Afọdidona Dodo Na Basi Hihọ́na Mí

‘Mì nọ dín dodo Jiwheyẹwhe tọn whẹ́.’—MATIU 6:33.

1, 2. Nudide tẹwẹ awhli Klistiani de basi, podọ naegbọn e do basi nudide mọnkọtọn?

AWHLI Klistiani de to Asie nọ wazọ́n taidi wekantọ to wekantẹn ahọlu tọn de mẹ. Azọ́n sinsinyẹnwatọ wẹ ewọ yin, bo nọ wá azọ́nmẹ do ganmẹ bo masọ nọ yí azọ́n etọn do daihun paali. Ṣigba, ojlẹ mẹtẹnpọn tọn mẹ wẹ e te to azọ́nmẹ, podọ ojlẹ lọ sọ nado pọ́n eyin e jẹna otẹn lọ nugbo. Ogán azọ́nwatẹn lọ tọn dọna awhli lọ dọ azọ́n lọ na lẹzun etọn pete podọ emi na tlẹ sọ ze e do otẹn daho mẹ eyin e na yigbe bo tindo kọndopọ zanhẹmẹ tọn hẹ emi. Awhli lọ gbẹ́ na ẹn madoadúdẹji, dile etlẹ yindọ ehe na dekọtọn do agbasazọ́n etọn hinhẹnbu mẹ.

² Be nulunu wẹ yọnnu Klistiani enẹ wà ya? Lala, e yí sọwhiwhe do setonuna ohó Jesu tọn lẹ he dọmọ: “Ṣigba mì dín . . . dodo [Jiwheyẹwhe tọn] whẹ́.” (Matiu 6:33) Na ewọ, nunọwhinnusẹ́n dodo tọn lẹ hihodo yin nujọnu tlala hú ale de mimọyi gbọn mahẹ tintindo to fẹnnuwiwa zanhẹmẹ tọn mẹ dali.—1 Kọlintinu lẹ 6:18.

Nujọnu-Yinyin Dodowiwa Tọn

3. Etẹwẹ dodowiwa yin?

³ ‘Dodowiwa’ bẹ linlẹn lọ hẹn nado tẹdo nunọwhinnusẹ́n walọ dagbe tọn lẹ go. To Biblu mẹ, hogbe Glẹkigbe po Heblugbe po tọn he yin zinzan na dodo zẹẹmẹdo “jijlọ” kavi “gbesisọ.” E ma zẹẹmẹdo dodonọ-jijlá kavi whẹsuna-mẹdetiti gbọn nujinọtedo mẹtọn titi lẹ dali gba. (Luku 16:15) Teninọ jijlọ he sọgbe hẹ nujinọtedo Jehovah tọn lẹ wẹ e yin. Dodowiwa Jiwheyẹwhe tọn wẹ e yin.—Lomunu lẹ 1:17; 3:21.

4. Naegbọn dodowiwa do yin nujọnu na Klistiani lẹ?

⁴ Naegbọn dodowiwa do yin nujọnu? Na Jehovah, “Jiwheyẹwhe dodo . . . tọn,” nọ do nukundagbe hia omẹ etọn lẹ eyin yé yí dodowiwa zan wutu. (Psalm 4:1; Howhinwhẹn lẹ 2:20-22; Habbakuk 1:13) Mẹdepope he nọ wazọ́n mawadodo tọn ma sọgan tindo haṣinṣan pẹkipẹki hẹ ẹ. (Howhinwhẹn lẹ 15:8) Nuhe zọ́n niyẹn bọ apọsteli Paulu dotuhomẹna Timoti dọmọ: “Nọ họ̀n na wantuntun yọpọ whenu tọn ga: ṣigba nọ hodo dodo,” gọna jẹhẹnu titengbe devo lẹ. (2 Timoti 2:22) Podọ whẹwhinwhẹ́n enẹ dopolọ wutu wẹ Paulu donù “tùnudo dodo tọn” go to whenuena e to adà voovo gbaja gbigbọmẹ tọn mítọn lẹ slẹ.—Efesunu lẹ 6:14.

