Teninọ to Bẹjẹeji Nuwiwa Daho Tọn — WESẸDOTẸN INTẸNẸT JI TỌN Watchtower Tọn

Teninọ to Bẹjẹeji Nuwiwa Daho Tọn

“GBIGBỌ agbàwhinwhlẹn tọn depope matin gba. Mẹlẹpo wẹ jlo dọ mẹdevo lẹ lọsu ni tindo kọdetọn dagbe,” wẹ Richard po Lusia po dọ, to zẹẹmẹ bibasi do wehọmẹvi hatọ yetọn klasi 105tọ tọn lẹ heyin Wehọmẹ Biblu Pinplọn Watchtower Giliadi tọn ji. “Mímẹpo wẹ gbọnvo taun, ṣigba hlan míwlẹ, wehọmẹvi dopodopo họakuẹ.” Klasi-gbẹ́ de, Lowell, yigbe, bo yidogọ dọmọ: “Vogbingbọn mítọn lẹ ko dọ̀n mí sẹpọ ode awetọ.”

Klasi lọ, ehe yí gbedewema to 12 septembre 1998, gbọnvo tlala na nugbo tọn. Delẹ to wehọmẹvi lọ lẹ mẹ ko basi gbehosọnalitọ to lẹdo he mẹ nuhudo daho na wẹnlatọ Ahọluduta lọ tọn lẹ tin te; devo lẹ ko sẹ̀n po nugbonọ-yinyin po sẹpọ whégbè. Vude lẹ, taidi Mats po Rose-Marie po, dona wazọ́n sinsinyẹn po sọwhiwhe po na ojlẹ gaa de nado hẹn Glẹnsigbe yetọn pọnte whẹpo yé nido wá wehọmẹ lọ. Susu to wehọmẹvi lọ lẹ mẹ ko to nulẹnpọndo sinsẹ̀nzọn mẹdehlan tọn ji sọn ovú whenu gbọ́n. Asu po asi po dopo doalọwemẹ whla 12; lehe yé yin homẹhunnọ sọ nado yin oylọ basina wá klasi 105tọ lọ!

Osẹ 20 azọ́nplọnmẹ sisosiso tọn lọ juwayi po awuyiya po. Whẹpo wehọmẹvi lẹ nido yọnẹn, yé ko ze azọ́nwiwa nukinkan tọn godo tọn yetọn jo, ko sọ dọ linlin hodidọ godo tọn yetọn, podọ azán gbedewema-yíyí tọn ko wá.

Azinponọ tito-to-whinnu lọ tọn, Albert Schroeder, yèdọ dopo to Hagbẹ Anademẹtọ Kunnudetọ Jehovah tọn lẹ tọn mẹ, flin klasi lọ dọ yewlẹ ‘ṣite to bẹjẹeji nuwiwa daho tọn to lẹdo wepinplọnmẹ Biblu tọn mẹ,’ bo hodo omẹ hugan 7 000 devo lẹ he ko jẹnukọnna yé wayi to Giliadi. E dohia dọ to alúnlùn lọ whenu, wehọmẹvi lọ lẹ ko duvivi dotẹnmẹ hundote lẹblanulọkẹyi vonọtaun gbẹdido hẹ mẹdehlan whenu gaa tọn lẹ to whenuena ehelẹ basi dlapọn na tatọ-tẹnnọ aihọn tọn to kọndopọ mẹ hẹ plidopọ akọjọpli tọn lẹ.

Enẹgodo Mẹmẹsunnu Schroeder basi oylọ na Max Larson heyin hagbẹ Wedegbẹ́ Azọ́nwiwa Bẹtẹli tọn. E dọhodo hosọ lọ ji “Wepinplọn He Nọ Planmẹ Yì Ogbẹ̀ Madopodo Mẹ.” Mẹmẹsunnu Larson yihodọ sọn Howhinwhẹn lẹ 1:5 mẹ, ehe dọmọ: “Na nuyọnẹntọ nido sè, bosọ sudeji to nupinplọn mẹ; podọ na zinzintọ nido yì jẹ hónamẹ whinwhẹ́n lẹ kọ̀n.” E biọ azọ́nyinyọnẹn nado yin mẹdehlan kọdetọn dagbenọ de. Azọ́nyọnẹntọ lẹ nọ ṣite to ahọlu lẹ nukọn. (Howhinwhẹn lẹ 22:29) To yinyin nuplọn na osun atọ́n godo, wehọmẹvi lọ lẹ yin awuwlena ganji nado ze afọ Ahọlu he klo hugan lọ lẹ tọn, yèdọ Jehovah Jiwheyẹwhe po Klisti Jesu po tọn lẹ dai.

