Jiji Jesu Tọn—Lehe E Hẹn Jijọho Wá Gbọn

E MA yin nulila angẹli lẹ tọn he yin “jijọho to gbẹtọ mẹhe mẹ ewọ yin homẹhunnọ te lẹ ṣẹnṣẹn” kẹdẹ wẹ yin dọdai he gando jiji Jesu tọn go gba. To yidogọ mẹ na nuhe yé lá na lẹngbọhọtọ lẹ, wẹnsagun olọnmẹ tọn lẹ ko lá ohó Jiwheyẹwhe tọn gando Jesu go na Malia po asu etọn, Josẹfu po. Dogbapọnna wẹndomẹ ehelẹ na gọalọna mí nado tindo pọndohlan he gbloada gando jiji Jesu tọn go bo mọnukunnujẹ zẹẹmẹ nujọnu tọn he opagbe angẹli lẹ tọn heyin jijọho to gbẹtọ lẹ ṣẹnṣẹn bẹhẹn mẹ.

Jẹnukọnna jiji Jesu tọn, yèdọ whẹpo Malia tlẹ do mọhò, angẹli de he Biblu ylọ dọ Gabliẹli dla ẹ pọ́n. Angẹli lọ dọnudo e dọmọ: “Oyinjla, hiẹ he mọ nukundagbe daho, [Jehovah] tin to dè we.” Dile hiẹ sọgan lẹn do, ehe dotukla Malia taun bo tlẹ sọgan ko dobuna ẹn vude. Zẹẹmẹ tẹwẹ nudọdomẹ mọnkọtọn sọgan tindo?

Gabliẹli dọmọ: “Doayi e go, hiẹ na mọhò to ohò towe mẹ, bo nasọ ji visunnu de bosọ ylọ oyín etọn Jesu. Ewọ na yin kiklo, Ovi Gigogán tọn wẹ yè na nọ ylọ ẹ: [Jehovah] Jiwheyẹwhe nasọ yí ofìn Davidi otọ́ etọn tọn na ẹn. E nasọ duahọlu to owhé Jakobu tọn gbè kakadoi; ahọludu etọn ma na do pòdo.” Malia kàn lehe enẹ na jọ do sè, to whenuena e yindọ ewọ he yin yọnnu alọji de, ma ko tindo kọndopọ zanhẹmẹ tọn hẹ sunnu de pọ́n. Gabliẹli yigbe dọ ohò ovi lọ tọn na yin mimọ gbọn gbigbọ wiwe Jiwheyẹwhe tọn dali. Ovi ehe na gbọnvo taun.—Luku 1:28-35.

Ahọlu Dopagbe De

Ohó Gabliẹli tọn lẹ dona ko gọalọna Malia nado yọnẹn dọ visunnu he e na wá ji lọ ji wẹ dọdai hohowhenu tọn lẹ sinai do. Nudọnamẹ he Jehovah dehia Malia dọ visunnu etọn na mọ “ofìn Davidi otọ́ etọn tọn” yí na hẹn ewọ—podọ na nugbo tọn Ju depope he jẹakọ hẹ Owe-wiwe—nado lẹnnupọndo opagbe he Jiwheyẹwhe do na Ahọlu Davidi Islaeli tọn ji.

Gbọn yẹwhegán Natani gblamẹ, Jehovah ko dọna Davidi dọmọ: “Owhé towe po ahọludu towe po yè na hẹn ẹn lí kakadoi to nukọn towe: yè na hẹn ofìn towe lodo kakadoi.” (2 Samuẹli 7:4, 16) Jehovah dọ gando Davidi go dọmọ: “Okún etọn ga wẹ yẹn na hẹn dẹn kaka, podọ ofìn etọn di azán olọn tọn lẹ. Okún etọn na tin kakadoi, podọ ofìn etọn taidi owhè to nukọn ṣie.” (Psalm 89:20, 29, 35, 36) Enẹwutu, e ma yin kosọ de dọ Malia po Josẹfu po wá sọn kúnkan Davidi tọn mẹ gba.

