Awhàngbigba to Whẹdatẹn Jlọjẹ Gbẹtọvi Europe Tọn lẹ Tọn
TO AZÁN 11 janvier 2007 tọn, Whẹdatẹn Jlọjẹ Gbẹtọvi Europe tọn lẹ tọn to Strasbourg, France, lá nudide dagbe he yin bibasi to pọmẹ de do ota Kunnudetọ Jehovah tọn lẹ tọn mẹ to Russie to whẹho whẹdida tọn he yé tindo hẹ Otò Russie tọn mẹ. Nudide lọ nọgodona mẹdekannujẹ Kunnudetọ Jehovah tọn lẹ tọn nado basi sinsẹ̀n podọ jlọjẹ yetọn nado duvivi whẹdida dodo tọn. Mì gbọ mí ni gbadopọnna nuhe hẹn whẹho lọ wá.
Diblayin tókunọ lẹ kẹdẹ wẹ tin to agun Kunnudetọ Jehovah tọn lẹ tọn he tin to tòdaho Tcheliabinsk tọn mẹ to Russie. Nọtẹn opli tọn yetọn yin ohọ̀ de he yé haya to wehọmẹ daho azọ́npinplọn whenu-gli tọn de mẹ. To dimanche 16 avril 2000, opli yetọn yin alọhẹndotena gbọn azinponọ Ogbẹ́ Jlọjẹ Gbẹtọvi lẹ tọn tòpọnla lọ tọn gọna ponọ-gán awe po ponọ he ma dó ponọ-wu dopo po dali. Na nuvẹun wutu, titengbe to adà azinponọ lọ tọn mẹ, opli lọ yin alọhẹndotena to dodonu whẹsadokọnamẹ he yin pipàdọ de tọn ji dọ osẹ́n otò tọn ma nagbè yé nado basi opli lẹ gba. Sọn azán 1er mai 2000 tọn ji, wema họhihaya tọn lọ yin hùzẹdeji.
Kunnudetọ Jehovah tọn lẹ ze whẹho lọ yì whẹ̀yidọtọ Tcheliabinsk tọn nukọn, ṣigba nudepope ma yin wiwà. Osẹ́n-we Russie tọn gọna Owe Gbekọndopọ tọn na Hihọ́-Bibasina Jlọjẹ Gbẹtọvi lẹ tọn po Mẹdekannujẹ Tangan lẹ po kẹalọyi mẹdekannujẹ sinsẹ̀n tọn po mẹdekannujẹ pipli dopọ tọn po. Enẹwutu owhẹ̀ lọ yin zize sọyi whẹdatẹn agbegbe tọn nukọn podọ to enẹgodo owhẹ̀ yin vivọ́ ylọ to whẹdatẹn tòpọnla tọn nukọn. Jẹnukọnna enẹ, to 30 juillet 1999, whẹdatẹn daho hugan ko dohia to whẹho devo mẹ dọ “sọgbe hẹ Osẹ́n Russie tọn do mẹdekannujẹ ayihadawhẹnamẹnu po pipli sinsẹ̀n tọn lẹ po ji, hogbe lọ ‘matin aliglọnnamẹ’ zẹẹmẹdo dọ nuhudo ma tin nado mọ alọkẹyi . . . aṣẹpatọ gandudu tọn lẹ tọn jẹnukọn nado basi hùnwhẹ sinsẹ̀n tọn lẹ to nọtẹn he yin awuwlena [na lẹndai enẹ] lẹ tọn mẹ gba.” (Glọ̀ndo yin yetọn.) Mahopọnna enẹ, owhẹ̀ he yin zize sọyi whẹdatẹn agbegbe po tòpọnla po tọn nukọn ma yin zizepọn.
To 17 décembre 2001, owhẹ̀ lọ yin hinhẹnwa Whẹdatẹn Jlọjẹ Gbẹtọvi Europe tọn lẹ tọn nukọn. Owhẹ̀ lọ yin zizepọn to 9 septembre 2004. Hodidọ he bọdego ehelẹ yin delẹ to tadona godo tọn he kọ̀n Whẹdatẹn lọ wá lẹ mẹ:
“Whẹdatẹn lọ mọ dọ jlọjẹ mẹdekannujẹ sinsẹ̀n tọn [Kunnudetọ lẹ tọn] yin afọtùn e ji to enẹ mẹ dọ, to 16 avril 2000, ahọluzọnwatọ lẹ hẹnalọdotena opli sinsẹ̀n tọn yetọn jẹnukọnna ogàn he mẹ opli lọ dona yin tadona.”
“E họnwun dọ dodonu osẹ́n tọn depope ma tin nado hẹnalọdotena nuwiwa sinsẹ̀n tọn he to yinyin bibasi to nọtẹn he yin hihaya sọgbe hẹ osẹ́n na lẹndai enẹ mẹ.”
“[Whẹdatẹn lọ] doayi e go dọ osẹ́ndoai Whẹdatẹn Daho Hugan Russie tọn dohia hezeheze dọ pipli sinsẹ̀n tọn lẹ ma tindo nuhudo nado mọ alọkẹyi aṣẹpatọ lẹ tọn kavi na nudọnamẹ de [yé] jẹnukọn gba.”
“Enẹwutu Osẹ́n 9tọ Owe Gbekọndopọ lọ tọn he yin [mẹdekannujẹ sinsẹ̀n tọn] yin gbigbà to whenuena azinponọ lọ po alọgọnamẹtọ etọn lẹ po hẹnalọdotena opli sinsẹ̀n tọn [Kunnudetọ lẹ] tọn to 16 avril 2000.”
“Whẹdatẹn lọ mọ dọ whẹdatẹn pẹvipẹvi lọ lẹ gboawupo to azọngban yetọn mẹ . . . nado hẹn ẹn diun dọ owhẹ̀ adà voovo awe lọ lẹ tọn yin gbigbejepọn to aliho dodo he sọzẹn de mẹ. . . . Osẹ́n 6tọ Owe Gbekọndopọ lọ tọn he yin [jlọjẹ nado mọ whẹdida dodo yí] ko yin gbigbà.”
Kunnudetọ Jehovah tọn lẹ dopẹ́ na Jiwheyẹwhe na awhàngbigba nina yé to Whẹdatẹn Jlọjẹ Gbẹtọvi Europe tọn lẹ tọn. (Psalm 98:1) Obá tẹ mẹ wẹ nudide Whẹdatẹn lọ tọn na yinuwado gbẹtọ lẹ ji jẹ? Joseph K. Grieboski, azinponọ titobasinanu he nọ penukundo whẹho sinsẹ̀n po gbẹtọ paa lẹ po tọn go de tọn dọmọ: “Na nugbo tọn, nudide ayidego tọn devo he na yinuwado mẹdekannujẹ sinsẹ̀n tọn ji to Europe pete mẹ wẹ ehe yin, na nudide lọ na na huhlọn jlọjẹ sinsẹ̀n tọn lẹ to whẹho he yin didohlan Whẹdatẹn Jlọjẹ Gbẹtọvi Europe tọn lẹ tọn lẹpo mẹ.”