Kanbiọ lẹ sọn Wehiatọ lẹ Dè

To kanlin wiwe lẹ mẹ, be dopodopo ṣinawe wẹ Noa hẹn biọ aki mẹ kavi awe-awe donu ṣinawe?

To aki lọ gbigbá godo, Jehovah dọna Noa dọmọ: “Hiẹ wá biọ aki mẹ po whédo towe lẹpo po, na hiẹ wẹ yẹn mọ yin dodonọ to nukọn ṣie, to whẹndo he mẹ. To whékanlin hunkọhunkọ wiwe lẹ mẹ wẹ hiẹ ni yí ṣinawe-ṣinawe wá dè we, asu po asi etọn po; podọ to whékanlin mawé lẹ mẹ awe-awe, asu po asi etọn po.” (Gẹnẹsisi 7:1, 2) Lẹdogbedevomẹ delẹ taidi Bible de Jérusalem, TOB, po Bible en français courant po lilẹ́ hogbe dowhenu Heblu tọn lọ do “awe-awe donu ṣinawe.”

To vogbingbọn mẹ, hogbe dowhenu tọn he yin yiyizan zẹẹmẹdo “ṣinawe-ṣinawe” to paa mẹ. (Gẹnẹsisi 7:2) Ṣigba to Heblugbe mẹ, sọha de vivọdọ ma zẹẹmẹdo dọ sọha awetọ lọ dona yin yiyidogọ tintan lọ dandan gba. Di apajlẹ, 2 Samuẹli 21:20 dọ dọ “dawe kiklo daho” de tin he tindo “alọviyẹyẹ ṣidopo to alọ awe lẹpo go, podọ afọviyẹyẹ ṣidopo to afọ awe lẹpo go.” To Heblugbe mẹ, sọha lọ “ṣidopo” yin vivọdọ. Nalete, ehe ma zẹẹmẹdo dọ dawe asuka lọ tindo alọviyẹyẹ 12 to alọ dopodopo go kavi afọviyẹyẹ 12 to afọ dopodopo go gba. Sọgbe hẹ osẹ́n he nọ deanana yizan hogbe lẹ tọn to Heblugbe mẹ, sọha lọ vivọdọ dohia poun dọ alọviyẹyẹ ṣidopo wẹ to alọ dopodopo go bọ afọviyẹyẹ ṣidopo to afọ dopodopo go.

Taidi kọdetọn de, “ṣinawe-ṣinawe” he sọawuhia to Gẹnẹsisi 7:2 ma zẹẹmẹdo ṣinawe donu awe kavi 14 gba, kẹdẹdile sọha lọ “awe” he yin vivọdọ to Gẹnẹsisi 7:9, 15 ma zẹẹmẹdo awe donu awe kavi ẹnẹ do. Enẹwutu, dile etlẹ yindọ kanlin wiwe lẹ “ṣinawe-ṣinawe” wẹ yin hinhẹn biọ aki lọ mẹ, kanlin mawé lẹ “awe-awe” wẹ yin hinhẹn biọ e mẹ.

Todin, etẹwẹ dogbọn hodidọ lọ “asu po asi etọn po” he sọawuhia to hogbe lọ “ṣinawe-ṣinawe” godo to Gẹnẹsisi 7:2 mẹ dali? Enẹ ko hẹn mẹdelẹ lẹndọ Noa yin anadena nado hẹn kanlin wiwe wunmẹ lẹpo asu po asi po ṣinawe-ṣinawe biọ aki lọ mẹ. Ṣigba, kanlin wiwe lẹ ma yin hihla dai kiki nado dókún devo lẹ tọn gba. Gẹnẹsisi 8:20 dọna mí dọ to whenuena yé tọ́nsọn aki lọ mẹ godo, “Noa sọ tùn agbà hlan OKLUNỌ; bo yí to whékanlin wiwe lẹpo mẹ, podọ ohẹ̀ wiwe lẹpo mẹ, bo do sanvọ́ nunina mimẹ̀ tọn to agbà lọ ji.” Kanlin ṣinawetọ lọ tintindo to aimẹ sọn kanlin wiwe wunmẹ dopodopo mẹ hẹn ẹn yọnbasi na Noa nado mọ kanlin he e na yí do sanvọ́ bo jo asu po asi po atọ̀n he pò lẹ do nado dókún yedelẹ tọn do aigba ji.