Nawẹ Jidide Towe to Jiwheyẹwhe mẹ Lodo Sọ?
“Ṣigba mì dín ahọludu Jiwheyẹwhe tọn . . . whẹ́.”—MATIU 6:33.
1, 2. Vọjlado tẹlẹ wẹ dẹpẹ de basi gando agbasazọ́n etọn go, podọ etẹwutu?
DẸPẸ de jlo nado yọn-na-yizan dogọ to agun etọn mẹ. Ṣigba agbasazọ́n etọn ma nọ na ẹn dotẹnmẹ nado yì opli lẹ to gbesisọ mẹ. Etẹwẹ e wà? E hẹn gbẹzan etọn bọawu dogọ, jo agbasazọ́n lọ do, podọ to ojlẹ vude godo, e mọ azọ́n he ma hẹnalọdotena nuwiwa Klistiani tọn etọn lẹ. Akuẹ he e nọ mọ todin ma sù sọ dehe e nọ mọ dai, ṣigba e gbẹ́ nọ penukundo whẹndo etọn go bosọ tindo whenu ganji nado gọalọ na agun lọ.
2 Be a yọ́n nuhe zọ́n bọ dẹpẹ enẹ basi vọjlado mọnkọtọn lẹ ya? Eyin hiẹ wẹ tin to otẹn etọn mẹ, be a lẹndọ emi na ko basi vọjlado mọnkọtọn lẹ ya? E jẹna pipà dọ Klistiani susu ko wàmọ, podọ mọwiwà yetọn do jidide he yé tindo to opagbe Jesu tọn mẹ hia dọmọ: “Ṣigba mì dín ahọludu Jiwheyẹwhe tọn, po dodo etọn po whẹ́; onú helẹ pó wẹ yè na dogọ hlan mì.” (Matiu 6:33) Yé dejido Jehovah go nado basi hihọ́na yé kakati nido yin aihọn ehe.—Howhinwhẹn lẹ 3:23, 26.
3. Naegbọn mẹdelẹ sọgan kanse eyin e gbẹ́ yin nuyọnẹnnu to egbehe nado ze Ahọluduta Jiwheyẹwhe tọn do otẹn tintan mẹ?
3 Na ojlẹ sinsinyẹn he mẹ mí to gbẹnọ te wutu, mẹdelẹ sọgan tindo ayihaawe do nudide dẹpẹ enẹ tọn go. To egbehe, mẹdelẹ nọ tin to ohẹ́n klókló mẹ to whenuena mẹdevo lẹ to gbẹdu. Suhugan mẹhe tin to otò wamọnọ tọn mẹ lẹ ma na lẹnnupọn whlaawe whẹpo do yí dotẹnmẹ depope he hundote nado hẹn gbẹzan yetọn pọnte vude dogọ zan. To alọ devo mẹ, susu mẹhe tin to otò adọkunnọ tọn mẹ lẹ to nulẹpo wà nado gbọṣi ninọmẹ dagbe he mẹ yé tin te mẹ mahopọnna doyiyi akuẹzinzan tọn, agbasazọ́n he ma sọgan yin jidedego, po nubiọtomẹsi susu he nọ yin zizedo azọ́nwatọ lẹ ji po. To pọndohlan mẹ na lehe gbẹninọ vẹawu do, mẹdelẹ sọgan kanse dọ, ‘Be e gbẹ́ yin nuyọnẹnnu nado dín Ahọluduta lọ whẹ́ ya?’ Nado sọgan mọ gblọndo na kanbiọ enẹ, mì gbọ mí ni lẹnnupọndo mẹhe Jesu to hodọna lẹ ji.
‘Mì Yin Magbọjẹnọ Blo’
4, 5. Nawẹ Jesu dohia gbọn dọ nuyọnẹnnu wẹ e yin na omẹ Jiwheyẹwhe tọn lẹ ma nado yin magbọjẹnọ zẹjlẹgo dogbọn ahunmẹdunamẹnu egbesọegbesọ tọn lẹ dali?
