bo to jijideji. Etẹwẹ yẹn sọgan wà?

Yinkọ Zizedai Podọ Nudide de Bibasi po Awuyiya Po

Yẹn ze yinkọ dai nado mọ azọ́nplọnmẹ yí to fihe nọ penukundo nukuntọ́nnọ lẹ po mẹhe ma nọ mọnú ganji lẹ po go to Nîmes podọ to godo mẹ yẹn yin alọkẹyi na osun atọ̀n. Whenu he yin yiyizan ganji wẹ ojlẹ enẹ yin. Yẹn wá mọ nuhe madogán agbasa tọn ṣie bẹhẹn lẹpo podọ n’plọn nado diọada sọgbe hẹ ẹ. Awukinkọndopọ hẹ mẹhe to oyà madogán agbasa tọn wunmẹwunmẹ ji lẹ gọalọna mi nado mọ lehe todido Klistiani tọn ṣie họakuẹ sọ. E whè gbau, yẹn gbẹ́ tindo yanwle de to gbẹ̀mẹ bo sọgan wà nude he nọ de sinsẹ́n tọ́n. Humọ, yẹn plọn nukinkan nukuntọ́nnọ lẹ tọn to Flansegbe mẹ.

To whenuena yẹn lẹkọwa whé, whẹndo ṣie doayi lehe azọ́nplọnmẹ lọ ko gọalọna mi sọ go. Ṣigba, onú dopo he yẹn ma yiwanna paali wẹ yin opò wewe nukuntọ́nnọ lẹ tọn he yẹn dona zan. E vẹawuna mi taun nado kẹalọyi dọ yẹn dona zan opò enẹ. Yẹn mọdọ e na jẹaṣọ́ hugan nado tindo alọgọnamẹnu devo, vlavo avún alidohiamẹ tọn he nọ deanana nukuntọ́nnọ lẹ.

Yẹn doalọ obiọwema de mẹ nado sọgan mọ avún lọ yí ṣigba e yin didọna mi dọ mẹhe ko basi obiọ mọnkọtọn lẹ sù taun. Humọ, azọ́nwhé lọ dona basi dodinnanu de whẹ́ na avún enẹ ma nọ yin yíyí na mẹdepope poun. To gbèdopo nawe de he nọ penukundo ogbẹ́ nukuntọ́nnọ lẹ tọn de go dọna mi dọ bọlu-hògbẹ́ tennis tọn de tin to lẹdo lọ mẹ he jlo na basi nunina avún mọnkọtọn de tọn na nukuntọ́nnọ kavi mẹhe ma nọ mọnù ganji de he nọ nọ̀ lẹdo mítọn mẹ. E dọ dọ emi lẹnnu jẹ yẹn ji. Be yẹn na jlo nado kẹalọyi ya? Yẹn mọ alọ Jehovah tọn to whẹho lọ mẹ bo kẹalọyi nuzedonukọnnamẹ homẹdagbe tọn lọ. Ṣigba, yẹn dona nọtepọn avún lọ.

Yẹn Gbẹ́ Pò to Nulẹnpọndo Aflika Ji

To whenuena yẹn to tepọn avún lọ, n’lẹ́ ayidonugo ṣie hlan fidevo. Dile yẹn ko dọ do jẹnukọn, sọn ovu whenu gbọ́n wẹ Aflika ko nọ jlo mi taun. Dile etlẹ yindọ nukun ṣie lẹ to gbigble dogọ, ojlo enẹ fọ́n bo to sinsinyẹn deji hú gbede pọ́n tọn, titengbe sọn whenue yẹn sè dọ mẹsusu nọ tindo ojlo to Biblu pinplọn mẹ podọ to Jehovah sinsẹ̀n mẹ to Aflika. Yẹn ko dọna Valérie to ojlẹ de mẹ wayi to aliho vlẹkẹsẹ de mẹ dọ yẹn na jlo nado basi dlapọn yì Aflika. Be ewọ na jlo nado hodo mi ya? E yigbe bọ mí kanwe hlan Alahọ Kunnudetọ Jehovah tọn lẹ tọn susu to otò he nọ do Flansegbe to Aflika lẹ mẹ.

Gblọndo de wá sọn Togo. Po aglinjijẹ po, n’dọna Valérie dọ e ni hia ẹ na mi. Wekanhlanmẹ lọ na tuli mí taun, enẹwutu Valérie dọmọ: “Eyin mọwẹ, naegbọn mí ma nado yì?” To wekinkan hlan mẹmẹsunnu he tin to alahọ Togo tọn mẹ lẹ godo, yé biọ to asi e nado kanwe hlan mẹmẹyọnnu de he nọ yin Sandra he yin gbehosọnalitọ to Lomé he yin tòdaho tatọ́-tònọ lọ. Mí basi tito nado yì to 1^er décembre 1998.