E ma yin ehelẹ kẹdẹ wẹ dọdai Owe-wiwe Heblu tọn he gando visunnu Davidi tọn he na yin ahọlu go gba. Malia na ko sọ jẹakọ hẹ dọdai Isaia tọn he dọmọ: “Yè ji ovi de hlan mí, yè na visunnu de hlan mí; ahọludu nasọ tin to abọ́ etọn ji: yè na nọ ylọ oyín etọn dọ Jiawu, Hónamẹtọ, Jiwheyẹwhe Huhlọnnọ, Otọ́ Madopodo, Ahọvi Jijọho tọn. Ahọludu etọn po jijọho po ma na ponu, to ofìn Davidi tọn ji, podọ to ahọludu etọn ji, nado nọ pọ́n e go, podọ nado sọ yonu etọn hẹnai, gbọn whẹdida dali; podọ gbọn dodo dali, sọn dinvie, yèdọ kakadoi. Vivẹnu OKLUNỌ awhànpa lẹ tọn tọn na basi ehe.”—Isaia 9:6, 7.

Enẹwutu, owẹ̀n he Gabliẹli do na Malia bẹ nususu hẹn hugan visunnu de jiji to azọ́njiawu-liho. Visunnu etọn na dugu gánzinpo Ahọlu Davidi tọn—yèdọ whédutọ tẹgbẹ tọn Ahọluduta Jiwheyẹwhe tọn. Dọdai Gabliẹli tọn lẹ gando azọngban sọgodo tọn Jesu tọn go tindo zẹẹmẹ titengbe lẹ na mímẹpo.

To whenuena Josẹfu sè dọ asi-mọdo-aliji etọn mọhò, e de nado jo e do. E yọnẹn dọ ovi lọ ma yin etọn na ewọ po Malia po ma tindo kọndopọ zanhẹmẹ tọn pọ́n gbede. Yí nukun homẹ tọn do pọ́n lehe e na vẹawu na Josẹfu do sọ nado yí zẹẹmẹ he Malia basi na ẹn gando ohò etọn go sè! Kandai Owe Wẹndagbe tọn dọmọ: “Angẹli [Jehovah] tọn sọawuhia ẹ to odlọ mẹ, bo dọmọ, Josẹfu, hiẹ ovi Davidi tọn, a dibu nado plan Malia asi towe blo, na enẹ he to ohò etọn mẹ, [gbigbọ wiwe] si wẹ e sọn. E nasọ ji visunnu de, Jesu wẹ hiẹ na ylọ oyín etọn, na ewọ wẹ na whlẹn omẹ etọn lẹ gán sọn ylando yetọn lẹ mẹ.”—Matiu 1:20, 21.

Biblu ma dọ obá he mẹ Josẹfu mọnukunnujẹ lehe ovi lọ na “whlẹn omẹ etọn lẹ gán sọn ylando yetọn lẹ mẹ” do mẹ jẹ gba. Ṣogan, owẹ̀n ehe ko pé nado na jide Josẹfu dọ Malia ma hùwhẹ ylanwiwa depope tọn. E hodo anademẹ angẹli lọ tọn bo plan Malia wá whégbè, yèdọ nuyiwa de he nọtena alọwiwle.

Po alọgọ nudọnamẹ he yin mimọ to fidevo lẹ to Owe-wiwe mẹ po, mí sọgan mọnukunnujẹ nuhe angẹli lọ to didọ mẹ. To bẹjẹeji whenuho gbẹtọvi tọn, angẹli atẹṣitọ de diọavunnukunsọ nupojipetọ-yinyin Jehovah tọn. Owe-wiwe Heblu tọn dohia dọ atẹṣitọ ehe sọalọakọ́n dọ Jiwheyẹwhe ma nọ dugán to aliho dodo tọn mẹ podọ gbẹtọ depope ma na hẹn tenọgligo hlan Jehovah to whlepọn glọ gba. (Gẹnẹsisi 3:2-5; Job 1:6-12) Mẹhe ma hẹn tenọgligo dopo wẹ Adam. Taidi kọdetọn ylando etọn tọn, gbẹtọ lẹpo dugu ylando tọn, podọ ylando enẹ hẹn okú wá. (Lomunu lẹ 5:12; 6:23) Ṣigba, Jesu yin jiji matin ylando depope na e ma yin gbẹtọ wẹ dóhò etọn gba. Gbọn ogbẹ̀ pipé gbẹtọvi tọn etọn zizejo taidi avọ́sinsan he sọgbe pẹpẹ hẹ nuhe Adam hẹnbu dali, Jesu penugo nado whlẹn gbẹtọvi lẹ sọn ylando yetọn lẹ mẹ bo na yé todido ogbẹ̀ madopodo tọn.—1 Timoti 2:3-6; Titu 3:6, 7; 1 Johanu 2:25.

