Kanbiọ lẹ sọn Wehiatọ lẹ Dè
Naegbọn lẹdogbedevomẹ Traduction du monde nouveau tọn do dọ to Deutelonomi 31:2 mẹ dọ Mose ma nasọ “yin dotẹnmẹna nado jẹgbonu yì podọ nado wá whégbè ba” taidi nukọntọ Islaeli tọn, to whenuena lẹdogbedevomẹ devo lẹ dọ dọ e masọ sọgan wàmọ ba?
Dile etlẹ yindọ hogbe Heblu tọn lọ sọgan yin lilẹdogbedevomẹ to aliho awe lọ lẹpo mẹ, lehe e yin didiọ do to lẹdogbedevomẹ Biblu tọn delẹ mẹ de linlẹn lọ tọ́n dọ to vivọnu gbẹzan etọn tọn, Mose tindo oblọ agbasago tọn de bo masọ sọgan penugo nado hẹn azọngban nukọntọ tọn lẹ di ba. Di apajlẹ, Biblu Wiwe—Gun Alada lilẹ hodidọ Mose tọn dole: “Owhe kantọ̀n mẹho wẹ yẹn to egbehe; yẹn masọ sọgan jẹgbonu yì podọ wá whégbè ba gba.” Mọdopolọ, lẹdogbedevomẹ The New English Bible dọmọ: “Yẹn masọ sọgan sẹtẹn dole e jlo mi do ba.”
Ṣigba, Deutelonomi 34:7 dohia dọ dile etlẹ yindọ Mose ko poyọnho, e ma tindo oblọ agbasago tọn gba. Wefọ lọ dọmọ: “Mose bosọ yin owhe kantọ̀n mẹho whenuena e kú: nukun etọn ma súzín gba, mọ huhlọn etọn masọ yin depò gba.” Enẹwutu, Mose gbẹ́ dohuhlọn nado deanana akọta lọ, ṣigba e ma yin ojlo Jehovah tọn dọ e ni zindonukọn to mọwiwà mẹ. Ehe sọawuhia to nuhe Mose dọ bọdego lẹ mẹ dọmọ: “OKLUNỌ lọ ko sọ dọhlan mi dọ, Hiẹ ma na hẹji yì Jọdani he godo gba.” E họnwun dọ, nuhe Jehovah ko degbè etọn to osin Mẹliba tọn kọ̀n wẹ e to vivọ dọ.—Osọha lẹ 20:9-12.
Mose ko zan gbẹzan gaa he jẹna ayidego de, ehe sọgan yin mimá do adà atọ̀n ji. Na owhe 40, e nọgbẹ̀ to Egipti, fie e “plọn nuyọnẹn Egiptitọ tọn lẹpo” te bosọ “dohuhlọn to ohó po walọ po mẹ.” (Owalọ lẹ 7:20-22) E yí owhe 40 devo zan to Midiani. Finẹ wẹ e wleawuna jẹhẹnu gbigbọmẹ tọn he yin dandannu nado deanana omẹ Jehovah tọn lẹ te. To godo mẹ, Mose plan Islaelivi lẹ bosọ deanana yé na owhe 40. Ṣigba todin, Jehovah ko basi dide dọ kakati nido yin Mose, Jọṣua wẹ na deanana akọta lọ dasá Tọ̀sisa Jọdani tọn biọ Aigba Pagbe tọn ji.—Deutelonomi 31:3.
Enẹwutu, lẹdogbedevomẹ Traduction du monde nouveau tọn do zẹẹmẹ he sọgbe Deutelonomi 31:2 tọn hia. Mose ma nasọ zindonukọn taidi nukọntọ Islaeli tọn ba, e ma yin na madogán agbasa tọn de wutu gba, ṣigba na Jehovah ma na ẹn dotẹnmẹ nado wàmọ wutu.