Vogbingbọn he tin to otò ehe po Europe po ṣẹnṣẹn sẹhundaga, ṣigba ayajẹ nankọ die! To whenuena agahun mítọn ko glin to Lomé godo, mí jẹte bọ yozò Aflika tọn gbaṣinyọ́n mí taidi avọ̀ ṣinṣinyọn nkọtọn. Sandra wá pé mí. Mí ma ko mọ míde pọ́n gbede dai, ṣigba to afọdopolọji e taidi dọ mí ko yin họntọn sọn ojlẹ dindẹn die. Ojlẹ vude jẹnukọnna wiwá mítọn, Sandra po awetọ etọn, Christine po ko yin pipà taidi gbehosọnalitọ titengbe to Tabligbo, he yin tòpẹvi de to ṣẹnṣẹn Togo tọn. Míwlẹ tindo lẹblanulọkẹyi lọ todin nado hodo yé yì azọ́ndenamẹ yọyọ yetọn mẹ. Mí nọ̀ finẹ na nudi osun awe, podọ to whenuena mí lẹkọ jei whé, yẹn yọnẹn dọ yẹn na lẹkọwa.

Homẹ Ṣie Hùn Nado Lẹkọwa

To France, yẹn jẹ awuwle ji to afọdopolọji nado basi gbejizọnlin ṣie awetọ yì Togo. Po alọgọ whẹndo ṣie tọn po, yẹn penugo nado basi tito bo nọ̀ Togo na osun ṣidopo. Enẹwutu, to septembre 1999 yẹn do agahun whladopo dogọ nado yì Togo. Ṣigba todin, mẹde ma hodo mi. Yí nukun homẹ tọn do pọ́n numọtolanmẹ hagbẹ whẹndo ṣie tọn lẹ tọn to whenuena yé mọdọ yẹn to gbejizọnlinzin yẹn ṣo mahopọnna madogán ṣie! Ṣigba, whẹwhinwhẹ́n depope ma tin nado hanú. Yẹn hẹn mẹjitọ ṣie lẹ deji dọ họntọn ṣie lẹ, he ko lẹzun whẹndo ṣie nkọtọn, na to tepọn mi to Lomé.

Ayajẹ nankọ die nado lẹkọwa fie mẹsusu sọmọ nọ do ojlo hia to Biblu pinplọn mẹ te! E ma yin nupaṣamẹ nado mọ gbẹtọ lẹ to Biblu hia to alitó. To Tabligbo, gbẹtọ lẹ nọ basi oylọ namẹ nado dọhodo Biblu ji hẹ yé. Podọ lẹblanulọkẹyi nankọ die nado má ohọ̀ kleun de zan hẹ mẹmẹyọnnu gbehosọnalitọ titengbe awe! Yẹn wá jẹakọ hẹ aṣa devo, yèdọ aliho devo nado pọ́n onú lẹ hlan. Tintan whẹ́, yẹn doayi e go dọ mẹmẹsunnu po mẹmẹyọnnu mítọn lẹ po to Aflika nọ ze Ahọluduta lọ do otẹn tintan mẹ to gbẹzan yetọn mẹ. Di apajlẹ, zọnlinzinzin na kilomẹtlu susu whẹpo do wá Plitẹnhọ Ahọluduta tọn mẹ ma nọ glọnalina yé nado wá opli lẹ gba. Yẹn sọ plọn nususu sọn gbigbọ awuyadomẹ po johẹmẹ tọn yetọn po mẹ.

To gbèdopo whenuena mí lẹkọ ja sọn lizọnyizọn kunnudegbe tọn mẹ, yẹn dọ numọtolanmẹ ṣie na Sandra dọ obu to didi mi nado lẹkọyi France. Nukun ṣie lẹ ko gble taun dogọ. Yẹn nọ hanú gando tòhomẹ-liho Béziers tọn lẹ he nọ ján bo nọ jẹ di ahi, pèkán ohọ̀ lẹ tọn lẹ, po onú devo he nọ hẹn ogbẹ̀ vẹawuna mẹhe ma nọ mọnú ganji lẹ po go. To vogbingbọnmẹ, dile etlẹ yindọ aliho Tabligbo tọn lẹ ma yin titlẹ́, yé ma nọ ján sọmọ na gbẹtọ lẹ ma nọ sù podọ wayì-wayì ma nọ tin sọmọ. Todin he Tabligbo ninọ̀ ko má mi ganji nawẹ yẹn na nọ̀ France gbọn?

To azán awe godo, onọ̀ ṣie ylọ mi to alokan ji bo dọna mi dọ wehọmẹ he nọ plọn avún alidohiamẹ tọn lẹ to tepọn mi. Avún de he nọ yin Océane ko wleawufo nado lẹzun “nukun” ṣie lẹ. Whladopo dogọ, nuhudo ṣie lẹ yin pekọhẹnwana podọ magbọjẹ ṣie lẹ busẹ. To osun ṣidopo sinsẹ̀nzọn he gọ́ na ayajẹ tọn wiwà to Tabligbo godo, yẹn lẹkọyi France nado yì pé Océane.

