Nukọnyiyi Ayidego Tọn to Awuwiwlena Biblu to Ogbè Aflika Tọn lẹ Mẹ
BIBLU hiatọ ahundoponọ lẹ sọn Europe po Agewaji Amelika tọn po mẹ ko mọ sọn whenu dindẹn die dọ Aflikanu lẹ tindo nuhudo nado hia Ohó Jiwheyẹwhe tọn to ogbè yetọn titi lẹ mẹ. Nado jẹ yanwle dagbe ehe kọ̀n, mẹsusu yì Aflika nado plọn ogbè Aflika tọn lẹ. Mẹdelẹ wleawuna wekun kinkàn na ogbè delẹ bosọ basi wezẹhomẹ lẹ. Enẹgodo, yé jẹ lẹdogbedevomẹ Biblu tọn basi do ogbè Aflika tọn susu mẹ ji. Azọ́n ehe ma bọawu gba. Owe alọdlẹndonu tọn de dọmọ: “E sọgan biọ dọ dodinnanu ni yin bibasi na owhe susu whẹpo hogbe he sọgbe na yin mimọ na nuplọnmẹ dodonu Klistiani tọn he tlẹ bọawu hugan lẹ.”—The Cambridge History of the Bible.
To 1857, tswana lẹ lẹzun omẹ tintan he tindo Biblu blebu to ogbè Aflika tọn he ma tindo wekun kinkàn dai de mẹ.a E yin zinzinjẹgbonu bo yin bibladopọ do adà voovo lẹ mẹ kakati nido yin owe blebu dopo. To nukọn mẹ, lẹdogbedevomẹ Biblu tọn lẹ yin bibasi do ogbè Aflika tọn devo lẹ mẹ. Susu to lẹdogbedevomẹ dowhenu tọn ehelẹ mẹ bẹ yinkọ Jiwheyẹwhe tọn, Jehovah hẹn, to Owe-wiwe Heblu tọn kavi “Alẹnu Hoho,” po Owe-wiwe Glẹki tọn kavi “Alẹnu Yọyọ” po mẹ. Ṣigba, lẹdogbedevomẹ yọyọ po dehe yin vivọjlado lẹ po yin bibasi gbọn mẹhe ma tindo sisi na yinkọ wiwe Dowatọ Biblu tọn, Jehovah, lẹ dali. Kakatimọ, yé hodo otangblo aṣa Ju lẹ tọn lẹ gbọn tẹnmẹ yinkọ delẹ taidi Jiwheyẹwhe kavi Oklunọ yíyí do diọ yinkọ Jiwheyẹwhe nugbo lọ tọn dali. Gbọnmọ dali, e lẹzun dandannu na mẹhe yiwanna Jiwheyẹwhe to Aflika lẹ nado tindo lẹdogbedevomẹ Biblu tọn he gọ̀ yinkọ Jiwheyẹwhe tọn do otẹn etọn mẹ.
Sọn owhe 1980 lẹ, Hagbẹ Anademẹtọ Kunnudetọ Jehovah tọn lẹ tọn ko dovivẹnu to pọmẹ nado mọ dọ Les Saintes Écritures — Traduction du monde nouveau yin lilẹ́ do ogbè Aflika tọn tangan delẹ mẹ. Taidi kọdetọn de, fọtọ́n kanweko susu wanyina Biblu tọ́ lẹ tọn to Aflika sọgan hia Biblu Traduction du monde nouveau to akọgbè yetọn lẹ mẹ. Kakajẹ din, Biblu Traduction du monde nouveau to blebu mẹ kavi to apadewhe, tin-to-aimẹ to ogbè 17 Aflika tọn lẹ mẹ.
