Be Hiẹ Flin Ya?

Be a duvivi zinjẹgbonu Atọ̀họ̀-Nuhihọ́ Lọ Tọn agọe tọn lẹ hihia tọn ya? Pọ́n eyin a sọgan na gblọndo na kanbiọ he bọdego helẹ:

• Etẹwẹ mí sọgan plọn sọn oló Jesu tọn gando jonọyitọ linsinyẹntọ lọ go mẹ? (Luku 11:5-10)

Oló ehe do pọndohlan he mí dona tindo to whenuena mí to dẹ̀ho hia. Mí dona yí linsinsinyẹn do nọ to bibiọ, titengbe mí na nọ biọ gbigbọ wiwe Jiwheyẹwhe tọn to whepoponu. (Luku 11:11-13)—15/12, weda 20-2.

• Etẹwẹ oló Jesu tọn gando asuṣiọsi po whẹdatọ de po go plọn mí? (Luku 18:1-8)

E zinnudo nuhudo dẹ̀hiho tọn ji. To vogbingbọn mẹ na whẹdatọ lọ, Jehovah yin dodonọ bo tindo ojlo nado gọalọna mí. Humọ, mí dona tindo yise he nkọ asuṣiọsi oló lọ tọn tindo.—15/12, weda 26-8.

• Naegbọn apọsteli Paulu dọna Klistiani Kọlinti tọn lẹ nado “hundote” kavi hùndonuvo? (2 Kọlintinu lẹ 6:11-13)

E taidi dọ mẹdelẹ to Kọlinti ma yọ́n pinpẹn yisenọ hatọ yetọn lẹ tọn, yé sú ahun yetọn bo masọ hùndonuvo. Mí dona dovivẹnu nado wleawuna pinpẹn-nutọn-yinyọnẹn nujọnu tọn na yisenọ hatọ lẹ, bo tlẹ tẹnpọn nado jihọntọn yọyọ lẹ.—1/1, weda 9-11.

• Hiadogonamẹ tẹwẹ yin alọdlẹndo to Osọhia 7:3 mẹ?

To whenuena Jiwheyẹwhe yí gbigbọ wiwe do de Klistiani lẹ, enẹ yin hiadogonamẹ tintan lọ. Ṣigba Osọhia 7:3 dlẹnalọdo hiadogonamẹ godo tọn de, whenuena mẹyiamisisadode mọnkọtọn lẹ yin kunnudena dọ yé ko do nugbonọ-yinyin yetọn hia to gigọ́ mẹ.—1/1, weda 30-1.

• Etẹwẹ mẹjitọ lẹ sọgan plọn sọn kandai Biblu tọn he gando Samuẹli go mẹ?

Tintan whẹ́, yé dona plọn ovi yetọn lẹ ohó Jiwheyẹwhe tọn, dile mẹjitọ Samuẹli tọn lẹ wà do. Humọ, yé dona na tuli ovi yetọn lẹ nado yí sinsẹ̀nzọn Jehovah tọn do basi yanwle gbẹzan tọn yetọn.—15/1, weda 16.

• Nawẹ mí sọgan dohia dọ mí yí ayajẹ do to tenọpọn Jehovah gbọn?

Mí to “nukundo . . . azán Jiwheyẹwhe tọn,” bo to nukọnpọnhlan kọgbọ to whenue e na và mẹylankan lẹpo sudo. (2 Pita 3:7, 12) Mahopọnna dọ Jehovah to jejeji nado hẹn ylanwiwa lẹpo wá opodo, e to homẹfa dohia nado sọgan hẹn whlẹngán Klistiani lẹ tọn wá to aliho de mẹ he na pagigona yinkọ etọn. Mí dona deji dọ Jehovah yọ́n ojlẹ dagbe hugan lọ nado yinuwa, ṣigba todin whẹ́, mí dona nọ yí zohunhun do pà ẹ. (Psalm 71:14, 15)—1/3, weda 17-18.

• To kanlin wiwe lẹ mẹ, be dopodopo ṣinawe wẹ Noa hẹn biọ aki mẹ kavi awe-awe donu ṣinawe?

Noa yin anadena nado ‘yí kanlin wiwe wunmẹ voovo ṣinawe-ṣinawe wá ede dè.’ (Gẹnẹsisi 7:1, 2) Hogbe Heblugbe tọn lọ “ṣinawe-ṣinawe” ma zẹẹmẹdo awe-awe donu ṣinawe, dile lẹdogbedevomẹ Biblu tọn devo lẹ dohia do gba. Kunnudenu dohia dọ Noa yí kanlin ṣinawe-ṣinawe sọn kanlin wiwe lẹ mẹ, asu po asi po atọ̀n gọna ṣinawetọ he sọgan yin yiyizan nado sanvọ́ to nukọn mẹ. (Gẹnẹsisi 8:20)—15/3, weda 31.

• Naegbọn Klistiani lẹ dona nọ “lẹn” kọdetọn yise mẹho lẹ, yèdọ mẹhe to nukọntọ yin lẹ tọn pọ́n?

Apọsteli Paulu dotuhomẹna mí nado nọ “lẹn” kavi yí sọwhiwhe do doayi kọdetọn nuyiwa nugbonọ-yinyin mẹho lẹ tọn go bo nọ hodo apajlẹ yise yetọn tọn. (Heblu lẹ 13:7) Mí nọ wà ehe na Ohó Jiwheyẹwhe tọn wẹ deanana mí nado wàmọ. Humọ, mí kudeji dọ nuhe gando Ahọluduta lọ go lẹ po dagbemẹninọ mítọn po nọ duahunmẹna mẹho lẹ.—1/4, weda 28.