Yí Dewe Whlá to Owanyi Jiwheyẹwhe Tọn Mẹ!
“Mẹyiwanna emi, . . . mì yí mìde whlá to owanyi Jiwheyẹwhe tọn mẹ, . . . hlan ogbẹ̀ madopodo.”—JUDA 20, 21.
1, 2. Nawẹ hiẹ sọgan gbọṣi owanyi Jiwheyẹwhe tọn mẹ gbọn?
JEHOVAH yiwanna aihọn sọmọ bọ e yí ovi detọ́n etọn dopo akàn namẹ, na yé he yí i sè lẹ nido tindo ogbẹ̀ madopodo. (Johanu 3:16) Lehe e jiawu do sọ nado tindo numimọ owanyi mọnkọtọn tọn! Na nugbo tọn, eyin hiẹ yin devizọnwatọ Jehovah tọn de, hiẹ na jlo nado duvivi owanyi enẹ tọn kakadoi.
2 Devi Juda do lehe hiẹ sọgan gbọṣi owanyi Jiwheyẹwhe tọn mẹ do hia. Juda wlan dọmọ: ‘Gbọn mìde hinhẹn dote to yise wiwe wiwe mìtọn mẹ dali, bo to dẹ̀ho to gbigbọ wiwe mẹ, mì yí mìde whlá to owanyi Jiwheyẹwhe tọn mẹ, bo to todo lẹblanu Jesu Klisti Oklunọ mítọn tọn hlan ogbẹ̀ madopodo.’ (Juda 20, 21) Ohó Jiwheyẹwhe tọn pinplọn po yẹwheho wẹndagbe lọ tọn didọ po ko jlọ we dote to “yise wiwe wiwe” he yin nuplọnmẹ Klistiani tọn lẹ mẹ. Nado gbọṣi owanyi Jiwheyẹwhe tọn mẹ, hiẹ dona nọ hodẹ̀ ‘to gbigbọ wiwe mẹ,’ kavi to nuyiwadomẹji etọn glọ. Nado sọgan mọ ahọsumẹ ogbẹ̀ madopodo tọn yí, hiẹ sọ dona do yise hia to avọ́sinsan ofligọ Jesu Klisti tọn mẹ.—1 Johanu 4:10.
3. Naegbọn mẹdelẹ masọ yin Kunnudetọ Jehovah tọn ba?
3 Mẹhe ko tindo yise wayi delẹ ma gbọṣi owanyi Jiwheyẹwhe tọn mẹ gba. Yé masọ yin Kunnudetọ Jehovah tọn ba na yé ko de nado doafọna ylanwiwa. Nawẹ hiẹ sọgan dapana numimọ ylankan mọnkọtọn gbọn? Ayihamẹlinlẹnpọn do nuagokun he bọdego helẹ ji sọgan gọalọna we nado dapana ylanwiwa bo gbọṣi owanyi Jiwheyẹwhe tọn mẹ.
Do Owanyi Towe Na Jiwheyẹwhe Hia
4. Nawẹ tonusisena Jiwheyẹwhe yin nujọnu sọ?
4 Do owanyi towe na Jiwheyẹwhe hia gbọn tonusisena ẹn dali. (Matiu 22:37) Apọsteli Johanu wlan dọmọ: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.” (1 Johanu 5:3) Tonusisena Jiwheyẹwhe to whelẹponu sọgan hẹn we lodo nado nọavunte sọta whlepọn lẹ bo hẹn we tindo ayajẹ. Psalm-kàntọ lọ dọmọ: “Donanọ wẹ omẹ he ma zinzọnlin to hónamẹ mẹylankan lẹ tọn mẹ, . . . ṣigba homẹhunhun etọn tin to osẹ́n OKLUNỌ tọn mẹ.”—Psalm 1:1, 2.
