Lehe Hiẹ Sọgan Yọ́n Sinsẹ̀n-Bibasi Nugbo Gbọn

SUHUGAN sinsẹ̀n lẹ tọn wẹ nọ sọalọakọ́n dọ nuplọnmẹ yetọn lẹ wá sọn Jiwheyẹwhe dè. Enẹwutu, mí na wadagbe nado setonuna nuhe apọsteli Jesu tọn Johanu wlan dọmọ: “Mẹyiwanna emi, mì yí [ohó gbọdo] popo sè blo, ṣigba mì nọ tẹ́n [ohó gbọdo] lẹ pọ́n eyin yé jọ sọn Jiwheyẹwhe dè: na yẹwhegán lalonọ susu ko tọ́nyi aihọn mẹ.” (1 Johanu 4:1) Nawẹ mí sọgan tẹ́n nude pọ́n nado yọnẹn eyin Jiwheyẹwhe dè wẹ e wá sọn gbọn?

Nuhe wá sọn Jiwheyẹwhe dè lẹpo wẹ nọ do jẹhẹnu etọn lẹ hia, titengbe dehe yiaga hugan lọ he yin owanyi. Di apajlẹ, nugopipe wánsise tọn mítọn, he nọ hẹn mí penugo nado duvivi owan gblingblin ogbé, vounvoun, kavi blẹdi he ṣẹṣẹ yin didà lẹ tọn yin dohia owanyi Jiwheyẹwhe tọn. Nugopipe mítọn nado mọ họyiyi owhè tọn, awẹwẹ de kavi nukiko yẹsẹ ovi pẹvi de tọn nọ do owanyi he Jiwheyẹwhe tindo na mí hia. Nudopolọ wẹ gando nugopipe mítọn nado sè húnhiho dagbedagbe de, hànjiji ohẹ̀ de tọn, kavi ogbè mẹyiwanna de tọn go. Agbasa gbẹtọvi tọn mítọn lọsu mahopọnna mapenọ-yinyin etọn, nọ do owanyi Jiwheyẹwhe tọn hia. Nuhe zọ́n niyẹn bọ mí nọ saba mọ nugbo-yinyin hogbe Jesu tọn lẹ tọn dọmọ: “Nado namẹ do dona [kavi ayajẹ] hú nado mọyi.” (Owalọ lẹ 20:35) Mí nọ duvivi owanyi didohia tọn na mí yin didá ‘to apajlẹ Jiwheyẹwhe tọn mẹ’ wutu. (Gẹnẹsisi 1:27) Dile etlẹ yindọ Jehovah tindo jẹhẹnu susu devo lẹ, owanyi wẹ to taji to popolẹpo mẹ.

Kandai he wá sọn Jiwheyẹwhe dè lẹ dona do owanyi etọn hia. Kandai hoho susu wẹ sinsẹ̀n aihọn tọn lẹ tindo. Obá tẹ mẹ wẹ kandai mọnkọtọn lẹ nọ do owanyi Jiwheyẹwhe tọn hia jẹ?

Nugbo lọ wẹ yindọ, suhugan kandai hoho sinsẹ̀n tọn lẹ ma basi zẹẹmẹ sọmọ do lehe Jiwheyẹwhe yiwanna mí kavi lehe mí sọgan yiwanna Jiwheyẹwhe do ji gba. Enẹwutu, livi susu gbẹtọ lẹ tọn ma nọ mọ gblọndo depope yí eyin yé kanse dọ, “Naegbọn mí nọ mọ ohia owanyi Jiwheyẹwhe tọn to nudida lẹ mẹ to whenuena yajiji po ylanwiwa po gbẹ́ to nuhẹngble?” To alọ devo mẹ, Biblu kẹdẹ wẹ yin kandai hoho sinsẹ̀n tọn dopo akàn he basi zẹẹmẹ owanyi Jiwheyẹwhe tọn to gigọ́ mẹ. E sọ nọ plọn mí lehe mí sọgan do owanyi hia gbọn.

Owe He Dọhodo Owanyi Ji Lọ

Ohó Jiwheyẹwhe tọn Biblu do Jehovah hia taidi “Jiwheyẹwhe owanyi . . . tọn.” (2 Kọlintinu lẹ 13:11) Biblu basi zẹẹmẹ lehe owanyi whàn Jehovah do nado na ogbẹ̀ he vò sọn azọ̀n po okú po si hlan gbẹtọvi tintan lẹ. Ṣigba atẹṣiṣi sọta aṣẹpipa Jiwheyẹwhe tọn hẹn yajiji wá gbẹtọvi lẹ ji. (Deutelonomi 32:4, 5; Lomunu lẹ 5:12) Jehovah yinuwa nado hẹn nuhe yin hinhẹnbu lọ gọwá. Ohó Jiwheyẹwhe tọn dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” (Johanu 3:16) Owe-wiwe tlẹ sọ tá hinhọ́n do owanyi Jiwheyẹwhe tọn ji dogọ to whenuena e basi zẹẹmẹ lehe Jiwheyẹwhe wleawuna gandudu pipé de do to anademẹ Jesu tọn glọ nado hẹn jijọho gọwá na gbẹtọvi tonusetọ lẹ.—Daniẹli 7:13, 14; 2 Pita 3:13.

