Otàn Gbẹzan Tọn

Pinpọn Ovi Ṣinatọ̀n Go Whẹ́n to Aliho Jehovah Tọn ji Yin Avùnnukundiọsọmẹnu de Ṣigba Gọ́ Na Ayajẹ

DILE E YIN DIDỌ GBỌN JOYCELYN VALENTINE DALI

To 1989, asu ṣie yì tògodo nado yì wazọ́n. E dopagbe nado nọ do akuẹ hlan whé ehe n’sọgan yí do nọ penukundo ovi ṣinatọ̀n ṣie lẹ go. Osẹ lẹ juwayi, ṣigba n’ma sè nudepope sọn e dè. Osun lẹ juwayi bọ n’masọ sè nudepope sọn asu ṣie dè. N’nọ to jide na dee dọ, ‘Eyin onú lẹ ko pọnte na ẹn, e na lẹkọwa whé.’

NA AKUẸ ma tin nado penukundo whẹndo ṣie go wutu, n’jẹflumẹ pete. To zánnukle ninọ̀ ṣie lẹ whenu, n’nọ kanse dee dọ, ‘Nawẹ e sọgan wà ehe do whẹndo etọn go gbọn?’ To godo mẹ, n’kúkú gbọ bo kẹalọyi nugbo lọ dọ asu ṣie ko gbẹkọ mí go. Owhe 16 ko juwayi sọn whenue gbọ́n e yì bọ e ma ko dó afọ whé kakajẹ din. Enẹwutu, n’penukundo ovi ṣie lẹ go matin alọgọ alọwlemẹ de tọn. Avùnnukundiọsọmẹnu de wẹ ehe yin, ṣigba mimọ ovi ṣie lẹ to zọnlinzin to aliho Jehovah tọn ji ko hẹn ayajẹ susu wá na mi. Todin, whẹpo n’nado dọ lehe mí pehẹ ninọmẹ ehe do taidi whẹndo de, mì gbọ ma pìntàn ovu whenu ṣie tọn na mì.

Anademẹ Biblu Tọn Dindin

N’yin jiji to 1938 to lopo Caraïbe tọn ji to Jamaïque. Dile etlẹ yindọ Papa ma biọ sinsẹ̀n de mẹ pọ́n, e nọ pọ́n ede di mẹhe dibusi Jiwheyẹwhe. To zánmẹ, e nọ saba dọna mi nado hia apadewhe Psalm tọn na ẹn sọn Biblu mẹ. Enẹ zọ́n bọ to madẹnmẹ, n’sọgan hia psalm susu sọn tamẹ. Mama yin hagbẹ sinsẹ̀n lẹdo lọ mẹ tọn de tọn, podọ e nọ plan mi yì ṣọṣi sọn ojlẹ de mẹ jẹ devo mẹ.

Mí yin didọna to ṣọṣi dọ Jiwheyẹwhe nọ bẹ mẹdagbe lẹ yì olọn mẹ bo nọ mẹ̀n mẹylankan lẹ to olọnzomẹ kakadoi. Mí sọ yin didọna dọ Jesu wẹ yin Jiwheyẹwhe podọ dọ e yiwanna ovivu lẹ. N’biọ bẹwlu mẹ bo nọ dibuna Jiwheyẹwhe. N’nọ kanse dee dọ, ‘Nawẹ Jiwheyẹwhe he yiwanna mí sọgan nọ sayana gbẹtọ to miyọ́n mẹ gbọn?’

Nulinlẹnpọndo olọnzomẹ ji nọ dobuna mi tlala. To nukọn mẹ, n’kẹalọyi tito Biblu pinplọn gbọn wekanhlanmẹ dali tọn he Ṣọṣi Adventistes du septième jour nọ deanana. Ṣọṣi enẹ plọnmẹ dọ mẹylankan lẹ ma na yin yasana kakadoi gba ṣigba yé na yin fifiọ gbidigbidi to miyọ́n mẹ. Ehe taidi nuhe sọgbe hẹ lẹnpọn dagbe hugan, enẹwutu n’jẹ ṣọṣi yetọn yì ji. Ṣigba n’doayi e go dọ nuplọnmẹ yetọn lẹ nọ sọta yede, podọ nuhe n’plọn lẹ ma jla pọndohlan agọ̀ he n’ko tindo gando walọ mawé go do gba.

