Alọgọ sọn “Jiwheyẹwhe Homẹfa po Homẹmimiọn po Tọn” Dè

TO NUDI owhe 2 000 die wayi, Biblu kàntọ Paulu dlẹnalọdo Jehovah taidi “Jiwheyẹwhe homẹfa po homẹmimiọn po tọn.” (Lomunu lẹ 15:5) To whenuena e yindọ Biblu na mí jide dọ Jehovah ma nọ diọ dile ojlẹ to yìyì, mí sọgan tindo nujikudo dọ Jiwheyẹwhe gbẹsọ nọ na homẹmimiọn mẹhe to sinsẹ̀n ẹn lẹ. (Jakobu 1:17) Na nugbo tọn, Biblu dohia dọ Jehovah nọ na homẹmimiọn mẹhe tindo nuhudo etọn lẹ to aliho voovo lẹ mẹ. Etẹwẹ yin delẹ to aliho ehelẹ mẹ? Jiwheyẹwhe nọ na huhlọn mẹhe lẹhlan e dè to odẹ̀ mẹ nado biọ alọgọ etọn lẹ. E sọ nọ whàn Klistiani nugbo lẹ nado miọnhomẹna yisenọ hatọ lẹ. Podọ Jehovah nọ wleawuna kandai ojlofọndotenamẹ tọn lẹ to Ohó etọn Biblu mẹ, ehe na taun tọn nọ vọ́ huhlọnna mẹhe to awubla na ovi yetọn he yé hẹnbu to okú mẹ lẹ. Mì gbọ mí ni gbadopọnna wunmẹ homẹmiọnnamẹ tọn atọ̀n ehelẹ debọdo-dego.

“OKLUNỌ Segbè Etọn”

Ahọlu Davidi wlan gando Mẹdatọ mítọn Jehovah go dọmọ: “Mì dotudo e go whepoponu, mì gbẹtọ lẹ emi; kọ̀n ayiha mìtọn jẹgbonu to nukọn etọn: Jiwheyẹwhe wẹ fibẹtado de na mí.” (Psalm 62:8) Naegbọn Davidi do dejido Jehovah go sọmọ? To hodidọ gando ede go mẹ, Davidi wlan dọmọ: “Dawe oyanọ he dawhá ylọ ẹ, OKLUNỌ segbè etọn, bosọ whlẹn ẹn sọn tukla etọn lẹpo mẹ.” (Psalm 34:6) To ninọmẹ tukla tọn he mẹ e jugbọn lẹpo mẹ, Davidi nọ hodẹ̀ hlan Jiwheyẹwhe na alọgọ to whepoponu, podọ Jehovah nọ gọalọna ẹn to whepoponu. Davidi yọnẹn sọn numimọ mẹ dọ Jiwheyẹwhe na nọgodona ẹn bo gọalọna ẹn nado doakọnnanu.

Mẹjitọ he to aluẹmẹ lẹ tindo nuhudo nado yọnẹn dọ Jehovah na gọalọna yé to awubla sinsinyẹn yetọn mẹ, kẹdẹdile e wà hlan Davidi do. Yé sọgan dọnsẹpọ ‘Sisetọ odẹ̀ tọn’ daho lọ bo deji dọ ewọ na gọalọna yé. (Psalm 65:2) William, he yin nùdego to hosọ he jẹnukọn mẹ, dọmọ: “Whlasusu wẹ n’ko lẹndọ n’ma sọgan nọgbẹ̀ zọnmii matin visunnu ṣie, podọ n’ko biọ to Jehovah si nado na mi kọgbọ. Ewọ ko na mi huhlọn po adọgbigbo po to whepoponu nado sọgan to gbẹnọ zọnmii.” Eyin hiẹ lọsu nọ hodẹ̀ hlan Jehovah to yise mẹ, Jiwheyẹwhe daho olọn mẹ tọn lọ na gọalọna we. To popolẹpo mẹ, Jehovah Jiwheyẹwhe dopagbe na mẹhe to vivẹnudo nado sẹ̀n ẹn lẹ dọmọ: “Yẹn OKLUNỌ Jiwheyẹwhe towe, na hẹn adusilọ towe go, bo na dọhlan we dọ, A dibu blo; yẹn na gọalọna we.”—Isaia 41:13.

