Balzilai—Dawe de He Yọ́n Dogbó Etọn Lẹ

‘ETẸWUTU mẹmẹsi towe nado yin agbàn de hlan we?’ Dawe owhe 80 mẹvi he dọ ohó ehelẹ na Ahọlu Davidi Islaeli tọn wẹ Balzilai. Biblu dọ dọ e yin “omẹ daho tlala de,” matin ayihaawe na adọkun he e tindo wutu. (2 Samuẹli 19:32, 35) Balzilai nọ nọ̀ aigba Giliadi tọn ji, aigba osó tọn he tin to whèzẹtẹn Tọ̀sisa Jọdani tọn.—2 Samuẹli 17:27; 19:31.

Ninọmẹ tẹlẹ glọ wẹ Balzilai dọho enẹ na Davidi te? Podọ naegbọn dawe mẹhomẹ ehe do dọmọ?

Atẹṣiṣi Sọta Ahọlu

Davidi tin to owù mẹ. Visunnu etọn, Absalọmi ko hò gánzinpo lọ yí to ‘ayiha omẹ Islaeli tọn tọn lẹ finfin’ godo. E họnwun dọ Absalọmi ma na jo mẹdepope he yin nugbonọ na otọ́ etọn do. Enẹwutu Davidi po devi etọn lẹ po tọ́nsọn Jelusalẹm. (2 Samuẹli 15:6, 13, 14) To whenuena Davidi jẹ Mahanaimi, lẹdo de to whèzẹtẹn Jọdani tọn, Balzilai gọalọna ẹn.

Balzilai po sunnu awe devo lẹ po na nususu Davidi sọn ojlo mẹ wá. Sunnu nugbonọ atọ̀n he yin mẹjidugando Davidi tọn ehelẹ dohia dọ yé mọnukunnujẹ ninọmẹ sinsinyẹn etọn mẹ to whenuena yé dọ gando ewọ po omẹ etọn lẹ po go dọmọ: “Gbẹtọ lẹ yin huvẹnọ, nudikọnọ, nugblanọ, to zungbo mẹ.” Balzilai, Ṣobi, po Makili po wà nuhe go yé pé lẹpo nado hẹn pekọwana nuhudo enẹlẹ gbọn adọ́zan, likun, gbado balle, linfin, gbado sisọ, ayìví, apàkún, owín, anọ́sin-hihò, lẹngbọ, po onú devo lẹ po hinhẹnwa na Davidi po omẹ etọn lẹ po dali.—2 Samuẹli 17:27-29.

Alọgigọna Davidi yin owùnu. Vlavo wẹ Absalọmi na jo mẹdepope he nọgodona ahọlu jlọjẹnọ lọ do bo ma na sayana ẹn. Enẹwutu, nado yin nugbonọ na Davidi, Balzilai yinuwa po adọgbigbo po.

Ninọmẹ lọ Diọ

Ojlẹ vude to enẹgodo, awhànfuntọ atẹṣitọ Absalọmi tọn lẹ pehẹ omẹ Davidi tọn lẹ. Awhàn de wá aimẹ to zungbo Eflaimi tọn mẹ, vlavo to lẹdo Mahanaimi tọn mẹ. Awhànpa Absalọmi tọn ṣíawhàn, podọ “hùhù daho . . . de wẹ tin to gbènẹgbè to finẹ.” Dile etlẹ yindọ Absalọmi tẹnpọn nado họ̀ngán, e yin hùhù.—2 Samuẹli 18:7-15.

Whladopo dogọ, Davidi gọyì ofìn etọn ji taidi ahọlu Islaeli tọn he ma sọgan yin agọjẹdo. Hodotọ etọn lẹ ma tindo nuhudo nado to fibẹtado dín pé ba. Humọ, nugbonọ-yinyin yetọn hlan Davidi hẹn ewọ nado do sisi po pinpẹn-nutọn po hia yé.

To whenuena Davidi jlo na lẹkọyi Jelusalẹm, “Balzilai Giliadinu lọ sọ jẹte wá sọn Logelimi; e sọ hẹaga yì Jọdani po ahọlu po nado plan ẹn jẹ Jọdani godo dọ́n.” To nujijọ enẹ mẹ, Davidi basi oylọna Balzilai yọnhonọ lọ dọmọ: “Hiẹ hẹji wá aga to dè e, yẹn nasọ bọ́ [kavi yìn] we to dè e to Jelusalẹm mẹ.”—2 Samuẹli 19:15, 31, 33.

Matin ayihaawe, Davidi yọ́n pinpẹn alọgọ Balzilai tọn taun. E na vẹawu nado wá tadona kọ̀n dọ ahọlu lọ to tintẹnpọn nado suahọ ẹ gbọn nukunpipedo nuhudo agbasa tọn etọn lẹ go dali. Balzilai adọkunnọ lọ ma tindo nuhudo alọgọ mọnkọtọn tọn gba. Davidi sọgan ko jlo dọ dawe yọnhonọ enẹ ni tin to họ̀nmẹ na jẹhẹnu dagbe etọn lẹ wutu. Gbégbò daho wẹ e na ko yin na Balzilai nado gbọṣi họ̀nmẹ ahọlu tọn bo duvivi lẹblanulọkẹyi he nọ wá sọn họntọn ahọlu tọn yinyin mẹ lẹ tọn.

