Sinsẹ̀n-Bibasi He Yọ́n Na We

“E YỌ́N na mi nado sẹpọ Jiwheyẹwhe,” wẹ psalm-kàntọ Asafi dọ. E ko lẹnnupọn na ojlẹ de nado hodo apajlẹ mẹhe gbẹkọ Jiwheyẹwhe go lẹ tọn nado sọgan doafọna gbẹzan awuvivo tọn. Ṣigba to enẹgodo, Asafi lẹnnupọndo ale he tin to dindọnsẹpọ Jiwheyẹwhe mẹ lẹ ji bo wá tadona kọ̀n dọ e yọ́n na emi. (Psalm 73:2, 3, 12, 28) Be sinsẹ̀n-bibasi nugbo yọ́n na hiẹ lọsu to egbehe ya? Nawẹ e sọgan hẹn ale wá na we gbọn?

Sinsẹ̀n-bibasi hlan Jiwheyẹwhe nugbo lọ na gọalọna we nado tindo nuhe họakuẹ tlala hú gbẹzan ṣejannabi tọn poun. Na aliho he mẹ “Jiwheyẹwhe owanyi . . . tọn” lọ dá mí te wutu, mẹhe nọ doafọna yanwle yetọn titi kẹdẹ lẹ ma sọgan tindo ayajẹ gbede. (2 Kọlintinu lẹ 13:11) Jesu plọnmẹ nugbo dodonu tọn de gando gbẹtọvi lẹ go to whenuena e dọmọ: “Nado namẹ do dona [kavi ayajẹ] hú nado mọyi.” (Owalọ lẹ 20:35) Nuhe zọ́n niyẹn bọ mí nọ jaya nado wà nulẹ na họntọn mítọn lẹ po hẹnnumẹ mítọn lẹ po. Ṣigba nuyiwa hlan Jiwheyẹwhe wẹ nọ hẹn ayajẹ daho hugan lọ wá. Ewọ jẹna owanyi mítọn hugan mẹdevo depope. Livi susu gbẹtọ lẹ tọn sọn ninọmẹ voovo lẹ mẹ ko mọ dọ sinsẹ̀n-bibasi hlan Jiwheyẹwhe gbọn wiwà nuhe e biọ to mí si lẹ dali nọ hẹn pekọ daho wá.—1 Johanu 5:3.

Lẹndai Tintindo to Gbẹ̀mẹ

Sinsẹ̀n-bibasi nugbo sọ yọ́n na we na e na hẹn we tindo lẹndai to gbẹ̀mẹ. Be hiẹ ko doayi e go dọ ayajẹ nọ saba yin kinkọndopọ hẹ numọtolanmẹ lọ dọ hiẹ to nuhe jẹ de wadotana ya? Suhugan gbẹtọ lẹ tọn wẹ tindo yanwle de to gbẹ̀mẹ, vlavo gando whẹndo yetọn, họntọn yetọn lẹ, ajọ́, kavi ayidedai go. Na ninọmẹ jide-matindo gbẹ̀mẹ tọn lẹ wutu, onú ehelẹ ma nọ saba hẹn ayajẹ wá na yé. (Yẹwhehodọtọ 9:11) Ṣigba, sinsẹ̀n-bibasi nugbo na gọalọna we nado tindo lẹndai he yiaga hugan de, yèdọ dehe nọ to pekọ hẹnwa zọnmii etlẹ yin to whenuena adà gbẹzan tọn devo lẹ to mẹhẹnjẹflumẹ.

Sinsẹ̀n-bibasi nugbo zẹẹmẹdo nado yọ́n Jehovah bo sẹ̀n ẹn po nugbonọ-yinyin po. Mẹhe to mahẹ tindo to e mẹ lẹ nọ dọnsẹpọ Jiwheyẹwhe pẹkipẹki. (Yẹwhehodọtọ 12:13; Johanu 4:23; Jakobu 4:8) E sọgan taidi nuhe vẹawu to nukun towe mẹ nado yọ́n Jiwheyẹwhe sọmọ bọ e na lẹzun họntọn towe. Ṣigba eyin hiẹ nọ gbadopọnna kandai nuyiwa etọn lẹ tọn hẹ gbẹtọ lẹ bo nọ lẹnnupọndo nuhe e dá lẹ ji, hiẹ sọgan yọ́n omẹ nankọtọn he e yin nugbonugbo. (Lomunu lẹ 1:20) Humọ, gbọn Ohó Jiwheyẹwhe tọn hihia dali, hiẹ sọgan mọnukunnujẹ nuhewutu mí do tin tofi mẹ, nuhewutu Jiwheyẹwhe jotẹnna yajiji, lehe e na hẹn yajiji wá opodo do, podọ vlavo dehe tlẹ sọ yin ojlofọndotenamẹnu hugan, lehe hiẹ sọgan yí adà tangan de wà to lẹndai Jiwheyẹwhe tọn mẹ do. (Isaia 43:10; 1 Kọlintinu lẹ 3:9) Nukunnumọjẹnumẹ mọnkọtọn sọgan hẹn we tindo mẹwhinwhàn yọyọ de to gbẹ̀mẹ!