Alọgọ sọn Họntọn Nugbo lẹ Dè

Mẹhe ovi kú do lẹ nọ saba tindo nuhudo whenu tọn nado blawu to nuglọ bo didẹ numọtolanmẹ yetọn lẹ. Etomọṣo, e ma na yin nuyọnẹnnu na yé nado dapana gbẹdido hẹ mẹdevo lẹ na ojlẹ dindẹn. Sọgbe hẹ Howhinwhẹn lẹ 18:1, “ewọ he klan ede dovo” sọgan hẹn awugble wá ede ji. Enẹwutu, mẹhe to aluẹmẹ lẹ dona payi ma nado jai jẹ omọ̀ mẹdetiti kinklandovo tọn mẹ.

Họntọn Budisi Jiwheyẹwhe tọ́ lẹ sọgan gọalọna mẹhe to ayimajai mẹ lẹ to aliho nujọnu tọn mẹ. Howhinwhẹn lẹ 17:17 dọmọ: “Họntọn nọ yiwannamẹ whepoponu, ṣigba mẹmẹsunnu wẹ yè ji na madodego [kavi ojlẹ ayimajai tọn].” Lucy, he sọ yin nùdego to hosọ he jẹnukọn mẹ, duvivi homẹmiọnnamẹ gbẹdohẹmẹtọ nugbo lẹ tọn to whenuena e hẹn visunnu etọn bu. E dọ gando họntọn etọn he tin to agun lọ mẹ lẹ go dọmọ: “Dlapọn yetọn lẹ gọalọ tlala, dile etlẹ yindọ to whedelẹnu yé ma nọ dọho susu. Họntọn ṣie dopo nọ dla mi pọ́n to azán he ji n’nọ tin to ṣokẹdẹ lẹ. E yọnẹn dọ n’na to avivi to whégbè, enẹwutu e nọ saba wá dè e nado viavi hẹ mi. Mẹdevo nọ ylọ mi egbesọegbesọ nado na mi tuli. Mẹdevo lẹ sọ nọ basi oylọna mí nado wá dùnú hẹ yé to owhé yetọn gbè podọ yé gbẹ́ pò to mọwà.”

Dile etlẹ yindọ awufiẹsa daho he mẹjitọ lẹ nọ jiya etọn to whenuena yé hẹn ovi yetọn bu ma nọ busẹ po awubibọ po, dẹ̀hiho hlan Jiwheyẹwhe po gbẹdido hẹ họntọn Klistiani nugbo lẹ po na hẹn homẹmimiọn nujọnu tọn wá na mẹhe to awubla lẹ. Mẹjitọ Klistiani susu he ko hẹn ovi yetọn bu lẹ nọ mọ dọ Jehovah tin hẹ yé. Mọwẹ, Jehovah nọ “hẹnazọ̀ngbọna ayihagbàdonọ lẹ, bosọ [nọ] blá alán yetọn.”—Psalm 147:3.

Kandai Biblu Tọn He Nọ Miọnhomẹnamẹ Lẹ

To yidogọmẹ na odẹ̀ po gbẹdido mẹjlọdote tọn po, Ohó kandai Jiwheyẹwhe tọn yin asisa homẹmiọnnamẹ tọn na mẹhe to aluẹmẹ lẹ. Kandai Biblu tọn lẹ dohia dọ Jesu tindo ojlo vẹkuvẹku gọna nugopipe lọ nado de awufiẹsa mẹjitọ he to aluẹmẹ lẹ tọn sẹ̀ gbọn mẹhe ko kú lẹ hinhẹngọwa ogbẹ̀ dali. Kandai mọnkọtọn lẹ nọ hẹn homẹmimiọn nujọnu tọn wá na mẹhe to awubla lẹ. Mì gbọ mí ni gbadopọnna awe to kandai ehelẹ mẹ.