Mẹhe nọ hia Biblu ogbè Aflika tọn ehelẹ hùnhomẹ nado tindo lẹdogbedevomẹ he yí yinkọ gigonọ Jiwheyẹwhe tọn, Jehovah, zan. Di apajlẹ, to whenuena Jesu fọnṣite to sinagọgu Nazalẹti tọn mẹ, e lá azọ́ndenamẹ etọn gbọn apadewhe owe-hihá Isaia tọn hihia dali, fie yinkọ Otọ́ etọn tọn sọawuhia te. (Isaia 61:1, 2) Sọgbe hẹ Owe Wẹndagbe Luku tọn dile e sọawuhia to Les Saintes Écritures — Traduction du monde nouveau mẹ do, Jesu hia dọmọ: “Gbigbọ Jehovah tọn tin to oji e, na e ko yiamisisadode mi nado lá wẹndagbe na wamọnọ lẹ, ewọ do mi hlan nado dọyẹwheho tundote tọn hlan kanlinmọ lẹ podọ nukunnumimọ tọn hlan nukuntọ́nnọ lẹ, nado tún mẹhe yin kọgbidina lẹ dote, nado dọyẹwheho owhe alọkẹyi Jehovah tọn.”—Luku 4:18, 19.
Nukọnyiyi ayidego tọn devo to awuwiwlena Biblu to ogbè Aflika tọn lẹ mẹ wá aimẹ to août 2005. To osun enẹ mẹ, hugan vọkan 76 000 Traduction du monde nouveau tọn to ogbè Aflika tọn lẹ mẹ wẹ yin zinzinjẹgbonu bo yin bibladopọ to alahọ Kunnudetọ Jehovah tọn lẹ tọn mẹ to Afrique du Sud. Vọkan Biblu tọn 30 000 to ogbè chona mẹ tin to sọha enẹ mẹ. Biblu ehe yin didetọn to Plidopọ Agbegbe “Tonusisena Jiwheyẹwhe” tọn he Kunnudetọ Jehovah tọn lẹ basi to Zimbabwe ji.
To osun ayidego tọn enẹ mẹ, jonọ he dla alahọ Afrique du Sud tọn pọ́n lẹ gọ́ na ayajẹ nado mọ zinjẹgbonu Biblu lẹ tọn to ogbè Aflika tọn devo lẹ mẹ. “Homẹ ṣie hùn taun na lẹblanulọkẹyi he n’tindo nado tindo mahẹ to awuwiwlena Biblu Traduction du monde nouveau to chona po ogbè Aflika tọn devo lẹ po mẹ,” wẹ Nhlanhla, hagbẹ whẹndo Bẹtẹli tọn de he nọ wazọ́n to fie owe lẹ nọ yin bibladopọ te dọ. Na nugbo tọn, e dọ nuhe yin numọtolanmẹ hagbẹ whẹndo Bẹtẹli Afrique du Sud tọn lẹpo tọn.
Taidi kọdetọn de, Biblu sọgan yawu jẹ mẹhe nọ nọ̀ Aflika lẹ dè bo nasọ pọ̀kuẹ hugan whenue e nọ yin zinzinjẹgbonu bo nọ yin bibẹ wá sọn yovotomẹ. Hú popolẹpo, lẹdogbedevomẹ dagbe he yí yinkọ wiwe Dowatọ Biblu tọn, Jehovah Jiwheyẹwhe zan ko tin-to-aimẹ na Aflikanu lẹ todin.
[Nudọnamẹ Odò Tọn]
a To 1835, Biblu ko yin lilẹdo ogbè malgache Madagascar tọn mẹ, podọ to 1840, e ko yin lilẹdo ogbè amharique Ethiopie tọn mẹ. Ogbè ehelẹ ko nọ yin kinkàn ojlẹ dindẹn whẹpo Biblu wá yin lilẹ́ do yé mẹ.
[Yẹdide to weda 12]
Harold Strange Library of African Studies
[Yẹdide to weda 12]
Yinkọ Jiwheyẹwhe tọn to Biblu tswana-gbè tọn mẹ he yin zinzinjẹgbonu to 1840
[Yẹdide to weda 13]
Jonọ he wá sọn Swaziland lẹ to Biblu yọyọ he to yinyin zinzinjẹgbonu to alahọ Afrique du Sud tọn mẹ pọ́n