4 Galili wẹ Jesu te bo to hodọna gbẹtọgun daho he wá sọn otò susu mẹ. (Matiu 4:25) Eyin depope to yé mẹ tlẹ yin adọkunnọ janwẹ, be vude poun wẹ e na yin. E yọnbasi dọ suhugan yetọn ni yin wamọnọ. Ṣogan, Jesu dotuhomẹna yé ma nado ze ayidonugo do adọkun agbasa tọn tintindo ji jẹnukọn, ṣigba do nuhe họakuẹ tlala hugan de bibẹpli ji—yèdọ adọkun gbigbọmẹ tọn. (Matiu 6:19-21, 24) E dọmọ: “Mì yin vivẹnunọ [kavi magbọjẹnọ] na ogbẹ̀ mìtọn blo, dọ, etẹ mì na dù podọ etẹ mì na nù, kavi na agbasa mìtọn dọ etẹ mì na ṣinyọ́n. Be ogbẹ̀ ma hú núdùdù, agbasa ma sọ hú avọ̀?”—Matiu 6:25.
5 Nuhe Jesu dọ lẹ sọgan ko taidi nulunu to nukun susu mẹhe to todoaina ẹn lẹ tọn mẹ. Yé yọnẹn dọ eyin yé ma wazọ́n sinsinyẹn, whẹndo yetọn na jiya. Ṣigba, Jesu flinnu yé gando ohẹ lẹ go. Ohẹ lẹ dona dín núdùdù po adọtẹn po egbesọegbesọ, ṣogan Jehovah nọ penukundo yé go. Jesu sọ dlẹnalọdo aliho he mẹ Jehovah nọ penukundo vounvoun gbémẹ tọn lẹ go te, whanpẹ ehe tọn hú Sọlọmọni tọn to gigo etọn lẹpo mẹ. Eyin Jehovah nọ penukundo ohẹ lẹ po vounvoun lẹ po go, nẹmunẹmu wẹ míwlẹ tọn bọ e ma na penukundo mí go? (Matiu 6:26-30) Dile Jesu dọ do, ogbẹ̀ po agbasa mítọn po họakuẹ tlala hú núdùdù he mí nọ họ̀ nado hẹn ogbẹ̀ mítọn dote gọna avọ̀ he mí nọ họ̀ nado ṣinyọ́n do agbasa mítọn. Eyin mí yí huhlọn mítọn lẹpo zan nado dín núdùdù po avọ̀ po, bo ma pò nujọnu depope dai na Jehovah sinsẹ̀n, be mí ko gbọ̀ lẹndai tangan gbẹninọ tọn go.—Yẹwhehodọtọ 12:13.
Pọndohlan Jlẹkaji Tọn Tintindo
6. (a) Azọngban tẹwẹ tin to Klistiani lẹ ji? (b) Fie wẹ Klistiani lẹ nọ ze jidide yetọn lẹpo do?
6 Nugbo wẹ dọ Jesu ma to tulina todoaitọ etọn lẹ nado blá alọ dogo bo nọtepọn Jiwheyẹwhe to aliho de mẹ nado wleawu dandannu gbẹ̀mẹ tọn lẹ tọn na whẹndo yetọn lẹ gba. Ohẹ lẹ lọsu tlẹ dona dín núdùdù na yede po ovi yetọn lẹ po. Enẹwutu, Klistiani lẹ dona wazọ́n whẹpo do mọ núdù. Yé dona penukundo azọngban whẹndo tọn lẹ go. Klistiani he yin devi po afanumẹ po lẹ dona wazọ́n sinsinyẹn na mẹmẹnu yetọn lẹ. (2 Tẹsalonikanu lẹ 3:10-12; 1 Timoti 5:8; 1 Pita 2:18) Apọsteli Paulu nọ saba wazọ́n taidi gohọ̀-gbátọ nado penukundo ede go. (Owalọ lẹ 18:1-4; 1 Tẹsalonikanu lẹ 2:9) Etomọṣo, Klistiani enẹlẹ ma nọ ganjẹ agbasazọ́n go nado mọ hihọ́ yí gba. Yé dejido Jehovah go. Taidi kọdetọn de, yé nọ duvivi jijọho ahun mẹ tọn he mẹdevo lẹ to dindin. Psalm-kantọ lọ dọmọ: “Yé he do todido to OKLUNỌ mẹ lẹ na tin di osó Ziọni tọn, he ma sọgan yin sisẹtẹnna, adavo e tin kakadoi.”—Psalm 125:1.
