Etẹwẹ ‘Azán Godo Tọn lẹ’ Yin?

BE NUHE sọgodo bẹhẹn na we po mẹyiwanna towe lẹ po nọ duahunmẹna we ya? Mẹsusu nọ na ayidonugo sọwhiwhe tọn hlan linlinnamẹnu lẹ nado yọ́n lehe nujijọ aihọn tọn lẹ sọgan yinuwado gbẹzan yetọn lẹ ji do. Ṣigba, ayidonugo nina Ohó gbọdo Jiwheyẹwhe tọn nọ na mí nukunnumọjẹnumẹ nugbo. Nuhe zọ́n wẹ yindọ Biblu ko dọ dọdai ninọmẹ nuhe to jijọ todin lẹ tọn sọn ojlẹ dindẹn die wayi po nuhe na jọ to sọgodo lẹ tọn po.

Di apajlẹ, to whenuena Jesu Klisti tin to aigba ji, e dọho susu gando Ahọluduta Jiwheyẹwhe tọn go. (Luku 4:43) Mẹhe sè ohó etọn lẹ jlo na yọ́n whenue Ahọluduta jiawu enẹ na wá. Na nugbo tọn, azán atọ̀n whẹpo Jesu do yin hùhù do okà ji, devi etọn lẹ kanse e dọmọ: “Etẹwẹ na yin ohia wiwá [tintin tofi to huhlọn Ahọluduta tọn mẹ] towe tọn, po opodo aihọn tọn po tọn?” (Matiu 24:3) Jesu dọna yé dọ Jehovah Jiwheyẹwhe kẹdẹ wẹ yọ́n ojlẹ tangan he mẹ Ahọluduta lọ na jẹ anadena aigba ji to gigọ́ mẹ. (Matiu 24:36; Malku 13:32) Nalete, Jesu po mẹdevo lẹ po dọ dọdai diọdo delẹ tọn he na wá aimẹ to aigba ji bo na do kunnudenu hia dọ Klisti to gandu to huhlọn Ahọluduta tọn mẹ.

Whẹpo mí nado gbadopọnna kunnudenu yinukundomọ he dohia dọ mí to gbẹnọ to ‘azán godo tọn’ aihọn ylankan ehe tọn mẹ lẹ, mì gbọ mí ni dọhodo nujijọ titengbe de ji he jọ to olọn mẹ. (2 Timoti 3:1) Jesu Klisti lẹzun Ahọlu to olọn mẹ to 1914.a (Daniẹli 7:13, 14) Tlolo he e mọ huhlọn Ahọluduta tọn yí godo, Jesu yinuwa. Biblu dọna mí dọmọ: “Awhàn de sọ tin to olọn mẹ: Mikaẹli po angẹli etọn lẹ po to avùnho hẹ dlagọni lọ; dlagọni lọ sọ to avùnho po angẹli etọn lẹ po.” (Osọhia 12:7) “Mikaẹli, ogán angẹli lẹ tọn lọ” wẹ Jesu Klisti to otẹn olọnmẹ tọn etọn mẹ.b (Juda 9; 1 Tẹsalonikanu lẹ 4:16) Dlagọni lọ wẹ Satani Lẹgba. Etẹwẹ yin kọdetọn awhàn lọ tọn na Satani po angẹli ylankan etọn, he nọ yin yiylọdọ aovi lẹ po? Yé jai to awhàn lọ nukọn bo yin ‘yinyan’ jẹgbonu sọn olọn mẹ dlan lẹdo aigba tọn ji. (Osọhia 12:9) Na ehe tọn wutu, “olọn lẹ . . . po [mẹhe] nọ nọ̀ yé mẹ lẹ po,” yèdọ, ovi gbigbọnọ nugbonọ Jiwheyẹwhe tọn lẹ, jaya. Ṣigba, gbẹtọvi lẹ ma tindo numimọ ayajẹ mọnkọtọn tọn gba. “Dindọn hlan aihọnmẹnu lẹ,” wẹ dọdai Biblu tọn dọ, “na Lẹgba lọ ko jẹte wá mì de, po homẹgble daho po wutu, na e yọnẹn dọ whenu gli de wẹ e tindo.”—Osọhia 12:12.

Satani, to adi etọn mẹ, ko hẹn dindọn—yajiji po awufiẹsa po—wá mẹhe nọ nọ̀ aigba ji lẹ ji. Nalete, dindọn enẹ ma na dẹn-to-aimẹ, e na yin na “whenu gli de.” Biblu ylọ ojlẹ ehe dọ ‘azán godo tọn lẹ.’ Homẹ mítọn sọgan hùn dọ to madẹnmẹ nuyiwadomẹji Lẹgba tọn do aigba ji na yin didesẹ mlẹnmlẹn. Ṣigba kunnudenu tẹwẹ dohia dọ mí to gbẹnọ to azán godo tọn lẹ mẹ?

[Nudọnamẹ Odò Tọn]