Homẹhunhun Etọn Tin to Osẹ́n Jehovah Tọn Mẹ — WESẸDOTẸN INTẸNẸT JI TỌN Watchtower Tọn

Homẹhunhun Etọn Tin to Osẹ́n Jehovah Tọn Mẹ

ALBERT D. SCHROEDER, dopo to Hagbẹ Anademẹtọ Kunnudetọ Jehovah tọn lẹ tọn mẹ, dotana gbẹzan aigba ji tọn etọn to mercredi 8 mars 2006. E tindo owhe 94 bo ko yí hugan owhe 73 zan to lizọnyizọn whenu-gigọ́ tọn mẹ.

Mẹmẹsunnu Schroeder yin jiji to Saginaw, Michigan, États-Unis, to 1911.a To ovu whenu etọn, e plọnnu susu gando Biblu go sọn onọ̀ daho etọn dè, mẹhe sọ dó ojlo lọ nado nọ hia Ohó Jehovah tọn do ahun etọn mẹ. E plọn Latin, Allemagne-gbè, po lẹnunnuyọnẹn miyọ́n lẹtliki tọn po to Wehọmẹ alavọ Michigan tọn. Nalete, dile pinpẹn-nutọn-yinyọnẹn etọn na Owe-wiwe jideji, e jo wehọmẹ do bo bẹ azọ́n whenu-gigọ́ tọn jẹeji nado lá wẹndagbe Ahọluduta lọ tọn. To 1932, e lẹzun hagbẹ whẹndo Bẹtẹli tọn to Brooklyn, New York.

To 1937, to owhe 26 mẹvi yinyin mẹ, Mẹmẹsunnu Schroeder yin dide nado deanana azọ́n Kunnudetọ Jehovah tọn lẹ tọn to Grande-Bretagne. Zohunhun he e tindo na azọ́n yẹwhehodidọ tọn na tuli mẹsusu nado bẹ sinsẹ̀nzọn whenu-gigọ́ tọn jẹeji to finẹ. Dopo to jọja he e wazọ́n hẹ lẹ mẹ to Bẹtẹli Londres tọn wẹ John E. Barr. To godo mẹ, yé wadevizọn dopọ na owhe susu to pipli Hagbẹ Anademẹtọ lọ tọn mẹ.

Azọ́n he Mẹmẹsunnu Schroeder wà do ota Kunnudetọ Jehovah tọn lẹ tọn mẹ to awhàn whenu ma gọ̀n ma yin ayidego gba. To août 1942 e yin yinyan sọn Grande-Bretagne. To gbejizọnlin owùnọ awhàn whenu tọn dasá Ohù Atlantique tọn bibasi godo, e lẹkọwa Brooklyn to septembre.

To ojlẹ enẹ mẹ, devizọnwatọ Jehovah tọn lẹ ko tin to nukundido mẹ dọ azọ́n daho de dona yin wiwà to Wẹkẹ Whàn II godo. E paṣa Mẹmẹsunnu Schroeder bosọ hẹn homẹ etọn hùn nado mọ azọ́ndenamẹ etọn he bọdego yí—nado gọalọ to awuwiwlena hosọ nupinplọn Wehọmẹ Biblu Pinplọn Watchtower Giliadi Tọn lẹ tọn mẹ. Na owhe delẹ, e wadevizọn to wehọ lọ mẹ taidi mẹplọntọ, bo gọalọ nado plọnnu mẹdehlan lẹ. Wehọmẹvi he e plọn to Giliadi podọ to Wehọmẹ Lizọnyizọn Ahọluduta tọn mẹ lẹ nọ flin nuplọnmẹ etọn lẹ po ayajẹ po. E nọ tindo homẹhunhun to owanyi na osẹ́n Jiwheyẹwhe tọn lẹ didó do ahun mẹ na wehọmẹvi etọn lẹ bo nọ zinnudo lehe e yin nujọnu nado yọ́n Jehovah do ji.

To 1956, Mẹmẹsunnu Schroeder wlealọ hẹ Charlotte Bowin, podọ to 1958 visunnu yetọn, Judah Ben, yin jiji. Mẹmẹsunnu Schroeder yin asu po otọ́ Klistiani dagbe de po. To 1974, e lẹzun dopo to Hagbẹ Anademẹtọ lọ mẹ, podọ pinpẹn-nutọn-yinyọnẹn yin didohia na wuntuntun etọn. E yin homẹdagbenọ bosọ yin whiwhẹnọ, podọ hú popolẹpo, e nọ jlo nado ze yinkọ daho Jiwheyẹwhe tọn daga. Mí deji dọ Mẹmẹsunnu Schroeder ko mọ ahọsumẹ olọnmẹ tọn etọn yí taidi Klistiani yiamisisadode he tindo ‘homẹhunhun to osẹ́n Jehovah tọn mẹ’ de.—Psalm 1:2.

[Nudọnamẹ Odò Tọn]

a Otàn gbẹzan Mẹmẹsunnu Schroeder tọn yin zinzinjẹgbonu to Atọ̀họ̀-Nuhihọ́ Lọ Tọn [Flansegbe] 1^er mars 1988 tọn mẹ.