5. Etẹwẹ owanyi tintindo na Jehovah na whàn we nado wà?
5 Owanyi towe na Jehovah na whàn we ma nado waylando sinsinyẹn he na hẹn vlẹko wá oyín etọn ji. Aguli hodẹ̀ dọmọ: “A na ohẹ́n kavi adọkun mi blo: yí núdùdù he pé mi na mi dù. Na yẹn nikaa dù gọ́ho hugan bo mọ́n we, dọ, Mẹnu wẹ OKLUNỌ lọ? Kavi dọ yẹn nikaa yin hẹntọnọ bosọ fìnnú, na yẹn nikaa waylan do oyín Jiwheyẹwhe ṣie tọn go.” (Howhinwhẹn lẹ 30:1, 8, 9) Magbe ma nado ‘waylan do oyín Jiwheyẹwhe tọn’ go gbọn vlẹko hinhẹnwa e ji dali. Kakatimọ, nọ dovivẹnu nado wà nuhe sọgbe he na pagigona ẹn lẹ.—Psalm 86:12.
6. Etẹwẹ sọgan jọ eyin hiẹ waylando sọn ojlo mẹ?
6 Nọ hodẹ̀ to gbesisọ mẹ hlan Otọ́ owanyinọ olọnmẹ tọn towe nado gọalọna we nado nọavunte sọta whlepọn nado waylando. (Matiu 6:13; Lomunu lẹ 12:12) Nọ hodo ayinamẹ Jiwheyẹwhe tọn to whepoponu na odẹ̀ towe lẹ nikaa pòali. (1 Pita 3:7) Eyin hiẹ waylando sọn ojlo mẹ wá, kọdetọn lọ lẹ na ylan taun, na to yẹhiadonu-liho, Jehovah nọ yí aslọ do glọnalina atẹṣitọ lẹ na odẹ̀ yetọn nikaa luntọ́n yì ewọ dè. (Avigbè Jẹlemia Tọn 3:42-44) Enẹwutu, do whiwhẹ hia, bosọ hodẹ̀ ma nado wà nudepope he na glọnalina we nado dọnsẹpọ Jiwheyẹwhe to odẹ̀ mẹ.—2 Kọlintinu lẹ 13:7.
Do Owanyi Hia Na Ovi Jiwheyẹwhe Tọn
7, 8. Nawẹ tonusisena ayinamẹ Jesu tọn sọgan gọalọna mẹde nado dapana ylanwiwa gbọn?
7 Do owanyi hia na Jesu Klisti gbọn tonusisena gbedide etọn lẹ dali, na ehe na gọalọna we nado dapana ylanwiwa. “Eyin mì yìn osẹ́n ṣie lẹ,” wẹ Jesu dọ, “mì na nọ nọ̀ owanyi ṣie mẹ; yèdọ dile yẹn yìn osẹ́n Otọ́ ṣie tọn, bosọ nọ nọ̀ owanyi etọn mẹ do.” (Johanu 15:10) Nawẹ gbẹninọ sọgbe hẹ ohó Jesu tọn lẹ na gọalọna we nado gbọṣi owanyi Jiwheyẹwhe tọn mẹ gbọn?
8 Tonusisena ohó Jesu tọn lẹ sọgan gọalọna we nado tẹdo nunọwhinnusẹ́n walọ dagbe tọn lẹ go. Jiwheyẹwhe dosẹ́n na Islaelivi lẹ dọmọ: “Hiẹ ma na deayọ.” (Eksọdusi 20:14) Ṣigba Jesu do nunọwhinnusẹ́n gbedide enẹ tọn hia dọmọ: “Eyin mẹdepope pọ́n yọnnusi de nado wà nugbigble hẹ ẹ, e ko deayọ hẹ ẹ to ayiha etọn mẹ dote.” (Matiu 5:27, 28) Apọsteli Pita dlẹnalọdo mẹhe tin to agun owhe kanweko tintan whenu tọn mẹ delẹ taidi mẹhe tindo “nukun he gọ́ na ayọdide” ‘he to ayiha he ma lodo lẹ klọ.’ (2 Pita 2:14) Ṣigba, to vogbingbọn mẹ na omẹ mọnkọtọn lẹ, hiẹ sọgan dapana ylando fẹnnuwiwa tọn eyin hiẹ yiwanna Jiwheyẹwhe po Klisti po bo setonuna yé bosọ magbe nado basi hihọ́na haṣinṣan towe po yé po.