5. Nawẹ nudida mapenọ lẹ sọgan dín dodo gbọn?

⁵ Nugbo wẹ dọ gbẹtọvi he yin dodonọ to linlẹn gigọ́ mẹ de ma tin. Mẹlẹpo wẹ dugu mape tọn sọn Adam dè bo gbọnmọ dali lẹzun ylandonọ, mawadodonọ, sọn jiji whenu. Ṣogan, Jesu dọ dọ mí ni dín dodo. Nawẹ enẹ sọgan yọnbasi gbọn? Flin dọ Jesu ze ogbẹ̀ pipé etọn jo taidi ofligọ de na mí, podọ eyin mí yí yise zan to avọ́sinsan enẹ mẹ, Jehovah tin to awuwle mẹ nado jo ylando mítọn lẹ na mí. (Matiu 20:28; Johanu 3:16; Lomunu lẹ 5:8, 9, 12, 18) Jehovah nọ kẹalọyi sinsẹ̀n-bibasi mítọn to dodonu enẹ ji, dile mí to nujinọtedo dodo Jehovah tọn lẹ plọn bo nọ wà nuhe go mí pé lẹpo nado hodo yé bosọ nọ hodẹ̀ na alọgọ nado duto madogán mítọn lẹ ji. (Psalm 1:6; Lomunu lẹ 7:19-25; Osọhia 7:9, 14) Lehe enẹ yin homẹmiọnnamẹnu do sọ!

Dodonọ-Yinyin to Aihọn Mawadodo Tọn de Mẹ

6. Naegbọn aihọn lọ do yin nọtẹn owùnọ de na Klistiani dowhenu tọn lẹ?

⁶ To whenuena devi Jesu tọn lẹ mọ azọ́ndenamẹ lọ yí nado yin kunnudetọ etọn lẹ “jẹ opodo aigba tọn,” yé pannukọn ninọmẹ sinsinyẹn de. (Owalọ lẹ 1:8) Aigba-denamẹ yetọn lẹpo wẹ “mlọnai to mẹylankan lọ,” Satani mẹ. (1 Johanu 5:19) Gbigbọ ylankan he e nọ zedaga ko hẹn aihọn lọ gblezọn, podọ Klistiani lẹ na tin to nuyiwadomẹji mẹhẹnflu etọn tọn glọ. (Efesunu lẹ 2:2) Nọtẹn owùnọ de wẹ aihọn lọ yin na yé. Nado sọgan doakọnnanu bo hẹn tenọgli go jẹ opodo, yé dona dín dodo Jiwheyẹwhe tọn whẹ́. Suhugan yetọn wàmọ, ṣigba vude to yé mẹ jo “aliho [dodo] tọn” lọ do.—Howhinwhẹn lẹ 12:28; 2 Timoti 4:10.

7. Azọngban tẹlẹ wẹ biọ dọ Klistiani de ni nọavunte sọta nuyiwadomẹji mẹhẹnflu tọn lẹ?

⁷ Be owù ko depò to aihọn lọ mẹ na Klistiani lẹ to egbehe wẹ ya? Paali! E tlẹ sọ gblezọn hú owhe kanweko tintan whenu tọn. To yidogọ mẹ, Satani ko yin yinyan dlan aigba ji bo to awhàn sinsinyẹn fùn hẹ Klistiani yiamisisadode lẹ, “[okún yọnnu lọ tọn] he pò lẹ, ehe to osẹ́n Jiwheyẹwhe tọn yìn, bosọ hẹn okunnu Klisti tọn go gligli lẹ.” (Osọhia 12:12, 17) Satani sọ nọ diọnukunsọ mẹdepope he nọgodona ‘okún’ enẹ. Ṣogan, Klistiani lẹ ma sọgan tọ́nsọn aihọn lọ mẹ gba. Dile etlẹ yindọ yé ma yin apadewhe etọn, yé dona nọ̀ e mẹ. (Johanu 17:15, 16) Podọ yé dona dọyẹwheho to e mẹ nado dín ahunjijlọnọ lẹ mọ bo plọn yé nado lẹzun devi Klisti tọn. (Matiu 24:14; 28:19, 20) Enẹwutu, to whenuena e yindọ Klistiani lẹ ma sọgan dapana nuyiwadomẹji mẹhẹnflu aihọn ehe tọn lẹ mlẹnmlẹn, yé dona nọavunte sọta yé. Mì gbọ mí ni gbadopọnna ẹnẹ to nuyiwadomẹji enẹlẹ mẹ.

