Dọ Ohó Jiwheyẹwhe Tọn po Adọgbigbo Po
‘Yì, dọ dọdai hlan omẹ ṣie lẹ.’—AMỌSI 7:15.
1, 2. Omẹ nankọ wẹ Amọsi yin, podọ etẹwẹ Biblu dọ gando ewọ go?
DILE devizọnwatọ Jehovah tọn de to lizọnyizọn etọn hẹndi, yẹwhenọ de diọnukunsọ ẹ. Yẹwhenọ lọ dawhá dọ: ‘A sọ dọyẹwheho ba blo! Tọ́nsọn lẹdo ehe mẹ!’ Nawẹ devizọnwatọ ehe yinuwa gbọn? Be e jogbe wẹ, kavi e zindonukọn nado to ohó Jiwheyẹwhe tọn dọ po adọgbigbo po? Hiẹ sọgan mọ gblọndo kanbiọ ehe tọn na devizọnwatọ enẹ basi kandai nujijọ gbẹzan etọn tọn do owe he tindo yinkọ edetiti tọn de mẹ. Owe Amọsi tọn he tin to Biblu mẹ wẹ. Ṣigba, whẹpo mí nido yọ́n nususu dogọ dogbọn kosọdudu devizọnwatọ lọ tọn hẹ yẹwhenọ lọ dali, mì gbọ mí ni gbadopọnna nudọnamẹ dodonu tọn delẹ gando Amọsi go.
2 Omẹ nankọ wẹ Amọsi yin? Whetẹnu podọ fie wẹ e nọgbẹ̀ te? Gblọndo kanbiọ ehelẹ tọn tin to Amọsi 1:1 mẹ, he hia dọmọ: “Ohó Amọsi tọn lẹ, mẹhe tin to kanlinyìntọ Tekoa tọn lẹ ṣẹnṣẹn . . . to azán Uzia ahọlu Juda tọn tọn lẹ mẹ, podọ to azán Jeloboami tọn, visunnu Joaṣi ahọlu Islaeli tọn tọn lẹ mẹ.” Amọsi yin tòvi Juda tọn bo nọ nọ̀ Tekoa he tin to kilomẹtlu 16 do hùwaji Jelusalẹm tọn. E nọgbẹ̀ to vivọnu owhe kanweko ṣinẹnẹtọ J.W.M. tọn to whenuena Ahọlu Uzia dugán to Juda bọ Jeloboami II dugán do ahọluduta whẹndo ao Islaeli tọn ji. Lẹngbọyìntọ de wẹ Amọsi yin. Na taun tọn, Amọsi 7:14 dọ dọ Amọsi ma yin “lẹngbọyìntọ” kẹdẹ gba, ṣigba e sọ yin “jladotọ atin sikomọle tọn” ga. Ehe dohia dọ e nọ yí ojlẹ de zan to owhe mẹ nado wazọ́n to jijẹwhenu. E nọ tọ́n ovò-sinsẹ́n lẹ. Azọ́n ehe nọ yin wiwà na ovò-sinsẹ́n lẹ nido yawu bia. Azọ́n sinsinyẹn taun de wẹ e yin.
“Yì, Dọ Dọdai”
3. Nawẹ nupinplọn dogbọn Amọsi dali na gọalọna mí eyin mí lẹndọ mí ma pegan nado dọyẹwheho gbọn?
3 Amọsi dọ madoadúdẹji dọmọ: “Yẹn ma yin yẹwhegán de, mọ yẹn masọ yin visunnu yẹwhegán de tọn.” (Amọsi 7:14) E ma yin yẹwhegán de wẹ ji Amọsi gba, mọjanwẹ ewọ masọ yin azọ́nplọn taidi yẹwhegán de do niyẹn. Etomọṣo, to mẹhe tin to Juda lẹpo mẹ, Amọsi wẹ Jehovah de nado wà azọ́n Etọn. To ojlẹ enẹ mẹ, Jiwheyẹwhe ma de ahọlu huhlọnnọ de, yẹwhenọ weyọnẹntọ de, kavi ahọvi adọkunnọ de gba. Nuplọnmẹ jidenamẹ tọn de wẹ ehe yin na míwlẹ. Mí sọgan nọma diyin sọmọ to aihọn mẹ kavi yin wesetọ akonka de. Ṣigba be enẹ dona hẹn mí lẹndọ mí ma pegan nado dọyẹwheho ohó Jiwheyẹwhe tọn wẹ ya? Paali! Jehovah sọgan hẹn mí pegan nado lá owẹ̀n etọn—etlẹ yin to aigba-denamẹ avùnnukundiọsọmẹ tọn lẹ ji. Nuhe Jehovah wà na Amọsi pẹpẹ niyẹn. Enẹwutu nuyọnẹnnu wẹ e na yin na mẹhe jlo nado dọ ohó Jiwheyẹwhe tọn po adọgbigbo po lẹpo nado gbadopọnna apajlẹ yẹwhegán adọgbotọ enẹ tọn.