Dike Gbigbọ Jehovah Tọn Ni Deanana We
9. Etẹwẹ sọgan jọ eyin mẹde zindonukọn to ylanwiwa mẹ?
9 Biọ gbigbọ wiwe Jiwheyẹwhe tọn to odẹ̀ mẹ, bo na ẹn dotẹnmẹ nado deanana we. (Luku 11:13; Galatianu lẹ 5:19-25) Eyin hiẹ zindonukọn to ylanwiwa mẹ, Jiwheyẹwhe sọgan de gbigbọ etọn sọn jiwe. To ylando wiwà hẹ Bati-ṣeba godo, Davidi vẹ̀ Jiwheyẹwhe dọmọ: “A yàn mi sọn nukọn towe blo; a sọ yí gbigbọ wiwe towe sọn dè e blo.” (Psalm 51:11) Na Ahọlu Sauli ma lẹnvọjọ sọn ylando etọn mẹ wutu, gbigbọ Jiwheyẹwhe tọn jo e do. Sauli waylando gbọn avọ́ nunina de mimẹ̀ dali podọ gbọn lẹngbọ, gbọgbọẹ, oyìn, po ahọlu Amalẹkinu lẹ tọn po hihla dai dali. To enẹgodo, Jehovah de gbigbọ wiwe etọn sọn Sauli ji.—1 Samuẹli 13:1-14; 15:1-35; 16:14-23.
10. Naegbọn hiẹ ma dona dike linlẹn lọ nado yí ylanwiwa do do aṣa ni tlẹ wá ayiha towe mẹ?
10 Ma dike linlẹn lọ nado yí ylanwiwa do do aṣa ni tlẹ wá ayiha towe mẹ blo. Apọsteli Paulu wlan dọmọ: “Eyin míwlẹ yọnẹn gán an bo [nọ] wà oylan whenuena míwlẹ ko mọ oyọnẹn nugbo tọn yí godo, avọ́ na ylando ma tin ba gba.” (Heblu lẹ 10:26-31) Lehe e na ylan do sọ eyin hiẹ zindonukọn to ylanwiwa mẹ jẹ obá enẹ mẹ!
Do Owanyi Nugbo Hia Mẹdevo Lẹ
11, 12. Aliho tẹlẹ mẹ wẹ owanyi po sisi po na glọnalina mẹde ma nado doalọ to walọ mawé fẹnnuwiwa tọn mẹ te?
11 Owanyi tintindo na mẹdevo lẹ na glọnalina we ma nado doalọ to walọ mawé fẹnnuwiwa tọn mẹ. (Matiu 22:39) Owanyi mọnkọtọn na whàn we nado basi hihọ́na ahun towe ma nado klọ we nado dọ̀n ayidonugo alọwlemẹ mẹdevo tọn do dewe ji. Mọwiwà sọgan dekọtọn do ayọdide mẹ. (Howhinwhẹn lẹ 4:23; Jẹlemia 4:14; 17:9, 10) Hodo apajlẹ Job nugbonọ lọ tọn, he domẹplọnlọ ede go ma nado na ayidonugo hlan yọnnu devo depope gbọnvona asi etọn.—Job 31:1.
12 Sisi tintindo na wiwe-yinyin alọwle tọn sọgan gọalọna we nado dapana ylando sinsinyẹn. Lẹndai Jiwheyẹwhe tọn wẹ yindọ gbẹtọvi lẹ ni jìgbà gbọn alọwle yẹyinọ po haṣinṣan zanhẹmẹ tọn po gblamẹ. (Gẹnẹsisi 1:26-28) Flindọ lẹndai vijinu lẹ tọn wẹ nado hẹn ogbẹ̀ yọnbasi—yèdọ onú wiwe de. Galọtọ po ayọdetọ lẹ po vẹtolina Jiwheyẹwhe, de yẹyi sọn kọndopọ zanhẹmẹ tọn go, bo ma tindo sisi na wiwe-yinyin alọwle tọn, bosọ waylando do agbasa yedetiti tọn go. (1 Kọlintinu lẹ 6:18) Ṣigba owanyi na Jiwheyẹwhe po kọmẹnu lẹ po gọna tonusisena Jiwheyẹwhe to whepoponu na basi hihọ́na mẹde ma nado wà nuhe sọgan hẹn ẹn nado yin didesẹ sọn agun Klistiani tọn mẹ.