Biblu basi bladopọ azọngban gbẹtọvi tọn to hogbe helẹ mẹ dọmọ; “Hiẹ na yí ayiha towe lẹpo, podọ alindọn towe lẹpo po nuyọnẹn towe lẹpo po do yiwanna [Jehovah] Jiwheyẹwhe towe. Ehe wẹ osẹ́n daho tintan lọ. Podọ awetọ sọ di i, Hiẹ, na yiwanna kọmẹnu towe di dewe. Osẹ́n awe helẹ go wẹ osẹ́n lọ pete, plá do.” (Matiu 22:37-40) Biblu sọalọakọ́n nado yin gbingbọ́n sọn Jiwheyẹwhe dè. To whenuena e yindọ e do jẹhẹnu Jehovah tọn lẹ hia hezeheze, mí sọgan kudeji dọ “Jiwheyẹwhe owanyi . . . tọn” lọ dè wẹ e wá sọn nugbo.—2 Timoti 3:16.

Gbọn nujinọtedo dopo ehe yiyizan dali, mí sọgan yọ́n kandai hoho he wá sọn Jiwheyẹwhe dè nugbonugbo lẹ. Owanyi sọ nọ dohiagona sinsẹ̀n-basitọ nugbo lẹ, na yé nọ hodo apajlẹ Jiwheyẹwhe tọn to owanyi didohia mẹ.

Lehe Mẹhe Yiwanna Jiwheyẹwhe lẹ Sọgan Yin Yinyọnẹn Gbọn

Mẹhe yiwanna Jiwheyẹwhe nugbonugbo lẹ gbọnvo, titengbe todin he mí to gbẹnọ to ojlẹ he Biblu ylọ dọ ‘azán godo tọn lẹ’ mẹ. Gbẹtọ lẹ fọ́n bo to lilẹzun “owanyi na yede tọ́, nukunkẹnnọ, . . . owanyi na aṣọ́ [kavi gbẹdudu] hú Jiwheyẹwhe tọ́.”—2 Timoti 3:1-4.

Nawẹ hiẹ sọgan yọ́n mẹhe yiwanna Jiwheyẹwhe lẹ gbọn? Biblu dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn.” (1 Johanu 5:3) Owanyi na Jiwheyẹwhe nọ whàn gbẹtọ lẹ nado na sisi nujinọtedo walọ dagbe tọn he to Biblu mẹ lẹ. Di dohia, Ohó Jiwheyẹwhe tọn bẹ osẹ́n lẹ hẹn gando zanhẹmẹ po alọwle po go. Alọwle mẹ kẹdẹ wẹ kọndopọ zanhẹmẹ tọn yin dotẹnmẹna te, podọ alọwle dona yin kanṣiṣa tẹgbẹ tọn. (Matiu 19:9; Heblu lẹ 13:4) To whenuena nawe de he yì wehọmẹ sinsẹ̀n-nuplọnmẹ tọn to Espagne yì opli Kunnudetọ Jehovah tọn lẹ tọn de he mẹ yé yí jejejininọ do to osẹ́n walọ dagbe Biblu tọn lẹ plọn te, e basi zẹẹmẹ dọmọ: “N’lẹkọyi whé po numọtolanmẹ mẹjlọdote tọn po, e ma yin na hodidọ sinai do Owe-wiwe ji he gọ́ na oplọn lẹ kẹdẹ wutu gba, ṣigba na pọninọ he tin to omẹ ehelẹ ṣẹnṣẹn gọna nujinọtedo walọ dagbe yiaga tọn yetọn po jijọ dagbe yetọn po wutu.”

Gbọnvona owanyi he yé tindo na Jiwheyẹwhe, Klistiani nugbo lẹ nọ yin yinyọnẹn po awubibọ po gbọn aliho he mẹ yé nọ do owanyi hia kọmẹnu yetọn lẹ te dali. Azọ́n titengbe hugan yetọn wẹ nado dọhona mẹdevo lẹ gando todido dopo akàn gbẹtọvi lẹ tọn go, yèdọ Ahọluduta Jiwheyẹwhe tọn. (Matiu 24:14) Nudepope ma sọgan hẹn ale dẹn-to-aimẹ wá na kọmẹnu yetọn lẹ hugan alọgigọna yé nado tindo oyọnẹn Jiwheyẹwhe tọn. (Johanu 17:3) Klistiani nugbo lẹ sọ nọ do owanyi yetọn hia to aliho devo lẹ mẹ. Yé nọ gọalọna mẹhe to yaji lẹ to aliho yọn-na-yizan mẹ. Di apajlẹ, to whenuena aigba sisọsisọ de hẹn nugbajẹmẹji wá to Italie, linlinwe lẹdo lọ tọn de na linlin dọ Kunnudetọ Jehovah tọn lẹ “yinuwa to aliho tangan de mẹ, gọalọna mẹhe to yaji lẹ, bo ma tlẹ lẹnnupọndo sinsẹ̀n he mẹ yé te ji.”