4. Naegbọn e yin avùnnukundiọsọmẹnu na Amọsi nado dọ dọdai to Islaeli?
4 Jehovah degbena Amọsi dọmọ: “Yì, dọ dọdai hlan Islaeli omẹ [ṣie] lẹ.” (Amọsi 7:15) Azọ́ndenamẹ avùnnukundiọsọmẹ tọn de wẹ enẹ yin. To whenẹnu, ahọluduta whẹndo ao Islaeli tọn to vivi jijọho, hihọ́ po adọkun po tọn dù. Susu yetọn wẹ tindo “ohọ̀ avivọ mẹ tọn” po “ohọ̀ alunlun mẹ tọn” lẹ po, he ma yin adó-họ̀ de poun gba, ṣigba “zannu pipà” akuẹgegenu tọn lẹ. Mẹdelẹ tindo nuyizan whanpẹnọ họmẹ tọn he yè yí ajinnakú-dú do doaṣọ́na lẹ, bo nọ nù ovẹn he wá sọn “vẹngle dagbedagbe lẹ” mẹ. (Amọsi 3:15; 5:11) Taidi kọdetọn de, mẹsusu ma kiya na nudepope. Na nugbo tọn, aigba he yin didena Amọsi sọgan ko taidi dehe ji delẹ to mí mẹ to lizọnyizọn mítọn hẹndi te to egbehe.
5. Nuyiwa mawadodo tọn tẹlẹ mẹ wẹ Islaelivi delẹ to mahẹ tindo te?
5 Nudepope ma ylan to e mẹ dọ Islaelivi lẹ ni tindo adọkunnu lẹ gba. Ṣigba, Islaelivi delẹ nọ hẹn adọkun yetọn sudeji to aliho mawadodo tọn lẹ mẹ. Adọkunnọ lẹ to “awú hẹn sinyẹn wamọnọ lẹ” bosọ “to agbátọnọ lẹ pẹ́tẹ.” (Amọsi 4:1) Ajọwatọ gbóogbó lẹ, whẹdatọ lẹ, po yẹwhenọ lẹ po blasé nado hò agbátọnọ lẹ dù. Todin mì gbọ mí ni lẹnnupọndo ojlẹ enẹ ji bo yí nukun homẹ tọn do pọ́n nuhe sunnu ehelẹ to wiwà.
Osẹ́n Jiwheyẹwhe Tọn Yin Gbigbà
6. Nawẹ Islaelivi ajọwatọ lẹ tafu mẹdevo lẹ gbọn?
6 Tintan whẹ́, lẹnnupọndo nuhe to jijọ to ahi mẹ ji. To finẹ ajọwatọ nugbomadọtọ lẹ hẹn “ẹfa lọ whè” bo hẹn ‘ṣekẹli klo,’ bo tlẹ sọ to ‘likun gúgú’ sà do dagbe tẹnmẹ. (Amọsi 8:5, 6) Ajọwatọ lẹ nọ hò ahisinọ yetọn lẹ dù gbọn nuhe sà yé te lẹ didepo, onú vẹahi sisà, po nuhe ma yọ́n ganji lẹ sisà po dali. To whenuena ajọwatọ lẹ ko tafu wamọnọ lẹ bo ko dù yé vọ̀ mlẹnmlẹn godo, e nọ wá lẹzun dandan na tapònọ enẹlẹ nado sà yede taidi kanlinmọ. To godo mẹ, ajọwatọ lọ lẹ nọ họ̀ yé yin akuẹ he sọgan yin yíyí do họ̀ “afọpa afọ lẹ tọn de.” (Amọsi 8:6) Yí nukun homẹ tọn do pọ́n! Ajọwatọ nukunkẹnnọ enẹlẹ nọ pọ́n Islaelivi hatọ yetọn lẹ hlan taidi nuhe ma họakuẹ hú afọpa tata de poun! Lehe ehe yin winyandomẹnu zẹjlẹgo na agbátọnọ lẹ, bosọ gbà Osẹ́n Jiwheyẹwhe tọn tlala do sọ! Ṣogan, ajọwatọ ehelẹ nọ payi “gbọjẹzan” go. (Amọsi 8:5) Mọwẹ, yé yin sinsẹ̀nnọ to nukunta.