13. Aliho tẹ mẹ wẹ gblewanọ de nọ “hẹn adọkun etọn gble” te?
13 Mí dona duto ayilinlẹn ylando tọn lẹ ji ma nado hẹn awufiẹsa wá mẹyiwanna mítọn lẹ ji. “Ewọ he to gbẹdo hẹ ayọdetọ nọ hẹn adọkun etọn gble,” wẹ Howhinwhẹn lẹ 29:3 dọ. Ayọdetọ he ma lẹnvọjọ nọ hẹn haṣinṣan he e tindo hẹ Jiwheyẹwhe gble bosọ nọ hẹn kanṣiṣa whẹndo tọn lẹ gble. Asi ayọdetọ lọ tọn sọgan basi gbẹdai. (Matiu 19:9) Vlavo ylanwatọ lọ yin asu kavi asi, gbakija alọwle tọn sọgan hẹn awufiẹsa daho wá na alọwlemẹ homẹvọnọ lọ, ovi lẹ, po mẹdevo lẹ po. Be hiẹ ma kẹalọyi dọ yinyọ́n lehe walọ mawé nọ hẹnnugble do dona whàn mí nado nọavunte sọta whlepọn lọ nado doalọ to e mẹ ya?
14. Nuplọnmẹ tẹwẹ mí mọ to Howhinwhẹn lẹ 6:30-35 mẹ gando ylanwiwa go?
14 Nugbo lọ dọ nudepope ma sọgan yin wiwà nado sú odò ayọdide tọn dona whàn mí nado dapana nuyiwa gblezọn ṣejannabi tọn ehe. Howhinwhẹn lẹ 6:30-35 dohia dọ to whenuena gbẹtọ lẹ sọgan vẹawu ajotọ he fìnnú na huvẹ to hùhù i wutu, yé nọ gbẹwanna ayọdetọ na e tindo mẹwhinwhàn ylankan wutu. Ewọ to ‘gbigbọ kavi ogbẹ̀ etọn titi husudo.’ To Osẹ́n Mose tọn glọ, ewọ na ko yin hùhù. (Levitiku 20:10) Mẹhe deayọ nọ hẹn awufiẹsa wá mẹdevo lẹ ji nado hẹn pekọwana ojlo zogbe ede tọn poun, podọ ayọdetọ he ma lẹnvọjọ ma sọgan gbọṣi owanyi Jiwheyẹwhe tọn mẹ ṣigba nọ yin didesẹ sọn agun wiwe Klistiani tọn mẹ.
Hẹn Ayihadawhẹnamẹnu Dagbe Go
15. Etẹwẹ nọ yin ninọmẹ ayihadawhẹnamẹnu he doapà taidi ‘nuhe yè yí ogàn miyọnawu do sí’ tọn?
15 Nado gbọṣi owanyi Jiwheyẹwhe tọn mẹ, mí ma sọgan na dotẹnmẹ ayihadawhẹnamẹnu mítọn nado tliji to ylanwiwa mẹ. E họnwun dọ mí ma dona kẹalọyi nujinọtedo walọ dagbe aihọn tọn he to doyi lẹ gba, podọ mí dona họ́ míde to nudide mítọn lẹ mẹ gando gbẹdido, wehihia, po ayidedai po go. Paulu na avase dọmọ: “To ojlẹ godo tọn lẹ mẹ mẹdelẹ na jai sọn yise mẹ, bo nasọ na otó gbigbọ oklọ, po oplọn aovi tọn po; yé na nọ dolalo to yẹnuwiwa mẹ; mẹhe yè yí ogàn miyọnawu do sí [ayihadawhẹnamẹnu] na.” (1 Timoti 4:1, 2) Ayihadawhẹnamẹnu he doapà taidi ‘nuhe yè yí ogàn miyọnawu do sí’ tin taidi alán he ko kúatli bo masọ nọ sè vivẹ́ ba. Ayihadawhẹnamẹnu mọnkọtọn ma nasọ na mí avase nado nọla na atẹṣitọ lẹ kavi ninọmẹ he sọgan hẹn mí nado jai sọn yise mẹ lẹ ba.