David Olson he nọ wazọ́n to Azọ́nwatẹn Sinsẹ̀nzọn tọn dọho bọdego do hosọ lọ ji “Gọalọ Nado Hẹn Homẹ Jehovah Tọn Hùn.” E kanse dọmọ: “Etẹwẹ gbẹtọvi mapenọ lẹ sọgan wà nado hẹn homẹ Jiwheyẹwhe tọn hùn?” Etẹwẹ yin gblọndo lọ? Yé sọgan sẹ̀n ewọ to nugbonọ-yinyin, ahundoponọ-yinyin mẹ, podọ po ayajẹ po. Jehovah jlo dọ omẹ etọn lẹ ni duvivi sinsẹ̀nzọn yetọn hlan ewọ. To whenuena mí wà ojlo Jiwheyẹwhe tọn po ayajẹ po, mí nọ hẹn homẹ etọn hùn. (Howhinwhẹn lẹ 27:11) Mẹmẹsunnu Olson hia wekanhlanmẹ de sọn mẹdehlan asu po asi po de he mọ gbedewema yí sọn Giliadi to klasi 104tọ mẹ dè. Be yé to vivi azọ́ndenamẹ yọyọ yetọn tọn dù ya? “Mí tindo nudi wẹnlatọ 140 lẹ,” wẹ yé wlan gando agun yetọn go, “po madozẹnzẹn pliwatọ sọha 250 jẹ 300 tọn lẹ po. Sinsẹ̀nzọn kunnudegbe tọn wẹ yin adà he yọ́n hugan lọ. Dopodopo mítọn tindo oplọn ẹnẹ, podọ delẹ tlẹ ko to opli lẹ wá to alọnu din.”

Lyman Swingle, heyin dopo to Hagbẹ Anademẹtọ lọ mẹ, dọho do hosọ lọ ji “Ojlẹ de Nado Nọte bo Lẹnnupọndo Dona Towe lẹ Ji.” Azọ́nplọnmẹ Giliadi tọn ko hẹn dona susu lẹ wá. E ko gọalọna wehọmẹvi lẹ nado hẹn oyọnẹn yetọn jideji, whẹn deji to pinpẹn-nutọn-yinyọnẹn na titobasinanu Jehovah tọn mẹ, bosọ wleawuna jẹhẹnu titengbe lẹ, taidi whiwhẹ. “Numimọ mẹdezewhè tọn wẹ e yin nado wá ofi bo yí ojlẹ zan nado dotoai na nuplọnmẹ,” wẹ Mẹmẹsunnu Swingle dọ, bo yidogọ dọmọ: “Mì na tọ́n yí sọn ofi po yinyin awuwlena ganji po nado ze Jehovah daga.”