7. Etẹwẹ hẹn ẹn yọnbasi na Islaelivi ajọwatọ lẹ nado gbà Osẹ́n Jiwheyẹwhe tọn?
7 Nawẹ ajọwatọ lọ lẹ wagbọn do dapana yasanamẹ he dona wá yé ji to whenuena yé gbà Osẹ́n Jiwheyẹwhe tọn he dọmọ: “Hiẹ na yiwanna kọmẹnu towe di dewe”? (Levitiku 19:18) Yé vò nado wà nudepope he jlo yé na mẹhe dona hẹnmẹ yìn Osẹ́n lẹ—yèdọ whẹdatọ lẹ—kọnawudopọ hẹ yé to sẹ́nhẹngba lọ mẹ. To họngbo tòdaho lọ tọn ji, fie owhẹ̀ nọ yin didá te, whẹdatọ lẹ nọ ‘yí núbla bosọ nọ lẹ́ agbátọnọ lẹ do apadopo sọn jlọjẹ yetọn mẹ.’ Kakati nado basi hihọ́na agbátọnọ lẹ, whẹdatọ lẹ nọ sà yé nado sọgan mọ alọgodokuẹ yí. (Amọsi 5:10, 12) Gbọnmọ dali, whẹdatọ lẹ lọsu to kọgbẹ́ Osẹ́n Jiwheyẹwhe tọn go.
8. Walọyizan tẹwẹ yẹwhenọ kanylantọ lẹ miyọnnukundo?
8 Etẹ yiwà wẹ yẹwhenọ Islaeli tọn lẹ ka te to whenuena ehe lẹpo to jijọ? Nado sọgan yọnẹn, mí dona lẹ́ ayidonugo mítọn hlan nọtẹn devo. Pọ́n ylando he yẹwhenọ lẹ kẹalọyi to ‘ohọ̀ yẹwhe yetọn lẹ tọn mẹ!’ Jiwheyẹwhe dọ gbọn Amọsi gblamẹ dọmọ: “Dawe de po otọ́ etọn po na yì jẹ yọnnuvu dopolọ dè, nado flu oyín wiwe ṣie.” (Amọsi 2:7, 8) Etẹ nkọ! Otọ́ Islaelivi de po visunnu etọn po nọ deayọ hẹ ogalọtọ tẹmpli mẹ tọn dopolọ. Podọ yẹwhenọ kanylantọ enẹlẹ miyọnnukundo fẹnnuwiwa mọnkọtọn!—Levitiku 19:29; Deutelonomi 5:18; 23:17.
9, 10. Osẹ́n Jiwheyẹwhe tọn tẹlẹ wẹ Islaelivi lẹ gbà, podọ nuyijlẹdonugo tẹwẹ sọgan yin bibasi po azán mítọn gbè po?
9 Jehovah dlẹnalọdo walọyizan ylankan devo dọmọ: “Yé sọ hẹn yede mlọnai to adà agbà dopodopo tọn ji to avọ̀ yè yí to afànu lẹ ji, podọ yé to ovẹn omẹ di omẹ yè ko wle ahọ́ lẹ nkọ tọn nù to ohọ̀ [yẹwhe yetọn lẹ] tọn mẹ.” (Amọsi 2:8) Mọwẹ, yẹwhenọ lẹ po omẹ paa lẹ po sọ gbẹkọ osẹ́n he yin kinkàndai to Eksọdusi 22:26, 27 mẹ go, ehe dọ dọ awù he yin yíyí do afànu dona yin gigọjo whẹpo ozán nido kú. Kakatimọ, avọ̀ ehelẹ ji wẹ yé nọ mlọ́n nado nùahàn bo basi hùnwhẹ hlan yẹwhe lalo lẹ. Podọ akuẹ he yé hòyí sọn wamọnọ lẹ si wẹ yé nọ yí do họ̀ ovẹn he yé na nù to hùnwhẹ sinsẹ̀n lalo tọn lẹ tẹnmẹ. Lehe yé ko buali mlẹnmlẹn sọn aliho sinsẹ̀n-bibasi wiwe-ṣeke tọn mẹ do sọ!