To ojlẹ enẹ mẹ, gbẹtọ lẹ yise to paa mẹ dọ galilọ yin ylando. Ṣogan, yẹn po mẹsusu devo lẹ po yise dọ mẹhe nọ tindo kọndopọ zanhẹmẹ tọn hẹ omẹ voovo susu lẹ kẹdẹ wẹ yin galọtọ lẹ. Enẹwutu, mí lẹndọ eyin omẹ awe nọ tindo kọndopọ zanhẹmẹ tọn hẹ yedelẹ kẹdẹ matin alọwle, enẹ ma yin ylando. (1 Kọlintinu lẹ 6:9, 10; Heblu lẹ 13:4) Nuyise enẹ hẹn mi nado ji ovi ṣidopo matin alọwle.

Nukọnyiyi to Gbigbọmẹ

To 1965, Vaslyn Goodison po Ethel Chambers po wá sawhé do tòpẹvi Bath he ma dẹn do mí lọ mẹ. Yé yin gbehosọnalitọ lẹ, kavi lizọnyizọnwatọ whenu-gigọ́ Kunnudetọ Jehovah tọn lẹ tọn. Yé dọho hẹ otọ́ ṣie to gbèdopo bọ e kẹalọyi plọnmẹ Biblu whégbè tọn he yé zedonukọnna ẹn. Eyin n’tin to whégbè bọ yé wá, yé nọ dọho hẹ yẹnlọsu ga. Dile etlẹ yindọ n’ma dejido Kunnudetọ Jehovah tọn lẹ go, n’basi dide nado plọn Biblu hẹ yé nado de lalo yetọn gbà.

N’nọ kàn kanbiọ susu biọ to oplọn lọ whenu, bọ Kunnudetọ lọ lẹ nọ yí Biblu do na gblọndo kanbiọ lọ lẹpo tọn. Yé gọalọna mi nado yọnẹn dọ oṣiọ lẹ ma yọ́n nude bo ma nọ jiya to zòmẹ. (Yẹwhehodọtọ 9:5, 10) N’sọ plọnnu dogbọn todido ogbẹ̀ madopodo to Paladisi aigba ji tọn mẹ dali. (Psalm 37:11, 29; Osọhia 21:3, 4) Dile etlẹ yindọ otọ́ ṣie doalọtena Biblu pinplọn etọn, yẹn jẹ opli lẹ yì ji to agun Kunnudetọ Jehovah tọn lẹ tọn mẹ. Aliho jijọho tọn po kannukannu tọn po he mẹ opli lọ lẹ nọ yin bibasi te gọalọna mi nado plọn nususu dogọ gando Jehovah go. N’sọ jẹ plidopọ lẹdo tọn po agbegbe tọn po he yin pipli daho he Kunnudetọ lẹ nọ basi lẹ yì ji. Nukunnumimọjẹ Biblu mẹ fọ́n ojlo sinsinyẹn de dote to ohò ṣie mẹ nado sẹ̀n Jehovah to aliho he yin alọkẹyi lọ mẹ. Ṣigba nude to aliglọnna mi.

To ojlẹ enẹ mẹ, n’to pọnọ hẹ sunnu de he n’ji atọ̀n to ovi ṣidopo ṣie lẹ mẹ na matin alọwle. N’plọn to Biblu mẹ dọ Jiwheyẹwhe jẹagọdo kọndopọ zanhẹmẹ tọn matin alọwle, bọ ayihadawhẹnamẹnu ṣie jẹ tuklado mi ji. (Howhinwhẹn lẹ 5:15-20; Galatianu lẹ 5:19) Dile owanyi ṣie na nugbo lọ siso dogọ, n’jlo vẹkuvẹku nado hẹn gbẹzan ṣie sọgbe hẹ osẹ́n Jiwheyẹwhe tọn. To godo mẹ, n’basi dide. N’dọna sunnu he po yẹn po to pọnọ lọ dọ mí dona wlealọ kavi eyin e ma yinmọ, mí dona klan. Dile etlẹ yindọ sunnu lọ ma kẹalọyi nuyise ṣie lẹ, mí wlealọ sọgbe hẹ osẹ́n to 15 août 1970, yèdọ owhe atọ́n godo he Kunnudetọ lọ lẹ dọho hẹ mi to tintan whenu. To décembre 1970, n’basi dohia klandowiwe ṣie hlan Jehovah tọn gbọn baptẹm osin mẹ tọn dali.

