Amọsi—Ovò-Sinsẹ́n Ṣinyantọ Kavi Mẹhe Nọ Tọ́n Odò Na?
TO OWHE kanweko ṣinẹnẹtọ J.W.M., yẹwhegán Amọsi yin gbedena gbọn Amazia, yèdọ yẹwhenọ kanylantọ oyìnvu sẹ̀ntọ de dali nado doalọtena dọdai didọ to Islaeli. Amọsi gbẹ́, bo dọ dọ: “Lẹngbọyìntọ de wẹ yẹn, podọ [mẹhe nọ tọ́n odò na ovò-sinsẹ́n, NW ] atin sikomọle tọn de: OKLUNỌ bosọ de mi sọn lẹngbọpa hihodo mẹ, OKLUNỌ bosọ dọhlan mi dọ, Yì, dọ dọdai hlan Islaeli omẹ towe lẹ.” (Amọsi 7:14, 15) Mọwẹ, Jehovah wẹ do Amọsi hlan taidi yẹwhegán, e ma yin ewọ lọsu wẹ de ede gba. Ṣigba etẹ dọ wẹ Amọsi te to whenuena e dọ dọ emi yin “mẹhe nọ tọ́n odò na” ovò-sinsẹ́n atin sikomọle tọn lẹ?
Whladopo gee wẹ hogbe Heblu tọn he yin lilẹdogbedevomẹ domọ sọawuhia to Biblu Traduction du monde nouveau mẹ. Lẹdogbedevomẹ Biblu tọn devo lẹ lilẹ́ hogbe lọ dọ “ṣinṣinyantọ,” “pipọ̀tọ,” “jladotọ,” kavi “didotọ” ovò-sinsẹ́n sikomọle tọn, kakati nido yin “mẹhe nọ tọ́n odò na.” Ṣigba, linlinwe lọ Economic Botany dọ dọ lẹdogbedevomẹ he sọgbe hogbe lọ tọn dona yin “mẹhe nọ tọ́n odò,” na hogbe ehe do nuyiwa vonọtaun de hia gando pipọ̀tọ ovò-sinsẹ́n sikomọle tọn lẹ go.
Aṣa lọ nado nọ tọ́n odò flinflin lẹ do ovò-sinsẹ́n sikomọle tọn lẹ go ko gbayipe taun to Egipti po Kiplu po sọn hohowhenu gbọ́n. Odò masọ nọ yin tintọ́n do ovò-sinsẹ́n lẹ go to Islaeli egbezangbe tọn mẹ ba na ovò-sinsẹ́n wunmẹ devo lẹ wẹ nọ yin didó to finẹ todin. Ṣigba, aṣa odò tintọ́n tọn lọ gbayipe to Islaelivi lẹ ṣẹnṣẹn to azán Amọsi tọn gbè, na sikomọle he nọ yin didó to Islaeli to whenẹnu wá sọn Egipti.
E taidi dọ, odò tintọ́n do ovò-sinsẹ́n lẹ go nọ zọ́n bọ yé nọ dọ̀n osin bo nọ dósin ganji. E sọ nọ zọ́n bọ sinsẹ́n lọ lẹ nọ yawu bia bo nọ klo bosọ nọ vivi dogọ. Humọ, ogbọ́n lẹ ma nọ hẹn sinsẹ́n lọ lẹ gble, na yé nọ yawu bia wutu.
Mahopọnna dọ lẹngbọyìntọ tata de poun wẹ Amọsi yin bosọ nọ tọ́n odò na ovò-sinsẹ́n lẹ, ewọ ma dibuna kẹntọ etọn lẹ gba. Kakatimọ, e yí adọgbigbo do lá owẹ̀n whẹdida Jehovah tọn sọta Islaeli. Apajlẹ dagbe nankọ die na devizọnwatọ Jiwheyẹwhe tọn lẹ to egbehe, he dona lá owẹ̀n he mẹsusu ma yiwanna de!—Matiu 5:11, 12; 10:22.