10 Islaelivi lẹ gbọn winyan matindo dali gbà gbedide Osẹ́n tọn awe he klohugan lẹ—yèdọ nado yiwanna Jehovah bosọ yiwanna kọmẹnu yetọn lẹ. Enẹwutu, Jiwheyẹwhe do Amọsi hlan nado gblewhẹdo yé na nugbonọ-mayin yetọn wutu. To egbehe, akọta aihọn tọn lẹ, he bẹ Mẹylọhodotọklisti tọn lẹ hẹn, sọzẹn pẹpẹ hẹ ninọmẹ gblezọn Islaeli hohowhenu tọn. Dile mẹdelẹ to adọkun jẹ, mẹsusu devo lẹ to ohẹ́n klókló jẹ bosọ yin awugblena to numọtolanmẹ-liho na walọ mawé nukọntọ mawadodonọ ajọ́ gbóogbó wàtọ lẹ, tonudọtọ lẹ, po sinsẹ̀n lalo tọn lẹ po tọn wutu. Ṣigba, Jehovah nọ hò mẹhe to yaji po mẹhe yin whinwhàn nado dín in lẹ po tọn pọ́n. Enẹwutu, e ko deazọ́nna devizọnwatọ etọn egbezangbe tọn lẹ nado wà azọ́n he taidi Amọsi tọn—yèdọ nado dọ ohó Etọn po adọgbigbo po.
11. Etẹwẹ mí sọgan plọn sọn apajlẹ Amọsi tọn mẹ?
11 Na kanṣiṣa he tin to azọ́n mítọn po Amọsi tọn po ṣẹnṣẹn wutu, mí na mọaleyi tlala eyin mí gbadopọnna apajlẹ etọn. Na nugbo tọn, Amọsi dohia mí (1) owẹ̀n he mí dona lá, (2) lehe mí dona dọyẹwheho gbọn, podọ (3) nuhewutu agọjẹdomẹtọ lẹ ma sọgan doalọtena azọ́n yẹwhehodidọ tọn mítọn. Mì gbọ mí ni gbadopọnna nuagokun ehelẹ dopodopo.
Lehe Mí Sọgan Hodo Apajlẹ Amọsi Tọn Gbọn
12, 13. Nawẹ Jehovah dohia dọ emi gblehomẹ do Islaelivi lẹ go gbọn, podọ nawẹ yé yinuwa gbọn?
12 Taidi Kunnudetọ Jehovah tọn lẹ, mí ze lizọnyizọn Klistiani tọn mítọn sinai do azọ́n yẹwheho Ahọluduta lọ tọn didọ po mẹhẹnzun devi po tọn ji. (Matiu 28:19, 20; Malku 13:10) Etomọṣo, mí sọ nọ dọ̀n ayidonugo wá avase Jiwheyẹwhe tọn lẹ ji, kẹdẹdile Amọsi lá dọ Jehovah na hẹn whẹdida whẹgbledomẹ tọn ṣẹ do mẹylankan lẹ ji do. Di apajlẹ, Amọsi 4:6-11 dohia dọ Jehovah hẹn ẹn họnwun pludopludo dọ emi gblehomẹ do Islaeli go. E hẹn “dindẹ́n [kavi whèdomẹ] akla tọn,” wá yé ji, “dọ̀n jikun dogodo sọn [yé] dè,” yí “ofufú po odọ́ po” do hò yé, bo do “azọ̀nylankan” hlan ṣẹnṣẹn yetọn. Be onú ehelẹ whàn Islaeli nado lẹnvọjọ ya? “Mìwlẹ ma ko lẹgọ do yẹn dè gba,” wẹ Jiwheyẹwhe dọ. Na nugbo tọn, whlasusu wẹ Islaelivi lẹ gbẹ́ Jehovah dai.