Luku weta 7 basi zẹẹmẹ nuhe jọ to whenuena Jesu dukosọ hẹ mẹdelẹ he jei ṣiọdi gbé to tòdaho Naini tọn mẹ. Visunnu dopo akàn asuṣiọsi de tọn dì gbé wẹ yé jei. Wefọ 13 dọ dọ, “Whenuena Oklunọ mọ ẹn, lẹblanu etọn wà ẹ, e sọ dọhlan ẹn, dọmọ, A sọ viavi blo.”

Mẹsusu ma na gboadọ bo dọna onọ̀ de nado gbọ avivi to ṣiọdidi visunnu etọn tọn whenu gba. Etẹwutu wẹ Jesu do dọ mọ? Na e yọnẹn dọ awubla onọ̀ lọ tọn na wayi to madẹnmẹ. Kandai lọ zindonukọn dọmọ: “[Jesu] sọ wá, bo doalọ apotinján lọ go: mẹhe ze e lẹ sọ ṣite ṣúdúdú. E sọ dọmọ, Visunnu, yẹn dọhlan we, Fọ́n. Mẹhe kú sọ fọ́n sinai, bosọ ṣẹ hodọ. E sọ jo e hlan onọ̀ etọn.” (Luku 7:14, 15) To ojlẹ enẹ mẹ, onọ̀ lọ na ko sọ viavi whladopo dogọ, ṣigba avi ayajẹ tọn wẹ e na yin to whenẹnu.

To nujijọ devo mẹ, dawe de he nọ yin Jailu dọnsẹpọ Jesu bo biọ alọgọ etọn, na viyọnnu etọn owhe 12 mẹvi to azọ̀njẹ sinsinyẹn. To ojlẹ vude godo, owẹ̀n wá dọ viyọnnu lọ ko kú. Owẹ̀n ehe hẹn Jailu jẹflumẹ, ṣigba Jesu dọna ẹn dọmọ: “A dibu blo, yise ṣokẹdẹ.” To whenuena Jesu jẹ owhé lọ gbè, e yì oṣiọ viyọnnu lọ tọn kọ̀n bo hẹn alọ etọn bosọ dọmọ: “Viyọnnu, yẹn dọhlan we, fọ́n.” Etẹwẹ jọ to enẹgodo? “To afọdoponẹji viyọnnu lọ sọ fọ́n bo to zọnlinzin.” Nawẹ mẹjitọ etọn lẹ yinuwa gbọn? “Avò sọ vò yé tlala.” Dile Jailu po asi etọn po gbò viyọnnu yetọn fán, yé gọ́ na ayajẹ. E taidi odlọ to nukun yetọn mẹ.—Malku 5:22-24, 35-43.

Kandai Biblu tọn ehelẹ he bẹ zẹẹmẹ gigọ́ hẹn gando fọnsọnku ovi lẹ tọn go gọalọna mẹjitọ he to awubla to egbehe lẹ nado yọ́n nuhe yé sọgan donukun. Jesu dọmọ: “Ojlẹ lọ ja, to ehe mẹ mẹhe tin to yọdò mẹ lẹpo na sè ogbè etọn, bo na tọnjẹgbonu.” (Johanu 5:28, 29) Lẹndai Jehovah tọn wẹ yindọ Ovi etọn na hẹn mẹhe ko kú lẹ gọwá ogbẹ̀. Livi susu madosọha ovi he ko kú lẹ tọn na “sè ogbè etọn” to whenue e na dọna yé dọmọ: “Yẹn dọhlan we, fọ́n.” Ovi flinflin ehelẹ na zinzọnlin bo dọho whladopo dogọ. Podọ taidi Jailu po asi etọn po, ‘avò na vò mẹjitọ yetọn lẹ tlala.’

