Kanbiọ lẹ sọn Wehiatọ lẹ Dè

Be tafo zannu tọn awe lọ lẹ kẹdẹ wẹ to aki alẹnu tọn lọ mẹ, kavi nudevo lẹ to e mẹ ga ya?

To ojlẹ klandowiwe tẹmpli Sọlọmọni tọn mẹ to owhe 1026 J.W.M. mẹ, “nude ma tin to aki lọ mẹ adavo tafo awe lẹ lọ he Mose yí do finẹ to Holẹbi, whenuena OKLUNỌ basi alẹnu de po ovi Islaeli tọn lẹ po, whenuena yé gọ̀ sọn Egipti.” (2 Otannugbo lẹ 5:10) Ṣigba, e ma nọ yin mọ to whepoponu gba.

Yé biọ zungbo Sinai tọn mẹ “to osun atọ̀ntọ mẹ ehe godo ovi Islaeli tọn lẹ ko tọ́n yì sọn aigba Egipti tọn ji.” (Eksọdusi 19:1, 2) Enẹgodo, Mose hẹji yì Osó Sinai tọn ji bo yí tafo zannu tọn awe he ji Osẹ́n lọ yin winwlan do lẹ. E dọmọ: “Yẹn bosọ lẹ́ bo jẹte sọn osó lọ ji wá, bo yí tafo lẹ lọ do aki he yẹn ko basi lọ mẹ; finẹ wẹ yé te, dile OKLUNỌ lọ degbena mi do.” (Deutelonomi 10:5) Ehe yin aki, kavi agbanhẹnnu ojlẹ gli tọn de poun, he Jehovah dọna Mose nado basi he na hẹn tafo Osẹ́n tọn lọ lẹ. (Deutelonomi 10:1) Aki alẹnu tọn lọ ma ko yin bibasi jẹnukọnna vivọnu owhe 1513 J.W.M. tọn.

Ojlẹ vude to whlẹngán yetọn sọn Egipti godo, Islaelivi lẹ hlunnudọ gando núdùdù go. Enẹwutu, Jehovah na mana yé. (Eksọdusi 12:17, 18; 16:1-5) To ojlẹ enẹ mẹ, Mose dọna Aalọn dọmọ: “Yí ozẹ́n de, bo yí omeli gigọ́ mana tọn de do e mẹ, bo ze e dai to OKLUNỌ nukọn, nado yin yí whlá na whẹndo mìtọn lẹ.” Kandai lọ dọmọ: ‘Dile OKLUNỌ degbena Mose do, mọwẹ Aalọn ze e dai do to Kunnuhó lọ [kandai tangan lẹ bẹsẹdotẹn] nukọn, nado yin yí whlá.’ (Eksọdusi 16:33, 34) Matin ayihaawe, to whenuena Aalọn bẹ mana pli do ozẹ́n de mẹ to ojlẹ lọ mẹ, e dona nọte kakajẹ whenuena Mose basi Aki lọ bo ze tafo zannu tọn lẹ do e mẹ whẹpo e nido ze ozẹ́n lọ do Kunnuhó lọ nukọn.

Dile e ko yin didọ do, Aki alẹnu tọn lọ yin bibasi to vivọnu owhe 1513 J.W.M. mẹ. Opò Aalọn tọn yin zizedo Aki lọ mẹ to agọgbọnẹnmẹ, yèdọ to atẹṣiṣi Kola po mẹdevo lẹ po tọn godo. Apọsteli Paulu donù aki alẹnu tọn lọ he mẹ “sika-zẹ́n mana tọn te po opò Aalọn tọn he jọ amà po, po tafo alẹnu tọn lẹ po” go.—Heblu lẹ 9:4.

Mana lọ yin awuwledainanu de he Jiwheyẹwhe basi na owhe 40 he Islaelivi lẹ yizan to zungbo mẹ lẹ. E masọ yin awuwlena to whenuena “yé sọ dù sọn gbado hoho aigba [pagbe tọn] lọ tọn mẹ” gba. (Jọṣua 5:11, 12) Opò Aalọn tọn yin zize do aki alẹnu tọn lọ mẹ na lẹndai de—yèdọ nado yin ohia kavi kunnudenu de sọta whẹndo atẹṣitọ lọ. Ehe dohia dọ, opò lọ gbọṣi finẹ, e whè gbau na ojlẹ he yé yizan to zungbo mẹ lọ. Enẹwutu, e taidi nuhe sọgbe hẹ lẹnpọn dagbe nado wá tadona kọ̀n dọ to ojlẹ vude to whenuena yé biọ Aigba Pagbe tọn lọ ji godo podọ jẹnukọnna klandowiwe tẹmpli Sọlọmọni tọn, opò Aalọn tọn po sika-zẹ́n mana tọn lọ po yin didesẹ sọn aki alẹnu tọn lọ mẹ.