“Lehe Ayajẹ Mìtọn Klo Sọ—Enẹwutu Naegbọn Mì Nado Hanú?” wẹ yin hosọ hodidọ de tọn gbọn Daniel Sydlik dali, he sọ yin dopo to Hagbẹ Anademẹtọ lọ mẹ ga. To whenuena nuhahun lẹ fọ́n, mì dín anademẹ sọn Owe-wiwe lẹ mẹ, wẹ e dotuhomẹnamẹ dọ. To yíyí wefọ ṣinṣinyan lẹ zan sọn weta 6tọ Matiu tọn mẹ, Mẹmẹsunnu Sydlik do lehe ehe sọgan yin bibasi do hia. Yise matindo sọgan hẹn mí nado to nuha dogbọn nuvọ́ lẹ dali, taidi núdùdù po avọ̀ po. Ṣigba, Jehovah yọ́n nuhe mí tindo nuhudo etọn lẹ. (Matiu 6:25, 30) Nuhiha na yidogọna nuhahun he azán dopodopo nọ hẹnwa lẹ poun wẹ. (Matiu 6:34) To alọ devo mẹ, titobibasi delẹ yin dandannu. (Yijlẹdo Luku 14:28 go.) “Nuhe Jesu gbẹ́ lọ, mayin nulẹnpọn nuyọnẹn tọn na sọgodo gba, ṣigba nuhiha he mayin nuyọnẹn tọn dogbọn dali etọn,” wẹ Mẹmẹsunnu Sydlik dọ. “Nuyiwa yin dopo to pọngbọ he yọ́n hugan lẹ mẹ na magbọjẹ. To whenuena mí lẹzun magbọjẹnọ, nuhe yọ́n lọ wẹ yin dọ mí ni jẹ hodọ dogbọn nugbo lọ dali ji.”

Ayinamẹ Godo Tọn lẹ sọn Nuplọnmẹtọ lẹ Dè

Hodidọ lẹ gbọn hagbẹ atọ̀n azọ́nwatẹn Giliadi tọn lẹ dali bọdego. Karl Adams dọho jẹnukọn, do hosọ lọ ji “Etẹwẹ Hiẹ Na Yí do Suahọ Jehovah?” Hodidọ etọn yin zize sinai do Psalm 116tọ lọ ji, ehe Jesu sọgan ko ji to ozán he jẹnukọnna okú etọn mẹ. (Matiu 26:30, nudọnamẹ odò tọn, NW ) Etẹwẹ na ko tin to ayiha Jesu tọn mẹ dile ewọ to hogbe lọ lẹ yí do jihan dọmọ: “Etẹ yẹn na na hlan OKLUNỌ na dagbewà etọn lẹ hlan dali ṣie”? (Psalm 116:12) Ewọ sọgan ko to nulẹnpọn do agbasa pipé he Jehovah ko wleawuna ẹn ji. (Heblu lẹ 10:5) To wunkẹngbe etọn, ewọ na ze agbasa ehe jo to avọ́sinsan mẹ, bo do sisosiso owanyi etọn tọn hia. Wehọmẹvi klasi 105tọ tọn lẹ ko dọ́ dagbewà Jehovah tọn pọ́n na osun atọ́n he wayi lẹ. Todin yé sọgan do owanyi yetọn hia hlan Jiwheyẹwhe gbọn azọ́n sinsinyẹn wiwà to azọ́ndenamẹ mẹdehlan tọn yetọn lẹ mẹ dali.

Mark Noumair, nuplọnmẹtọ awetọ Giliadi tọn he dọho, na avase wehọmẹvi lọ lẹ nado “Zindonukọn to Nuhe Sọgbe lẹ Wiwà Mẹ.” Josẹfu, to whenuena e ko yin sisà taidi kanlinmọ de do Egipti godo, doakọnna owhe 13 nuyiwahẹmẹ agọ̀ tọn lẹ. Be ewọ dike na nuṣiwa mẹdevo lẹ tọn ni doalọtena ẹn wẹ? Lala, e zindonukọn nado to nuhe sọgbe wà. Enẹgodo, to ojlẹ dide Jiwheyẹwhe tọn mẹ, Josẹfu yin whinwhlẹngan sọn whlepọn etọn lẹ mẹ. To ajiji mẹ, ewọ diọ sọn gbẹninọ to ganpa de mẹ biọ gbẹninọ to họ̀nmẹ de mẹ. (Gẹnẹsisi, weta 37-50) Nuplọnmẹtọ lọ kanse wehọmẹvi etọn lẹ dọ: “Eyin nuhe yin nukundido mìtọn lẹ mayin mimọ to azọ́ndenamẹ mẹdehlan tọn mìtọn mẹ, be mì na doalọte wẹ ya? Be mì na jogbe na todido matindo wẹ? Kavi be mì na doakọnna, dile Josẹfu wà do ya?”