13 Jehovah domẹplọnlọ Islaelivi tó-tlítọ lẹ go. Ṣigba, whẹpo ehe nado jọ, yé mọ avase dọdai tọn de yí whẹ́. To kọndopọmẹ hẹ ehe, Jiwheyẹwhe lá dọmọ: “Oklunọ JIWHEYẸWHE ma na wà nude, adavo ewọ de aṣli etọn hia hlan devi etọn yẹwhegán lẹ.” (Amọsi 3:7) Jiwheyẹwhe dehia Noa dọ Singigọ na wá bo degbena ẹn nado lá avase de. Mọdopolọ, Jehovah dọna Amọsi nado lá avase godo tọn de. E blawu dọ, Islaeli gbẹkọ owẹ̀n Jiwheyẹwhe tọn enẹ go bo gboawupo nado de afọdide he sọgbe lọ.
14. Kanṣiṣa tẹlẹ wẹ tin to ojlẹ Amọsi tọn po mítọn po ṣẹnṣẹn?
14 Matin ayihaawe hiẹ na yigbe dọ kanṣiṣa he jẹna ayidego lẹ tin to ojlẹ Amọsi tọn po mítọn po ṣẹnṣẹn. Jesu Klisti dọ dọdai nugbajẹmẹji susu tọn he na jọ to ojlẹ opodo tọn mẹ. E sọ dọ dọdai azọ́n yẹwhehodidọ lẹdo aihọn pé de tọn ga. (Matiu 24:3-14) Ṣigba, dile e te to azán Amọsi tọn gbè do, to egbehe suhugan gbẹtọ lẹ tọn nọ gbẹkọ ohia azán mítọn gbè tọn lẹ po owẹ̀n Ahọluduta lọ tọn po go. Nuhe jọ do Islaelivi tó-tlítọ lẹ go pẹpẹ wẹ na jọ do omẹ mọnkọtọn lẹ go. Jehovah na yé avase dọmọ: “Wleawu nado [yì pé] Jiwheyẹwhe towe.” (Amọsi 4:12) Yé pé Jiwheyẹwhe gbọn numimọ whẹdida whẹgbledomẹ etọn tọn tintindo to whenuena Assilianu lẹ gbawhàn yetọn dali. To egbehe, aihọn jijọ-madi-Jiwheyẹwhe tọn ehe na ‘pé Jiwheyẹwhe’ to Amagẹdọni. (Osọhia 16:14, 16) Ṣogan, dile e na dẹnsọ bọ homẹfa Jehovah tọn na zindonukọn, mí to tudohomẹna mẹsusu dile e sọgan yọnbasi do dọmọ: “Mì dín OKLUNỌ, mì bo nasọ nọgbẹ̀.”—Amọsi 5:6.
Pipehẹ Agọjẹdomẹ Dile Amọsi Wà Do
15-17. (a) Mẹnu wẹ yin Amazia, podọ nawẹ e yinuwa hlan nulila Amọsi tọn lẹ gbọn? (b) Lalo tẹlẹ wẹ Amazia do dokọna Amọsi?
15 Mí sọgan hodo apajlẹ Amọsi tọn, e ma yin to nuhe mí nọ dọyẹwheho etọn kẹdẹ mẹ gba, ṣigba to lehe mí nọ dọyẹwheho gbọn mẹ ga. Enẹ yin nùzindeji to weta 7 mẹ, ehe dọhodo yẹwhenọ he yin nùdego to bẹjẹeji hodọdopọ mítọn tọn lọ ji. Ewọ wẹ “Amazia yẹwhenọ Bẹtẹli tọn.” (Amọsi 7:10) Tòdaho Bẹtẹli tọn yin ahọ́nkan sinsẹ̀n atẹṣitọ Islaeli tọn he bẹ sinsẹ̀n-bibasi oyìnvu tọn hẹn. Enẹwutu Amazia yin yẹwhenọ de to sinsẹ̀n otò lọ tọn mẹ. Nawẹ e yinuwa hlan nulila adọgbigbo tọn he Amọsi basi lẹ gbọn?
16 Amazia dọna Amọsi dọ: “Hiẹ numọtọ E, yì, hiẹ ni họnyi biọ aigba Juda tọn mẹ, bo dù akla finẹ, bosọ nọ dọ dọdai to finẹ: ṣigba a sọ dọ dọdai to Bẹtẹli ba blo: na fiwiwe ahọlu tọn e yin, podọ owhé ahọlu tọn e yin.” (Amọsi 7:12, 13) Na taun tọn, nuhe dọ Amazia te die: ‘Yì whégbè! Mí ko tindo sinsẹ̀n mítọn titi tofi.’ E sọ tẹnpọn nado whàn gandudu otò lọ tọn nado hẹnalọdotena nuwiwa Amọsi tọn lẹ, bo dọna Ahọlu Jeloboami II dọmọ: “Amọsi ko blanú do oji we to gblagbla owhé Islaeli tọn tọn gbè.” (Amọsi 7:10) Mọwẹ, Amazia sawhẹ sébibla tọn dokọna Amọsi! E dọna ahọlu lọ dọ: “Le wẹ Amọsi dọ dọmọ, Jeloboami na kú gbọn ohí dali, podọ Islaeli nasọ yin hinhẹn yì mẹglọnọ mẹ tọ́nsọn aigba etọn mẹ.”—Amọsi 7:11.