To lizọnyizọn aigba ji tọn etọn whenu, Jesu basi dohia nuhe nugandomẹgo ylando tọn lẹ didesẹ na zẹẹmẹdo tọn. E hẹn azọ̀n wunmẹ lẹpo gbọ na gbẹtọ lẹ bo tlẹ sọ fọ́n oṣiọ lẹ sọnku. (Matiu 4:23; Johanu 11:1-44) Azọ́njiawu enẹlẹ do nuhe e na wà to sọgodo hia. Jesu lọsu dọmọ: “Ojlẹ lọ ja, to ehe mẹ mẹhe tin to yọdò mẹ lẹpo na sè ogbè [ṣie], bo na tọnjẹgbonu.”—Johanu 5:28, 29.

Opagbe he gando fọnsọnku sọgodo tọn go enẹ basi zẹẹmẹ nuhewutu jiji Jesu tọn, podọ titengbe okú etọn, do yin nujọnu na mí taun. Jiwheyẹwhe do Ovi etọn hlan aihọn mẹ “na yè nido gbọn ewọ mẹ whlẹn aihọn gán,” wẹ Johanu 3:17 dọ. Owẹ̀n jiawu ehe flin mí nuhe angẹli lẹ lá na lẹngbọhọtọ he to lẹngbọ lẹ họ́ to ozán he mẹ Jesu yin jiji.

“Wẹndagbe Homẹhunhun Daho Tọn”

Na nugbo tọn, “wẹndagbe homẹhunhun daho tọn” wẹ e yin na gbẹtọvi lẹ to whenuena angẹli lẹ lá jiji “Whlẹngantọ de [tọn] . . . he yin Klisti Oklunọ.” (Luku 2:10, 11) Ovi ehe wẹ na yin Mẹssia, Yẹwhegán po Gandutọ daho lọ po he omẹ Jiwheyẹwhe tọn lẹ ko to nukundo na ojlẹ dindẹn. (Deutelonomi 18:18; Mika 5:2) Gbẹzan etọn po okú etọn po to aigba ji na yí adà titengbe de wà nado suwhẹna nupojipetọ-yinyin Jehovah tọn sọmọ bọ angẹli lẹ sọgan lá dọmọ: “Gigo hlan Jiwheyẹwhe to olọn aga.”—Luku 2:14.

Jesu, he Biblu ylọ dọ “Adam godo tọn,” dohia dọ gbẹtọ sọgan yin nugbonọ na Jehovah to whlepọn he tlẹ sinyẹn hugan glọ. (1 Kọlintinu lẹ 15:45) Gbọnmọ dali, e do Satani hia taidi lalonọ he ylan hugan. Ehe hẹn ayajẹ wá na angẹli nugbonọ lẹ to olọn mẹ.