To godo mẹ, mẹhe nọ penukundo kandai Wehọmẹ Giliadi tọn go lọ, Wallace Liverance, deanana hodọdopọ mẹwhantọ de hẹ hagbẹ klasi lọ tọn lẹ do hosọ lọ ji “Mì Lá Ahọlu lọ po Ahọluduta lọ Po.” Delẹ to wehọmẹvi lọ lẹ mẹ dọ numimọ lẹ he yé tindo to whenuena yé to yẹwhehodọ sọn whédegbè jẹ whédegbè, sọn nusatẹn jẹ nusatẹn, podọ to tohomẹliho lẹ ji. Devo lẹ dọ lehe yé penugo nado dekunnuna mẹhe nọ do ogbè devo lẹ do. Ṣogan mẹdevo lẹ do lehe yè na dọyẹwheho na mẹhe tindo dodonu sinsẹ̀n tọn devo lẹ hia. Mẹhe jlo na yí gbedewema lẹpo wẹ tin to jejeji nado tindo mahẹ gigọ́ to azọ́n mẹdehlan tọn lọ mẹ.

Mẹdehlan Ayajẹnọ Whenu Gaa Tọn Lẹ

Adà he bọdego lọ, he hosọ etọn yin “Kọdetọn Ayajẹnọ lẹ He Nọ Wá sọn Sinsẹ̀nzọn Mẹdehlan Tọn Mẹ,” yin zizedonukọnnamẹ gbọn Robert Wallen dali bosọ bẹ hokansemẹ lẹ hẹ mẹmẹsunnu ẹnẹ sọn azọ́nwatọ tatọ-tẹnnọ tọn lẹ he ko tindo gbẹdido mẹjlọdote tọn hẹ mẹdehlan numimọnọ lẹ to agọe mẹ hẹn. Mẹdehlan enẹlẹ ma whleawu nado yigbe dọ e ma bọawu na yewlẹ gba nado plọn ogbè yọyọ de, nado diọ sọgbe hẹ aṣa devo, kavi nado diọada sọgbe hẹ ninọmẹ aimẹ tọn de. Enẹgodo numọtolanmẹ ojlo whégbè-lilẹkọyì tọn tin to finẹ nado pehẹ. To whedelẹnu, nuhahun agbasalilo tọn lẹ nọ fọndote. Ṣigba gbọn popolẹpo gblamẹ, mẹdehlan lọ lẹ hẹn walọ nujikudo tọn de go, podọ linsinsinyẹn yetọn yin didona. Delẹ ko hẹn gbẹtọ susu lẹ wá oyọnẹn Jehovah tọn kọ̀n. Devo lẹ ko tindo mahẹ to aliho voovo lẹ mẹ na jideji azọ́n Ahọluduta lọ tọn to aigba yetọn lẹ ji.

Omẹ godo tọn nado dọho wẹ Carey Barber, yèdọ dopo to Hagbẹ Anademẹtọ lọ mẹ. E gbadopọnna bladopọ tito-to-whinnu plidopọ agbegbe “Aliho Jiwheyẹwhe Tọn na Gbẹninọ.” “Nuyiwadomẹji tẹwẹ tito-to-whinnu plidopọ lọ tọn tindo do haṣinṣan mìtọn hẹ Jehovah ji?” wẹ e kanse mẹplidopọ lẹ. Hodọtọ lọ yí vogbingbọn he tin to kọdetọn dona hihodo aliho Jiwheyẹwhe tọn lẹ mẹ jlẹdo kọdetọn nugbajẹmẹji tọn na mẹhe nọ hodo aliho aihọn lọ tọn lẹ go. To alọdindlẹndo sẹ́nhẹngba Mose tọn to Meriba mẹ, e na avase dọmọ: “Yèdọ etlẹ yin to whenuena mẹde ko sẹ̀n po nugbonọ-yinyin po na owhe susu lẹ, Jehovah ma nọ yí nukunpẹvi do pọ́n etlẹ yin afọtuntun osẹ́n dodo tọn Etọn lẹ ji kleun kleun gba.” (Osọha lẹ 20:2-13) Na devizọnwatọ Jiwheyẹwhe tọn lẹpo to filẹpo ni hẹn lẹblanulọkẹyi devizọnwiwa tọn yetọn lẹ go gligli!