16. Naegbọn e do yin nujọnu sọmọ nado tindo ayihadawhẹnamẹnu dagbe de?
16 Whlẹngán mítọn sinai do ayihadawhẹnamẹnu dagbe tintindo ji. (1 Pita 3:21) Gbọn yise mítọn to hùnsọndai Jesu tọn mẹ dali, ayihadawhẹnamẹnu mítọn ko yin kiklọwé sọn azọ́n kúkú lẹ mẹ, “nado sẹ̀n Jiwheyẹwhe ogbẹ̀nọ lọ.” (Heblu lẹ 9:13, 14) Eyin mí waylando sọn ojlo mẹ, ayihadawhẹnamẹnu mítọn na yin hinhẹn gblezọn podọ mí ma na pegan na sinsẹ̀nzọn Jiwheyẹwhe tọn ba. (Titu 1:15) Ṣigba po alọgọ Jehovah tọn po, mí sọgan tindo ayihadawhẹnamẹnu dagbe de.
Aliho Devo lẹ Nado Dapana Walọ Ylankan
17. Ale tẹwẹ tin to ‘Jehovah hihodo mlẹnmlẹn’ mẹ?
17 ‘Hodo Jehovah mlẹnmlẹn,’ dile Kalẹbu Islaeli hohowhenu tọn wà do. (Deutelonomi 1:34-36) Wà nuhe Jiwheyẹwhe biọ to asi we lẹ, bo ma tẹnpọn nado dùnú to “tafo aovi lẹ tọn” ji gbede blo. (1 Kọlintinu lẹ 10:21) Gbẹ́ atẹṣiṣi dai. Yí pinpẹn-nutọn-yinyọnẹn do dù núdùdù gbigbọmẹ tọn he sọgan yin mimọ to tafo Jehovah tọn kẹdẹ ji, podọ hiẹ ma na yin kiklọ gbọn mẹplọntọ lalonọ lẹ kavi gbigbọ ylankan lẹ dali. (Efesunu lẹ 6:12; Juda 3, 4) Ze ayidonugo do gbigbọnu lẹ ji, taidi Biblu pinplọn, opli lẹ yìyì, po lizọnyizọn kunnudegbe tọn po. Matin ayihaawe, hiẹ na yin ayajẹnọ eyin hiẹ hodo Jehovah mlẹnmlẹn bo hẹn alọnu ján to azọ́n Oklunọ tọn mẹ.—1 Kọlintinu lẹ 15:58.
18. Nawẹ budisi Jehovah na yinuwado walọ towe ji gbọn?
18 Magbe nado “nọ basi sinsẹ̀n homẹhunnọ hlan Jiwheyẹwhe . . . po yẹyi po, po osi po.” (Heblu lẹ 12:28) Obu gbégbò tọn tintindo na Jehovah na whàn we nado gbẹ́ aliho ylankan lẹpo dai. E na gọalọna we nado nọgbẹ̀ sọgbe hẹ ayinamẹ he Pita na mẹyiamisisadode hatọ etọn lẹ dọmọ: “Eyin mì sọ to oyín Otọ́ tọn ylọ, mẹhe ma tin mẹhopọn gbẹtọ tọn nọ dawhẹ kẹdẹdile azọ́n omẹ dopodopo tọn te, mì nọ zan azán wáṣi whenu mìtọn tọn to ofi to osi mẹ.”—1 Pita 1:17.
