“Míwlẹ Ma Hà Nọma Setonuna Jiwheyẹwhe Hú Gbẹtọ”

‘Jah Lẹzun Whlẹngán Ṣie’

OMẸ Jehovah tọn lẹ pannukọn nudide de. Be yé na setonuna gbedide ahọlu kanylantọ Egipti hohowhenu tọn wẹ ya? Kavi yé na setonuna Jehovah Jiwheyẹwhe, bo tọ́nsọn aigba kanlinmọgbenu tọn enẹ ji, bo yì Aigba Pagbe tọn lọ ji?

Na Falo tasinyẹntọ Egipti tọn gbẹ́ gbidigbidi nado tún omẹ Jehovah tọn lẹ dote wutu, Jiwheyẹwhe do Azọ̀nylankan Ao lẹ hlan aigba lọ ji. Lehe ehe do huhlọn Jehovah tọn hia do sọ! Yẹwhe Egipti tọn lẹ ma sọgan glọnalina nugbajẹmẹji enẹlẹ.

To whenuena Falo yin didọna nado dike omẹ Jiwheyẹwhe tọn lẹ ni yì, e yí ovlẹ do dọmọ: “Mẹnu wẹ [Jehovah], bọ yẹn nado dotoai hlan ogbè etọn nado gbọ ovi Islaeli tọn lẹ ni yì? Yẹn ma yọ́n [Jehovah] gba, podọ humọ yẹn ma to na gbọ Islaeli ni yì gba.” (Eksọdusi 5:2) Taidi kọdetọn de, nugbajẹmẹji ehelẹ wá Egipti ji: (1) osin diọzun ohùn, (2) bese lẹ, (3) ojọ́ lẹ, (4) supọ̀ lẹ, (5) azọ̀nylankan kanlin-yinyin lẹ tọn, (6) nútitẹ̀ lẹ to gbẹtọ po kanlin po go, (7) kẹnsu, (8) owẹ̀n lẹ, (9) zinvlu, podọ (10) okú viplọnji Egiptinu lẹ tọn, kakajẹ visunnu Falo lọsu tọn ji. To godo mẹ, Falo dike Heblu lẹ ni yì. Ovẹ̀ wẹ e tlẹ vẹ̀ yé nado yì!—Eksọdusi 12:31, 32.

Nudi gbẹtọ livi donu atọ̀n, he bẹ Islaelivi sunnu, yọnnu, po ovi flinflin lẹ po gọna jonọ flusọ́ devo lẹ hẹn, tọ́nyi po awuyiya po. (Eksọdusi 12:37, 38) Ṣigba, to madẹnmẹ, Falo dómọna yé po awhànpa sẹhundaga etọn po. E taidi dọ Islaelivi lẹ yin ginglọndo Ohù Vẹẹ, zungbo owùnọ de, po awhànpa Falo tọn lẹ po ṣẹnṣẹn. Ṣogan, Mose dọna gbẹtọ lọ lẹ dọmọ: “Mìwlẹ dibu blo, ṣite guun, bo mọ whlẹngán [Jehovah] tọn.”—Eksọdusi 14:8-14.

To azọ́njiawu-liho, Jehovah má osin Ohù Vẹẹ lọ tọn lẹ doawe na Islaelivi lẹ nado họ̀ngán. Ṣigba to whenuena Egiptinu lẹ dómọna yé biọ e mẹ, Jiwheyẹwhe hẹn osin lọ nado lẹkọwa otẹn etọn mẹ. “Kẹkẹ Falo tọn lẹ po awhànpa etọn po wẹ [Jehovah] ko zedlan ohù mẹ.” (Eksọdusi 14:26-28; 15:4) Gbigbẹ́ nado gbògbéna Jehovah ko plan Falo saklanọ lọ yì vasudo mẹ.

Jehovah do ede hia nado yin “gbẹtọ awhànfuntọ de” to Ohù Vẹẹ lọ kọ̀n. (Eksọdusi 15:3) “Islaeli sọ mọ azọ́n daho he [Jehovah] wà to Egiptinu lẹ go,” wẹ kandai gbọdo lọ dọ, “gbẹtọ ewlẹ sọ dibuna [Jehovah]: yé sọ yise to [Jehovah] mẹ.” (Eksọdusi 14:31; Psalm 136:10-15) Yé do pinpẹn-nutọn sọn ahun mẹ wá yetọn hia Jiwheyẹwhe dile sunnu lẹ kọnawudopọ hẹ Mose to ohàn awhàngbigba tọn de mẹ bọ nọviyọnnu etọn, Miliam, yin nukọntọ na yọnnu lẹ to wedudu mẹ.a