Gando lizọnyizọn lọ go, n’ma sọgan wọn azán tintan he gbè n’tindo mahẹ to azọ́n yẹwhehodidọ tọn mẹ gbede. N’to budi sọmọ bo ma yọ́n lehe n’sọgan bẹ hodọdopọ Biblu tọn de jẹeji do. Na taun tọn, e vivi na mi to whenuena whétọ tintan lọ yawu doalọtena hodọdopọ mítọn. Ṣigba to ojlẹ vude godo, n’masọ dibu ba. To vivọnu, homẹ ṣie hùn taun, na n’penugo bo dọhona omẹ vude dogbọn Biblu dali bosọ do owe sinai do Biblu ji lẹ gbonu na yé.

Hinhẹn Whẹndo lọ Lodo to Gbigbọ-Liho

To 1977, whẹndo mítọn ko jideji bo ko bẹ ovi ṣinatọ̀n hẹn. Yẹn magbe nado wà nuhe go n’pé lẹpo nado gọalọna whédo ṣie nado to Jehovah sẹ̀n. (Jọṣua 24:15) Enẹwutu, n’dovivẹnu vẹkuvẹku nado nọ deanana plọnmẹ Biblu whẹndo tọn de to gbesisọ mẹ. To whedelẹnu, na nuṣikọ sinsinyẹn wutu, n’nọ samlọngọ to whenuena ovi lẹ to hukan de hia daga, bọ ovi lẹ dona nọ fọ́n mi. Ṣigba, nuṣikọ ma glọnalina mí nado basi oplọn whẹndo tọn gbede gba.

N’sọ nọ hodẹ̀ whẹwhẹ hẹ ovi ṣie lẹ. Tlolo he yé whẹ́n jẹ obá de mẹ, n’nọ plọn yé nado nọ hodẹ̀ na yede hlan Jehovah. N’nọ hẹn ẹn diun dọ dopodopo yetọn hodẹ̀ na yede whẹpo do yìhọ. Yẹn lọsu titi nọ hodẹ̀ hẹ dopodopo ovi he ma ko whẹ́n sọmọ nado hodẹ̀ na yede lẹ.

To bẹjẹeji, asu ṣie jẹagọdo ovi lẹ pinplan yì opli agun tọn lẹ. Ṣigba, mimọ dọ e na lẹzun dandan na ẹn nado nọ penukundo ovi lẹ go edeṣo to whenuena yẹn yì opli lẹ zọ́n bọ agọjẹdomẹ etọn depò. E yiwanna nado nọ disa yì họntọn etọn lẹ dè to whèjai lẹ, ṣigba e mọdọ e na vẹawuna emi nado nọ plan ovi dopodopo ṣinatọ̀n tọ́n yì sadi gbé! To godo mẹ, ewọ lọsu tlẹ nọ gọalọ nado sọnú na ovi lẹ nado yì Plitẹnhọ Ahọluduta tọn mẹ.

To madẹnmẹ, ovi lẹ jẹakọhẹ opli agun tọn lẹpo yìyì po mahẹ tintindo to lizọnyizọn gbangba tọn mẹ po. To gbọjẹ daho wehọmẹ tọn yetọn lẹ whenu, yé nọ saba tọ́n hẹ gbehosọnalitọ lẹ, kavi lizọnyizọnwatọ whenu-gigọ́ tọn he to agun lọ mẹ lẹ na azọ́n yẹwhehodidọ tọn. Ehe gọalọna ovi jọja ṣie lẹ nado wleawuna owanyi sisosiso na agun lọ podọ na azọ́n yẹwhehodidọ tọn.—Matiu 24:14.

