“Mì Sẹpọ Jiwheyẹwhe, Ewọ Nasọ Sẹpọ Mì”
Jẹnukọnna Biblu Pinplọn Podọ to Enẹgodo—E Penugo Nado Diọ
SANDRA, heyin yọnnu Mexique tọn de basi zẹẹmẹ ede tọn taidi ovi tolivẹtọ he nọ dowinyan whẹndo etọn. Owhe aflanmẹ tọn etọn lẹ blawu taun na e yin kọgbẹ́ e go bo ma mọ dohia owanyi tọn depope. E dọmọ: “Yẹn jugbọn owhe aflanmẹ tọn mẹ po numọtolanmẹ nuvọ́nọ-yinyin tẹgbẹ̀ tọn po gọna ayihaawe tintindo gando nuhewutu yẹn tin to ogbẹ̀ go.”
To whenuena Sandra tin to wehọmẹ daho, e jẹ ovẹn he otọ́ etọn nọ tindo to họmẹ nù ji. To madẹnmẹ, e nọ jẹ ovẹn edetiti tọn bo lẹzun ahànnumunọ. “Yẹn ma tindo ojlo depope nado nọgbẹ̀,” wẹ e dọ. Na flumẹjijẹ wutu, Sandra jẹ amasin-adínọ zan ji. E dọmọ: “Onú dopo gee he nọ gọalọna mi nado wọnji nuhahun ṣie lẹ go wẹ nuhe yẹn nọ hẹn do saki ṣie mẹ lẹ: ahàn sinsinyẹn, amasin-kún delẹ, kavi marijuana vude.”
To wehọmẹ dotozọ́n pinplọn tọn fifó godo, Sandra tlọ biọ ahànnumu mẹ sisosiso. E tẹnpọn nado hù ede. Ṣigba e ma kú.
Sandra dín alọgọ gbigbọmẹ tọn po numọtolanmẹ tọn po to sinsẹ̀n voovo lẹ mẹ, ṣigba ovọ́ wẹ popolẹpo. Na e ko hẹn todido bu bọ sọgodo etọn dozín wutu, e viavi whlasusu hlan Jiwheyẹwhe dọ: “Fie wẹ a te? Naegbọn hiẹ ma gọalọna mi?” Numọtolanmẹ nuvọ́nọ-yinyin tọn etọn lẹ ko sinyẹn deji whẹpo Kunnudetọ Jehovah tọn de dọho hẹ ẹ. Ehe dekọtọn do plọnmẹ Biblu mẹ hẹ ẹ. Sandra yin whinwhàn tlala to whenuena e plọn dọ “OKLUNỌ sẹpọ yé he yin ayiha gbigbanọ de tọn lẹ.”—Psalm 34:18.
Mẹhe plọn Biblu hẹ Sandra gọalọna ẹn nado mọnukunnujẹemẹ dọ Jehovah Jiwheyẹwhe yọnẹn dọ madogánnọ wẹ mí yin na ylando po mape po he mí dugu etọn sọn Adam dè wutu. Sandra yọnẹn dọ Jiwheyẹwhe mọnukunnujẹemẹ dọ mí ma sọgan nọgbẹ̀ sọgbe hẹ nujinọtedo dodo tọn lẹ mlẹnmlẹn gba. (Psalm 51:5; Lomunu lẹ 3:23; 5:12, 18) Homẹ etọn hùn nado yọnẹn dọ Jehovah ma nọ ze ayidonugo do madogán mítọn lẹ ji gba, podọ e ma nọ donukun nususu hugan nuhe mí sọgan wà. Psalm-kàntọ lọ kanse dọ: “Oklunọ E, mẹnu wẹ sọgan ṣite, eyin hiẹ, OKLUNỌ na payiha ylando go?”—Psalm 130:3.
Nugbo tangan Biblu tọn he miọnhomẹna Sandra wẹ avọ́sinsan ofligọ Jesu Klisti tọn. Gbọn ehe gblamẹ, Jehovah nọ gbọn lẹblanu dali na teninọ dodo tọn gbẹtọvi tonusetọ lẹ mahopọnna mapenọ-yinyin yetọn. (1 Johanu 2:2; 4:9, 10) Mọwẹ, mí sọgan mọ “jona ylando [mítọn lẹ] tọn” bo gbọnmọ dali yin alọgọna nado duto numọtolanmẹ nuvọ́nọ-yinyin tọn depope ji.—Efesunu lẹ 1:7.