Omọ̀ Fẹnnuwiwa Tọn

8. Naegbọn Islaelivi lẹ jẹ yẹwhe Moabinu lẹ tọn sẹ̀n ji?

⁸ Sẹpọ vivọnu gbejizọnlin owhe 40 tọn he Islaelivi lẹ zin to zungbo mẹ, suhugan yetọn jo aliho dodo tọn lọ do. Yé ko yí nukun yetọn lẹ do mọ nuwiwa mẹwhlẹngán tọn Jehovah tọn lẹ, podọ to madẹnmẹ yé na biọ Aigba Pagbe tọn mẹ. Ṣogan, to ojlẹ titengbe enẹ mẹ, yé jẹ yẹwhe Moabinu lẹ tọn sẹ̀n ji. Etẹwutu? Na yé joawuna “wantuntun agbasalan tọn” wutu. (1 Johanu 2:16) Kandai lọ dọmọ: “Gbẹtọ lẹ sọ ṣẹ galọ hẹ viyọnnu Moabi tọn lẹ lọ.”—Osọha lẹ 25:1.

9, 10. Ninọmẹ egbezangbe tọn tẹwẹ hẹn ẹn zun onú titengbe nado hẹn nuyiwadomẹji mẹhẹnflu wantuntun agbasalan tọn lẹ do ayiha mẹ?

⁹ Nujijọ enẹ do lehe wantuntun agbasalan tọn lẹ sọgan hẹn mẹhe ma tin to aṣeji lẹ gblezọn do hia. Mí dona plọnnu sọn e mẹ, titengbe to whenuena e yindọ fẹnnuwiwa ko lẹzun nuhe mẹsusu kẹalọyi taidi aliho gbẹzan tọn he sọgbe de. (1 Kọlintinu lẹ 10:6, 8) Linlin he wá sọn États-Unis de dọmọ: “Jẹnukọnna 1970, pọninọ [sunnu po yọnnu po tọn matin alọwle] yin nude he ma sọgbe hẹ osẹ́n to ayimatẹn Amelika tọn lẹpo mẹ. Todin, aṣa he gbayipe taun de wẹ e yin. Hugan odaa mẹhe to alọwle to tintan whenu lẹ tọn wẹ ko to pọnọ jẹnukọnna alọwle yetọn.” E ma yin otò dopo kẹdẹ mẹ wẹ aṣa gblezọn enẹ po mọnkọtọn devo lẹ po nọ yin mimọ te gba. Yé nọ yin mimọ lẹdo aihọn pé, podọ e blawu dọ, Klistiani delẹ ko hodo aṣa ehe—bo tlẹ hẹn teninọ yetọn bu to agun Klistiani tọn mẹ.—1 Kọlintinu lẹ 5:11.