7. Pọndohlan tẹwẹ mẹhe ma dejido Jehovah go mlẹnmlẹn sọgan tindo?
7 Mẹdepope he ma dejido Jehovah go mlẹnmlẹn sọgan tindo pọndohlan he gbọnvo. Suhugan gbẹtọvi lẹ tọn nọ pọ́n adọkun agbasa tọn hlan taidi asisa tangan hihọ́ tọn. Nuhe zọ́n niyẹn bọ mẹjitọ delẹ nọ na tuli ovi yetọn lẹ nado yí suhugan jọja whenu yetọn tọn zan na wepinplọn dahodaho lẹ, po linlẹn lọ po dọ enẹ na hẹn ẹn yọnbasi na yé nado mọ agbasazọ́n he pekuẹ ganji lẹ. E blawu dọ whẹndo Klistiani delẹ ko gbẹ̀n kọdetọn vẹadi nudide mọnkọtọn tọn lẹ dile ovi yetọn lẹ gbẹkọ gbigbọnu lẹ go bo jẹ afọdona yanwle agbasanu bibẹpli tọn lẹ ji.
8. Jlẹkajininọ tẹ go wẹ Klistiani lẹ nọ hẹn?
8 Enẹwutu, Klistiani nuyọnẹntọ lẹ yọnẹn dọ ayinamẹ Jesu tọn yọn-na-yizan taun to egbehe dile e yin do to owhe kanweko tintan whenu, podọ yé nọ tẹnpọn nado hẹn jlẹkajininọ go. Eyin e tlẹ lẹzun dandan dọ yé ni yí ganhiho susu zan to azọ́nmẹ nado sọgan hẹn azọngban Owe-wiwe tọn yetọn lẹ di, yé ma nọ dike nuhudo lọ nado dín akuẹ ni hẹn yé nado gbẹkọ nuwiwa gbigbọmẹ tọn he yin nujọnu hugan lẹ go gba.—Yẹwhehodọtọ 7:12.
Ayinamẹ Yinukọn Dogọ Sọta Magbọjẹnọ-Yinyin
9. Nawẹ Jesu vọ́ jide na mẹhe dejido Jehovah go mlẹnmlẹn lẹ gbọn?
9 To Yẹwhehodidọ Osó ji tọn etọn mẹ, Jesu na tuli hosetọ etọn lẹ dọmọ: “Mì yin vivẹnunọ [kavi magbọjẹnọ] blo, dọ, Etẹ mí na dù? kavi, Etẹ mí na nù? kavi, Etẹ mí na do yin mẹṣinyọnavọ̀na? Na onú helẹ pó wẹ Kosi lẹ to dindin pé: Otọ́ mìtọn olọn tọn sọ yọnẹn dọ mì ma sọgan nọma tindo onú helẹ pó gba.” (Matiu 6:31, 32) Hogbe tulinamẹ tọn nankọtọn lẹ die! Eyin mí dejido Jehovah go mlẹnmlẹn, ewọ na tin to finẹ to whepoponu nado gọalọna mí. Ṣigba, nuhe Jesu dọ lẹ sọ hẹnmẹ lẹnnupọn ga. Yé flinnu mí dọ agbasanu lẹ “dindin pé” na dohia dọ mí to nulẹnpọn taidi “Kosi lẹ,” mẹhe ma yin Klistiani nugbo lẹ.