17 Nudọnamẹ mẹkiklọ tọn voovo atọ̀n wẹ tin to nuhe Amazia dọ lẹ mẹ. E dọmọ: “Le wẹ Amọsi dọ.” Ṣogan, Amọsi ma sọalọakọ́n pọ́n gbede dọ emi wẹ yin asisa dọdai lọ tọn. Kakatimọ, e nọ dọ to whepoponu dọ: “Le wẹ OKLUNỌ dọ.” (Amọsi 1:3) E sọ sawhẹdokọna Amọsi dọ ewọ lá dọ: “Jeloboami na kú gbọn ohí dali.” Ṣigba dile Amọsi 7:9 dohia do, dọdai he Amọsi dọ die: ‘Yẹn [Jehovah] nasọ yí ohí do fọ́n do owhé Jeloboami tọn ji.’ Jiwheyẹwhe ko dọ dọdai nugbajẹmẹji ehe tọn do ‘owhé’ Jeloboami tọn ji, yèdọ kúnkan etọn. Humọ, Amazia sọalọakọ́n dọ Amọsi lá dọ: ‘Islaeli na yin hinhẹn yì mẹglọnọ mẹ dandan.’ Ṣigba Amọsi sọ dọ dọdai dọ Islaelivi depope he lẹhlan Jiwheyẹwhe dè na mọ dona lẹ yí. E họnwun dọ, Amazia gbọn tasọdona nugbo dali tẹnpọn nado mọdọ azọ́n yẹwhehodidọ Amọsi tọn yin alọhẹndotena to osẹ́n-liho.
18. Kanṣiṣa tẹlẹ wẹ tin to aliho he Amazia yizan lẹ po dehe sinsẹ̀ngán lẹ nọ yizan to egbehe lẹ po ṣẹnṣẹn?
18 Be hiẹ doayi kanṣiṣa he tin to aliho he Amazia yizan lẹ po dehe mẹhe jẹagọdo omẹ Jehovah tọn lẹ nọ yizan to egbehe lẹ po ṣẹnṣẹn go ya? Kẹdẹdile Amazia tẹnpọn nado bọnùdo na Amọsi do, mọwẹ yẹwhenọ, nukọntọ sinsẹ̀n tọn, po sinsẹ̀ngán egbehe tọn delẹ po nọ tẹnpọn nado glọnalina azọ́n yẹwhehodidọ devizọnwatọ Jehovah tọn lẹ tọn do. Amazia sawhẹ sébibla tọn dokọna Amọsi. To egbehe, sinsẹ̀ngán delẹ nọ sawhẹdokọna Kunnudetọ Jehovah tọn lẹ dọ yé yin owù na hihọ́ akọta tọn. Podọ dile Amazia biọ alọgọ ahọlu tọn nado duto Amọsi ji do, mọwẹ sinsẹ̀ngán lẹ nọ saba dín godonọnamẹ tonudọtọ lẹ tọn nado dohomẹkẹn Kunnudetọ Jehovah tọn lẹ do.
Agọjẹdomẹtọ lẹ Ma Sọgan Doalọtena Azọ́n Yẹwhehodidọ Tọn Mítọn
19, 20. Nawẹ Amọsi yinuwa hlan agọjẹdomẹ Amazia tọn gbọn?