¹⁰ Humọ, diblayin filẹpo wẹ nujijla oklọ tọn he nọ nọgodona fẹnnuwiwa lẹ tin te. Tito-to-whinnu sinimoto po televiziọn po tọn lẹ nọ dohia dọ nuhe sọgbe mlẹnmlẹn wẹ e yin na jọja lẹ nado tindo kọndopọ zanhẹmẹ tọn jẹnukọnna alọwle. Kọndopọ alọwle tọn to vijinu dopolọ lẹ ṣẹnṣẹn nọ yin didohia taidi nuhe sọgbe. Podọ susu nọ do nuwiwa zanhẹmẹ tọn lẹ hia to gigọ́mẹ to aliho he họnwun hezeheze mẹ. Yẹdide zanhẹmẹ tọn lẹ sọ nọ yin mimọ po awubibọ po to Internet ji. Di dohia, linlinwe-kantọ de na linlin dọ visunnu owhe-ṣinawe-mẹvi etọn lẹkọwa whégbè sọn wehọmẹ bo yí jeje do dọna otọ́ etọn dọ wehọmẹvigbẹ́ emitọn de ko mọ nọtẹn Internet ji tọn he nọ do yọnnu he to omẹ́ bo to kọndopọ zanhẹmẹ tọn tindo lẹ hia. Otọ́ lọ jọsi, ṣigba be e ma yin nugbo wẹ dọ ovi susu wẹ nọ dukosọ hẹ nọtẹn gblewa tọn mọnkọtọn lẹ ṣogan bo ma nọ dọ nudepope na mẹjitọ yetọn lẹ ya? Podọ mẹjitọ nẹmu wẹ tlẹ yọ́n nuhe aihundida video tọn ovi yetọn lẹ tọn bẹhẹn? Aihundida he gbayipe susu wẹ nọ do fẹnnuwiwa he hiọawu, gọna afinyọnnuwiwa po danuwiwa po hia.

11. Nawẹ whẹndo de sọgan yin hihọ́-basina sọn walọ fẹnnuwiwa tọn he gbayipe to aihọn lọ mẹ gbọn?

¹¹ Nawẹ whẹndo de sọgan nọavunte sọta “ayidedai” gblezọn mọnkọtọn gbọn? Gbọn dodo Jiwheyẹwhe tọn dindin whẹ́, bo gbẹ́ nado doalọ to walọ mawé lẹpo mẹ dali. (2 Kọlintinu lẹ 6:14; Efesunu lẹ 5:3) Mẹjitọ he nọ hẹn nukun do nuwiwa ovi yetọn lẹ tọn ji bosọ nọ dó owanyi na Jehovah po osẹ́n dodo tọn etọn lẹ po do ahun mẹ na ovi yetọn lẹ nọ hẹn yé lodo nado nọavunte sọta yẹdide fẹnnuwiwa tọn, aihundida video tọn he bẹ fẹnnuwiwa hẹn, sinimoto mawé lẹ, po whlepọn mawadodo tọn devo lẹ po.—Deutelonomi 6:4-9.a

Owù Kọgbidinamẹ Kọmẹnu lẹ Tọn

12. Nuhahun tẹwẹ fọndote to owhe kanweko tintan mẹ?

¹² To whenuena Paulu tin to Listla to Asia Pẹvi, e hẹnazọngbọna dawe de to azọ́njiawu-liho. Kandai lọ dọmọ: “Whenuena gbẹtọ lẹ mọ nuhe Paulu wà, yé ze ogbè yetọn daga bo to didọ to ogbè Lukaonia tọn mẹ, dọ, Yẹwhe lẹ wá mí dè to apajlẹ gbẹtọ tọn mẹ. Yé ylọ Balnaba dọ Jupiteli; bo ylọ Paulu dọ Melkuliu, na ewọ wẹ ogán hodidọ tọn wutu.” (Owalọ lẹ 14:11, 12) To nukọn mẹ, omẹ enẹlẹ dopolọ wẹ sọ jlo na hù Paulu po Balnaba po. (Owalọ lẹ 14:19) E họnwun dọ yé yawu joawuna kọgbidinamẹ kọmẹnu yetọn lẹ tọn. E taidi dọ to whenuena mẹhe wá sọn lẹdo enẹ mẹ delẹ lẹzun Klistiani, yé gbẹ́ tẹdo linlẹn otangblo tọn yetọn lẹ go. To wekanhlanmẹ he Paulu dohlan Klistiani Kọlọsi tọn lẹ mẹ, e na avase yé sọta “taliaina angẹli lẹ” kavi sinsẹ̀n-bibasi na angẹli lẹ.—Kọlọsinu lẹ 2:18.