10. To whenuena dẹpẹ de kàn ayinamẹ biọ Jesu, nawẹ Jesu de nuhe dẹpẹ lọ yiwanna hugan hia gbọn?
10 To gbèdopo, dẹpẹ adọkunnọ de kàn nuhe e dona wà nado mọ ogbẹ̀ madopodo yí sè Jesu. Jesu hẹn nubiọtomẹsi Osẹ́n lọ tọn, he gbẹ́ to azọ́nwa to whenẹnu lẹ wá oflin mẹ na ẹn. Dẹpẹ lọ dọna Jesu dọ: “Onú helẹ pó wẹ yẹn ko payi e go: etẹwẹ sọ whè do mi?” Gblọndo Jesu tọn sọgan ko taidi nulunu to nukun mẹsusu tọn mẹ. E dọmọ: “Eyin hiẹ jlo na yin pipé, yì, sà nuhe hiẹ tindo, bo yí na wamọnọ lẹ, hiẹ nasọ tindo adọkunnu to olọn mẹ: bo wá bo to hihodo mi.” (Matiu 19:16-21) Nukunmẹ dẹpẹ lọ tọn kúṣiọ dile e tlọ́n Jesu dè, na onú godo tọn he ji e sọgan lẹnnupọndo wẹ adọkun etọn hinhẹnbu. Mahopọnna obá he mẹ e yiwanna Jehovah jẹ, e yiwanna nutindo etọn lẹ humọ.
11, 12. (a) Ohó mẹhẹnlẹnnupọn tọn tẹlẹ wẹ Jesu dọ gando adọkun go? (b) Nawẹ nutindo lẹ sọgan glọnalina Jehovah sinsẹ̀n gbọn?
11 Nujijọ enẹ sisẹ́ Jesu nado dọ nude he paṣa mẹsusu. E dọmọ: “E [na] sinyẹnawuna adọkunnọ nado biọ ahọludu olọn tọn mẹ. . . . E bọawu na kanklosọpoawenọ de nado gbọ̀n nùvo yẹnvi tọn mẹ yì, hú na adọkunnọ nado biọ ahọludu Jiwheyẹwhe tọn mẹ.” (Matiu 19:23, 24) Be nuhe dọ Jesu te wẹ yindọ adọkunnọ de ma na dugu Ahọluduta lọ tọn ya? Lala, na e dọ to enẹgodo dọmọ: “To Jiwheyẹwhe dè onú lẹpo wẹ wiwà.” (Matiu 19:25, 26) Na nugbo tọn, po alọgọ Jehovah tọn po, adọkunnọ delẹ to whenẹnu wá lẹzun Klistiani yiamisisadode lẹ. (1 Timoti 6:17) Etomọṣo, Jesu dọ ohó mẹhẹnlẹnnupọn tọn enẹlẹ na whẹwhinwhẹ́n dagbe wutu. Avase na wẹ e te.
12 Eyin mẹde yiwanna nutindo etọn lẹ zẹjlẹgo kẹdẹdile dẹpẹ adọkunnọ enẹ wà do, yé sọgan glọnalina ẹn nado sẹ̀n Jehovah po ahun lẹpo po. Enẹ sọgan yin nugbo to whẹho mẹhe ko yin adọkunnọ tọn mẹ podọ na mẹhe “jlo nado yin adọkunnọ” lọsu ga. (1 Timoti 6:9, 10) Jidide zizedo agbasanu lẹ mẹ zẹjlẹgo sọgan hẹn mẹde nado dovọ́na ‘nuhudo gbigbọmẹ tọn etọn.’ (Matiu 5:3) Taidi kọdetọn de, e sọgan lẹndọ emi ma tindo nuhudo alọgọ Jehovah tọn sọmọ ba. (Deutelonomi 6:10-12) E sọgan jẹ nukundo ji nado nọ yin nuyiwahẹ to aliho vonọtaun mẹ to agun mẹ. (Jakobu 2:1-4) Podọ e sọgan yí suhugan whenu etọn tọn zan nado duvivi adọkun etọn tọn kakati nado yí ì do sẹ̀n Jehovah.