Ojlẹ Mẹtẹnpọn Tọn Lẹ

Nado hẹn ninọmẹ akuẹzinzan whẹndo mítọn tọn pọnte, asu ṣie jẹ tògodo yì ji nado yì wazọ́n. E nọ jo whẹndo lọ do na ojlẹ dindẹn ṣigba e nọ saba gọ̀ sọn ojlẹ de mẹ jẹ devo mẹ. Ṣigba, to 1989, e yì bo ma gọ̀ kakajẹ egbé. Dile n’dọ jẹnukọn do, búbú asu ṣie tọn hẹn mi jẹflumẹ taun. To ozán susu mẹ, n’nọ viavi bo nọ hodẹ̀ hlan Jehovah vẹkuvẹku na homẹmimiọn po akọndonanu po, podọ n’mọdọ e sè odẹ̀ ṣie lẹ. Wefọ mọnkọtọn lẹ taidi Isaia 54:4 po 1 Kọlintinu lẹ 7:15 po nọ hẹn mi vò to ayiha mẹ bosọ nọ hẹn mi lodo nado zindonukọn to gbẹzan ṣie mẹ. Hẹnnumẹ lẹ po họntọn lẹ po to agun Klistiani tọn mẹ sọ gọalọna mi to numọtolanmẹ-liho podọ to agbasa-liho ga. N’dopẹna Jehovah po omẹ etọn lẹ po taun na alọgọ yetọn.

Whlepọn mítọn ma vọ̀ do finẹ gba. Dopo to viyọnnu ṣie lẹ mẹ yin didesẹ sọn agun mẹ to ojlẹ de mẹ na walọ he ma sọgbe hẹ Owe-wiwe de wutu. N’yiwanna ovi ṣie lẹpo taun, ṣigba nugbonọ-yinyin ṣie hlan Jehovah wẹ tin to otẹn tintan mẹ. Enẹwutu, to ojlẹ enẹ gblamẹ, yẹn po ovi ṣie he pò lẹ po setonuna anademẹ Biblu tọn do lehe yè dona yinuwa hlan mẹdesẹ sọn agun mẹ lẹ do ji. (1 Kọlintinu lẹ 5:11, 13) Mẹhe ma mọnukunnujẹ teninọ mítọn mẹ lẹ mọhodọ do mí go taun. Ṣigba, to whenuena viyọnnu ṣie wá yin gigọyí do agun mẹ godo, asu etọn dọna mi dọ teninọ gligli mítọn na nunọwhinnusẹ́n Biblu tọn lẹ yinuwado emi ji taun. Todin, asu lọ to Jehovah sẹ̀n hẹ whẹndo etọn.

Pipehẹ Nuhahun Akuẹzinzan Tọn Lẹ

To whenuena asu ṣie jo mí do bọ whẹndo lọ masọ nọ mọ alọgọ akuẹzinzan tọn sọn e dè ba, aliho depope ma tin he mẹ n’nọ mọ akuẹ te to gbesisọ mẹ gba. Ninọmẹ ehe plọn mí nado tindo pekọ po gbẹzan jlẹkaji tọn po bo nọ doafọna adọkun gbigbọmẹ tọn hú yanwle agbasa tọn lẹ. Ovi ṣie lẹ wá tindo kanṣiṣa pẹkipẹki to yedelẹ ṣẹnṣẹn dile yé plọn nado yiwanna bo nọ gọalọna ode awetọ. To whenuena mẹhe ko whẹ́n mẹho to yé mẹ lẹ jẹ azọ́nwa ji, yé nọ desọn ojlo mẹ nado gọalọna nọvi yetọn pẹvi lẹ. Viyọnnu plọnji ṣie, Marseree, gọalọna nọviyọnnu etọn pẹvi, Nicole, nado dotana nupinplọn wehọmẹ daho tọn etọn. To yidogọ mẹ, n’penugo nado jẹ dadonu lẹ sà ji. Ale vude he nọ tọ́n to e mẹ gọalọna mi nado penukundo nuhudo agbasa tọn mítọn delẹ go.

Jehovah ma gbẹkọ mí go gbede. N’dọna mẹmẹyọnnu de to gbèdopo dọ mí ma na penugo nado yì plidopọ agbegbe he ja, na akuẹ ma tin wutu. Mẹmẹyọnnu lọ gblọn dọmọ: “Mẹmẹyọnnu Val, eyin a sè azán plidopọ tọn, saa nọ jẹ agbàn dó ji poun! Jehovah na penukundo nuhudo towe lẹ go.” N’hodo ayinamẹ etọn. Jehovah penukundo nuhudo mítọn go nugbo, podọ e ko sọ zindonukọn to mọwiwà mẹ kakajẹ egbé. Whẹndo mítọn ma ko gọ̀n plidopọ de na akuẹ ma tin wutu gba.