Gbọnvona owanyi na Jiwheyẹwhe po kọmẹnu po, Klistiani nugbo lẹ nọ yiwanna ode awetọ yetọn. Jesu dọmọ: “Osẹ́n yọyọ de wẹ yẹn na hlan mì, dọ mì ni yiwanna mìnọzo: dile yẹn yiwanna mì, na mìwlẹ ga ni yiwanna mìnọzo. Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.”—Johanu 13:34, 35.

Be owanyi he Klistiani nugbo lẹ tindo na yenọzo sọgan yin ayidego taidi nuhe gbọnvo ya? Whégbè-zọ́nwatọ de he nọ yin Ema lẹnmọ. E nọ wazọ́n to La Paz, Bolivie, fie vogbingbọn akọ̀ tọn lẹ nọ saba klan adọkunnọ lẹ dovo na wamọnọ lẹ te. E dọmọ: “Whla tintan he n’yì opli Kunnudetọ Jehovah tọn lẹ tọn de, n’mọ bọ dawe mẹjọmẹ he sọnú ganji de sinai bo to hodọ hẹ yọnnu Indianu de. N’ma ko mọ onú mọnkọtọn pọ́n gbede. To ojlẹ enẹ mẹ pẹẹ wẹ n’mọ dọ omẹ ehelẹ dona yin omẹ Jiwheyẹwhe tọn lẹ.” Mọdopolọ, awhli Brésil-nu de he nọ yin Miriam dọmọ: “Yẹn ma yọ́n lehe n’na yin ayajẹnọ do gba, etlẹ yin to whẹndo ṣie mẹ. Whla tintan he n’mọ nuyiwa owanyi tọn, Kunnudetọ Jehovah tọn lẹ ṣẹnṣẹn wẹ.” To États-Unis, mẹhe nọ penukundo linlin lẹ go to azọ́nwatẹn televiziọn tọn de dọmọ: “Eyin mẹsusu nọ yinuwa dile sinsẹ̀n mìtọn nọ wà do wẹ, otò ehe ma na to ninọmẹ he mẹ e te todin. Yẹn yin linlin-kàntọ de he yọnẹn dọ titobasinanu mìtọn sinai do owanyi po yise dolido to Mẹdatọ lọ mẹ po ji.”

Dín Sinsẹ̀n-Bibasi Nugbo lọ Mọ

Owanyi yin adà tangan de he nọ hẹn sinsẹ̀n-bibasi nugbo gbọnvo. Jesu yí sinsẹ̀n-bibasi nugbo lọ mimọ jlẹdo aliho he sọgbe lọ mimọ po nudide bibasi nado zinzọnlin to e ji po go. Aliho enẹ kẹdẹ wẹ nọ planmẹ yì ogbẹ̀ madopodo mẹ. Jesu dọmọ: “Mì gbọ̀n họntonu bibó mẹ biọ whégbè, na gbigblo wẹ họntonu lọ, gblagada sọ wẹ ali lọ, he hẹnmẹ yì dindọn mẹ, susu sọ wẹ yé he to zọnlinzin gbọ̀n finẹ lẹ. Na bibó wẹ họntonu lọ, jijlọ sọ wẹ ali lọ, he hẹnmẹ yì ogbẹ̀ mẹ, pẹvide wẹ yé he dín in mọ lẹ.” (Matiu 7:13, 14) Pipli Klistiani nugbo lẹ tọn dopo gee wẹ to zọnlinzin to kọndopọ mẹ hẹ Jiwheyẹwhe to aliho sinsẹ̀n-bibasi nugbo tọn lọ ji. Enẹwutu, nudide he hiẹ basi gando sinsẹ̀n go yin nujọnu taun. Eyin hiẹ mọ aliho ehe bo de nado zinzọnlin gbọ̀n e ji, be hiẹ ko mọ aliho dagbe hugan gbẹninọ tọn na aliho owanyi tọn wẹ.—Efesunu lẹ 4:1-4.

Lẹnnupọndo ayajẹ he hiẹ sọgan tindo dile a to zọnlinzin to aliho sinsẹ̀n-bibasi nugbo tọn ji! E taidi zọnlinzinzin hẹ Jiwheyẹwhe nkọ. Hiẹ sọgan plọn nuyọnẹn po owanyi po sọn Jiwheyẹwhe dè nado sọgan duvivi haṣinṣan dagbe tọn hẹ mẹdevo lẹ. A sọgan plọnnu sọn ewọ dè gando lẹndai ogbẹ̀ tọn go, podọ hiẹ sọgan mọnukunnujẹ opagbe Jiwheyẹwhe tọn lẹ mẹ bo tindo todido de na sọgodo. E ma na vẹna we pọ́n gbede dọ a dín sinsẹ̀n-bibasi nugbo lọ mọ.

[Yẹdide to weda 5]

To kandai hoho sinsẹ̀n tọn lẹ mẹ, Biblu kẹdẹ wẹ do owanyi Jiwheyẹwhe tọn hia

[Yẹdide to weda 7]

Klistiani nugbo lẹ bọawu yinyọnẹn na yé nọ do owanyi hia