13. Aṣa tẹlẹ wẹ Klistiani de dona dapana, podọ nawẹ e sọgan mọ huhlọn yí nado wàmọ gbọn?

¹³ Mọdopolọ to egbehe, Klistiani nugbo lẹ dona dapana aṣa he yin alọkẹyi to paa mẹ bo yin zize sinai do linlẹn sinsẹ̀n lalo tọn lẹ ji bosọ jẹagọdo nunọwhinnusẹ́n Klistiani tọn lẹ. Di apajlẹ, to otò delẹ mẹ, hùnwhẹ aṣa tọn susu he gando vijiji po ṣiọdidi po go lẹ yin zize sinai do lalo lọ ji dọ mí tindo gbigbọ de he nọ gbọṣi ogbẹ̀ to okú godo. (Yẹwhehodọtọ 9:5, 10) To otò delẹ mẹ, nuwiwa aṣa tọn wẹ e yin nado nọ gbòada na viyọnnu jọja lẹ. Nuyiwa kanyinylan tọn he ma yin dandannu de wẹ ehe yin, bo masọ tin to gbesisọ mẹ hẹ nukunpedomẹgo owanyinọ he mẹjitọ Klistiani lẹ dona na ovi yetọn lẹ. (Deutelonomi 6:6, 7; Efesunu lẹ 6:4) Nawẹ Klistiani lẹ sọgan nọavunte sọta kọgbidinamẹ kọmẹnu yetọn lẹ tọn bo jo aṣa mọnkọtọn lẹ do gbọn? Gbọn tudido do Jehovah go mlẹnmlẹn dali. (Psalm 31:6) Jiwheyẹwhe dodonọ lọ na na huhlọn bosọ penukundo mẹhe yí ahun lẹpo do dọna ẹn dọ: “[Hiẹ] wẹ fibẹtado ṣie podọ figángán ṣie: Jiwheyẹwhe ṣie; [hiẹ] go wẹ yẹn na dotudo” lẹ go.—Psalm 91:2; Howhinwhẹn lẹ 29:25.

A Wọ̀n Jehovah Blo

14. Avase tẹwẹ Jehovah na Islaelivi lẹ ojlẹ vude whẹpo yé do biọ Aigba Pagbe tọn mẹ?

¹⁴ Ojlẹ vude whẹpo Islaelivi lẹ do biọ Aigba Pagbe tọn mẹ, Jehovah na yé avase ma nado wọ̀n emi. E dọmọ: “Payiha hiẹ nikaa wọ̀n OKLUNỌ lọ Jiwheyẹwhe towe, to gbedide etọn lẹ ma yìn mẹ, po whẹdida etọn lẹ po, po aṣẹdai etọn lẹ po, he yẹn degbena we to egbehe: hiẹ nikaa ko dù bosọ yin gigọ́, bo ko dó ohọ̀ dagbedagbe lẹ, bo nọ nọ̀ e mẹ; podọ whenuena kanlinpó towe lẹ po kanlinpa towe lẹ po sudeji, bọ yè sọ hẹn fataka towe po sika towe po sudeji, bọ yè sọ hẹn ehe hiẹ tindo lẹpo sudeji; whenẹnu bọ ayiha towe yin zizedaga, bọ hiẹ wọ̀n OKLUNỌ lọ Jiwheyẹwhe towe.”—Deutelonomi 8:11-14.

