Kanbiọ lẹ sọn Wehiatọ lẹ Dè

Be odàn he dọhona Evi tindo afọ wẹ ya?

Dile Gẹnẹsisi 3:14 dọ do, Jehovah Jiwheyẹwhe dọhona odàn he klọ Evi to jipa Edẹni tọn mẹ. Jiwheyẹwhe dọmọ: “Na hiẹ ko basi ehe wutu, mẹhodẹ̀do wẹ hiẹ hú whékanlin lẹpo tọn podọ hú gbekanlin lẹpo tọn; hòtò towe ji wẹ hiẹ na nọ gbọ̀n yì, kọ́gudu wẹ hiẹ na nọ dù to azán ogbẹ̀ towe tọn lẹpo mẹ.” Biblu ma dọna mí tlọlọ dọ kanlin he yin yiyizan nado whlé Evi pọ́n tindo afọ dai ṣigba bo ma tindo yé ba. Dile etlẹ yindọ hogbe Gẹnẹsisi 3:14 tọn lẹ sọgan hẹn mẹdelẹ nado lẹnmọ, mí ma tin to dandannu glọ nado wá tadona lọ kọ̀n dọ odàn lẹ tindo afọ jẹnukọnna dẹ̀hodo ehe gba. Naegbọn mí do dọmọ?

Whẹwhinwhẹ́n tangan lọ wẹ yindọ mẹhe Jehovah to whẹdana lọ wẹ Satani—yèdọ nudida gbigbọnọ he yí kanlin he ma yọ́n nude enẹ zan. Biblu ylọ Satani dọ ‘otọ́ lalo tọn’ podọ “odàn hoho lọ.” E họnwun dọ hodidọ awe ehe lẹpo to alọdlẹndo Satani he yí kanlin he sọgan yin mimọ de zan, yèdọ odàn de, he ji e dọho gbọ̀n nado klọ Evi nado vẹtolina gbedide Jiwheyẹwhe tọn.—Johanu 8:44; Osọhia 20:2.

Jiwheyẹwhe wẹ dá odàn lẹ, podọ ayihaawe ma tin dọ Adam ko do yinkọ na yé whẹpo Satani do yí odàn zan nado klọ Evi. Mí ma sọgan gblewhẹdo odàn he ma do nuyọnẹn he dọhona Evi lọ gba. E ma na ko yọnẹn dọ Satani to yíyí ì zan, podọ e ma sọgan mọnukunnujẹ owhẹ̀ he Jiwheyẹwhe dá na ylanwatọ lọ lẹ mẹ.

Eyin mọ wẹ, naegbọn Jiwheyẹwhe dọ dọ ninọmẹ odàn lọ tọn na ylan dogọ? Nuyiwa odàn de tọn to jọwamọ-liho nado nọ sá gbọ̀n hòtò etọn ji bo nọ to odẹ́ detọ́n taidi dọ e to kọ́gudu didọ́, gbọn gbesisọ dali nọtena ninọmẹ ylankan he mẹ Satani tin te. E ko duvivi ogántẹn he yiaga de tọn dai taidi dopo to angẹli Jiwheyẹwhe tọn lẹ mẹ, ṣigba todin e yin hinhẹnwa ninọmẹ he yìdo de mẹ ehe Biblu ylọdọ “Taltalu.”—2 Pita 2:4, NW.

Humọ, dile odàn jọ odàn de sọgan gbleawuna gbẹtọ to afọgbẹn do, Satani to ninọmẹ he yìdo etọn mẹ na “só afọgbẹn” “okún” Jiwheyẹwhe tọn lọ tọn. (Gẹnẹsisi 3:15) Adà tintan okún enẹ tọn sọawuhia nado yin Jesu Klisti, mẹhe jiya na ojlẹ de to alọ godonọnamẹtọ Satani tọn lẹ tọn mẹ. Ṣigba ota odàn yẹhiadonu tọn lọ tọn na yin sisó mlẹnmlẹn to madẹnmẹ gbọn Klisti po gbẹdohẹmẹtọ etọn, Klistiani yiamisisadode he ko yin finfọnsọnku lẹ po dali. (Lomunu lẹ 16:20) Gbọnmọ dali, dẹ̀hodo Jiwheyẹwhe tọn hlan odàn he sọgan yin mimọ lọ gbọn gbesisọ dali nọtena ninọmẹ ylankan po vasudo mlẹnmlẹn “odàn hoho” mayinukundomọ lọ, Satani Lẹgba po tọn.