Nugbodidọ Doale — WESẸDOTẸN INTẸNẸT JI TỌN Watchtower Tọn

Nugbodidọ Doale

NUGBOMADỌ ko tin sọn jipa Edẹni tọn mẹ gbọ́n. Etomọṣo, aṣa po lẹdo susu po nọ yí nukun nujọnu tọn do pọ́n nugbodidọ bo nọ pọ́n lalodido po oklọ po hlan taidi nuhe ma sọgbe bosọ ylan. Nado nọ yin pinpọnhlan taidi nugbodọtọ yin nude he mẹ yè dona nọ doawagun te. Nalete, mẹsusu fọ́n bo to nugbomadọ pọnhlan taidi dandannu nado sọgan tindo kọdetọn dagbe to aihọn egbehe tọn mẹ. Etẹwẹ yin numọtolanmẹ towe gando ehe go? Be awuwiwlena walọ nugbodidọ tọn doale ya? Etẹwẹ yin nujinọtedo towe gando nudide walọyizan nugbodidọ po nugbomadọ tọn po go?

Nado hẹn homẹ Jiwheyẹwhe tọn hùn, mí dona yin nugbonọ to hodidọ po aliho gbẹzan tọn mítọn po mẹ. Apọsteli Paulu dotuhomẹna Klistiani hatọ lẹ dọmọ: “Mìmẹpo ni nọ dọ nugbo hẹ kọmẹnu etọn.” (Efesunu lẹ 4:25) Paulu sọ wlan dọmọ: “Mí . . . jlo nado tin to walọ dagbe mẹ [kavi yin nugbodọtọ] to onú lẹpo mẹ.” (Heblu lẹ 13:18) E ma yin nado mọ pipà yí sọn gbẹtọvi hatọ lẹ si wẹ nọ whàn mí nado yin nugbodọtọ gba. Mí nọ dọ nugbo, na mí tindo sisi na Mẹdatọ mítọn bo nọ jlo nado hẹn homẹ etọn hùn.

Ma Whlá Nuhe A Yin Blo

To otò susu lẹ mẹ, gbẹtọvi lẹ nọ do yedelẹ hia to aliho he gbọnvo mẹ nado sọgan mọ ale delẹ yí to gbẹ̀mẹ. Yé nọ yí wema, gbedewema po kalti mẹdohia tọn oklọ tọn lẹ po zan nado biọ otò devo mẹ to aliho he ma sọgbe hẹ osẹ́n mẹ kavi nado mọ azọ́n kavi otẹn he yé ma pegan na yí. Mẹjitọ delẹ nọ basi jiji-wema oklọ tọn lẹ na ovi yetọn lẹ, na yé nido sọgan yì wehọmẹ dogọ.

Ṣigba, eyin mí jlo na hẹn homẹhun Jiwheyẹwhe, mí ma dona yin mẹklọtọ. Biblu dọ dọ Jehovah yin “Jiwheyẹwhe nugbo tọn” podọ e sọ nọ donukun nugbonọ-yinyin sọn mẹhe tindo haṣinṣan pẹkipẹki hẹ ẹ lẹ si. (Psalm 31:5) Eyin mí jlo na hẹn haṣinṣan pẹkipẹki de go hẹ Jehovah, mí ma dona hodo apajlẹ “mẹvọ́nu,” kavi lalonọ he ‘nọ whlá nuhe yé yin lẹ’ tọn.—Psalm 26:4.

Nuhe gbayipe wẹ e sọ yin to gbẹtọvi lẹ ṣẹnṣẹn nado nọ yí nugbo whlá to whenue yé ṣinuwa bo pannukọn mẹplọnlọ-domẹgo. Etlẹ yin to agun Klistiani tọn mẹ, mẹde sọgan yin whiwhlepọn nado wàmọ. Di apajlẹ, to agun de mẹ, dẹpẹ de dọna mẹho lẹ dọ emi ko huwhẹ̀ ylando delẹ tọn. Ṣigba, e ma yigbe dọ emi jẹajo, dile etlẹ yindọ kunnudenu tin dọ e wàmọ. To godo mẹ, kunnudenu lọ wá họnwun bọ e dona yin didesẹ sọn agun mẹ. Be e ma na ko yin nuyọnẹnnu na ẹn nado dọ nugbo sọn ahun mẹ wá bo mọ alọgọ yí nado vọ́ haṣinṣan họakuẹ etọn jlado hẹ Jehovah ya? To popolẹpo mẹ, Biblu dọmọ: “Hiẹ vlẹ mẹplọnlọ [Jehovah] tọn blo, agbọ́ sọ pé we whenuena yè gbọn alọ etọn mẹ do to wiwọhẹ we blo: na ewọ he [Jehovah] yiwanna wẹ e nọ wọhẹ.”—Heblu lẹ 12:5, 6.