Wleawuna Pọndohlan He Sọgbe Lọ
13. Pọndohlan agọ̀ tẹwẹ Laodikeanu lẹ tindo?
13 Agun Laodikea owhe kanweko tintan whenu tọn yin dopo to pipli he tindo pọndohlan agọ̀ gando nutindo agbasa tọn lẹ go mẹ. Jesu dọ gando yé go dọmọ: “Hiẹ dọmọ, Adọkunnọ wẹ yẹn, bosọ tindo adọkun susu, bo ma gbọagba nude tọn . . . ; bo ma yọnẹn dọ tapònọ wẹ hiẹ, lèlènọ, agbátọnọ, nukuntọ́nnọ, omẹ́nọ.” E ma yin adọkun Laodikeanu lẹ tọn wẹ hẹn yé biọ ninọmẹ blawu gbigbọmẹ tọn mọnkọtọn mẹ gba. Jidide yetọn he yé zedo adọkun mẹ kakati nido yin Jehovah mẹ wẹ hẹn yé biọ ninọmẹ mọnkọtọn mẹ. Taidi kọdetọn de, yé gblọ to gbigbọ-liho, bo nasọ yin ‘suslú jẹgbonu sọn’ onù Jesu tọn mẹ.—Osọhia 3:14-17.
14. Naegbọn Klistiani Heblu lẹ jẹna pipà Paulu tọn?
14 To vogbingbọn mẹ, Paulu pà Klistiani Heblu lẹ na aliho he mẹ yé yinuwa te to ojlẹ homẹkẹn tọn he jẹnukọn de whenu. E dọmọ: “Mìwlẹ do awubla na [mẹhe tin to ogàn mẹ lẹ], mì sọ yí homẹhunhun do yí agbàn mìtọn yè hẹngble lẹ, na le mì ko yọnẹn to mìde homẹ dọ, mì tindo adọkun he pọnte he ma nọ gble humọ to olọn mẹ.” (Heblu lẹ 10:34) Klistiani enẹlẹ ma dike nutindo he yé hẹnbu lẹ ni hẹn yé gbọjọ gba. Yé ma hẹn ayajẹ yetọn bu na yé hẹn nutindo họakuẹ hugan yetọn go gligli wutu, yèdọ “adọkun he pọnte he ma nọ gble.” Taidi ajọwatọ lọ to oló Jesu tọn mẹ he yí nulẹpo do sanvọ́ nado sọgan tindo pali dopo akuẹ gege tọn, yé magbe nado hẹn todido Ahọluduta lọ tọn go gbanun-gbanun, mahopọnna avọ́sinsan depope he yé dona basi. (Matiu 13:45, 46) Pọndohlan dagbe nankọtọn die!
15. Nawẹ mẹmẹyọnnu Klistiani de ze Ahọluduta lọ do otẹn tintan mẹ to Libéria gbọn?
15 Mẹsusu wẹ tindo pọndohlan dagbe mọnkọtọn to egbehe. Di apajlẹ, to Libéria, dotẹnmẹ lọ hundote na awhli Klistiani de nado plọnwe to wehọmẹ alavọ tọn. To otò enẹ mẹ, dotẹnmẹ hundote mọnkọtọn nọ yin pinpọnhlan taidi aliho de nado tindo sọgodo dagbe de. Ṣigba, gbehosọnalitọ de wẹ ewọ yin, yèdọ wẹndagbe-jlatọ whenu-gigọ́ tọn, bo ko sọ yin oylọ-basina nado yì sẹ̀n na ojlẹ gli de taidi gbehosọnalitọ titengbe. E basi dide nado dín Ahọluduta lọ whẹ́ bo gbọṣi sinsẹ̀nzọn whenu-gigọ́ tọn mẹ. E yì azọ́ndenamẹ etọn mẹ bosọ bẹ plọnmẹ Biblu 21 jẹeji to osun atọ̀n gblamẹ. Mẹmẹyọnnu jọja ehe po fọtọ́n susu devo lẹ po taidi ewọ nọ dín Ahọluduta lọ whẹ́, eyin ehe tlẹ biọ dọ yé ni yí nuhe sọgan hẹn ale mẹdetiti tọn wá lẹ do sanvọ́. Etẹwẹ nọ gọalọna yé nado hẹn pọndohlan mọnkọtọn go to aihọn agbasanu lẹ bibẹpli tọn ehe mẹ? Jẹhẹnu dagbe he yé ko wleawuna lẹ wẹ. Mì gbọ mí ni dọhodo delẹ to yé mẹ ji.