19. Naegbọn hiẹ dona nọ yí nuhe a to pinplọn sọn Ohó Jiwheyẹwhe tọn mẹ lẹ do yizan mẹ to whepoponu?
19 Nọ yí nuhe a to pinplọn to Ohó Jiwheyẹwhe tọn mẹ lẹ do yizan mẹ to whepoponu. Ehe na gọalọna we nado dapana ylando sinsinyẹn na hiẹ ko do dewe hia taidi mẹhe tin to “yé he gbọn linlẹn zinzan tọn dali yí nuyọnẹn yetọn do to dagbe po oylan po yọnẹn” lẹ mẹ wutu. (Heblu lẹ 5:14) Kakati nado nọ dọho bo nọ yinuwa to aliho vọdonanu tọn mẹ, tin to aṣeji na hiẹ nido zinzọnlin taidi nuyọnẹntọ, bo nọ “fli ojlẹ” to azán ylankan ehelẹ mẹ. ‘Tunwun nuhe ojlo Jehovah tọn yin go,’ bo nọ wà ẹ to whepoponu.—Efesunu lẹ 5:15-17; 2 Pita 3:17.
20. Naegbọn mí dona dapana nukundido onú mẹdevo tọn lẹ mẹ?
20 Dapana nukundonumẹ—yèdọ ojlo he ma sọgbe tintindo na onú mẹdevo tọn lẹ. Dopo to Gbedide Ao lẹ mẹ dọmọ: “Hiẹ ma na donukunkẹn do owhé kọmẹnu towe tọn go, hiẹ ma na donukunkẹn do asi kọmẹnu towe tọn go, kavi devisunnu etọn, kavi deviyọnnu etọn, kavi oyìn etọn, kavi kẹtẹkẹtẹ etọn, kavi onú depope he yin kọmẹnu towe tọn.” (Eksọdusi 20:17) Osẹ́n ehe nọ basi hihọ́na owhé, asi, devi, kavi kanlin mẹde tọn, po mọmọ po sọyi. Ṣigba nuhe sọ jẹna ayidego hugan wẹ hogbe Jesu tọn dọ nukunkẹn nọ hẹn gbẹtọ flu.—Malku 7:20-23.
21, 22. Afọdide tẹlẹ wẹ Klistiani de sọgan ze nado basi hihọ́na ede sọta ylanwiwa?
21 Basi hihọ́na dewe na ojlo towe nikaa hẹn we biọ ylanwiwa mẹ. Devi Jakobu wlan dọmọ: “Omẹ dopodopo wẹ yè whlepọn, whenuena yè gbọn wantuntun [kavi ojlo] etọn titi dali dọ̀n ẹn yì, bọ yè sọ doyẹklọ ẹ. Whenẹnu, wantuntun, whenuena e mọhò, e ji ylando: podọ ylando, whenuena yè basi i pó, e ji okú.” (Jakobu 1:14, 15) Di apajlẹ, eyin mẹde ko tindo nuhahun ahànnunu tọn wayi, e sọgan de ma nado tindo ahàn sinsinyẹn lẹ to ohọ̀ etọn mẹ. Nado dapana whlepọn he gando vijinu awetọnọ go, Klistiani de sọgan tin to dandannu glọ nado diọ azọ́nwatẹn kavi agbasazọ́n etọn.—Howhinwhẹn lẹ 6:23-28.
22 Ma tlẹ tẹnpọn nado ze afọdide tintan he nọ planmẹ jẹ ylando mẹ blo. Aihun gblewa tọn kavi nulinlẹnpọndo linlẹn mawé lẹ ji sọgan dekọtọn do galilọ kavi ayọdide mẹ. Lalo pẹvipẹvi lẹ dido sọgan hẹn ayiha mẹde tọn tliji nado dolalo dahodaho lẹ podọ ehe sọgan dekọtọn do aṣa ylankan lalodido tọn mẹ. Ajò flinflin lẹ sọgan de huhlọn pò na ayihadawhẹnamẹnu mẹde tọn jẹ obá lọ mẹ bọ e na jẹ onú dahodaho lẹ fìn ji. Awujijona nulẹnpọn atẹṣitọ lẹ tọn to obá kleun de mẹ tlẹ sọgan hẹn mẹde nado lẹzun atẹṣitọ to godo mẹ.—Howhinwhẹn lẹ 11:9; Osọhia 21:8.