19 Nawẹ Amọsi yinuwa hlan agọjẹdomẹ Amazia tọn gbọn? Tintan whẹ́, Amọsi kanse yẹwhenọ lọ dọ: ‘Be hiẹ to didọ dọ, A sọ dọ dọdai do Islaeli go ba blo wẹ?’ To enẹgodo, yẹwhegán adọgbotọ lọ ma whleawu nado dọ nuhe Amazia ma jlo na sè paali lẹ. (Amọsi 7:16, 17) Ahun Amọsi tọn ma gbàdo. Apajlẹ dagbe nankọ die na míwlẹ! Na nuhe dù ohó Jiwheyẹwhe tọn didọ, mí ma na vẹtolina Jiwheyẹwhe mítọn, etlẹ yin to otò he mẹ Amazia egbezangbe tọn lẹ to homẹkẹn sinsinyẹn fọndote te lẹ mẹ gba. Taidi Amọsi, mí zindonukọn nado to lilá dọ: “Le wẹ OKLUNỌ dọ.” Podọ agọjẹdomẹtọ lẹ ma sọgan doalọtena azọ́n yẹwhehodidọ tọn mítọn pọ́n gbede, na “alọ [Jehovah] tọn” tin hẹ mí.—Owalọ lẹ 11:19-21.
20 Amazia dona ko yọnẹn dọ budonamẹ etọn na yin to ovọ́ mẹ. Amọsi ko dọ nuhewutu mẹdepope ma tin to aigba ji he sọgan hẹnalọdotena ẹn nado dọho—podọ enẹ wẹ yin nuagokun atọ̀ntọ he mí na gbadopọnna. Sọgbe hẹ Amọsi 3:3-8, Amọsi yí kanbiọ debọdo-dego po oló lẹ po zan nado dohia dọ nudepope ma nọ jọ matin hẹnwatọ. To enẹgodo, e basi yọn-na-yizan ehe dọmọ: “Kinnikinni lọ ko lì, mẹnu wẹ ma na sinú? Oklunọ JIWHEYẸWHE ko dọhó, mẹnu wẹ ma na dọ dọdai?” To hogbe devo mẹ, nuhe dọ Amọsi te na todoaitọ etọn lẹ die: ‘Kẹdẹdile mì ma sọgan nọma dibu to whenuena mì sè bọ kinnikinni de lì, mọdopolọ yẹn ma sọgan nọma dọ ohó Jiwheyẹwhe tọn to whenuena yẹn ko sè gbedide Jehovah tọn nado wàmọ.’ Obu, kavi sisi sisosiso tintindo na Jehovah wẹ whàn Amọsi nado dọhó po adọgbigbo po.
21. Nawẹ mí nọ yinuwa hlan gbedide Jiwheyẹwhe tọn nado dọyẹwheho wẹndagbe lọ tọn gbọn?
21 Mílọsu lẹ ko sè gbedide Jehovah tọn nado dọyẹwheho. Nawẹ mí yinuwa gbọn? Po alọgọ Jehovah tọn po, mí to ohó Etọn dọ po adọgbigbo po taidi Amọsi podọ taidi hodotọ dowhenu Jesu tọn lẹ. (Owalọ lẹ 4:23-31) Homẹkẹn he agọjẹdomẹtọ lẹ nọ fọndote kavi vọdonanu mẹhe mí nọ dọyẹwheho na lẹ tọn ma sọgan bọ̀ onù mítọn dó gba. Po zohunhun he taidi Amọsi tọn po, Kunnudetọ Jehovah tọn lẹ lẹdo aihọn pé yin whinwhàn nado yí adọgbigbo do to wẹndagbe lọ lá zọnmii. Azọngban mítọn wẹ e yin nado na avase gbẹtọ lẹ gando whẹdida Jehovah tọn he to unklẹn lọ go. Etẹwẹ whẹdida enẹ bẹhẹn? Gblọndo kanbiọ enẹ tọn na yin nina to hosọ he bọdego mẹ.
Nawẹ Hiẹ Na Na Gblọndo Gbọn?
• Ninọmẹ tẹlẹ mẹ wẹ Amọsi hẹn azọ́n he Jiwheyẹwhe dena ẹn di te?
• Taidi Amọsi, yẹwheho etẹ tọn wẹ mí dona dọ?
• Gbigbọ tẹwẹ mí dona yí do wà azọ́n yẹwhehodidọ tọn mítọn?
• Naegbọn agọjẹdomẹtọ lẹ ma sọgan doalọtena azọ́n kunnudide tọn mítọn?
[Yẹdide to weda 10]
Jiwheyẹwhe de Amọsi, heyin jladotọ ovotin tọn, nado wà azọ́n Etọn
[Yẹdide lẹ to weda 13]
Be hiẹ to owẹ̀n Jehovah tọn lá po adọgbigbo po taidi Amọsi ya?