To whedelẹnu, mẹmẹsunnu he to vivẹnudo na otẹn azọngban tọn to agun mẹ de sọgan tẹnpọn nado whlá nuhahun mẹdetiti tọn lẹ kavi nuhe e ko ṣiwà wayi lẹ. Di apajlẹ, eyin mẹde to alọdowemẹ na lẹblanulọkẹyi vonọtaun sinsẹ̀nzọn tọn de, e sọgan nọma na gblọndo na kanbiọ he gando agbasalilo po walọ dagbe po go lẹ to gigọ́ mẹ, po linlẹn lọ po dọ nugbodidọ do whẹho enẹlẹ ji sọgan zọ́n bọ e ma na pegan. E sọgan dín whẹjijọ dọ, ‘N’ma dolalo nẹ,’ ṣigba be hójọhó kavi nugbo janwẹ e to didọna mẹdevo lẹ ya? Lẹnnupọndo nuagokun he tin to Howhinwhẹn lẹ 3:32 mẹ ji dọmọ: “Osùnú de wẹ tasinyẹntọ [kavi gbẹtọ oklọnọ] yin hlan OKLUNỌ: ṣigba aṣli etọn tin dodonọ lẹ dè.”

Onú tintan he e zẹẹmẹdo nado yin nugbodọtọ wẹ nado nọ dọ nugbo na míde. Nuhe mí jlo nado yise wẹ mí nọ saba yise kakati nido yin nuhe sọgbe kavi nuhe yin nugbo. Lehe e bọawu nado nọ ze nuṣiwa mídetiti tọn do mẹdevo lẹ ji do sọ! Di apajlẹ, Ahọlu Sauli tẹnpọn nado suwhẹna tolivivẹ etọn gbọn owhẹ̀ lọ zize do mẹdevo lẹ ji dali. Taidi kọdetọn de, Jehovah gbẹ́ ẹ dai taidi ahọlu. (1 Samuẹli 15:20-23) Lehe enẹ gbọnvo do whẹho Ahọlu Davidi tọn do sọ, mẹhe hodẹ̀ hlan Jehovah dọmọ: “Yẹn yigbe tasinyẹn ṣie tọn hlan we, ylanwiwa ṣie wẹ yẹn masọ yí whlá. Yẹn dọmọ, yẹn na yigbe oylan hoho ṣie tọn hlan OKLUNỌ: hiẹ sọ jó ylanwiwa ylando ṣie tọn na mi.”—Psalm 32:5.

Nugbodidọ Nọ Hẹn Ale Wá

Nugbodidọ kavi lalodido nọ yinuwado nukun he mẹdevo lẹ nọ yí do pọ́n mí ji. Eyin gbẹtọ lẹ mọ dọ a ko doyẹklọ yé etlẹ yin whladopo poun, yé ma nasọ deji do gowe ba, podọ e ma nọ bọawu nado vọ́ jidedomẹgo yetọn mọyi. To alọ devo mẹ, nugbodidọ sọn ahun mẹ wá, na hẹn we tindo oyín dagbe taidi tenọglinọ he go yè sọgan dejido de. Kunnudetọ Jehovah tọn lẹ tindo yinkọ dagbe enẹ. Gbadopọnna apajlẹ delẹ.

Ogán azọ́nwhé de tọn doayi e go dọ susu to azọ́nwatọ etọn lẹ mẹ wẹ to azọ́nwhé lọ hòdu, enẹwutu e biọ alọgọ ponọ lẹ tọn. Whenuena e sè dọ dopo to Kunnudetọ Jehovah tọn lẹ mẹ tin to azọ́nwatọ he yin wiwle lọ lẹ mẹ, e yì ponọ lọ lẹ dè nado de e tọ́n to afọdopolọji. Etẹwutu? Na ogán lọ yọnẹn dọ azọ́nwatọ nugbonọ podọ homẹvọnọ de wẹ e yin. Kunnudetọ lọ zindonukọn to agbasazọ́n etọn mẹ, to whenuena mẹhe pò lẹ yin yinyan. Kunnudetọ hatọ etọn lẹ jaya, na yé yọnẹn dọ walọyizan etọn hẹn gbégbò wá na oyín Jehovah tọn.