Sandra mọ nuplọnmẹ titengbe lẹ plọn sọn apajlẹ apọsteli Paulu tọn mẹ. E yọ́n pinpẹn homẹdagbe Jiwheyẹwhe tọn to ylando etọn he ko wayi lẹ jijona ẹn po alọgigọna ẹn nado hoavùn sinsinyẹn nado duto madogán he nọ sọawuhia gbọzangbọzan lẹ po ji mẹ. (Lomunu lẹ 7:15-25; 1 Kọlintinu lẹ 15:9, 10) Paulu vọ́ gbẹzan ede tọn jlado, yèdọ ‘linú agbasa ede tọn bo hẹn ẹn wá taliai mẹ’ nado sọgan gbọṣi aliho he Jiwheyẹwhe kẹalọyi lọ ji. (1 Kọlintinu lẹ 9:27) E ma na dotẹnmẹ ayilinlẹn ylando tọn etọn lẹ nado deanana ẹn taidi afanumẹ de gba.
Madogán Sandra tọn lẹ dotukla ẹ taun, ṣigba e to avunho hẹ yé zọnmii. E hodẹ̀ hlan Jehovah vẹkuvẹku nado gọalọna ẹn nado duto yé ji bosọ dín lẹblanu etọn. (Psalm 55:22; Jakobu 4:8) To mimọ dọ Jiwheyẹwhe tindo ojlo nujọnu tọn to emi mẹ, Sandra penugo nado diọ gbẹzan ede tọn. “Homẹ ṣie hùn nado nọ plọn Biblu mẹdevo lẹ to whenu-gigọ́ mẹ,” wẹ e dọ. Sandra tindo lẹblanulọkẹyi lọ nado gọalọna nọviyọnnu etọn daho po nọviyọnnu etọn pẹvi po nado yọ́n Jehovah. Dile e to ‘azọ́n dagbe lẹ wà,’ e sọ nọ yí azọ́nyinyọnẹn etọn taidi doto de zan to plidopọ Kunnudetọ Jehovah tọn lẹ tọn lẹ ji.—Galatianu 6:10.
Etẹwẹ dogbọn nuhe mẹ Sandra ko tlọ́ ede do lẹ dali? E dọ po jidide po dọmọ: “Ayiha ṣie wé. Yẹn ma nọ nùahàn, zan taba, kavi amasin adínọ lẹ ba. Yẹn ma tindo nuhudo yetọn. Yẹn mọ nuhe yẹn to dindin.”
[Nudọnamẹ tangan lẹ to weda 9]
“Yẹn mọ nuhe yẹn to dindin”
[Apotin to weda 9]
Nunọwhinnusẹ́n He Yọn-na-Yizan Lẹ
Nunọwhinnusẹ́n Biblu tọn delẹ die he ko gọalọna mẹsusu nado jo onú adínọ lẹ zinzan do:
“Mì gbọ mí ni klọ́ míde sọn diho agbasalan po gbigbọ tọn lẹpo po mẹ, bosọ hẹn wiwe sọgbe to osi Jiwheyẹwhe tọn mẹ.” (2 Kọlintinu lẹ 7:1) Mẹhe ko klọ́ yede wé sọn diho mẹ, bo dapana nuwiwa mawé tọn lẹ wẹ Jiwheyẹwhe nọ dona.
“Osi OKLUNỌ tọn wẹ wangbẹna oylan.” (Howhinwhẹn lẹ 8:13) Obu gbégbigbòna Jiwheyẹwhe tọn nọ gọalọnamẹ nado gbẹ́ aṣa ylankan lẹ dai, gọna amasin-adínọ zinzan. Gbọnvona homẹ Jehovah tọn hinhẹn hùn, mẹhe diọ lọ nọ yin hihọ́ basina sọn awutu ylankan lẹ si.
‘Mì nọ tin to taliai mẹ hlan ogán po huhlọn lẹ po, nado nọ setonuna togán lẹ.’ (Titu 3:1) To fisusu, sẹ́nhẹngba wẹ amasin-adínọ delẹ tintindo kavi yiyizan yin. Klistiani nugbo lẹ ma nọ tindo kavi zan amasin-adínọ he ma sọgbe hẹ osẹ́n lẹ gba.