Eyin hiẹ ko hẹn visunnu kavi viyọnnu de bu to okú mẹ janwẹ, jaale yọnẹn dọ Jehovah na diọ awubla towe zun ayajẹ gbọn fọnsọnku gblamẹ. Nado mọaleyi sọn todido gigonọ ehe mẹ, setonuna tudohomẹnamẹ psalm-kàntọ lọ tọn dọmọ: “Mì dín OKLUNỌ po huhlọn etọn po; mì nọ dín nukunmẹ etọn whepoponu. Mì nọ flin azọ́njiawu etọn he e ko wà lẹ.” (Psalm 105:4, 5) Mọwẹ, sẹ̀n Jiwheyẹwhe nugbo lọ Jehovah bosọ nọ basi sinsẹ̀n hlan ẹn to aliho he sọgbe mẹ.

Kọdetọn tẹwẹ hiẹ na mọyi to afọdopolọji eyin a “dín OKLUNỌ”? Hiẹ na mọ huhlọn yí sọn dẹ̀hiho hlan Jiwheyẹwhe mẹ, bo na yin homẹmiọnna gbọn mẹtọnhopọn owanyinọ Klistiani gbẹdohẹmẹtọ nugbo lẹ tọn dali, podọ Ohó Jiwheyẹwhe tọn pinplọn na jlọ we dote. Humọ, to madẹnmẹ, hiẹ na mọ “azọ́njiawu” he Jehovah na wà lẹ nado hẹn ale mavọmavọ lẹ wá na hiẹ po ovi towe he a ko hẹnbu to okú mẹ po.

[Apotin to weda 5]

‘Plan Nawe He Ovi Awe Kú do lọ Wá’

Kehinde po Bintu po, yèdọ asu po asi po de sọn Nigéria he yin Kunnudetọ Jehovah tọn lẹ, hẹn awe to ovi yetọn lẹ mẹ bu to asidan mọto tọn de mẹ. Sọn whenẹnu gbọ́n, yé ko mọ awufiẹsa susu na nugbajẹmẹji ylankan ehe wutu. Etomọṣo, jidide yetọn to Jehovah mẹ hẹn yé dote, bọ yé zindonukọn nado to owẹ̀n todido tọn he tin to Biblu mẹ má hẹ kọmẹnu yetọn lẹ.

Mẹdevo lẹ doayi tudido gọna huhlọn he Kehinde po Bintu po dohia go. To gbèdopo, nawe de he nọ yin Whési Ukoli dọna dopo to họntọn Bintu tọn lẹ mẹ dọmọ: “Plan nawe he ovi awe kú do to ojlẹ dopolọ mẹ bọ e gbẹsọ pò to owẹ̀n Biblu tọn lá lọ wá. N’jlo na yọ́n nuhe na ẹn huhlọn nado doakọnna.” To whenuena Bintu wá owhé nawe lọ tọn gbè, Whési Ukoli dọna ẹn dọmọ: “N’jlo na yọ́n nuhewutu a gbẹ́ pò to yẹwhehodọ gando Jiwheyẹwhe he hù ovi towe lẹ go. Sọn whenue gbọ́n Jiwheyẹwhe ko yí viyọnnu dopo akàn he n’tindo lọ, n’masọ tindo ojlo depope to Jiwheyẹwhe mẹ ba.” Bintu yí Biblu zan nado basi zẹẹmẹ nuhewutu gbẹtọ do nọ kú podọ nuhewutu mí sọgan tindo todido dejidego lọ dọ mẹyiwanna he ko kú lẹ na yin finfọnsọnku.—Owalọ lẹ 24:15; Lomunu lẹ 5:12.

Enẹgodo, Whési Ukoli dọmọ: “Linlẹn ṣie dai wẹ yindọ Jiwheyẹwhe wẹ nọ hẹn okú wá gbẹtọvi lẹ ji. Todin n’ko yọ́n nugbo lọ.” E basi dide nado plọn Biblu hẹ Kunnudetọ Jehovah tọn lẹ nado sọgan yọ́n nususu dogọ gando opagbe Jiwheyẹwhe tọn lẹ go.