Etẹwẹ Hiẹ Na Wà Eyin Hiẹ Ko Waylando?
23, 24. Homẹmiọnnamẹ tẹwẹ sọgan yin mimọ to 2 Otannugbo lẹ 6:29, 30 po Howhinwhẹn lẹ 28:13 po mẹ?
23 Gbẹtọvi lẹpo wẹ yin mapenọ. (Yẹwhehodọtọ 7:20) Ṣigba eyin hiẹ ko waylando sinsinyẹn, hiẹ sọgan mọ homẹmimiọn yí sọn odẹ̀ he Ahọlu Sọlọmọni hò to klandowiwe tẹmpli Jehovah tọn whenu mẹ. Sọlọmọni hodẹ̀ hlan Jiwheyẹwhe dọmọ: “Odẹ̀ kavi ovẹ̀ depope yin bibasi gbọn omẹ depope dali, kavi gbọn Islaeli omẹ towe lẹpo dali, he na yọnẹn omẹ dopodopo onú dotuklamẹ etọn titi po awubla etọn titi po, bo na tẹ́ alọ etọn lẹ jẹgbonu hlan ohọ̀ he kọ̀n: whenẹnu hiẹ ni sè sọn olọn mẹ otẹn fininọ towe, bo jona, bosọ gọ̀ jo hlan omẹ dopodopo kẹdẹdi aliho etọn lẹpo, ayiha mẹhe tọn hiẹ yọnẹn; (na hiẹ, yèdọ hiẹ ṣokẹdẹ, wẹ yọ́n ayiha ovi gbẹtọ lẹ tọn tọn lẹ).”—2 Otannugbo lẹ 6:29, 30.
24 Mọwẹ, Jiwheyẹwhe yọ́n nuhe tin to ahun mẹ lẹ bosọ nọ jonamẹ. Howhinwhẹn lẹ 28:13 dọmọ: “Ewọ he ṣinyọnnudo ylanwa etọn ma na wà dagbe: ṣigba mẹdepope he yigbe bosọ jo e dai na mọ lẹblanu.” Eyin mẹde lẹnvọjọ bo yigbe ylanwiwa etọn tọn bosọ jo e do, e sọgan mọ lẹblanu Jiwheyẹwhe tọn yí. Ṣigba, eyin hiẹ to azọ̀njẹ to gbigbọ-liho, onú devo tẹwẹ sọgan gọalọna we nado gbọṣi owanyi Jiwheyẹwhe tọn mẹ?
Etẹwẹ Na Yin Gblọndo Towe?
• Nawẹ mí sọgan gbọṣi owanyi Jiwheyẹwhe tọn mẹ gbọn?
• Nawẹ owanyi tintindo na Jiwheyẹwhe po Klisti po na gọalọna mí nado dapana ylanwiwa gbọn?
• Naegbọn owanyi nujọnu tọn tintindo na mẹdevo lẹ nọ glọnalina mí ma nado doalọ to walọ mawé fẹnnuwiwa tọn mẹ?
• Aliho tẹlẹ mẹ wẹ mí sọgan dapana walọ ylankan te?
[Yẹdide to weda 21]
Juda do lehe mí sọgan gbọṣi owanyi Jiwheyẹwhe tọn mẹ do hia mí
[Yẹdide to weda 23]
Gbakija alọwle tọn sọgan hẹn awufiẹsa daho wá na alọwlemẹ homẹvọnọ lọ po ovi lẹ po
[Yẹdide to weda 24]
Taidi Kalẹbu, be hiẹ magbe nado ‘hodo Jehovah mlẹnmlẹn’ ya?
[Yẹdide to weda 25]
Nọ biọ alọgọ to odẹ̀ mẹ to whepoponu nado nọavunte sọta whlepọn