Walọ dagbe ma nọ whlá. To lẹdo Aflika tọn de mẹ, aná he gbọ̀n osinwhín daho de ji dona yin vivọjlado na delẹ to owhlẹ lọ lẹ mẹ ko yin finfin wutu. Mẹhe nọ nọ̀ lẹdo lọ mẹ lẹ basi dide nado ṣinyan akuẹ na owhlẹ lọ lẹ vivọ́ basi, ṣigba mẹnu go wẹ yé sọgan dejido nado hẹn akuẹ lọ? Yemẹpo wẹ kọngbedopọ dọ e dona yin dopo to Kunnudetọ Jehovah tọn lẹ mẹ.

To whenuena hunyanhunyan tonudidọ po akọ̀ tọn po fọ́n to otò Aflika tọn de mẹ, Kunnudetọ de he to azọ́nwa taidi akuẹ-lẹntọ́ to azọ́nwhé akọjọpli tọn de mẹ yin tẹndiọna gbọn azọ́nwhé lọ dali na ogbẹ̀ etọn tin to owù mẹ. Azọ́nwhé lọ basi tito na ẹn nado to azọ́nwa na yé to otò devo mẹ na osun susu kakajẹ whenue ninọmẹ lọ pọnte. Etẹwutu? Na to ojlẹ de mẹ wayi, e ko gbẹ́ nado kọnawudopọ hẹ mẹhe blasé nado dù azọ́nwhé lọ sudo lẹ. Ogán lọ lẹ yọnẹn dogbọn oyín dagbe etọn dali taidi nugbodọtọ he ma do mọdọ de. Be yé na ko jlo nado gọalọna azọ́nwatọ ehe eyin e ko yin yinyọnẹn na walọ nugbomadọ tọn wutu ya?

“Gbẹtọ nugbonọ to zọnlinzin to walọ pipé [kavi tenọgli] etọn mẹ,” wẹ Howhinwhẹn lẹ 20:7 dọ. Mẹhe yin nugbodọtọ sọ nọ yin tenọglinọ ga. E ma nọ tafu kavi klọ hatọ etọn. Be e ma yin lehe hiẹ jlo dọ mẹdevo lẹ ni nọ yinuwa hẹ we do niyẹn ya? Nugbodidọ yin adà tangan sinsẹ̀n-bibasi nugbo tọn. Dohia owanyi mítọn na Jiwheyẹwhe po kọmẹnu mítọn po tọn wẹ e yin. Gbọn nugbodidọ dali, mí nọ dohia dọ mí jlo na hodo nunọwhinnusẹ́n walọyizan tọn he go Jesu donù dọmọ: “Enẹwutu nudepope mìwlẹ jlo gbẹtọ ni wà hlan mì, mọkẹdẹ wẹ mì ni wà hlan yé.”—Matiu 7:12; 22:36-39.

Nugbodidọ to ojlẹ lẹpo mẹ sọgan hẹn kọdetọn vẹadi lẹ wá, ṣigba ayihadawhẹnamẹnu wiwe he e nọ hẹnwa họakuẹ tlala hugan nudepope. E yá wẹo kavi e dẹn wẹo, nugbodidọ po walọ dagbe po nọ hẹn ale daho hugan wá. Nugbo lọ wẹ yindọ nude ma họakuẹ sọ haṣinṣan dagbe de tintindo hẹ Jehovah. Naegbọn hiẹ na do hẹn haṣinṣan enẹ gble gbọn awujijona nuyiwa nugbomadọ tọn dali ma nado duwinyan to gbẹtọ lẹ nukọn kavi nado mọ ale he ma sọgbe hẹ osẹ́n yí? Mahopọnna avùnnukundiọsọmẹ depope he mí pannukọn, mí sọgan tindo jide to hogbe psalm-kàntọ lọ tọn lẹ mẹ dọmọ: “Donanọ [kavi ayajẹnọ] wẹ sunnu lọ he yí OKLUNỌ do basi tudonu etọn, bo masọ zẹ̀ do saklanọ dè, kavi yé he nọ lẹ́ jẹ apadopo hlan lalo lẹ.”—Psalm 40:4.

[Yẹdide to weda 18]

Klistiani nugbo lẹ ma nọ họ̀ kavi yí wema oklọ tọn lẹ zan gba