Hinhẹn Gbẹtọ-Yinyin Towe Pọnte

Sinsẹ̀n-bibasi nugbo yọ́n na we na e na gọalọna we nado pọnte dogọ. Dile hiẹ to mahẹ tindo to e mẹ, a na wleawuna gbẹtọ-yinyin he nọ dekọtọn do haṣinṣan ayajẹ tọn hẹ mẹdevo lẹ mẹ. Hiẹ na plọnnu sọn Jiwheyẹwhe po Ovi etọn po dè nado lẹzun nugbodọtọ, mẹhe jọmẹ to hodidọ mẹ podọ mẹhe go yè sọgan ganjẹ. (Efesunu lẹ 4:20–5:5) Eyin hiẹ yọ́n Jiwheyẹwhe sọmọ bọ a wá yiwanna ẹn, hiẹ na yin whinwhàn nado hodo apajlẹ etọn. Biblu dọmọ: “Mì yin mẹhodotọ Jiwheyẹwhe tọn di ovi yiwanna lẹ; bo nọ zinzọnlin to owanyi mẹ.”—Efesunu lẹ 5:1, 2.

Be e ma yin homẹhunnu wẹ e na yin nado tin to mẹhe nọ hodo apajlẹ owanyi Jiwheyẹwhe tọn lẹ ṣẹnṣẹn ya? Ayajẹnu wẹ e yin dọ sinsẹ̀n-bibasi Jiwheyẹwhe nugbo lọ tọn ma yin nude he hiẹ na wà hiẹ ṣokẹdẹ gba. E nọ hẹn we wá kọndopọmẹ hẹ mẹdevo he yiwanna nuhe jlọ bosọ sọgbe lẹ. Nugbo wẹ dọ hiẹ sọgan hanú gando linlẹn lọ go nado tin to sinsẹ̀n he yin titobasina to pọmẹ de mẹ. Etomọṣo, dile mí ko mọ do to hosọ he jẹnukọn mẹ, nuhahun lọ to suhugan sinsẹ̀n lẹ tọn mẹ ma yindọ yé yin titobasina gba ṣigba dọ yé ma yin titobasina to aliho he sọgbe mẹ nado jẹ yanwle he sọgbe lẹ kọ̀n. Susu sinsẹ̀n he yin titobasina lẹ tọn wẹ nọ hẹn lẹndai he jẹagọdo nujinọtedo Klistiani tọn lẹ di. Omẹ Jiwheyẹwhe tọn lẹ yin titobasina gbọn Jehovah lọsu dali nado hẹn lẹndai gigonọ de di. Biblu dọmọ: “Jiwheyẹwhe ma yin nudaitọ numanukannu tọn de gba, adavo jijọho tọn.” (1 Kọlintinu lẹ 14:33) Taidi gbẹtọ livi susu devo lẹ, hiẹ sọgan mọ dọ gbẹdido hẹ pipli Klistiani he yin titobasina ganji lẹ tọn na yinuwado pọndohlan towe ji to aliho dagbe mẹ.

Todido de Na Sọgodo

Owe Wiwe dohia dọ Jiwheyẹwhe to titobasina sinsẹ̀n-basitọ nugbo lẹ nado sọgan lùn vivọnu aihọn ylankan ehe tọn tọ́n bo dugu aigba yọyọ de tọn fie “dodo nọ nọ̀.” (2 Pita 3:13; Osọhia 7:9-17) Gbọnmọ dali sinsẹ̀n-bibasi he yọ́n na we nọ wleawuna todido he yin dandannu nado tindo ayajẹ. Mẹdelẹ nọ mọ dọ eyin gandudu lẹ hẹnai bọ tito ajọwiwa tọn lẹ to yìyì linsinlinsin kavi dọ nukundido agbasalilo dagbe po gbọjẹ gaa pekọ hẹnwanamẹ tọn po tin, be sọgodo yetọn na yọ́n. Ṣigba depope to onú ehelẹ mẹ ma nọ wleawuna dodonu dolido de nado donukun sọgodo ayajẹnọ de gba. To alọ devo mẹ, apọsteli Paulu wlan dọmọ: “Míwlẹ dotudo Jiwheyẹwhe ogbẹnọ go.”—1 Timoti 4:10.

Eyin hiẹ basi dodinnanu sọwhiwhe tọn, hiẹ sọgan mọ sinsẹ̀n-basitọ nugbo lẹ. To aihọn gbakija tọn ehe mẹ owanyi po pọninọ Kunnudetọ Jehovah tọn lẹ tọn po nọ hẹn yé gbọnvo mlẹnmlẹn. Diblayin dọ akọta po ninọmẹ lẹpo po mẹ wẹ yé wá sọn; ṣogan owanyi na ode awetọ po owanyi na Jehovah po kọ̀n yé dopọ. (Johanu 13:35) Yé to oylọ basina we nado wá yí nukun towe titi do mọ nuhe yé tindo numimọ etọn. Asafi wlan dọmọ: “E yọ́n na mi nado sẹpọ Jiwheyẹwhe.”—Psalm 73:28.

[Yẹdide to weda 7]

Hiẹ sọgan lẹzun họntọn Jiwheyẹwhe tọn