Ojlẹ lọ ko wá na wehọmẹvi lọ lẹ nado yí gbedewema yetọn lẹ. Enẹgodo, nukunmọnu klasi lọ tọn de hia wekanhlanmẹ pinpẹn-nutọn-yinyọnẹn tọn de na azọ́nplọnmẹ he wehọmẹvi lọ lẹ ko mọyi. To ohàn tadona tọn de jiji po odẹ̀ ahundopo tọn de po godo, tito-to-whinnu gbedewema-yíyí tọn lọ wá vivọnu. Ṣigba, na klasi 105tọ lọ, ehe yin bẹjẹeji de poun, na mẹdehlan yọyọ lọ lẹ ‘ṣite to bẹjẹeji nuwiwa daho tọn’ wutu.

[Apotin to weda 23]

Sọha Nulinlẹn Klasi lọ Tọn

Sọha otò he mẹ yé wá sọn lẹ: 9

Sọha otò he mẹ yè do yé hlan lẹ: 17

Sọha wehọmẹvi lẹ tọn: 48

Sọha asu po asi po lẹ tọn: 24

Madozẹnzẹn owhe mẹhodido tọn: 33

Madozẹnzẹn owhe to nugbo mẹ tọn: 16

Madozẹnzẹn owhe lizọnyizọn whenu-gigọ́ tọn: 12

[Apotin to weda 24]

Yé Dè Sinsẹ̀nzọn Whenu-Gigọ́ Tọn

“To whenuena yẹn tin to ovu, yẹn ma tindo tito lẹ depope nado lẹzun gbehosọnalitọ gba,” wẹ Ben, dopo to gbedewema-yítọ klasi 105tọ tọn mẹ dọ. “Yẹn lẹndọ mẹhe tindo nugopipe vonọtaun po ninọmẹ he pọnte lẹ po kẹdẹ wẹ sọgan basi gbehosọnalitọ,” wẹ e yidogọ. “Ṣigba yẹn plọn nado yiwanna sinsẹ̀nzọn kunnudegbe tọn. Enẹgodo to gbèdopo e sọawuhia hlan mi dọ nado yin gbehosọnalitọ de zẹẹmẹdo mahẹ gigọ́ de tintindo to lizọnyizọn lọ mẹ poun. To whenẹnu wẹ yẹn wá yọnẹn dọ yẹn sọgan basi gbehosọnalitọ.”

“Devizọnwatọ whenu-gigọ́ tọn lẹ nọ saba yin nukun nuhọakuẹ tọn yí do pọ́n to owhé mítọn gbè,” wẹ Lusia dọ. E flin numọtolanmẹ homẹhunhun ayajẹ tọn he nọ gbayipe to agun etọn mẹ to whedepopenu he mẹdehlan lẹ wá na dlapọn de. “To whenuena yẹn to whinwhẹ́n,” wẹ e dọ, “e yin nukunnumọjẹemẹ dọ sinsẹ̀nzọn whenu-gigọ́ tọn dona tin to tito ṣie lẹ mẹ.”

Onọ̀ Theodis tọn kú to whenuena ewọ yin owhe 15-mẹvi. “To whenẹnu, agun lọ nọgodona mi taun,” wẹ e dọ, “enẹwutu yẹn kanse dee dọ, ‘Etẹwẹ yẹn sọgan wà nado do pinpẹn-nutọn-yinyọnẹn ṣie hia?’ ” Ehe hẹn mi nado biọ sinsẹ̀nzọn whenu-gigọ́ tọn mẹ podọ todin azọ́n mẹdehlan tọn mẹ.

[Yẹdide to weda 25]

Gbedewema-Yíyí Klasi 105tọ Wehọmẹ Biblu Pinplọn Watchtower Giliadi Tọn

To yinkọ he to odò lẹ mẹ, hukan lẹ yin sọha yí na sọn nukọn yì godo, bọ yinkọ lẹ yin sislẹ sọn amiyọnwhé yì adusiwhe to hukan dopodopo ji

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.