16, 17. (a) Naegbọn jlẹkajininọ do yin nujọnu nado sọgan dejido Jehovah go? (b) Naegbọn mí dona wleawuna jidide to opagbe Jiwheyẹwhe tọn lẹ mẹ?
16 Jlẹkajininọ: Biblu dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe. A yin nuyọnẹntọ to nukun dewe tọn mẹ blo.” (Howhinwhẹn lẹ 3:5-7) To whedelẹnu, aliho nuyiwa tọn de sọgan taidi nuhe sọgbe to pọndohlan gbẹtọvi lẹ tọn mẹ. (Jẹlemia 17:9) Etomọṣo, Klistiani ahundoponọ de nọ ganjẹ Jehovah go nado do ali hia ẹ kavi deanana ẹn. (Psalm 48:14) ‘To aliho etọn lẹpo ji’—to whẹho agun tọn, wepinplọn kavi agbasazọ́n, gbọjẹyíyí, kavi nudevo depope tọn mẹ—e nọ gbọn jlẹkajininọ dali dín hónamẹ kavi ayinamẹ Jehovah tọn.—Psalm 73:24.
17 Jidide to opagbe Jehovah tọn lẹ mẹ: Paulu dọmọ: “Ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6) Eyin mí tindo ayihaawe dọ Jehovah na hẹn opagbe etọn lẹ di, e sọgan taidi lẹnpọn dagbenu nado ‘yí aihọn ehe zan to gigọ́mẹ.’ (1 Kọlintinu lẹ 7:31) To alọ devo mẹ, eyin mí tindo yise he lodo, mí na magbe nado nọ dín Ahọluduta lọ whẹ́. Nawẹ yise he lodo sọgan yin awuwlena gbọn? Gbọn dindọnsẹpọ Jehovah pẹkipẹki to odẹ̀ ahundopo tọn mẹ egbesọegbesọ dali podọ gbọn oplọn mẹdetiti gbesisọ tọn gblamẹ. (Psalm 1:1-3; Filippinu lẹ 4:6, 7; Jakobu 4:8) Taidi Ahọlu Davidi, mí sọgan hodẹ̀ dọmọ: “Yẹn dotudo gowe, OKLUNỌ E: yẹn dọ, Hiẹ wẹ Jiwheyẹwhe ṣie. Na dagbe towe ka klo dole!”—Psalm 31:14, 19.
18, 19. (a) Nawẹ vivẹnudido nọ hẹn jidide mítọn to Jehovah mẹ lodo gbọn? (b) Naegbọn Klistiani de dona tindo ojlo nado yí onú delẹ do sanvọ́?
18 Vivẹnudido to sinsẹ̀nzọn Jehovah tọn mẹ: Paulu dohia dọ jidide to opagbe Jehovah tọn lẹ mẹ nọ zọnpọ hẹ vivẹnudido to whenuena e wlan dọmọ: “Míwlẹ sọ jlo dọ mì omẹ dopodopo ni to magbọjẹ mọnkọtọn sọhia jẹ yinyọnẹn he diun to todido mẹ [kavi nado tindo jidide mlẹnmlẹn to todido mẹ] kakajẹ opodo.” (Heblu lẹ 6:11) Jehovah na nọgodona mí eyin mí hẹn alọnu ján to sinsẹ̀nzọn etọn mẹ. Whedepopenu he mí tindo numimọ godonọnamẹ enẹ tọn, jidide mítọn to ewọ mẹ nọ lodo dogọ, podọ mí nọ lẹzun “tenọglinọ, masẹafọ.” (1 Kọlintinu lẹ 15:58) Yise mítọn nọ yin hinhẹn jẹ yọyọ, podọ todido mítọn nọ diun dogọ.—Efesunu lẹ 3:16-19.
