Nunina Tẹgbẹ Tọn de Sọn Mẹdatọ lọ Dè
BE E ma paṣa we nado yọnẹn dọ nuhe lẹnunnuyọnẹntọ lẹ yise dọ e yin dandannu nado hẹn ogbẹ̀ dote to planẹti de ji sọawuhia kavi yin alọdlẹndo tlọlọ to weta tintan Biblu tọn mẹ ya? Etẹlẹ wẹ?
Na gbẹninọ nido yọnbasi, osin susu dona tin, dile Gẹnẹsisi 1:2 dọ do. Ninọmẹ aimẹ tọn dona tin to jlẹkaji na osin nido gbọṣi planẹti lọ ji. Ehe biọ dọ planẹti lọ ni dẹn do owhè dile e jẹ do. Kandai Gẹnẹsisi tọn dlẹnalọdo owhè po lehe e nọ yinuwado aigba ji do po whlasusu.
Whẹpo gbẹtọ nido sọgan nọ̀ planẹti de ji, e dona tindo agahomẹ he gọ́ na ozi titengbe delẹ. Adà tangan ehe yin nùdego to Gẹnẹsisi 1:6-8 mẹ. Ogbé susu he wú do aigba ji, dile Gẹnẹsisi 1:11, 12 dọ do, yidogọna asisa jẹhọn dagbe he tin-to-aimẹ tọn. Na kanlin wunmẹ voovo lẹ nido sọgan nọgbẹ̀ to planẹti de ji, e dona tindo aigba-klo he dojó, dile e yin zẹẹmẹ basina to Gẹnẹsisi 1:9-12 mẹ do. Podọ, nado tindo ninọmẹ aimẹ tọn dagbe, planẹti de dona dẹ́ hlan awà he sọgbe ji bo yin hinhẹndote ganji—to whẹho aigba tọn mẹ, huhlọn nudọnwado osun tọn wẹ nọ hẹn ehe yọnbasi jẹ obá de mẹ. Miyọ́n jọwamọ aigba tọn ehe po delẹ to dagbe he e nọ wà lẹ mẹ po yin nùzindeji to Gẹnẹsisi 1:14, 16 mẹ.
Nawẹ Mose he yin wekantọ hohowhenu tọn penugo nado dọ̀n ayidonugo wá nuhe yin nùdego to aga ehelẹ ji matin alọgọ lẹnunnuyọnẹn egbezangbe tọn gbọn? Be Mose mọnukunnujẹ nujọnu-yinyin onú ehelẹ tọn mẹ na e tindo nugopipe vonọtaun he mẹdevo lẹ ma tindo wutu wẹ ya? Gblọndo lọ wẹ yindọ ewọ yin gbigbọdo gbọn Mẹdatọ olọn lẹ po aigba po tọn dali. Ehe jẹna ayidego to pọndohlan mẹ na gbesisọ-yinyin kandai Gẹnẹsisi tọn.
Biblu hẹn ẹn họnwun dọ nujiawu he mí nọ mọ to lẹdo mítọn mẹ lẹ yin didá na lẹndai de wutu. Psalm 115:16 dọmọ: “Olọn lẹ wẹ olọn OKLUNỌ tọn lẹ: ṣigba aigba wẹ e yí na ovi gbẹtọ lẹ tọn lẹ.” Psalm devo dọmọ: “Ewọ ko do aihọn ai do dòdó etọn lẹ ji, bọ e ma nado yin tẹnsẹna gbedegbede.” (Psalm 104:5) Eyin wẹkẹ lọ po planẹti whanpẹnọ mítọn po yin awuwlena bo yin bibasi gbọn Mẹdatọ de dali, lẹnpọn dagbenu wẹ e yin nado yise dọ ewọ tindo nugopipe lọ nado penukundo yé go. Ehe dohia dọ hiẹ sọgan pọnnukọn po jidide po hlan hẹndi opagbe jiawu lọ tọn he dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” (Psalm 37:29) Na jide tọn, Jiwheyẹwhe “ma dá [aigba] tata gba” ṣigba e “do e na” gbẹtọvi pinpẹn-nutọn-yọnẹntọ he kẹalọyi nuwiwa etọn lẹ nido nọ nọ̀ e mẹ.—Isaia 45:18.
Sọgbe hẹ Owe-wiwe, Jesu wá aigba ji nado plọnnu mí gando Jiwheyẹwhe po lẹndai Etọn nado na ogbẹ̀ madopodo gbẹtọvi tonusetọ lẹ po go. (Johanu 3:16) Mí yin hinhẹn deji dọ to madẹnmẹ Jiwheyẹwhe na “husudo yé he to aihọn husudo lẹ” bọ gbẹtọvi akọta lẹpo tọn he yiwanna jijọho bo kẹalọyi awuwledainanu etọn na whlẹngán lẹ na luntọ́n. (Osọhia 7:9, 14; 11:18) Lehe gbẹninọ na jiawu do sọ dile gbẹtọvi lẹ to nujiawu nudida Jiwheyẹwhe tọn lẹ tọn mọ bosọ to vivi yetọn dù kakadoi!—Yẹwhehodọtọ 3:11; Lomunu lẹ 8:21.
[Asisa Yẹdide tọn]
NASA photo