Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Nawẹ Jesu na “whlẹn agbátọnọ lọ” sọgbe hẹ dọdai Psalm 72:12 tọn gbọn?

To gandudu Jesu tọn glọ, whẹdida dodo na tin na mẹlẹpo, podọ mẹhodu ma na tin ba. Awhàn nọ saba dekọtọn do ohẹ́n mẹ, ṣigba Klisti na hẹn jijọho pipé wá. E nọ vẹawu gbẹtọ lẹ bo nasọ kọ̀n mẹlẹpo dopọ, podọ e na hẹn ẹn diun dọ núdùdù susugege tin-to-aimẹ na gbẹtọvi lẹ. (Psalm 72:4-16)—1/5, weda 7.

• Nawẹ míwlẹ taidi Klistiani sọgan do ‘awuvivo hodidọ tọn’ mítọn hia gbọn? (1 Timoti 3:13; Filemọni 8; Heblu lẹ 4:16)

Mí sọgan wàmọ gbọn zohunhun yíyí do dekunnu na mẹdevo lẹ po adọgbigbo po, mẹpinplọn po ayinamẹ he jẹ nina mẹdevo lẹ domẹwhenu po, podọ gbọn dẹ̀hiho na Jiwheyẹwhe sọn ahun mẹ wá po jidide lọ po dọ ewọ na sè bosọ na gblọndo dali.—15/5, weda 14-16.

• To Osẹ́n Mose tọn glọ, naegbọn nuyiwa jọwamọ vijinu tọn delẹ nọ hẹn mẹde zun “mawé”?

Osẹ́n lẹ gando mawé he nọ dekọtọn sọn kùnkùn vijisìn tọn, lajijẹ, po vijiji po go lẹ ze aliho gbẹninọ tọn dagbe daga, bo nọgodona nujinọtedo walọ dagbe tọn he yiaga lẹ, bosọ zinnudo wiwe-yinyin ohùn tọn po nuhudo lọ na ovẹsè ylando tọn po ji.—1/6, weda 31.

• Eyin mẹde jlo na tindo ayajẹ, naegbọn e do yin nujọnu dọ ewọ ni gbadopọnna owe Psalm lẹ tọn?

Mẹhe kàn owe Psalm tọn lẹ kudeji dọ haṣinṣan dagbe de tintindo hẹ Jiwheyẹwhe nọ hẹn ayajẹ wá. (Psalm 112:1) Yé zinnudeji dọ haṣinṣan gbẹtọvi tọn, nutindo agbasa tọn, kavi nuwadotana mẹdetiti tọn depope ma sọgan hẹn ayajẹ wá sọ dehe nọ wá sọn yinyin apadewhe ‘mẹhe Jiwheyẹwhe yetọn yin Jehovah’ lẹ tọn mẹ gba. (Psalm 144:15)—15/6, weda 12.

• Haṣinṣan vonọtaun tẹwẹ akọta Islaeli hohowhenu tọn tindo hẹ Jehovah?

To 1513 J.W.M., Jehovah hẹn Islaelivi lẹ biọ haṣinṣan yọyọ kavi alẹnu de mẹ hẹ ede. (Eksọdusi 19:5, 6; 24:7) Enẹgodo, Islaelivi lẹ nọ yin jiji taidi hagbẹ akọta dide Jiwheyẹwhe tọn lẹ tọn. Etomọṣo, dopodopo yetọn dona basi nudide na ede nado sẹ̀n Jiwheyẹwhe.—1/7, weda 21-2.

• Naegbọn mí dona wà onú popo “matin hùnhlún”? (Filippinu lẹ 2:14)

Apajlẹ Owe-wiwe tọn susu dohia dọ nuhlundọ hẹn awugble wá omẹ Jiwheyẹwhe tọn lẹ ṣẹnṣẹn. Mí dona nọ lẹnnupọn do huhlọn nuhẹngble tọn he e sọgan tindo to egbehe ji. Gbẹtọvi mapenọ lẹ tindo ayilinlẹn lọ nado nọ wule, podọ mí dona tin to aṣeji nado doayi ohia ayilinlẹn ehe tọn depope go bosọ dapana ẹn.—15/7, weda 16-17.

• Nawẹ mí wagbọn do yọnẹn dọ nuyọnẹn he yin nùdego to Howhinwhẹn lẹ 8:22-31 mẹ ma yin nuyọnẹn to paa mẹ?

Nuyọnẹn enẹ yin dehe yè “tindo” kavi yin didá, taidi bẹjẹeji aliho Jehovah tọn. Jiwheyẹwhe yin madopodo podọ nuyọnẹn etọn to ote tẹgbẹ; nuyọnẹn etọn ma yin didá gba. Nuyọnẹn he yin nùdego to Howhinwhẹn lẹ 8:22-31 mẹ tin to adà Jiwheyẹwhe tọn mẹ taidi “azọ́nwatọgán de,” yèdọ hogbe de he yin yiyizan na nudida gbigbọnọ he lẹzun Jesu, mẹhe wazọ́n to pọmẹ pẹkipẹki hẹ Jiwheyẹwhe to onú lẹ didá mẹ. (Kọlọsinu lẹ 1:17; Osọhia 3:14)—1/8, weda 31.