To azọ́nplọnmẹ osun susu tọn godo, Océane yin zizedo alọmẹ na mi. To bẹjẹeji, e ma bọawu gba. Mí dona plọn nado jẹakọ hẹ ode awetọ. Ṣigba, vudevude, yẹn wá mọ lehe n’tindo nuhudo Océane tọn sọ. Nado dọ hójọhó, Océane ko lẹzun agbasagonu ṣie todin. Nawẹ gbẹtọ lẹ to Béziers nọ yinuwa gbọn eyin yé mọ bọ n’ja ohọ̀n yetọn ji po avún de po? Mẹsusu nọ do sisi po homẹdagbe po hia mi. Océane wá diyin taun to okọ́ lọ mẹ. To whenuena e yindọ mẹsusu ma nọ voawu to mẹhe tindo oblọ agbasago tọn de nukọn, avún de tintindo nọ gọalọna mi nado dọhodo madogán ṣie ji to aliho jọwamọ tọn mẹ. Gbẹtọ lẹ nọ voawu bo nọ dotoaina mi. Na nugbo tọn, Océane lẹzun aliho hodọdopọ bibẹjẹeji tọn dagbe hugan de.

Yẹn Wá Aflika po Océane Po

Yẹn ma wọnji Aflika go gba, podọ yẹn jẹ awuwlena gbejizọnlin ṣie atọ̀ntọ ji. Todin, Océane hodo mi. Asu po asi po jọja de, he nọ yin Anthony po Aurore po, gọna họntọn ṣie Caroline, he yemẹpo yin gbehosọnalitọ taidi yẹn sọ hodo mi ga. To 10 septembre 2000, mí wá Lomé.

To bẹjẹeji, mẹsusu nọ dibuna Océane. Omẹ vude wẹ ko mọ avún daho mọnkọtọn pọ́n to Lomé, na suhugan avún he to Togo lẹ tọn wẹ ma nọ klo. Eyin yé mọ okàn he to okọ̀ na ẹn, mẹdelẹ nọ lẹndọ kanlin he ylanhùn de wẹ e yin bo dona yin ginglọn. Na nuhe dù Océane, e nọ fọnadán bo nọ tin to aṣeji nado basi hihọ́na mi sọta nudepope he e mọ taidi owù. Etomọṣo, to madẹnmẹ Océane wá voawu to lẹdo yọyọ lọ mẹ. Eyin okàn jẹ okọ̀ na ẹn, e nọ taidi dọ e to azọ́nwa nkọtọn, bọ e nọ nọ̀ whii bo nọ tin to apá ṣie. To whenuena okàn yin didesọn okọ̀ na ẹn, e nọ jẹ aihunda ji, bo tlẹ nọ sinyẹnta to whedelẹnu. Mí nọ daihun dopọ taun.

Mímẹpo yin oylọ-basina nado nọ̀ hẹ Sandra po Christine po to Tabligbo. Nado gọalọna mẹmẹsunnu po mẹmẹyọnnu lẹdo lọ tọn lẹ po nado jẹakọ hẹ Océane, mí basi oylọna yé nado wá dla mí pọ́n bọ mí basi zẹẹmẹ na yé gando azọngban avún mọnkọtọn tọn, nuhewutu yẹn tindo nuhudo avún enẹ tọn, po lehe yé dona nọ yinuwa gbọn eyin yé tin to apá etọn po go. Mẹho lẹ yigbe dọ Océane na nọ hodo mi wá Plitẹnhọ Ahọluduta tọn mẹ. Na tito ehe yin onú yọyọ de to Togo wutu, nulila de yin bibasi nado basi zẹẹmẹ do whẹho lọ ji na agun lọ. Na nuhe dù lizọnyizọn lọ, gọyìpọn lẹ po plọnmẹ Biblu lẹ po whenu kẹdẹ wẹ Océane nọ hodo mi—yèdọ ninọmẹ he mẹ e ma na vẹawu nado mọnukunnujẹ nuhewutu e tin to finẹ mẹ te lẹ.

Yẹwhehodidọ to aigba-denamẹ ehe ji gbẹ́ nọ hẹn homẹhun mi. Mẹtọnhopọn he gbẹtọ jijọ dagbenọ lẹ nọ dohia gbọn nuyiwa homẹdagbe tọn lẹ dali, taidi jeje yetọn nado na mi oján nọ yinuwado ji e sisosiso to whepoponu. To octobre 2001, onọ̀ ṣie hodo mi to gbejizọnlin ṣie ẹnẹtọ yì Togo mẹ. Mimọ dọ yẹn to ganji vọ́ jide na ẹn bọ e lẹkọyi France po ayajẹ po to osẹ atọ̀n godo.

Yẹn dopẹna Jehovah tlala dọ yẹn ko penugo nado wadevizọn to Togo. Yẹn deji dọ Jehovah na zindonukọn nado to ‘obiọ ahun ṣie mẹ tọn’ na mi dile yẹn to nukọnzindo nado to nuhe n’tindo lẹpo yizan to sinsẹ̀nzọn etọn mẹ.a

[Nudọnamẹ odò tọn]

[Yẹdide lẹ to weda 10]

Nọtẹn flala po gbekanlin wunmẹwunmẹ Aflika tọn lẹ po ko nọ fọnjlodotena mi to whepoponu

[Yẹdide to weda 10]

Océane hodo mi yì gọyìpọn

[Yẹdide to weda 11]

Mẹho lẹ yigbe na mi nado nọ plan Océane wá opli lẹ ji