15. Nawẹ mí sọgan hẹn ẹn diun dọ mí ma to jiwọn Jehovah go gbọn?

¹⁵ Be onú mọnkọtọn sọgan jọ to egbehe ya? Mọwẹ, eyin mí ze nuhe ma sọgbe lẹ do otẹn tintan mẹ. Ṣigba, eyin mí nọ dín dodo Jiwheyẹwhe tọn whẹ́, sinsẹ̀n-bibasi wiwe ṣeke wẹ mí na ze do otẹn tintan mẹ to gbẹzan mítọn mẹ. Dile Paulu na tuli mí nado wà do, mí na nọ ‘fli ojlẹ’ bo hẹn ẹn do ayiha mẹ dọ lizọnyizọn mítọn yin nuhe mí dona wà to niyaniya mẹ. (Kọlọsinu lẹ 4:5; 2 Timoti 4:2) Nalete, eyin gbọjẹyíyí kavi afọdidona gbẹdudu wá yíta to opli lẹ po sinsẹ̀nzọn kunnudegbe tọn po si, mí sọgan wọ̀n Jehovah na mí ko ze e do otẹn awetọ mẹ to gbẹzan mítọn mẹ wutu. Paulu dọ dọ to azán godo tọn lẹ mẹ, gbẹtọ lẹ na lẹzun “wanyina aṣọ́ [kavi gbẹdudu] hú Jiwheyẹwhe tọ́.” (2 Timoti 3:4) Klistiani ahundoponọ lẹ nọ gbeje yede pọ́n whẹwhẹ nado hẹn ẹn diun dọ nulẹnpọn mọnkọtọn ma yinuwado yé ji.—2 Kọlintinu lẹ 13:5.

Dapana Gbigbọ Mẹdekannujẹ Tọn

16. Gbigbọ he ma sọgbe tẹwẹ Evi gọna mẹdelẹ to azán Paulu tọn gbè dohia?

¹⁶ To jipa Edẹni tọn mẹ, Satani yí ojlo ṣejannabi tọn he Evi tindo na mẹdekannujẹ zan po kọdetọn dagbe po. Evi jlo nado basi nudide dagbe po oylan po tọn na ede. (Gẹnẹsisi 3:1-6) To owhe kanweko tintan mẹ, mẹdelẹ to agun Kọlinti tọn mẹ tindo gbigbọ mẹdekannujẹ tọn mọnkọtọn. Yé lẹndọ yé mọnukunnujẹnumẹ hú Paulu, podọ ewọ gbọn vlẹko dali ylọ yé dọ apọsteli dahodaho lẹ.—2 Kọlintinu lẹ 11:3-5; 1 Timoti 6:3-5.

17. Nawẹ mí sọgan dapana gbigbọ mẹdekannujẹ tọn tintindo gbọn?

¹⁷ To aihọn lọ mẹ to egbehe, mẹsusu wẹ yin “tasinyẹntọ, goyitọ,” podọ aliho nulẹnpọn tọn enẹ ko yinuwado Klistiani delẹ ji. Mẹdelẹ tlẹ ko jẹagọdo nugbo lọ. (2 Timoti 3:4; Filippinu lẹ 3:18) To whẹho he gando sinsẹ̀n-bibasi wiwe ṣeke go lẹ mẹ, onú titengbe wẹ e yin dọ mí ni nọ dín anademẹ Jehovah tọn bo nọ kọngbedopọ hẹ “afanumẹ nugbonọ, nuyọnẹntọ” lọ po mẹho agun tọn lẹ po. Aliho dopo niyẹn nado dín dodo, podọ e nọ basi hihọ́na mí ma nado wleawuna gbigbọ mẹdekannujẹ tọn. (Matiu 24:45-47; Psalm 25:9, 10; Isaia 30:21) Agun Jiwheyẹwhe tọn wẹ “dòtin afọdotẹn nugbo tọn.” Jehovah ko do agun ehe ai nado basi hihọ́na mí bo deanana mí. (1 Timoti 3:15) Eyin mí kẹalọyi azọngban tangan he e to hinhẹndi, ehe na gọalọna mí ‘ma nado yí ogoyi ovọ́ do wà nudepope’ dile mí gbọn whiwhẹ dali litaina ojlo dodo Jehovah tọn.—Filippinu lẹ 2:2-4; Howhinwhẹn lẹ 3:4-6.