Ṣigba, mì gbọ mí ni vọ́ dogbapọnna kanbiọ lọ dọ, “Be todido nujọnu tọn depope tin dọ nuhe angẹli lẹ dọ to ozán he mẹ Jesu yin jiji te na mọ hẹndi ya?” Po nujikudo po mọwẹ! Jijọho yin adà tangan to hẹndi lẹndai Jiwheyẹwhe tọn na aigba mẹ, ehe bẹ aigba didiọzun paladisi hẹn. To whenuena enẹ na ko yin wiwadotana lẹdo aihọn pé, nuyiwa mẹlẹpo tọn na nọ yin whinwhàn gbọn owanyi po nugbonọ-yinyin po dali. Enẹwutu, hẹndi lẹndai Jehovah tọn sọ biọ dọ mẹhe jẹagọdo nupojipetọ-yinyin etọn lẹpo ni yin didesẹ. Ehe ma yin wẹndagbe de na mẹdepope he nọgodona Satani he sọalọakọ́n dọ nujinọtedo Jehovah tọn lẹ ma sọgbe. Omẹ mọnkọtọn lẹ na yin vivasudo.—Psalm 37:11; Howhinwhẹn lẹ 2:21, 22.

Doayi e go dọ angẹli lẹ ma dọna lẹngbọhọtọ lẹ dọ gbẹtọ lẹpo na tindo jijọho po nukundagbe po gba. Kakatimọ, yé lá ‘jijọho to gbẹtọ mẹhe mẹ ewọ yin homẹhunnọ te lẹ ṣẹnṣẹn.’ Enẹ zẹẹmẹdo jijọho to mẹhe Jiwheyẹwhe kẹalọyi bosọ do nukundagbe hia lẹ ṣẹnṣẹn. Mẹhe do yise nujọnu tọn hia to Jehovah mẹ lẹ nọ lẹzun hodotọ nugbonọ he nọ hodo apajlẹ Jesu tọn lẹ. Omẹ mọnkọtọn lẹ nọ tindo ojlo nado do homẹdagbe po awuvẹmẹ po hia mẹdevo lẹ to ojlẹ lẹpo mẹ, kakati nido yin na azán vude poun.

Jijọho Klistiani Tọn Na Gbọṣi Aimẹ

Huhlọn wẹndagbe he Jesu lá tọn ko yinuwado gbẹzan gbẹtọ madosọha lẹ tọn ji. Mẹsusu ko yí nunọwhinnusẹ́n Klistiani tọn lẹ zan to adà gbẹzan tọn yetọn lẹpo mẹ. Mẹhe yin ṣejannabinọ dai lẹ ko jẹ nuhe Jesu na ko wà eyin ewọ wẹ tin to ninọmẹ yetọn mẹ kanse yedelẹ ji. Mẹdelẹ he ze gbẹzan yetọn sinai do nutindo po gbẹdudu po ji dai ko wá yọ́n nujọnu-yinyin nuhọakuẹ gbigbọmẹ tọn lẹ tọn bosọ mọ dọ emilẹ tin to dandannu glọ nado má yé hẹ mẹdevo lẹ. Omẹ mọnkọtọn lẹ nọ dovivẹnu nado do alọtútlú po homẹdagbe po hia to ojlẹ lẹpo mẹ. Be e ma yin nuhe hiẹ na donukun dọ Klistiani nugbo lẹ ni wà niyẹn ya?

Eyin gbẹtọ ahundoponọ lẹpo yiagbọji bo lẹnnupọndo nujọnu-yinyin po zẹẹmẹ wẹndomẹ jijọho angẹli lọ lẹ tọn po ji bo yinuwa sọgbe hẹ nudọnamẹ mọnkọtọn lẹ, matin ayihaawe ninọmẹ aihọn lọ tọn na pọnte taun.

Dọdai he gando jiji Jesu tọn go lẹ na jide mẹhe tindo nukundagbe Jiwheyẹwhe tọn lẹ dọ yé sọgan duvivi jijọho nujọnu tọn kakadoi. Be e ma yin nuhe hiẹ jlo niyẹn ya? Mí sọgan deji dọ nulila gigonọ dọdai jijọho tọn he angẹli lẹ basi to whenuena Jesu yin jiji na mọ hẹndi dandan. Kakati nido yin nùmẹ-yozò Noẹli whenu tọn, mí tindo jide dọ jijọho na wá tin kakadoi.

[Yẹdide to weda 7]

Jijọho Klistiani tọn sọgan bosọ dona yin didohia to ojlẹ lẹpo mẹ