Kanbiọ lẹ sọn Wehiatọ lẹ Dè
Nawẹ odàn to jipa Edẹni tọn mẹ dọna Evi nado gbà osẹ́n Jiwheyẹwhe tọn gando atin yinyọ́n dagbe po oylan po lọ go gbọn?
Gẹnẹsisi 3:1 dọmọ: “Odàn sọ yin zinzintọ hú kanlin ogbé mẹ tọn lẹpo he OKLUNỌ Jiwheyẹwhe dá. E sọ dọ hlan yọnnu lọ, dọmọ, Ojé, Jiwheyẹwhe ko dọmọ, Mì ma na dù to atin lẹ mẹ he tin to ojipa mẹ lẹ depope?” Linlẹn voovo lẹ ko tin gando lehe odàn dona ko dọho hẹ Evi do ji. Linlẹn dopo wẹ yindọ e wàmọ gbọn agbasa-yido-basi-dohia dali. Di apajlẹ, nukọntọ sinsẹ̀n tọn Glẹnsinu lọ Joseph Benson dọmọ: “E yọnbasi taun dọ gbọn ohia wunmẹ de dali wẹ e wàmọ. Na taun tọn, mẹdelẹ dọ dọ nugopipe nulinlẹnpọn tọn po hodidọ po tọn yin nuyiwa he odàn lẹ yin yinyọnẹn na to whenẹnu, . . . ṣigba kunnudenu depope matin dọ ehe yin nugbo gba.”
Ṣigba eyin agbasa yiyizan nado basi dohia poun wẹ, nawẹ odàn sọgan dọna Evi do dọ eyin e dù atin-sinsẹ́n he yin gbigbẹ́ na ẹn ewọ na taidi Jiwheyẹwhe, bo na penugo nado basi nudide dagbe po oylan po tọn gbọn? Humọ, Evi tindo mahẹ to hodọdopọ lọ mẹ, bo na gblọndo kanbiọ heyin finfọndote gbọn odàn lọ dali tọn. (Gẹnẹsisi 3:2-5) Pọndohlan lọ dọ odàn dọho gbọn ohia kavi gòwhinwhàn agbasa tọn dali na zẹẹmẹdo dọ Evi na gblọndo gbọn alọ-yido basi dohia dali, to whenuena e yindọ Biblu dọ dọ e dọho.
To alọdindlẹndo nujijọ ehe mẹ, apọsteli Paulu na avase Klistiani hatọ lẹ dọmọ: “Obu didi mi, dọ to onú depope mẹ dile odàn klọ Evi gbọn oklọ etọn dali, na yè nikaa hẹn ayiha mìtọn gble.” Owù he Paulu dọho etọn wá sọn ‘apọsteli lalonọ lẹ, azọ́n oklọ tọn watọ lẹ dè.’ ” Owù he “apọsteli dahodaho lẹ” hẹnwa mayin sọn hodidọ gbọn alọ-yido-basi dohia tọn dali gba. E bẹ hodidọ yetọn hẹn—hogbe oklọ tọn yetọn lẹ, he yin didọ nado hẹn mẹdevo lẹ buali.—2 Kọlintinu lẹ 11:3-5, 13.
Dile etlẹ yindọ gbọn hodidọ dali wẹ Evi yin hinhẹn danbú to jipa Edẹni tọn mẹ, kunnudenu depope matin nado dọ dọ odàn tata de tindo nugonu hodidọ tọn gba. Na taun tọn, e ma tindo nuhudo nugonu hodidọ tọn lẹ gba. To whenuena angẹli Jiwheyẹwhe tọn dọho na Balaami gbọn kẹtẹkẹtẹ de dali, kanlin lọ ma tindo nuhudo nugonu hodidọ tọn gigẹdẹ de to ede mẹ taidi gbẹtọ tọn de gba. (Osọha lẹ 22:26-31) E họnwun dọ, whenuena ‘kẹtẹkẹtẹ unbọpẹnnọ yí ogbè gbẹtọ tọn do dọhó,’ huhlọn nuyiwa lọ tọn wá sọn agblò gbigbọ tọn mẹ.—2 Pita 2:16.
Nudida gbigbọnọ lọ he tin to godo na odàn he dọho hlan Evi yin didohia to Biblu mẹ taidi “odàn hoho lọ, he yè nọ ylọ Lẹgba, podọ Satani.” (Osọhia 12:9) Ogbè he Evi sè bosọ na gblọndo hlan lọ wá sọn Satani dè, mẹhe “nọ diọadazun angẹli hinhọ́n tọn.”—2 Kọlintinu lẹ 11:14.
[Asisa Yẹdide Tọn 27]
“Mìwlẹ na tin di Jiwheyẹwhe, bo [na] yọ́n onú dagbe po oylan po”