[Apotin to weda 6]

‘N’Jlo Na Gọalọ, Ṣigba Gbọnna?’

To whenuena mẹjitọ lẹ po nọvi ovi he kú de tọn lẹ po to awubla sinsinyẹn, họntọn yetọn lẹ sọgan to nuhà. Yé jlo na gọalọna whẹndo lọ ṣigba yé nọ to budi dọ eyin yé dọ kavi wà nude he ma sọgbe, enẹ sọgan hẹn ninọmẹ awufiẹsa tọn lọ sinyẹn deji. Ayinamẹ delẹ die na mẹhe sọgan nọ lẹndọ, ‘N’jlo na gọalọ, ṣigba gbọnna?’

❖ Ma dapana mẹhe to aluẹmẹ lọ lẹ na a ma yọ́n nuhe a na dọ kavi wà wutu blo. Tintin to finẹ towe kẹdẹ ko pé nado na huhlọn yé. Be e vẹawuna we nado yọ́n nuhe a na dọ wẹ ya? Mẹgbòfán po ahundopo yíyí do dọ “Mì payìdo” po na gọalọna yé nado yọnẹn dọ a to yetọn hòpọn. Be hiẹ to budi dọ eyin a jẹ avivi ji, a na yidogọna awubla yetọn wẹ ya? Biblu dọmọ: “[Mì] nọ viavi hẹ yé he to avivi lẹ.” (Lomunu lẹ 12:15) Dasin towe lẹ nọ dohia dọ awubla yetọn biọ lanmẹ na we, podọ homẹmiọnnamẹnu de wẹ enẹ yin.

❖ Nọ ze afọdide tintan. Be hiẹ sọgan wleawuna núdùdù kleun de na whẹndo lọ ya? Be a sọgan klọ́ panu he yé ko zan bo pli do finẹ lẹ ya? Be hiẹ sọgan gọalọna yé to yigọyigọ delẹ mẹ ya? Ma dọ blo dọ, “Eyin mì tindo nuhudo nudepope tọn, mì dike ma mọ sè.” Eyin hogbe ehelẹ tlẹ yin didọ po ahundopo po, yé nọ hẹn mẹjitọ he to aluẹmẹ lẹ tindo numọtolanmẹ lọ dọ alọnu towe ko ján gbau nado gọalọna yé. Kakatimọ, kanse dọ, “Etẹwẹ n’sọgan wà nado gọalọna mì todin?” podọ to enẹgodo yí nuhe yé biọ to asiwe lọ wà. Ṣigba họ́ dewe ma nado dín tlintlindo to owhé yetọn gbè kavi donù whẹho mẹdetiti tọn yetọn lẹ mẹ.

❖ Nọ dapana hodidọ lọ dọ, “N’yọ́n numọtolanmẹ mìtọn.” Aliho voovo mẹ wẹ mẹdopodopo nọ yinuwa te to okú mẹyiwanna de tọn whenu. Eyin hiẹ lọsu tlẹ ko hẹn ovi de bu janwẹ, a ma sọgan yọ́n numọtolanmẹ yetọn pẹẹpẹ gba.

❖ Ojlẹ susu na juwayi whẹpo whẹndo lọ na do gọ̀ jẹ ninọmẹ etọn hoho mẹ jẹ obá de mẹ. Zindonukọn nado to alọgọ dile e sọgan yọnbasi do. To tintan whenu, whẹndo he to aluẹmẹ lẹ nọ saba mọ godonọnamẹ susu yí, ṣigba yé tindo nuhudo susu humọ. Nọ doayi nuhudo yetọn lẹ go to osẹ po osun he na bọdego lẹ po mẹ.a

[Nudọnamẹ Odò Tọn]

[Yẹdide to weda 7]

Kandai Biblu tọn lẹ dohia dọ Jesu tindo huhlọn gọna ojlo lọ nado hẹn ovi lẹ gọwá ogbẹ̀