To whenuena jẹhọn-ahizi heyin yiylọdọ Gilbert hẹnnugble to Jamaïque to 1988, mí họ̀n sọn owhé mítọn gbè yì hihọ́tẹn de. To whenuena yujẹhọn lọ doalọte na ojlẹ kleun de, yẹn po visunnu ṣie po tọ́n sọn hihọ́tẹn lọ nado yì pọ́n lehe ohọ̀ mítọn yin hinhẹngble sọ. Dile mí to gbakija lọ lẹ mẹ kàn pọ́n, n’mọ nude he n’jlo nado ze. To ajijimẹ, yujẹhọn lọ sọ vọ́ bẹ whladopo dogọ, ṣigba n’gbẹ́ tẹdo onú lọ go majomajo. “Mama, ze televiziọn lọ dai. Kavi mì jlo na lẹzun asi Lọti tọn wẹ ya?” (Luku 17:31, 32) Ohó enẹ he visunnu ṣie dọ hẹn mi gọ̀ biọ dee mẹ, bọ n’jo televiziọn he jikun ko hò pẹ̀nṣẹ̀n lọ do, bọ mí omẹ awe lẹ họ̀ngán.

Obu nọ di mi todin eyin n’flin dọ n’ze ogbẹ̀ ṣie do owù mẹ na televiziọn tata wutu. Ṣigba homẹ ṣie nọ hùn eyin n’lẹnnupọndo nuhe visunnu ṣie dọ he dohia dọ e to nukle to gbigbọ-liho lọ ji. Na oplọn sinai do Biblu ji he e ko mọyi to agun Klistiani tọn mẹ wutu, e penugo nado gọalọna mi nado dapana owù agbasa tọn po gbigbọmẹ tọn sinsinyẹn lọ po.

Jẹhọn-ahizi lọ hẹn owhé po nutindo mítọn lẹpo po gble, bosọ hẹn mí jẹflumẹ. To nujijọ lọ godo, mẹmẹsunnu Klistiani mítọn lẹ wá. Yé na tuli mí nado doakọnnanu bo dejido Jehovah go podọ nado zindonukọn to lizọnyizọn lọ mẹ po zohunhun po. Yé sọ gọalọ nado vọ́ ohọ̀ mítọn gbá. Azọ́n owanyi po mẹde-yido-sanvọ́ tọn enẹ po he Kunnudetọ mẹdezejotọ Jamaïque tọn lẹ po dehe wá sọn tògodo lẹ po wà yinuwado mí ji tlala.

Jehovah Zizedo Otẹn Tintan Mẹ

To whenuena ovi ṣie awetọ, Melaine, dotana wehọmẹ etọn godo, e lẹzun gbehosọnalitọ de. Enẹgodo e kẹalọyi oylọ-basinamẹ lọ nado yì sẹ̀n taidi gbehosọnalitọ to agun devo mẹ, ehe biọ dọ e dona jo agbasazọ́n etọn do. Dile etlẹ yindọ azọ́n etọn nọ zọ́n bọ e nọ gọalọna whẹndo lọ to akuẹzinzan-liho taun, mí deji dọ Jehovah na penukundo mí go eyin dopodopo mítọn ze Ahọluduta lọ do otẹn tintan mẹ. (Matiu 6:33) To madẹnmẹ, visunnu ṣie, Ewan, lọsu mọ oylọ-basinamẹ de yí nado sẹ̀n taidi gbehosọnalitọ de. Ewọ lọsu to alọgọna whẹndo lọ to akuẹzinzan-liho to whenẹnu, ṣigba mí dotuhomẹna ẹn nado kẹalọyi oylọ-basinamẹ lọ bo biọ dona Jehovah tọn do e ji. Yẹn ma yí whedepopenu do hẹn ovi lẹ gbọjọ ma nado hẹn sinsẹ̀nzọn Ahọluduta lọ tọn gblodeji gba, podọ mí mẹhe pò to whégbè lẹ ma ko jẹdò nudepope tọn gbede. Kakatimọ, ayajẹ mítọn ko jideji, podọ to ojlẹ delẹ mẹ, mí tlẹ penugo nado gọalọna mẹhe tin to nuhudo mẹ lẹ.