19 Ojlo tintindo nado yí onú delẹ do sanvọ́: Paulu yí dotẹnmẹ hundote dagbe de do sanvọ́ nado sọgan hodo Jesu. E họnwun dọ nudide he sọgbe lọ wẹ e basi, dile etlẹ yindọ gbẹzan etọn ma vò mlẹnmlẹn sọn awusinyẹnnamẹnu lẹ si to agbasa-liho. (1 Kọlintinu lẹ 4:11-13) Jehovah ma dopagbe gbẹzan fẹẹmẹninọ tọn gba, podọ to whedelẹnu devizọnwatọ etọn lẹ nọ doakọnna awusinyẹnnamẹnu lẹ. Ojlo tintindo mítọn nado hẹn gbẹzan mítọn bọawu bo yí onú delẹ do sanvọ́ nọ do obá he mẹ gbemima mítọn nado sẹ̀n Jehovah lodo jẹ hia.—1 Timoti 6:6-8.
20. Naegbọn homẹfa yin onú titengbe de na mẹhe ze Ahọluduta lọ do otẹn tintan mẹ?
20 Homẹfa: Devi Jakobu dotuhomẹna Klistiani hatọ etọn lẹ dọmọ: ‘Enẹwutu, mẹmẹsunnu emi, mì fahomẹ kakajẹ tintin-tofi Oklunọ tọn whenu.’ (Jakobu 5:7) To aihọn he mẹ mẹlẹpo tin to plaplaji te ehe mẹ, e nọ vẹawu nado fahomẹ. Mí nọ jlo dọ onú lẹ ni yawu jọ. Ṣigba Paulu na tuli mí nado hodo apajlẹ yé he ‘gbọn yise po homẹfa po dali dugu opagbe lẹ tọn lẹ.’ (Heblu lẹ 6:12) Wleawufo nado nọtepọn Jehovah. Ogbẹ̀ madopodo to aigba paladisi tọn de ji—na jide tọn nuhe yè dona nọtepọn de wẹ e yin!
21. (a) Etẹwẹ mí nọ dohia to whenuena mí ze Ahọluduta lọ do otẹn tintan mẹ? (b) Etẹwẹ na yin hodọdeji to hosọ he bọdego mẹ?
21 Mọwẹ, ayinamẹ Jesu tọn nado dín Ahọluduta lọ whẹ́ yọn-na-yizan. Eyin mí wàmọ, mí nọ dohia dọ mí dejido Jehovah go nugbo bo de aliho gbẹninọ tọn dagbe hugan he Klistiani de sọgan hodo. Ṣigba, Jesu sọ na mí ayinamẹ nado ‘dín dodo Jiwheyẹwhe tọn whẹ́.’ To hosọ he bọdego mẹ, mí na mọ nuhewutu tulinamẹ enẹ wá do ganmẹ titengbe to egbehe.
Be Hiẹ Sọgan Basi Zẹẹmẹ Ya?
• Na nuhe dù agbasanu lẹ, jlẹkajininọ tẹwẹ Jesu na mí ayinamẹ nado tindo?
• Etẹwẹ mí plọn sọn oló Jesu tọn mẹ gando kanklosọpoawenọ lọ po nùvo yẹnvi tọn lọ po go?
• Jẹhẹnu Klistiani tọn tẹlẹ wẹ nọ gọalọna mí nado dín Ahọluduta Jiwheyẹwhe tọn whẹ́?
[Yẹdide to weda 21]
Suhugan mẹhe sè ohó Jesu tọn lẹ tọn wẹ yin wamọnọ
[Yẹdide to weda 23]
Dẹpẹ adọkunnọ lọ yiwanna nutindo etọn lẹ hú Jiwheyẹwhe
Ajọwatọ lọ to oló Jesu tọn mẹ yí onú lẹpo do sanvọ́ nado tindo pali akuẹ gege tọn dopo
[Yẹdide to weda 24]
Jehovah na nọgodona mí eyin mí hẹn alọnu ján to sinsẹ̀nzọn etọn mẹ