“Dopo to Azán Dagbe Hugan Gbẹzan Ṣie Tọn lẹ Mẹ”

“APỌṢIMẸ wẹ yin azọ̀n he linlin etọn nọ saba yin nina hugan, podọ vlavo dehe yin titengbe hugan to apọ̀nmẹzọ̀n he nọ sayana jọja lẹ mẹ,” wẹ Beyondblue, azọ́nwatẹn ahọlu tọn de to Australie dọ. Dodinnanu lẹ dohia dọ nudi jọja Australie tọn 100 000 wẹ nọ jiya apọṣimẹ tọn to whemẹwhemẹ.

Jọja Klistiani lẹ ma vò sọn apọṣimẹ si gba. Ṣigba, yise tintindo to Jehovah mẹ ko gọalọna susu yetọn nado duto numọtolanmẹ agọ̀ lẹ ji bo tindo kọdetọn dagbe to jọja-whenu yetọn. To mọwiwà mẹ, yé nọ yinuwado mẹdevo lẹ ji to aliho dagbe mẹ. Gbọnna?

Lẹnnupọndo apajlẹ Claire he yin owhe 18-mẹvi de tọn ji. Ewọ po onọ̀ etọn po tin to agun Kunnudetọ Jehovah tọn lẹ tọn de mẹ to Melbourne. Claire bẹ azọ̀n apọṣimẹ tọn to whenuena otọ́ etọn jo whẹndo lọ do. Ṣigba yise etọn to Otọ́ olọn mẹ tọn etọn Jehovah mẹ gbẹ́ lodo. To gbèdopo, doto whẹndo lọ tọn, Lydia, wá owhé Claire tọn gbè nado pọ́n dagbemẹninọ onọ̀ etọn he to azọ̀njẹ tọn. Enẹgodo, e gbọn homẹdagbe dali do ojlo hia nado plan Claire yì nusatẹn de po mọto etọn po. To aliji, e kanse Claire eyin ewọ tindo họntọn sunnu de. Claire basi zẹẹmẹ dọ taidi Kunnudetọ Jehovah tọn de, emi ma nọ tọ́n hẹ sunnu lẹ domọ poun gba. Ehe paṣa doto lọ. Enẹgodo Claire basi zẹẹmẹ lehe Biblu ko gọalọna ẹn nado basi nudide nuyọnẹn tọn lẹ to gbẹ̀mẹ do. To godo mẹ, Claire dopà nado hẹn vọkan owe sinai do Biblu ji he ko gọalọna ẹn tlala de tọn wá na doto lọ. Hosọ owe lọ tọn wẹ Kanbiọ He Jọja lẹ Nọ Kanse—Gblọndo He Wazọ́n Lẹ.

Azán atọ̀n to owe lọ mimọyi godo, Lydia tẹkan hlan onọ̀ Claire tọn nado dọ lehe ewọ ko duvivi owe lọ hihia tọn sọ. Enẹgodo e biọ vọkan ṣidopo owe lọ tọn na azọnwatọgbẹ́ etọn lẹ. To whenuena Claire bẹ owe lọ lẹ yì, doto lọ dọ dọ yise Claire tọn yinuwado emi ji taun. Claire ze plọnmẹ Biblu de donukọnna ẹn, bọ doto lọ kẹalọyi.

Na osun susu, Claire nọ deanana oplọn lọ to whenuena doto lọ vò to núdùdù whèmẹ tọn whenu. To whenẹnu wẹ Lydia kanse Claire eyin e na jlo nado dọho to opli nupinplọn tọn de ji do whẹho apọṣimẹ jọja lẹ tọn ji. Claire yigbe po obu dopo adán dopo po. Gbẹtọ hugan 60 wẹ wá opli lọ tẹnmẹ. Mẹplọntọ apọ̀nmẹzọ̀n tọn ẹnẹ—he yemẹpo yin mẹhomẹ lẹ—dọhona mẹplidopọ lọ. Enẹgodo ojlẹ sọ̀ na Claire nado yihó. E zinnudeji dọ nujọnu taun wẹ e yin na jọja lẹ nado tindo haṣinṣan de hẹ Jiwheyẹwhe. E basi zẹẹmẹ dọ Jehovah Jiwheyẹwhe nọ hò jọja lẹ tọn pọ́n taun bosọ nọ gọalọna mẹdepope he dín alọgọ po homẹmiọnnamẹ po sọn ewọ dè. Humọ, e do nujikudo etọn hia dọ Jehovah na de wunmẹ azọ̀n agbasa tọn po apọ̀nmẹ tọn lẹpo po sẹ to madẹnmẹ. (Isaia 33:24) Etẹwẹ yin kọdetọn kunnudide dagbe ehe tọn?

“Mẹsusu wá dè e to opli lọ godo nado dọ lehe awuji yé sọ nado sè bọ jọja de to hodọ dogbọn Jiwheyẹwhe dali,” wẹ Claire dọ. “N’dó vọkan owe Kanbiọ He Jọja lẹ Nọ Kanse tọn 23 gbonu. Viyọnnu atọ̀n sọn mẹplidopọ lọ mẹ na mi sọha alokan yetọn lẹ tọn. Dopo to viyọnnu ehelẹ mẹ to Biblu plọn to alọnu din. Azán enẹ yin dopo to azán dagbe hugan gbẹzan ṣie tọn lẹ mẹ.”