Jehovah Gbẹ́ Yin Whlẹngantọ De

Devizọnwatọ Jehovah tọn egbezangbe tọn lẹ sọgan mọ nuplọnmẹ yise hẹnlodo tọn lẹ yí sọn nuyiwa mẹwhlẹngán tọn Jiwheyẹwhe tọn enẹ mẹ. Nuplọnmẹ tintan wẹ yindọ Jehovah tindo huhlọn mado-dogbó bo sọgan gọalọna omẹ etọn lẹ to gigọ́mẹ. To ohàn awhàngbigba tọn yetọn mẹ, Mose po Islaelivi lẹ po yí aglinjijẹ awhàngbigba tọn do jihàn dọmọ: “Adusilọ towe, [Jehovah] E, yin gigonọ to huhlọn mẹ, adusilọ towe, [Jehovah] E, gbà kẹntọ lọ hanyanhanyan.”—Eksọdusi 15:6.

Nuplọnmẹ awetọ wẹ yindọ Ganhunupotọ lọ tindo ojlo vẹkuvẹku nado basi hihọ́na omẹ etọn lẹ. Islaelivi lẹ jihàn dọmọ: Jah “wẹ huhlọn po ohàn ṣie po, ewọ sọ lẹzun whlẹngán ṣie: ehe wẹ Jiwheyẹwhe ṣie, yẹn nasọ to pipà ẹ.” Podọ nuplọnmẹ atọ̀ntọ wẹ yindọ mẹdepope ma sọgan diọnukunsọ ojlo Jehovah Jiwheyẹwhe tọn po kọdetọn dagbe po gba. To ohàn awhàngbigba tọn yetọn mẹ, mẹhe Jiwheyẹwhe whlẹngán lẹ jihàn dọmọ: “Mẹnu wẹ tin di we, [Jehovah] E, to yẹwhe lẹ ṣẹnṣẹn? Mẹnu wẹ tin di we, gigonọ to wiwe mẹ, osinọ to pipà lẹ mẹ, he nọ wà nujiawu lẹ?”—Eksọdusi 15:2, 11.

Taidi Falo Egipti hohowhenu tọn, gandutọ aihọn egbehe tọn lẹ nọ dohomẹkẹn omẹ Jehovah tọn lẹ. Nukọntọ saklanọ lẹ sọgan “dọ ohó lẹ do Gigogán go, bo . . . hẹn agbọ́pé mẹwiwe Gigogán tọn lẹ.” (Daniẹli 7:25; 11:36) Ṣigba Jehovah na jide omẹ etọn lẹ dọmọ: “Avùnhonu depope he yè jlẹ do ogo we ma na wà nude; odẹ́ he fọ́n do oji we to whẹdida mẹ lẹpo wẹ hiẹ na gblewhẹdo: ehe wẹ ogú devi OKLUNỌ tọn lẹ tọn.”—Isaia 54:17.

Mẹhe diọnukunsọ Jiwheyẹwhe lẹ na jai, kẹdẹdi Falo po awhànpa etọn po. Nuyiwa mẹwhlẹngán Jehovah tọn lẹ, taidi gbejizọnlin tintọ́nsọn Egipti tọn, dekunnu dọ e sọgbe nado hodo nunọwhinnusẹ́n lọ he go apọsteli Jesu tọn lẹ donù, dọmọ: “Míwlẹ ma hà nọma setonuna Jiwheyẹwhe hú gbẹtọ.”—Owalọ lẹ 5:29.

[Nudọnamẹ Odò Tọn]

[Apotin/Yẹdide to weda 9]

BE HIẸ YỌNẸN YA?

• Jehovah hẹn jẹhọn sinsinyẹn de nado yìn to ozán lọ pete mẹ nado sọgan dike Islaelivi lẹ ni dasá Ohù Vẹẹ lọ to aigba kló ji.—Eksọdusi 14:21, 22.

• E na ko biọ aliho he gblo sọ kilomẹtlu dopo daa kavi humọ na Islaelivi livi susu lẹ nado dasá Ohù Vẹẹ lọ to ojlẹ gli enẹ gblamẹ.

[Yẹdide to weda 9]

Yẹwhe lalonọ Egipti tọn lẹ ma sọgan glọnalina Azọ̀nylankan Ao he Jehovah dohlan lẹ gba

[Asisa Yẹdide tọn]

Numẹ̀nsẹ̀n atọ̀n lẹpo: Fọto yin dide gbọn alọkẹyi British Museum tọn dali