Hodo Apajlẹ Jesu Tọn

18. Aliho tẹlẹ mẹ wẹ mí yin tulina nado hodo apajlẹ Jesu tọn te?

¹⁸ Biblu dọ dọdai gando Jesu go dọmọ: “Hiẹ yiwanna dodo, bosọ gbẹwanna ylanwiwa.” (Psalm 45:7; Heblu lẹ 1:9) Apajlẹ dagbe nankọtọn die nado hodo! (1 Kọlintinu lẹ 11:1) E ma yin dọ Jesu yọ́n nujinọtedo dodo Jehovah tọn lẹ poun wẹ gba; e yiwanna yé. Abajọ to whenuena Satani whlé e pọ́n to zungbo mẹ, Jesu ma whleawu nado gbẹnuna ẹn bosọ tẹdo gbemima etọn nado gbọṣi “aliho dodo tọn” ji go.—Howhinwhẹn lẹ 8:20; Matiu 4:3-11.

19, 20. Kọdetọn dagbe tẹlẹ wẹ afọdidona dodo nọ hẹnwa?

¹⁹ Na nugbo tọn, ojlo ylankan agbasalan tọn lẹ sọgan sinyẹn. (Lomunu lẹ 7:19, 20) Etomọṣo, eyin mí nọ yí nukun he họakuẹ do pọ́n dodowiwa, ehe na na mí huhlọn nado nọavunte sọta ylanwiwa. (Psalm 119:165) Owanyi sisosiso tintindo na dodo na basi hihọ́na mí to whenuena mí yin whiwhlepọn nado waylan. (Howhinwhẹn lẹ 4:4-6) Flin dọ whedepopenu he mí joawuna whlepọn, mí ko jotẹnna Satani nado gbawhàn. Lehe e na pọnte hugan nado nọavunte sọta ẹ bo hẹn ẹn yọnbasi na Jehovah nado gbawhàn do sọ!—Howhinwhẹn lẹ 27:11; Jakobu 4:7, 8.

²⁰ Na Klistiani nugbo lẹ nọ dín dodo wutu, yé “gọ́ na sinsẹ́n dodo tọn, he gbọn Jesu Klisti mẹ, hlan gigo po pipà Jiwheyẹwhe tọn po.” (Filippinu lẹ 1:10, 11) Yé nọ ze “gbẹtọ yọyọ lọ dogo, mẹhe yè dá to dodo mẹ di apajlẹ Jiwheyẹwhe tọn, podọ to jijọ wiwe nugbo tọn mẹ.” (Efesunu lẹ 4:24) Jehovah tọn wẹ yé yin podọ yé tin to ogbẹ̀ nado sẹ̀n ẹn, e ma yin nado wà ojlo yedetiti tọn gba. (Lomunu lẹ 14:8; 1 Pita 4:2) Nuhe nọ deanana linlẹn po nuyiwa yetọn lẹ po niyẹn. Lehe yé nọ hẹn homẹhun Otọ́ olọn mẹ tọn yetọn do sọ!—Howhinwhẹn lẹ 23:24.

[Nudọnamẹ Odò Tọn]

Be Hiẹ Sọgan Basi Zẹẹmẹ Ya?

• Naegbọn e do yin nujọnu nado dín dodo?

• Nawẹ Klistiani mapenọ de sọgan dín dodo gbọn?

• Etẹwẹ yin delẹ to nuhe Klistiani lẹ dona dapana to aihọn mẹ lẹ mẹ?

• Nawẹ afọdidona dodo nọ basi hihọ́na mí gbọn?

[Yẹdide to weda 26]

Nọtẹn owùnọ de wẹ aihọn lọ yin na hodotọ Jesu tọn lẹ

[Yẹdide to weda 27]

Ovi he yin pinplọn nado yiwanna Jehovah lẹ na yin hinhẹn lodo nado nọavunte sọta fẹnnuwiwa

[Yẹdide to weda 28]

Islaelivi delẹ wọ̀n Jehovah to whenuena yé lẹzun adọkunnọ to Aigba Pagbe tọn mẹ godo

[Yẹdide to weda 29]

Taidi Jesu, Klistiani lẹ gbẹwanna mawadodo