Todin, mimọ dọ ovi ṣie lẹ to “zọnlinzin to nugbo lọ mẹ” nọ hẹn ayajẹ susu wá na mi. (3 Johanu 4) Dopo to viyọnnu ṣie lẹ mẹ, Melaine, po asu etọn po tin to lizọnyizọn tomẹyiyi tọn mẹ taidi nugopọntọ lẹdo tọn. Viyọnnu ṣie, Andrea po asu etọn po to sinsẹ̀n taidi gbehosọnalitọ titengbe lẹ, podọ ewọ lọsu po asu etọn po nọ dla agun lẹ pọ́n taidi nugopọntọ lẹdo tọn tẹnmẹpọnnamẹtọ de. Visunnu ṣie, Ewan, po asi etọn po to sinsẹ̀n taidi gbehosọnalitọ titengbe lẹ, podọ e sọ yin mẹho agun tọn de ga. Viyọnnu ṣie devo, Ava-Gay, po asu etọn po to azọ́nwa to wekantẹn alahọ Kunnudetọ Jehovah tọn lẹ tọn to Jamaïque. Jennifer, Genieve, po Nicole po to sinsẹ̀n hẹ asu yetọn lẹ po ovi yetọn lẹ po taidi hagbẹ zohunhunnọ agun yetọn lẹ tọn. Marseree gbẹ́ pò to apá ṣie, podọ mí omẹ awe lẹ to awukọndopọ hẹ agun Port Morant tọn. Dona ṣie lẹ sù taun, na ovi ṣie ṣinatọ̀n lẹpo wẹ zindonukọn to Jehovah sinsẹ̀n mẹ.

Dile owhe lẹ to jujuyi, n’ko jẹ nuhahun agbasalilo tọn lẹ tindo ji. Todin, n’to akọndona húdu-húdu, ṣigba yẹn gbẹ́ pò to vivi sinsẹ̀nzọnwiwa taidi gbehosọnalitọ de tọn dù. Nalete, to ojlẹ de mẹ wayi, e lẹzun nuhe vẹawuna mi taun nado nọ zinzọnlin gbọ̀n agbegbe he gọ́ na pópló lẹ ji to lẹdo he mẹ n’nọ nọ̀. E vẹawuna mi taun nado nọ tọ́n na lizọnyizọn ṣie. N’tẹ́n kẹkẹ tata kùnkùn pọ́n bo mọdọ e bọawu hú zọnlinzinzin. Enẹwutu n’họ̀ kẹkẹ tata hoho de bo jẹ zinzan ji. To bẹjẹeji, e ma bọawuna ovi ṣie lẹ nado mọ onọ̀ yetọn he nọ jẹ húdu-húdu to kẹkẹ tata kùn. Ṣogan, homẹ yetọn hùn nado mọdọ n’to nukọnzindo to yẹwhehodidọ mẹ dile ahun ṣie jlo do.

E nọ hẹn ayajẹ wá na mi nado mọ mẹhe n’plọnnu hẹ lẹ kẹalọyi nugbo Biblu tọn. Odẹ̀ ṣie to whepoponu wẹ yindọ Jehovah ni gọalọna hagbẹ whẹndo ṣie tọn lẹpo nado hẹn nugbonọ-yinyin yetọn go to ojlẹ opodo tọn ehe mẹ podọ kakadoi. Pipà po pẹdido ṣie po yì Jehovah, ‘Sisetọ odẹ̀ tọn’ Daho lọ dè, dọ e hẹn mi penugo nado pehẹ avùnnukundiọsọmẹ ovi ṣie ṣinatọ̀n lẹ go pinpọn whẹ́n to aliho etọn ji tọn.—Psalm 65:2.

[Yẹdide to weda 10]

Yẹn po ovi ṣie lẹ, alọwlemẹ yetọn lẹ, gọna ovivi ṣie lẹ po

[Yẹdide to weda 12]

N’nọ zan kẹkẹ tata todin nado wà lizọnyizọn ṣie