E Whiwhẹ Ede bo Kẹalọyi Dogbó Etọn Lẹ

Balzilai yigbena nuzedonukọnnamẹ Ahọlu Davidi tọn dọmọ: “Nẹmu wẹ azán owhe ogbẹ̀ ṣie tọn lẹ, bọ yẹn nado hẹji po ahọlu po yì Jelusalẹm? Yẹn to egbé yin owhe kanwe mẹho: yẹn sọ sọgan dawhẹ to dagbe po oylan po ṣẹnṣẹn? Mẹmẹsi towe sọ sọgan dọ́ nuhe yẹn dù kavi nuhe yẹn nù pọ́n? Yẹn sọ sọgan sè ogbè sunnu hànjitọ lẹ po yọnnu hànjitọ lẹ tọn po ba?” (2 Samuẹli 19:34, 35) Gbọnmọ dali, Balzilai gbẹ́ oylọ-basinamẹ gọna lẹblanulọkẹyi dagbe ehe po sisi po. Ṣigba etẹwutu wẹ?

Whẹwhinwhẹ́n dopo na nudide Balzilai tọn sọgan ko yin yọnhowhe etọn po dogbó he e bẹhẹn lẹ po. Balzilai sọgan ko lẹndọ ewọ ma na nọgbẹ̀ dẹn ba. (Psalm 90:10) E ko wà nuhe go e pé nado nọgodona Davidi, ṣigba e sọ yọ́n dogbó he yọnhowhe bẹhẹn lẹ. Balzilai ma dike linlẹn yindidi po mẹjọmẹ-yinyin po tọn ni glọnalina ẹn nado lẹnnupọndo nugopipe etọn lẹ ji po lẹnpọn dagbe po. To vogbingbọn mẹ na Absalọmi ojlo zogbènọ lọ, Balzilai yí nuyọnẹn do do whiwhẹ hia.—Howhinwhẹn lẹ 11:2.

Whẹwhinwhẹ́n devo na nudide Balzilai tọn sọgan ko yindọ e ma jlo dọ dogbó etọn lẹ ni glọnalina nuwiwa ahọlu dide Jiwheyẹwhe tọn tọn lẹ to aliho depope mẹ. Balzilai kanse dọmọ: “Etẹwutu wẹ mẹmẹsi towe nado yin agbàn de hlan ahọlu klunọ ṣie?” (2 Samuẹli 19:35) Dile etlẹ yindọ Balzilai gbẹ́ to godonọna Davidi, e sọgan ko mọdọ sunnu jọja de na penugo nado penukundo azọ́ndenamẹ lẹ go ganji dogọ. Vlavo Balzilai sọgan ko to alọdlẹndo visunnu ede tọn to whenuena e dọmọ: “Doayi e go, Ṣimhami mẹmẹsi towe; gbọ ewọ ni hẹaga yì po ahọlu klunọ ṣie po; bo wà hlan ẹn nuhe na sọawuhia dagbe hlan we.” Kakati Davidi ni gblehomẹ, e kẹalọyi ayinamẹ ehe. Na nugbo tọn, whẹpo do dasá Jọdani, Davidi “donùnùgo na Balzilai, bo dona ẹn.”—2 Samuẹli 19:37-39.

Mí Dona Yin Lẹnpọn Dagbenọ

Kandai Balzilai tọn dohia dọ mí dona yin lẹnpọn dagbenọ. To alọ de mẹ, mí ma dona gbẹ́ lẹblanulọkẹyi sinsẹ̀nzọn tọn dai kavi gbẹ́ nado dovivẹnu na mí jlo na zan gbẹzan vivomẹninọ tọn kavi na mí lẹndọ mí ma sọgan didá azọngban wutu. Jiwheyẹwhe sọgan gọalọna mí nado jẹ yanwle lẹ kọ̀n eyin mí ganjẹ ewọ go nado mọ huhlọn po nuyọnẹn po yí.—Filippinu lẹ 4:13; Jakobu 4:17; 1 Pita 4:11.

To alọ devo mẹ, mí dona yọ́n dogbó mítọn lẹ. Di apajlẹ, Klistiani de sọgan ko hẹn alọnu ede tọn ján po nuwiwa gbigbọmẹ tọn lẹ po. E mọdọ eyin ewọ kẹalọyi lẹblanulọkẹyi devo lẹ, e yọnbasi dọ azọngban Owe-wiwe tọn lẹ taidi nukunpipedo whẹndo etọn go ni yin vọdona. To ninọmẹ mọnkọtọn mẹ, be e ma na yin dohia whiwhẹ po lẹnpọn dagbe po tọn to adà etọn mẹ nado gbẹ́ lẹblanulọkẹyi devo lẹ to alọnu din whẹ́ ya?—Filippinu lẹ 4:5; 1 Timoti 5:8.

Balzilai ze apajlẹ dagbe dai, podọ nuyọnẹnnu wẹ e na yin nado lẹnnupọndo e ji. E yin nugbonọ, adọgbotọ, alọtlútọ, podọ whiwhẹnọ. Hú popolẹpo, Balzilai magbe nado ze ojlo Jiwheyẹwhe tọn do otẹn tintan mẹ to gbẹzan etọn mẹ.—Matiu 6:33.

[Yẹdide otò tọn to weda 15]

(Nado mọ yẹdide lọ ganji, pọ́n zinjẹgbonu lọ mẹ)

Balzilai owhe 80 mẹvi zingbejizọnlin gaa nado sọgan gọalọna Davidi

GILIADI

Logelimi

Mahanaimi

Tọ̀sisa Jọdani

Gilgali

Jẹliko

Sukkoti

Jelusalẹm

EFLAIMI

[Yẹdide to weda 13]

Naegbọn Balzilai gbẹ́ nuzedonukọnnamẹ Davidi tọn?